يا بابكر ياخ محسن قال ليك المرأة (أقل) ما قال عدمانة كلو كلو
اها اسي انت تجي تقول ميري استريب أنا اجي اقول ليك مارلن براندو
دا بالاضافة لي انو كلام محسن ظابط مية المية لأنو احسبها انت براك
عددياً سااااااااااااااي بتلقى المرأة اقل ابداعا من الرجل
فبطل ملاوة محسن في الحتة دي


انت لو عايز تعصر محسن اعصرو في حتة أشارتو (هناية)
بصراحة دي شينة من محسن

غير كدة بتلقى من محسن مسيكة تمسكها عليهو
لانو محسن كلامو نجيض تب في الحتة دي

"يتمنعن وهن الراغبـــات"
تقدر تقول يا قيقراوي في الموقف دا انو المراة كضابة؟
يا أخي في الموقف دا، المرأة بتستخدم لغة تانية تمتلك هي مفرداتها، لغة أصدق مية مرة من لغة الكلام المباشر.
و لو انت في الموقف دا وصلت لي انو المرأة دي كضابة، طوالي تمشي السينما

يا وجدي، فلانة و فرتكانة و هناية ديل أنا شايفن عاديات جدا، دي أسامي إشارة عادية

غايتو يا بابكر الناس ديل أنا جبتهم ليكم هنا "فلاسفه ومفكرين" اما عظمتهم دي فجبتها إنت براك.

بعدين يا بابكر خلينا من دا كلو وتعال نتفاكر بشكل أعمق في بعض المسائل التي يتغافل عنها نصراء المرأة عمداً،
وخليني أبدأ بالتساؤلات دي:
-ليه المرأة تعتبر في النص الديني مدخل للمعصية وشهوة من شهوات الدنيا المزمومة؟
(زيّن للناس حب الشهوات من النساء و..الخ)قران كريم
-ليه أول من طالب بإعطاء المرأة حقوقها كامله ومساواتها بالرجل هو الرجل؟
-لماذا تتعامل المرأة مع نفسها بإعتبار إنها سلعة؟ (بيع المتعة+المهور والنفقات)

ملحوظة: أنا لم أتبنى داخل هذا البوست حتى الأن أي رؤية حيال قضية المرأة وما حديثي وتساؤلاتي هذه إلا (توسيعاً لماعون النقاش) أو قل "توريطاً" للمتحاورين والمتحاورات.

لا بصراحة ما عادية
في الحالة الزي دي
يا تفتو عديييييييييييييل وتمرق الاسم
يا تقطعها في حنانك

الاشارات الزي دي ما حلوة

هسع ملحوطتك دي فرقها شنو من كلام الجيلي لمحسن: انت حسابك إتهكر و لّ شنو؟

بجيك بعدين لبقية المداخلة

لووووووب
يا الاسعد - دي على وزن الاهيف الابا ما يرين و لّ شنو كدا ماعارف داك!- اها عشان بعدين ما تجي تقذف في ذمتنا الفكرية ساي، من اسي خليني النحدثك .. سمعتا؟

خالد مونيكا* قال : [ للغزالة قرنان، يشيران في اتحاه العدو المطارد. في حال الحروب تتشعب، فتشير في كل الاتجاهات .. انها ذاكرة التيتل .. انها ذاكرة الابتلاءات يا قريبي.]

بناءاً عليه، و للضمان كدا، و بعد الحمد لله و الثناء على من لا نبي بعده، نقول - بدون مجازفة تذكر - انو:
قيقا ذاكرة مغتصبة، عشان كدا بنات افكارو بتطلع بت حرام كلها .. كان شابهت بنات افكارك يكون المغتصب واحد بس ما اكتر:D. و امكن يكون دا استثناء القاعدة " من شابه اباه فما ظلم".
شفت كيف؟looool

لووووووووب
يا بابكر رايك شنو في عدل الطبيعة الجعل جور الحبيب مسموح، و لم يكتف بذلك، بل جعل للغزالة قرنان بس ، و للتيتل ما شاء لها من تشعب، و خلها ذاكرة وااااسعة رام و روم كمان؟
ما رأيكم دام فضلكم

------

* خالد عباس الطاهر .. تشكيلي، قاص، و شاعر .

بمناسبة ( تشكيلي ) دي يا بابكر ما تعال نبقى تشكيليين ياخ؟
انت تشكيلي و انا اشكيلك looool:D
قلت لي لو ما فهمت لغتم اقع ياتو بحر؟:D

سلامات على العظماء وعلى الحوار الجميل وملولو " سير فكر" في بنبر ..ياخي أنا جاي وقايل روحي الناس لسة هناك في بداية الصفحة :) على الليمان أنا قاعد أقرأ تلاتة ساعات ..يا محسن وقعت معاي في جرح ربك يهون نجيكم باكر.

تحياتي للجميع..

رغم انو بعد الرأي الإيجابي الختاهو مشكور أ. محسن في أسئلتي أنا إتورطت وكان حقو أعمل نايمة خشية الطبزات:rolleyes:..لكن مالو..جئنا لأجل النقاش وممكن الزول يسوي زي سواة مبر دي ويرمي إسقاطاتو ويجي يقول بس عشان أحرر النقاش;)..


أرى أنه من غير الموضوعي وضع رأي شامل في طبيعة وشخصية المرأة بعيدا عن تركيبة المجتمع الموجودة فيه إلا إذا كنت أفترض فيها الإختلاف في المكون الإنساني (أصلا) ومستصحب قدرة إستعلائيه على تحليلها ككائن أقل شأناً وده هو السوء ذااااااااتو في نظري..

لكن الناس لو حبت تكون علمية فممكن تكون في أدلة منطقية منصفة زي مافي كلام أ.محسن ده:
والرموز منها ما ينحاز للمرأة ومنها ما يقف ضدها، وما له رؤية وسطية نحوها، وإلى آخره من المواقف المتنوعة حسب العصر المعني والاعتقادات المنتشرة فيه.
فلو كان العصر أمومياً سينحاز للأم، أو للمرأة، وعلى عكسه سيكون العصر الأبوي.

وبعدين أنا كأنثى إتفقت مع فكرة الكضب بالمنطق لأنو خصوصية المجتمع بتاعنا أفضت للنتيجة دي الأفتكر واضحة والكلام ده أنا ما أظنو بيتحسب على المرأه بل بيتحسب ليها كضحية لهذا الإضطهاد الإجتماعي البيخليها تميل للزيف وللكذب عشان تقعد محكرة في الإطار الخاتيهو ليها المجتمع، نحنا لو عايزين نغير واقعها ده إذا لازم نتعرف بسوءه ولا شنو؟
أما حتة الإبداع فلسه أ.محسن ما أدانا فيها قرايتو الفضَل إنها تكون دقيقة ومدعومة علميا وأنا في إنتظارها...لكن كوننا نهبش الكلام ده من طرف ونجي نسقطوا على المرأه ككائن وجودي إجمالا بإنها كضابة وما مبدعة بتكون دي شغلة تانية كلو كلو..
ويا(مبر) رغم انو نقلك لأحاديث المفكرين دي كلها كان بهدف فتح (طاقات) للنقاش لكن عندي عليها مية خط أحمر في انو التاريخ الفلسفي والأدبي كتبو شق واحد بس من المجتمع، المفكرين ديل ذاتم جاءوا من مجتمعات وضع المرأه إنسانيا فيها عامل كيف؟؟ (ولاحظ على حقب زمنية متفاوتة)......وكلامي ده ما تبرئة مجملة للمرأه الإتحدثوا عنها بس تبرئة لإنسانيتها وإبداعها الفطري من إسقاطاتهم ومن ثم إسقاطاتكم...أما موضوع الدين ده فذكرتني بس بيهو جماعة أنصار السنة !!!قلت لي أكثر مكرا وشراً؟؟ (بس لو ممكن شرح للمكر والشر وعلاقتهم ببعض)..

وياريت النقاش تتحدد محاورو بصورة أدق عشان الناس تقدر تستفيد

مشكورين يا مبدعين:)

لوووووب

كيف يعني بيتحسب ليها..؟؟
طيّب ما تقولي بيتحسب علي الرجل..لأنو الموضوع متعلق بسلبية وليس ايجابية وضع محدّد..
وبعدين في رأيك، ليه التاريخ الأدبي والفلسفي كتبو شق واحد من المجتمع..؟؟

سماح يا ستي ..تحيّاتي.
غايتو تحدثتي كثيراً ولكنك للاسف لم تقولي شيئاً حتى الأن.

أنا لم أسقط شيئاً، وما جلبت الأحاديث بعاليه إلا لتحرير هذا البوست من "محسن قال" و"محسن مهكر" و "مامعقوله يا محسن"! وقلت لكم وسعوا ماعون الحوار وأطرحوا رؤاكم بشكل عميق يتناول هذه القضية داخل كل المشاريع الدينية والفكرية والفلسفيه.
ثم اتيت وطرحت أسئلة جوهرية ومافي زول حتى الان ناقشها او إشتغل بيها الشغلة

____________
ما ماشي بعيد.. ح أجيك تاني

تحياتي يالرشيد
ممكن يكون تعبيرك أصح لكن أنا أصلا ما ميالة للإتهام الكان ممكن تجيبوا صيغة (يتحسب على الرجل) لأني هنا بكون بفترض إنو الهيكلة الإجتماعية ختاها هو براهو وقاعدة احاسبو عليها هو براهو..وطبعا (يتحسب ليها ) هنا ما قاصدة بيها وضع إيجابي وإن خانني التعبير لكن قاصدة أضيفها بصورة (+) في خانة الحاجات السالبة الواقعة على المرأة.

طيب يالرشيد ده السؤال الممكن يكون توريطة لأنو معلوماتي فيهو ممكن تكون ما كافية لكن حأحاول..لو قلت ليك إنو العصور التي تم فيها تدوين هذه الآثار الفكرية والفلسفية كانت في أغلبها عصور ذات سلطة ذكورية حتجيني طوالي لسؤال: طيب وين آثار العصور ذات السلطة الأنثوية؟ وأنا ثقافتي في تاريخ الحضارات ضعيفة لكن ممكن أفترض كم إفتراض زي: إنها كانت أقدم من الكتابة الأدبية والفلسفية لكن ممكن تتلقي في الرموز، وممكن إنها تمت إزالتها أو إستبعادها بذات الحضارات ذات السلطة الذكورية التي تلتها..

ربما الماركسية الألمانية أورزولا شوي هي المرأة الوحيد التي كتبت حديثاً معقولاً لتفسير قلة إبداع المرأة (كماً وكيفاً) وذلك عبر سلسلة من المقالات ختمتها بكتاب جميل يحمل عنوان"أصل الفروقات بين الجنسين" والذي جاء في ترويسته العبارة التالية: نحن لا نولد بناتاً وإنما يجعلون منّا هكذا!

أنصح الجميع بقرأة هذا الكتاب.

يا زول لو في مفكرين و فلاسفة ما عظيمين، أنا بعتذر..


وين المرأة مزمومة تحديدا في الآية دي؟ ما برضو قال: و البنين و ديل ممكن يكونوا رجال!
أكيد هي بتكون طالبت في البيت، لكن قمعت،
محمّد (ص) طالب بتحرير العبيد و ما كان عبد

فيما يخص بيع المتعة الراجل ما كان شغال القصة دي لانو من ناحية فسيولوجية صعبة عليهو، لكن بعد جات التكنولوجيا، بقى شغال و بعمل أفلام جنس يتكسب منها زي العجب

بخصوص المهور: في الهند القريبة دي المرأة هي من يدفع المهر