سودانيات .. تواصل ومحبة - بَرْداً سَلامْ ........

سودانيات .. تواصل ومحبة (http://www.sudanyat.org/vb/index.php)

- منتـــــــــدى الحـــــوار (http://www.sudanyat.org/vb/forumdisplay.php?f=2)

- - بَرْداً سَلامْ ........ (http://www.sudanyat.org/vb/showthread.php?t=28235)

اقتباس:

المشاركة الأصلية كتبت بواسطة عصام عيسى رجب (المشاركة 553471)

بَرْداً سَلامْ ........

"ياااااااا وَطَنْ عِزَّ الشدايد ..... حِمَّيد"

(1)
ما بتَغْرَقي،
يا الزَّينةْ هوي،
يا رَاكْزَة مِنْ زمَن الْمَطَرْ نُقَّاطْ
مصوبَرْ في السَّحابْ:
(زمَنْ السَّحاب لِسَّعْ صَبي،
وبنيَّه زي عُشباً طري،
وما آنْ أوانْ .....)
زمَنْ الْمَطَرْ عشَماً بَلِيلْ،
زي خَاطْرَةْ بِتَّاور الأرِضْ،
أو فِكرةْ في بَالْ الشَّجَرْ ......
كم مِنْ مطَرْ
دقَّ وفَتَرْ
والمويه وِصْلَتْ للْكُتوف
خافتْ قُلوب النّاس عليك
يمكن خلاص تمحاكي
ما يفضِّلْ أثَرْ ......
أهو زي عوايدِك
هوبْ: بتمرقي مِنْ مكايد المويه
والسَّيل الْخَطَرْ ......
(2)
ما بتَغْرَقي،
بِغْرَقْ رُعاةْ الْغَفلة
في شِبْرِكْ ..... عشانْ عابرينْ سبيلْ
ما بجُوكي يِنْهَرُوا موجك الْهدَّام
يتارسُوا المويه، لا،
ديلْ ناسْ سَفَرْ
مارقين إذاً للرِيبة،
والتَّلَفْ الْقَبيلْ حَدَفُمْ عليك .......
ديلْ بِغْرَقُوا
وقتين يجي الطوفانْ
تَخُتِّيهُم تِحِتْ رجليك
وتطلَعي للجَبَلْ ........
(3)
داخرِكْ يقينْ
ما تخَنْقِكْ الْعَبْرَة
وتنَهْنِهِي في خَفاكْ
ورَّينا صوتك لمَّا يملاكي الصَّباح
لَيْ حَدْ جبينِكْ بالضياءْ
يغشاكي خيرك
قبلِ ما يرتَدَّ طرفك
أو يرجِّعْ ليك غُناك
هُدْهُدْ مُوَلَّهْ بالْبُشاراتْ .... والْعَدِيلْ
ما بتَغْرَقي،
ما بتَغْرَقي،
ما بتَغْرَقي ...........

عصام عيسى رجب
الخميس 8 أغسطس 2013 م

عصام:
ما قصرت انت ولا حروفك ..
أديتا بس راجياك تزيد ..

شكرا فأنت رائع وانها تستحق.

شكراً جميييلاً يا مها: الجمال بجي من الروح الجميلة الْبِخُتها الجميلات والجميلين في القصيدة، مِنْ خلال قراية واعية ومُحِبَّة بِجمال .....

عكود يا حبيب،

ليك المحبّة البتليق بجمالك .....

في وسط الخراب والشدايد دي ما عندنا حل غير نغني للأمل ونرفع بيارق البشارات .... وننادي مع حِمَّيد: يااااااا وطنْ عِزَّ الشدايد ......

ويا ريت نخُتْ في بالنا ويقينا إنّو أحلك ساعات الليل ظُلمة هي البتسبق فجر الخلاص .....

الأحباب الرشيد وقيس ومحمد حسن،

شكراً بجمالكم على محبّتكم "برداً سلامْ ...." ..... وهاكم رابط القصيدة صوتاً في صفحتي "ساوند كلاود":

https://soundcloud.com/erajab/ma-bataghargi-20130810

سلام عصام،
بخصوص سؤالك:
تعليق الرشيد يعبر عني تماماً

اقتباس:

مقطع "زمَن المَطَر نُقَّاط" أهديه لبابكر ليقرأه كاملاً:
عكـــود

يا عكـــود، عليك الله، ما تخمنا، كدي أشرح لي الجزء دا، وعلق لي على وجود الاقواس في نص شعري.

اقتباس:

ما بتَغْرَقي،
يا الزَّينةْ هوي،
يا رَاكْزَة مِنْ زمَن الْمَطَرْ نُقَّاطْ
مصوبَرْ في السَّحابْ:
(زمَنْ السَّحاب لِسَّعْ صَبي،
وبنيَّه زي عُشباً طري،
وما آنْ أوانْ .....)

https://soundcloud.com/erajab/ma-bataghargi-20130810

ورَّينا صوتك لمَّا يملاكي الصَّباح
لَيْ حَدْ جبينِكْ بالضياءْ
يغشاكي خيرك
قبلِ ما يرتَدَّ طرفك
أو يرجِّعْ ليك غُناك
هُدْهُدْ مُوَلَّهْ بالْبُشاراتْ .... والْعَدِيلْ