الأستاذ/محسن خالد
لا املك شيئاً اسوقه لكم غير الأسف
انا متاسف جداً عن ما بدر مني في ذلك
ولكن
أسفي احصره في حتة سوء التعبير ولا ابذله في مقصد المداخلة التي رأيتم فيها سخرية
لأن المداخلة كان مقصدها الإشارة عن مدى تعبكم وارهاقكم في المشروع الضخم (الكوشريثا)
فبلاهي عليك يا استاذ أنشدتك الحق أن تنظر إلى مداخلتي من زاوية اخرى غير حكمت فيها حكمك واتهامك لها بالسخرية

ارجو يا أستاذ مطالعة ما كبر خطه وتغير لونه
عله يساعدكم في فهم لب المداخلة
على العموم يا أستاذ أسفين مرة أخرى
وعساها العترة التي تحسن مشيتنا في اسلوب بذلنا للمحبة لمن نحبهم

الكوشريثا في عينك.
اسمها الكوشرثيا.

اعتذارك ما بفيدك، العملتو كان بإيدك.

يتواصل الرهان، هذه الصور فريش، طازجة، هسسسع وعشوائية، ومأخوذة بكاميرا موبايل ساكت.
تعالَ واستخرج لنا عيباً، سواءً على مستوى البنية، أو الأطوال، التناسق، التدرّج، الانحراف، الارتكاز، التجويفات، الامتلاء... وإلخ مما لا علم لك به أيها المتشدق.
تاني بتجي محل حش البرسيم؟

علي الدين حننتني يا محسن خالد وانت منزل صورتك قبل شوية مستخدم صاحبنا وجدي كاحسن ما يكون الكُبري .
يا وجدي الحق نفسك صاحبك محسن اتخذك كزانة ليعبر بيها الي "الحسس" ما معروف البيحصل عليك بكرة شنو ومنو الحيستخدمك في شنو تاني .

وييين يا أساسي
شوف بالله، كان نكشح ليك جردل صور من زمااان شان تجي مارق، والله مشتاقين يا سماني القوم.
حنّنتك رشاقة النمر دي؟ تقول والله؟ ياخي حرام عليك. كرشك السمينة ديك إنت جاريها كمين سنة ما حننتك، شووف المسخة مستهبل إنت وألا شنو؟ هههههه
صاحبي وجدي مصدّق إنّي زعلان، إخير إنت الحنيت علينا.
المشكلة إنو البوست البتكلّم عن الجسد من خلال سلطة غيرية تتحكّم في أجساد الآخرين بمثل النفس المدسوس في مداخلتك هذه ذاتها، فذاك البوست قد راح فيها.
هسّع لو في لعيبة بتوع جنباز "معاهم بنات بالمناسبة" وفتحوا بوستات هنا بحننوكم مش؟ وألا بعقدوكم؟ وألا بخجلوكم؟
عشان كدا السوداني لمن يصل أربعين سنة، كان امرأة كان راجل، إلا يشيلوهوا في شبكة وألا قفة؟
إنا لله. لاحظ كون هذه الصور لشخص سوداني بعد سنتين سيكمل أربعين سنة.
مفروض يدوني كأس، أنا ما عارف كأس شنو، لكن لازم يدوني واحد. أيوة، كبييير وليه أضنين. هههه
لو كتّرت كلامك هسّع بمشي النادي، وأقول للجماعة صوروني بلبس الرياضة الجد جد، ونفتح بوست للتربية البدنية، كااامل.
إنت قايلها دي حركة ساكت؟ أبداً، دا شغل واهتمامات وحب واتجاه وميول في الدنيا وتعليم وأساتذة ومنتجات وصفافير وكأسات وهيلماااانة.
أها أنا مشيت للجماعة ديل ما أظن أكتر من مرتين بس:D

عليك الله يا أساسي البحنن منو؟ عليك الله موش وجدي يقطع القلب؟!

عليك الله يا محسن شوف الرموز مع السينما لائقة كيف؟ بهناك ناشقة، و حات الله صورة الكديس بهنا فيها سحر عظيم

* مرحب بأساسي

يا بابكر كلامك بتاع الصور بهناك ما لافقة دا كلام خوف منك بس، ياهو كلامك إنت ذاتك القلتو لحسبو. فعليك بالحب لا الخوف.
عارف؟ في رأسي كلام مُبر أمس عن سليمان الزغرات، وزول كسلا القال ليه كلمتهم آ السواطة؟ خليه يحكي ليك القصص العجيبة دي.
يا بكور الله دا حُب ما هو خوف.
والغافلون وحدهم هم من يؤلّفون الله، العارف لا يؤلِّف الله، فإن كان لا يُحاط، فكيف يُتوقّع؟
ياخي الرموز جميلة في كل مكان، والبديع جمال جمال جمال، وكمال.

يا بابكر يا اخوي بركة الجيت بي جاي
في بوست زيارتكم لي قطر
أنا غلطت فيك ممازحاً
ويشهد الله انها ممازحة محبة
المهم رجعت ومسحتها وكتبت بدلها اعتذار
فيا اخوي للضمان كدة (العذر والسموحة)
عشان ما في مقبلات الايام تجي ناطي لي زعلان في اني كيف اصفك بذاك الوصف
كفاية علينا خلعة الايام ، ما ناقصين خلعة الاحباب

هذا الاعتذار وقاية لي نفسي في المستقبل القريب
ومن باب (من مأمنه يؤتى الحذر)
وانا حذر جداً مع هذه الحياة في بذل أي عاطفة سلبية
ومأمني لوم واغضاب الاحباب
وأعلم تماماً أني ما متسق مع مبدئي هذا
لكن اهو بنتعلم من الايام عشان نتسق مع مبدئنا ده

و الله الأيام دي الحنين و الشفافة ما حايقات!
أتقطع أنا؟

:D:D
صقر أولتنار :D:D

____________
بطل* الشماتة يابابكر..
________
* تشكيل الكلمة على مزاج القارئ

دا كلام مكعوج ياقيقا,
قدر ماحاولت أمررو , أصلو مالقيت ليهو صرفة ..


قلت لى كيف
الحب الذى لاتقيده رغبة سوى حب الله وحده ؟؟؟

يااخى انت نسفت فكرة الصوفية نسف بى مزاج

وكمان بى الأزرق!!

الساعة أربعة صباحا
وجيت قبل شوية من المستشفى
يا أخوانا رأسي دا لسع مو عديل، فدحين أعفوا لينا بالله.
كلمني بكرة يا مُبر لو قدرت.