الكلام دا انا بقولو من زمااان تعصب لي ام درمان
مع انو بلتمس ليهم العذر لانو الوطن بقعة بشكلها الانسان في داخله كيفما شاء يسكنه والدليل اننا نعيش السودان بي الرغم من البعد فلا بأس ان تشكل تلك البقعة لدي البعض كأم درمان في اعتقادي ان ام درمان تجربة حب لن تتكرر لكن العنصرية حاصلة واهل ام درمان يرفضون كل ماهو غير امدرمانى ودا كلام مامن فراغ لانو انا عايشة في امدرمان واهلها كانو بيشاكلوووني لما اقول انو انا ساكنة ام درمان لكن انا من شندي |
وشهد شاهد من أهلها 0أها دي ساكنة أمدرمان وبتقول الحقيقة بكل شجاعة والغريبة طلعت بلدياتي يعني شنداوية بس يانسايم :عطرة ما بتقرب لي ولا كانوا أهلي بيسووا الفراد عشان مخك ما يمشي لي بعيد لكن أبوي ذاتو مولود في شندي ولكوندة عباس حنفي سيدها عمي وهاشم عباس صبحي نسيبي
|
اقتباس:
انا زااااتى شايقية وزرعونا في شندي علشان نلطفها نسقيها بي شوية محنة وجمال من بتاااع اهلي الشوايقة وفرااد شندي مشهورة في الاجازة لازم اشتري لي اتنييين والغريبة انى مابلبس توب |
عزيزي فتحي لك التحية والمودة
شوف يا حلبي انت آخر انسان يتكلم عن عنصرية أم درمان كدي ناخدها واحدة واحدة روعة أم درمان أنها تنبذ العنصرية والجهوية تجي من أي مكان في العالم تقبل بي طريقة الحياة والكلام والسلوك الأم درماني أنت تصير أم درماني عشان كده أنا قلت قديما "يا بلدا زي نهدا ما عرف شقريب حلوة زي الحجري الفي الشلوح عسليب فيك العليل بيطيب وانت للمريض محريب جراب العرد تشيل وابدا ما بتابي غريب ساكن البقعة ما بضوق المر وزول أم در كان ما نفع ما بضر الحنقوق نوعين الانتاية والضكر والخلق شكلين فيهم البعرف أم در" أول شي إنت أم درماني اكتر مني بدليل أمك الله يرحمها خالتنا أمينة بت الهندي كانت من بيت المال ومن عباءة بيت المال خرجت أم درمان . وناس بيت المال ديل احن ناس في العالم ، أنحن اطفال يلقونا نسوان بيت المال في الشارع يقولوا ليك تعال يا ود حشاي النشمك ويحضنوك لامن ضلعوك تقرب تتكسر ويقولوا لي نحن أهل الحرم أم حبوبتك زينب بت الحرم وزينب يت الحرم كانت جارة جدك المطبعجي الذي كان له بيت طوب وسط بيوت الجالوص. بيتهم يفتح علي حوش نقد والد الإداري الدرديري والدكتور عزيز نقد. من جيران جدك آل أبوجبل وآل أبوالقاسم زال النصري وال شمشوم وال الدعيتة اهل هاشم العطا وال خال العيال وال حمد. وجيران اللواء صديق حمد وآل أبو شقة وآل سوركتي وآل جارنتوت والبلوك . والدك رحمة الله عليه الرجل الوسيم الذي طاف كل السودان وكانت له صولات وجولات لفا ودور وجا أخرتها أم درمان وأنت ذاتك ما لفيت الدنيا دي كلها شمالها وجنوبها إتزوجت من حي العرب اللي هو وادي عبقر بتاع أم درمان . وأم أحمد لو لم تكن بت أم درمان ما كان قدرت عليك . وأولاد ملة هم احد ركائز أم درمان وجيرانهم في حي العرب (حيث الطرب) جيران إبراهيم عوض والتاج مصطفي وسيد عبد العزيز و عبد الرحمن الريح وميرغني المأمون واحمد حسن جمعة وعبيد عبد الرحمن وعمر احمد (كان بدري عليك) والرائع عبد الله محمد زين رحمة الله عليه. عنصرية شنو يا فتحي قبل شهر أنا مش قلت ليك امش قابل عثمان أحب زول إلي نفسي واقرب إلي من أشقائي وهو الآن موجود معاك في القاهرة . والد عثمان ناصر بلال كان بمثابة الوالد بالنسبة لي ويحمل اسمه احد أبنائي وهم مجموعة أكثر من خمسة عشرة ابنا وابنة من أم واحدة وكنت أعتبر منزلهم منزلي والقليل من الأدب الذي تعلمته تعلمته في منزل عثمان ناصر وهم من أعالي النيل ونحن رباطاب هاجر جدودنا بسبب ضيق العيش في السافل وجمعتنا أم درمان وصرنا أهل وأقرباء. وكانت والدتي رحمة الله عليها عندما ننادي عثمان بود المكة كانت تقول ده ود الملكة وهو ذاته أمير. الطيب سعد الفكي أتي من الشريق في الرباطاب والتقيت به صدفة في الجنينة قدام المجلس البلدي وكان يكبرني بثلاثة أو أربعة سنوات وصار احد سكان منزلنا وشقيقنا ولي ابن يحمل اسمه وله ثلاثة من الابناء يحملون اسمائي واسماء اشقائي الشنقيطي وشوقي واسعد وفي البداية كانوا ينادونه بالطيب العربي نسبة للهجته الرباطابية ثم صار من اهم الشخصيات في العباسية وصار رئيسا لنادي الربيع اقدم من الهلال والمريخ وتوقيعي في سودانيات " العيد الما حضرو بله اريتو ما كان طله النسيم بجى الحله عشان خاطر ناس بله انبشقن كوباكت الصبر وتانى ما تلمو حتى مسله قالوا الحزن خضوع ومذله ليك يا غالى رضينا كان ننذله" لم احزن علي أي بشر ولا أزال ابكي ويبكي القلب كل يوم علي توأم الروح بله جمعتنا أم درمان وسميت احد أبنائي الكبار عليه أتت والدته من أعالي النيل وهي من الدينكا ووالده من النوبة الميري إلا انه أم درماني 100 % كما ذكرت في كتاب حكاوي ام درمان اننا كنا جيران لمدام أوجين وهي من آل كوركجيال وهم أرمن لم يجمعنا معهم إلا الجوار ولكن لما أمي كانت تقول نادوا أخوانكم للأكل لم نكن نحسب أن البنات شوشيك وهينازان واناهيد واستفان او أبناء اختها الذين كانوا يسكنون معها قاري وارتين بمثابة أشقاءنا وأخواننا ولم نفترق عنهم ليلا ولا نهارا الي ان انتقلوا الي الخرطوم وكنا نسخر منهم في بعض الأحيان لأنهم قد سكنوا في الحواتة في النيل الأزرق وكانوا يؤمنون بالفقرا والسحرة وهذه من الأشياء التي كان أهل ام درمان قد تعدوها. وحتى بعد ان انتقلت مدام اوجين الي لندن بهد ان تزوجت ابنتها من مدرسها في الأحفاد البريطاني لم تنقطع صلتنا وكنا نزورها عندما نتواجد في لندن . إنت يا حلبي بعد ما نحن سافرنا من أم درمان صحبانك كانوا منو مش أولاد أم درمان ؟ شفت أحلي من خوة أولاد أم درمان أصدقاءك طه إمام عبد الله وعثمان عبد المجيد كوارع ومحمد المهدي مسعود الحلو ابن عمة بابكر مخير مش قبلوك وشالوك في راسهم وحبوك نحن ما عنصريين نحن رائعين وروعة ام درمان انه ما عندها سيد تجي تخش فينا تبقي سيد البلد ما عنصرين مميزين مميزين يا فتحي وأنت عارف وكان مغالطني أسأل الناس القريبين ليك أم درمان كانت تقبل أي انسان اذا عاش بقوانينها واخلاقها . ــــــــــــــــــــــــــــــــــــــــــــــــــ ــــــــــــــــــــــــــــــــــــــــ الشقريب : هو انشطار الجلد او تشققه نتيجة لترهل او حمل الحجري : هو البطيخة او الشمامة التي في اول الشلح وهي الاجود والاحلي والشلح هو العرق الحنقوق : الجزء السميك من الزعف العرد والمردس نباتات يدبغ بها الجلود وجراب العرد هو اقوي واجمل جراب ولهذا يقولون عن الشخص القوي الذي يتحمل فلان جراب عرد |
الي عزيز أعزائي وعزيزي شوقي
=========== حي ووب جاني اللا بسكت ولا بقول الروب0 يازول انت الجابك شنو ناطي ما تخليني الاعب الناس ديل شوية أنا جيت لقيت في ناس عاملين ليهم حرابات ثنائية واقعين سلخ في روحهم قلت أفتح لي شي يلهيهم شوية0 وأخونا المرحوم عبدالله محمد زين ما انت كنت السبب في شبكتي معاه لما في شقتك الفي المهندسين مليتو لي راسي انت والمرحوم حسن عطية لاعب الهلال الراحل وقلتو لي لازم ترد عليهو0 خليتوني ادخل لي في معركة كلامية مع الزول دي استمرت لي شهور عديدة0 أما أخونا المرحوم حسن عطية فقد دامت علاقتنا الي يوم سفره الي السودان بعد أن قمت باقناعه بالرجوع الي السودان حيث وافته المنية فندمت علي رجوعه وقلت في نفسي ياريتني ما قابلته عند شوقي 0 نفس الشئ مع المرحوم بلله الذي من ما سمعته من حكاوي بلله منك قمت بالاتصال به عند ذهابي الي السودان فوجدت شخصا عظيم الأدب لم أصادف مثله بين من عرفتهم في ربع القرن الاخير أما عمك عثمان فقد اتصلت به عدة مرات وهو أيضا قد اتصل بي ووعد بزيارتي بعد أن وصفت له البيت ولكن يبدو ان اقامته في 6 اكتوبر مكسلاه شوية وبيني وبينك أنا ملاوز الراجل أقعد معاه تقوم تحصل ليهو حاجة أحمل نفسي المسئولية0ربك يستر0 لقد صدقت في كل ما ذكرته وأنا قد قلتها واضحة بأن 95% من أصحابي هم من أولاد أمدرمان (عجايز أمدرمان حاليا)فلا أحتاج الي تذكيري بما اعترفت به ولا تنسي اني كنت محظوظا في اختيار خيرة ابناء أمدرمان لأصادقهم0 وأذكر انه في مرة قال لي طه امام ياخي دي حكاية عجيبة يمشوا أولاد أمينة يجيني برضو ود أمينة واحد أبتر والتاني هندي والغريبة كلهم يسافروا لي نفس البلد ضرتي الجديدة:D:D ود امام كان في ملكوت تاني في يوم وداعي وكان معاي مجدي أخوي الذي استمر مع طه حتي يكون هناك دائما ود أمينة موجود معاهو وبعد سفر مجدي حمل اللواء شقيقي الأصغر سمير0 ومن أعز الأصدقاء الذين تاهت عنك ذكراهم التجاني سلوم وأخوه صلاح والمرحوم الفاتح التجاني وقريبهم حاتم وأعز العزاز محمد عبيد أرباب أونسي (زوربا) في آخر سفرة الي السودان كنت في حي الشهداء ازور أخو زوجتي حسن شفيق صاحب المعهد الدولي في الشهدا وبينما كنت أتوجه الي سيارتي رأيت منظرا غريبا رأيت رجلا يمشي وخلفه امرأة وخلفهما ثلاث بنات صغار السن وكانوا يمشون خلف بعض في طابور مثل الجنوبيين الذين يمشون هكذا حسب العادة في المشي داخل الغابة لضيق الطريق بين الأشجار فاصبحوا يمشون بنفس الطريقة حتي داخل المدن0(هذا الشرح لابد منو حتي لا تعتقد بأني أستهزأ بحبايبك الجنوبيين) وأنا لعلمك أكره تعريفهم بالجنوبيين . المهم عندما دققت النظر وجدت أنه التجاني تايجر فناديت عليه فتوقف والتفت ثم قال فتحي مسعد معقولة وجاء مهرولا واحتضنني طويلا بقوة من ضاع منه شخص عزيز فوجده ولا يريد أن يتركه بعد أن وجده00وبدون شعور صدقني ياشوقي سالت الدموع علي خدودي ولم أستطيع أن أتمالك نفسي لعدة دقائق أما هو فقد بدأ يحكي لي ما حدث معه بعد سفري وذهابه الي السعودية ثم رجوعه وزواجه وكانت المراة التي معه زوجته مع بناته وكانوا ينظرون الينا بتعجب وأعتقد انها كانت المرة الأولي التي يرون فيها صديق حلبي لأبيهم0 وفي آخر سفرة الي السودان كنت يوميا في بيت شقيقنا المرحوم شنقيطي حيث أقابل الكثير من الشلة القديمة فكنت تري علي يطبخ الحلة ودكتور سهل يوزع في الفتاوي وكامل ابراهيم حسن وحضري يتناكفان علي جنب0 كانت اجازة لن تنسي0 شئ أخير زوجتي الأستاذة آمال شفيق همام وأقول أستاذة لأنها معلمة من خريجات معهد المعلمات بالأبيض وأكيد قد قامت بتدريس بعض عضوات هذا المنتدي لذا وجب التننويه0المهم هي شنداوية المولد كردفانية النشأة بحراوية العمل يعني ما تدخلها في حسبة ناس أمدرمان وهي كما تعلم ابنة عمتي وأبوها صعيدي من اخميم محافظة سوهاج وابن عمها مصطفي همام هو الارهابي الذي مازالت الحكزمة المصرية تبحث عنه وأبوها هو شفيق احمد همام من مواليد شندي ايضا0 أما الوالدة رحمها الله فهي من مواليد الدامر كما أظن وعاشت طوال عمرها في نفس البيت الذي ولدت فيه أنا في حلة حلب(حمد) وأمها من سلالة المطبعجية ذوي الأصول التركية ولي جدة مدفونة في قبب الأتراك المواجهة لميدان أبو جنزير مقابل النادي العربي القديم الذي خلفه نادي الخريجين0وأبوها هندي من لاهور قبل تقسيم الهند الذي جعل لاهور من مدن باكستان0 شفت يا شوقي التركيبة العجيبة دي:confused:أظن بعد دا لو فتحت خشمي الجماعة حيقولو لي وانت مالك كما قالها لي في براغ المرحوم عمر الدوش عندما تدخلت لفض شجار بينه وبين أخونا دكتور حسن عبد السلام فقد قال لي انت الدخلك شنو احنا سودانيين في بعض نتضارب نتطاعن انت ما ليك دعوة وترك حسن وحول المشكلة معاي أنا فاعل الخير0 وجيت انت هسع كشفت أوراقي كلها وبعد دا الا الزول يعمل حسابو شديد عشان مافي زول ينط ليهو في حلقو0 سعدت بمداخلتك وان كنت أتمني لو كانت تأخرت شوية عشان آخد راحتي في الجماعة ديل لكن انت دايما كدا لا ترحم لا تخللي رحمة الله تنزل0 لك كونتينر أربعين قدم مودة0 فتحي(أبو أحمد) |
يا حنفي كان داير تعرف العنصرية الصحي صحي، اخد ليك لفة في كرش الفيل ولا كرتون كسلا ،، و هناك ... السالم فشفاشو وارم...:o:o هسي عليك امان الله لو نحنا عنصريين جورج مشرقي و ابونخلة و العدني و رمسيس و العتبانية و القبانية ما كان بقوا معاكم في بحري ست الهوى :D:D:D
بعدين بحري ذاتها امتداد البقعة على وزن الخرطوم عاصمة الثقافة و كدا :eek::eek::eek:.:D:D:D |
اقتباس:
طلعت الحكاية كياشة مني ساكت والطريقة أتاريها سسسسسسسسهلا وما إحتجت لي رأفت عشان يسأل ولدو |
أخوي الصغير سنا فيصل سعد خليني كدي أمشي أصللي الجمعة وأرجع ليك بي رواقة وفي الوكت دا فكر انت غير العدني والقبانية في منو من ناس أمدرمان
|
يا حنفي كان داير تعرف العنصرية الصحي صحي، اخد ليك لفة في كرش الفيل ولا كرتون كسلا ،، و هناك ... السالم فشفاشو وارم... هسي عليك امان الله لو نحنا عنصريين جورج مشرقي و ابونخلة و العدني و رمسيس و العتبانية و القبانية ما كان بقوا معاكم في بحري ست الهوى
بعدين بحري ذاتها امتداد البقعة على وزن الخرطوم عاصمة الثقافة و كدا . =========== أها جيت راجع0 انت يازول بايتة معاك ولا بتنطط مالك من كرش الفيل تنط في كسلا وبعدين لعلمك العتبانية أصلهم من بحري ولسة في بحري من ما الله خلقني ساكنين جنب كنيسة ماري جرجس وأبو نخلة في الخرطوم ورمسيس اصلا في بحري وكان عندو أكبر بقالة في سوق بحري هو وأخوهو الفونس بعدين ما دام بتعرف العين مالك نسيت ود عوضون البقي شيخ محايات وعباس ريحان قون التحرير الزمان أبو موتر واسحاق الحلنقي قبل ما يرجع السودان وأزهري الشيخ(أبو بكر ) الشغال في المحكمة وعامر الشلالي الفي البلدية ألخ ألخ ألخ0 كدا القسمة بقت 75% انت و25% أنا ,وبعدين مالك ما جبت سيرة كفيلي ولا اقتنعت وما قلت لي دكتور مهدي دا آدم!!1 ok |
بعد إنتصار شوقى بدرى على حلب بحرى
يحيكم أقباط المسالمة إنتصارآ لأمدرمان [media]http://www.sudaneseonline.com/video/janayn.MP3[/media] المصيبة حسن خليفة عطبراوى وأبوداؤود من بحرى :D:D بس خليل فرح بربري من أندينا من أمدرمان |
يا رأفت ياخوي ما كان العشم ياظريف يعني أول زيارة ليك تقيف لي مع الرباطاب الأنا وانت الاتنين بالنسبة ليهم حلب وعقاب مصريين :confused:أنا من بحري(الاسكندرية)وانت من قبلي( الصعيد) بعدين شوقي دا ذاتو أكبر عنصري وما تسمع كلامو دا وأنا معاشرو وعارفو كويس وبعدين انتصار شنو البتقول عليهو؟انت ما قريت ردي عليهو الطلعت ليهو فيهو معلوماتو كلها مغلوطة0
يازول انت عايزني أصدق كلام فيصل سعد لما قال لي أبعد من رأفت وبابكر مخير ولا شنو:eek: الظاهر بعد انحيازك دا أنا ما حأتعامل الا مع مجدي أخوي علي الأقل ضامنو0 شكرا علي الزيارة |
اقتباس:
بس اوعك تقول هاجرت قبال الحاج يوسف ما اتبني، اسحاق صديق و اخ عزيزو عامر بشير بعرفو تب، لكن الباقيين ما بعرفهم و عوض الله البعرفوا اسمه عوض الله مصطفى بتاع سودانير و ما ممكن يكون بتاع محايات الا محو أثار العدوان و لا يكون قلب بورانا و دروش :D:D و اصدقائى اولاد المجمر بالمزاد عصام و هشام و همام معانا في كندا هنا. كدا بقينا انا سيكستي و انت فورتي :cool: و اهلي ناس صلاح النور ما عرفتهم جيران ناس كابتن عماد خوجلي.اخونا صلاح السيد رحمه الله ظابط اعدم في رمضان 1990 بواسطة نظام الجبهة المجرم و اخوانه بدر الدين و ماضي بتعرفهم؟. |
انا حتت زي دي ما بمشيها والحاج يوسف بعرفها كويس وعندنا بيت في المايقوما والكرتون برضو بعرفو لكن اسم كرتون كسلا ما سمعت بيهو لكن بعرف الكرتون الفيهو الحفر البتبلع العربية0يعني ما تايواني بالنسبة للناس البعرفهم هم الناس العرفتهم قبال ما اسافر والمولودين بعد سنة 58 صعب اكون بعرفهم وود عوضون دا اسمو مصطفي عوضون شلالي من حلة حمد وفي بحري انا بعرف الناس الكبار بس واكيد في ناس بكون نسيتم لاننا بنتكلم عن حاجات ليها 44 سنة تاريخ سفري من السودان وأنا متذكر في التمنينات كنت في اجازة في الخرطوم قعدت اتلفت طول ما انا ماشي في الشارع عشان القي لي زول بعرفو ما لقيت0 بعدين انتبهت اني بفتش في اشكال اكيد اتغيرت بعامل الزمن فابتديت افتش في الاشكال العجوزة وطبعا لقيت0والمحزن انو الناس ديل اتبهدلو شديد واصغر واحد فيهم كان شكلو اكبر مني بي عشرة سنين من المعاناة العايشين فيها0
|
وستظل ام درمان هي ام درمان رغم حديث ناس بحري المغرضين :D
بالمناسبه انا معرفتي ببحري دي زي معرفتي باللغه الصينيه حدي الشوارع الرئيسيه بس .. لكن تاني بروح فيها عاااادي هذا علي سبيل التحيه .. ونحن كالنحل يجذبنا ورد الحديث عن ام درمان فنخرج لناس بحري ودول الجوار شهدا :) عظيم مودتي |
اقتباس:
|
| الساعة الآن 05:56 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.