سودانيات .. تواصل ومحبة - القاعد يشرب موية السلطة و يتنحنح و يتمطق يقول أناااووووو؟؟!!

سودانيات .. تواصل ومحبة (http://www.sudanyat.org/vb/index.php)

- منتـــــــــدى الحـــــوار (http://www.sudanyat.org/vb/forumdisplay.php?f=2)

.

زولنا طب عبدالرحيم ابراهيم العبيد
و الله حبابك بالكتير ..
و يا دوووب البوست جاتو (آحسن سلطة) ..موليتا..
يا سلااااام ياخ ..بالدكوة و البصل الدقااااق؟ ..:rolleyes:
و بالليمون أم تراك تفضلها بالأتي؟ (ألتي..عتي)..و هو للحناكيش مادة بلون زينب تفرزها الحويصلة الصفراء (المرارة)..راجعوا دكتور قنات فهو طبيب و أهل عوض .. يعرف التداوي بعشب الموليتا أكثر من الفارماكولوجي :D ..
عبدالرحيم .. قاعد تعمل ليها توم خفيف؟:p ..لو جاك مشوار بعدها لازم تاكل لبان..
حاااادقة كيف..بعدين لازم الزول يكون بيعرفها .. لأ هنالك عشب يشبهها طعمو حنضل القيزان بس:( ..
عبدالرحيم يا صاحب ..ناس ممكونة و حنينة و إشراق بيكونوا اتصلوا999 فاكريننا بنخلط مواد Weapons of Mass destruction;)
ذكرتني جدي أمحمد ود اللمين في القلمونا ..ريفي غريقانة ..في طريق أب عدارة ..و جميع أهل تلك القرى تعتمد بص سرحان (أخو صديق سرحان) كوسيلة وحيدة للوصول للمراكز الحضرية في طابت/الحصيحصة/مدني...كنت أمدغ الموليتا كثيرآ بداره يرحمه الله .. و في طابت تجيدها بخيتة منصور مناع ..خالة زوجتي ...يوهوووو..

الليلة يا قريبي أنا البيسكتني شنو؟ :)

.

هلا هلا هيع

اهلك زمان قالو جني الجن ابقرننا شوكة ايدو في الاكل و عينو في الدوكة

دحين اتا آالطيب جربت موية السلطة مع عجنة القرع بالكسرة؟

خمج:p :D

اقتباس:

المشاركة الأصلية كتبت بواسطة abu-wsam (المشاركة 66145)

مرحبتين أبو وسـام..

و الله ضحّـكـتني ضحك شديد..جنى الجن دة ما سمعت بيهو قبال دة

عيلا بالحـيـــل حفظتو..بالغ عديل كدة

أيدو في الأكل و عينو في الدوكة...زلعة ما عادية

لكن لو أنا باكل لي في صينية منتظمة و زول تاني جاب ليهو (حرف) حاااار م الدوكة و رمى فيهو القرع و موية السلطة..باقي ليك ما بتاوق ليهو؟؟..
القرع دة ما كنت بطيقو ..زي القريب فروت..
لكن حكمة الله عجنو لي كسرة بالقرع ..بي موية السلطة..ما أديت الجنبي..
لكن الكسرة بالرجلة بموية السلطة..مااااا هينة برضها

تسلم يا زول يا إكّـيــل

.

اقتباس:

المشاركة الأصلية كتبت بواسطة الطيب بشير (المشاركة 63588)

.

كان العنوان الأصلي للبوست هو

الأكل بالأيتيكيت ..أم الأكل في بطن البيت؟؟

نحن (أهل العوض) نرتكب الأيتيكيت كل ما فرضته علينا ظروف طارئة:(
و نزعم أنه دخيل علينا جميعآ :p
و لا نسعى هنا لاختبار هذه الفرضية
بل هي ونيسة حول عادات الأكل
يرى البعض أن الأيتيكيت تطور حميد و (حضاري) و (ثقافي)!!..
و لا نود الخوض في تعريفات حضارة و ثقافة رفقآ بالقاريء
و يدخل في اطار الأيتيكيت
الأكل بالشوكة و السكين و الملاعق
و حتى العيدان الصينية التي تحل بديلة لتلكم الأدوات متى انتهى بك نداء الجوع
في China Town..
الأكل بالأدوات..يعكس شكل حياة قوم
و (لهط) العصيدة و (لغف) باقي الروب و (الحترب) المذاب بالقاع
هو الآخر ..يعكس شكل حياة قوم
و طريقة تعاملهم مع برنامج الأكل و (الطقوس) المصاحبة لانتاجه و طبخه و تقديمه.
نحن هنا نجفل من تقديم تعريف أكاديمي لمفردات ذات طرق شائكة
مثل (حضاري) و (ثقافي)..لكننا نحوم حول حماها بالضرورة.
و البعد عن المباشرة يوفر لنا غطاء (الزوغة) من المنهج الجاف;)
و يعطي هذه الونيسة ما نزعم أنه جمال
أووكيي؟؟
طيب نبدأ بالأكل في البيت..
و هنا..
أنا أكلت في بيوت وصفها القرآن(بيوت خالاتكم و بيوت عماتكم) الى آخر الآية الكريمة..و بيوت أكثر حميمية ..هي بيوت أصحابنا ..أمثال أسامة عبدالعزيز ود خالتي أم سلمى بت حاج الصديق في دولة الحضراب المجاورة لحدود اقليم أعالي شمبات و ولايات الصافية الشمالية و عاصمتها مدينة مربع تسعة ..و لم يتميز أكل (صفاء عمر حضرة) على أكل الخالة أم سلمة الا بفارق السن و عولمة التجربة و الخبرات الدولية التي أتاحتها سنوات الدراسة بالخارج لصفاء و تفوقت عليها الخالة أم سلمة (بالقدحة) التقليدية و شيء من ثقافة البحيرات العظمى أيام غربتها مع (عريسها) البروف عبدالعزيز الطيب.
في تلكم البيوت كنت ضيفآ أقرب لسيد بيت..
لكنني لم أستطع شرب أو (جغم) (موية) السلطة الناتجة عن (تحلل و تخلل) الطماطم ..و تشرب البهارات و الحرارات في قعر صحن السلطة.
قدر ما حاولت غلبني!!
حتى لمن كانت صفاء تطلع و تخليني أنا و أسامة براااانا
برضو غلبني..غلبني طب
في بيت أختي أحلام غلبني
في بيت نسابتي ..لوووول ..هو أنا أقدر:cool: :rolleyes:
بس في بطن بيت أمي حاجة بتول يديها الصحة و العافية (زمن الجهلة)
و بيت سوما هسع..
تاني .. أبى لي طب ..و طار لي حطب
طبعآ لمن أكون ضيف و أشوف الصينية راجعة و موية السلطة كتييييرة
لعابي يسيل..
و أعالجها بغمستين من لب الرغيف
و لبعضه لب يخلب الألباب يا أولي الألباب
هذه الغمسة بالكاد تفشني
أما السلطة المسييييييخة (و هي أيضآ شكل جديد) و يقال حضاري!!
هه حضاري الما بخلي؟؟
ما بدورها أبدآ...
و لو في أي طريقة بقول لي ناس البيت شيلو السلطة دي أملوها بهارات و جيبوها.
و طبعآ أحيانآ أسكت أو بالأحرى أنطم..
طيب منو معاي في حكاية موية السلطة دي؟؟
و منو القاعد مؤدب و مربع يدينو؟ زي الطيب بشير في بيت نسابتو..لوووول
تعالوا
و بجيكم تاني

ملهوزة

كان لتقلية ميسز عبدالباقي و ضلع الحنينة أثر كبير في (تطعيم) فكرة البوست

.

ودا برضو يا سمراء

اقتباس:

المشاركة الأصلية كتبت بواسطة Ishrag Dirar (المشاركة 63671)

انا ... وباش ولدي وسرورة بنحب موية السلتة موووت....!

..
..

كذلك كانت إشراق ضرار

مجاملة..و تحب موية السلطة

.

اقتباس:

المشاركة الأصلية كتبت بواسطة الطيب بشير (المشاركة 419026)

كذلك كانت إشراق ضرار

مجاملة..و تحب موية السلطة

.

ونحبّها..
المُشرقة إشراق..
و..
سلامٌ عليها..
وعليك..

.
و عليك السلام يا رشيد يا صديق

أهي محاولة للتحايل على الحزن

.

اقتباس:

المشاركة الأصلية كتبت بواسطة الطيب بشير (المشاركة 419130)

.
و عليك السلام يا رشيد يا صديق

أهي محاولة للتحايل على الحزن
.

التحااااايُل علي الأحزان .. وارِد يا ود الشيخ

عِلا هذا الصديق الــ ( موت ) ..

فخليه لا تهبشه .. فأنا صديقه وبعرِفُو ياخ

ياخي أقول ليك قولة ...

ربنا يرحم الغالية إشراق ضرار بواسع رحمته

أللهم آمين

.
أهلين يا ناصر
هل هو صديق؟
أنا أقبل التعامل معه بالرضا
لكن دبارة صحوبية ليهو مافي :D

و يرحم الله إشراق
.

اقتباس:

المشاركة الأصلية كتبت بواسطة الطيب بشير (المشاركة 419323)

.
أهلين يا ناصر
هل هو صديق؟أنا أقبل التعامل معه بالرضا
لكن دبارة صحوبية ليهو مافي :D

و يرحم الله إشراق
.

يا أخوي خلاص ... نغير الكلمة ..
أنا بقيت متصاااالح مع المدعو الموت

.
أهلين يا ناصر يا متصالحآ مع فكرة الموت..
أتمنى أن أتقدّم أنا خطوة فوق الرضا لأصبح متصالح

و

يرحم الله إشراق

.