شخصيات من حلتنا....
 

(1)

شخصيات من حلتنا...


جمال....

الخرطوم تلاتة في نهاية الثمانينات يحمل جمال حقيبة المدرسة ويتوقف لمدة أمام بقالة "أولقا" الحبشية وهو في طريقه إلي مدرسة المقرن.. هذا شارع الجمال فبه تمر فتيات مدرسة الخرطوم الثانوية للبنات.. لا تدعه أولقا يمارس طقوسه اليومية تنهره : يا ولد يا جمال سيب الصياعة دي وأمش المدرسة..
يحاول جمال جاهدا الظهور بمظهر المجرب ويحكي عن مقامرات نسائية هي من بنات خياله ، فرغم مظهره الذي يبدو أكبر من عمره إلا أنه عبارة عن طفل في الدواخل بجسد ضخم يخدع الناظرين..
في نهاية اليوم الدراسي يعود جمال ليقف مرة أخري أمام بقالة أولقا .. هذه المرة تطول الوقفة وينضم له بعض الزملاء ...يعود للمنزل فتقف والدته علي رأسه تحسه علي الأكل ثم المذاكرة فهي دون الناس جميعا لا تنخدع بمظهره...
كان الحي ذاك اليوم يعيش رتابته المعهودة لا جديد أو هكذا كان يبدو إلا من حدثين ، كمية من الإزعاج والصريخ لمجموعة من الشباب أمام نادي الأسرة بقيادة "علي حران" وكان السبب انتصار المريخ علي الهلال وهذه مناسبة تصيب علي حران بهستيرية وفرحة كبيرة لدرجة أنه إشتري "بوهية" من حر ماله ليلون السور الأمامي للنادي باللونين الأحمر والأصفر..
السبب الآخر جاءت به فاطنة ظهرة (فاطمة زهرة) وهي تمثل الإذاعة الداخلية للحي تجد عندها كل أخبار الحي من تزوج ومن مات ومن سافر ، لا يفوتها حدث علي الإطلاق..
دخلت فاطنة ظهرة وهي تحمل "الشمار" وبدأت تحكي :
إنتي يا حاجة آمنة بتول دي جنت؟
حاجة آمنة : مالها خير إن شاء الله
فاطنة ظهرة : المرة دي سكنت في بيتها حبش.. بت صغيرونة وسميحة وعندها وليد، لكن الشهادة لي الله البنية ماسكها وليدها وفي حالها..

هنا إنتبه جمال!! هذا موضوع يستحق المتابعة ...يستمع جمال لبقية أخبار الحي من الحاجة فاطمة وهي تسردها
بصورة مسرحية...ويخرج متسللا حتي لا تراه والدته...
يقف جمال أمام سور النادي وينظر في اتجاه منزل الحاجة بتول ممنيا نفسه برؤية الساكنة الجديدة وفي ذهنه وصف حاجة فاطمة لها (صغيرونة وسميحة) رغم عدم ارتياحه للحاجة فاطمة لكنه يثق في وصفها... عليه أن يجد مدخل للتعرف إليها..
ينفتح باب المنزل ليخرج طفل في الثالثة من العمر..يتجه إليه جمال.. يمسك بيده ويجلس حتي يصير في محاذاته
جمال : إنت إسمك منو
الطفل اسمي تسفاي
جمال : أمك اسمها منو ؟
الطفل : إسمها سوسن
يلاطف جمال الطفل وتعلو وجهه ابتسامة الرضي !! أخيرا وجد المدخل المناسب للتعرف إلي سوسن.. يا له من إسم جميل!!!

تغير روتين جمال اليومي صار يتحين فرصة خروج تسفاي وأضاف لي ديونه من بقالة اولقا سلعة جديدة بالإضافة للسجائر صار يشتري الحلوي لتسفاي...

تعمقت علاقة جمال بتسفاي وصار من المألوف رؤيته وهو يحمله ويلاعبه ، صار الطفل علي ركاكة لغته العربية ينادي بابا جمال وينطلق جاريآ إليه حين يراه..

خرجت سوسن من منزلها وكان جمال واقفا أمام مدخل نادي الأسرة.. جميلة تسير في غير تكلف لها نونات
وتقطعات مميزة علي حواجب العين..كان جمالها يزداد وضوحا كلما اقتربت منه..لم يجد مشقة في التحدث إليها فقد انفلت تسفاي من يدها وإتجه جاريا وهو ينادي بابا جمال...
سألته : أنت جمال..
رد جمال كالحالم نعم...
سوسن : أنا سوسن ، تسفاي بيتكلم عنك كتير.
جمال : تسفاي طفل لطيف أرجو أن لا يضايقك أن أهتم به ..
سوسن: لا لا مافي ضيق بس هو مزعج شويه

أخيرا رأي ابتسامتها وتضخمت النونات وفلجة تتوسط الأسنان العليا ولون اللثة الأخضر..و..آه .. من الشهقة..
صار جمال عاشقا من النظرة الأولي...
تعددت زيارات جمال لمنزل سوسن ، يشرب القهوة التي تعدها له بطيب خاطر.. وتعمقت علاقتهم وكان حريصآ أن لا تراه الحاجة فاطمة زهرة مخافة أن يصير من ضمن أخبار الحي اليومية..

شعرت سوسن ببراءة جمال رغم محاولاته المستميتة في الظهور بمظهر الإنسان المجرب.. كان ينظر إليها بصورة لا تخلو من شهوة تعاملت معها بصبر الخبير..كان بصورة ما يعجبها فهو إنسان وسيم الطلعة..
مع مرور الأيام انطلق لسانه وصار يتحدث عن أشواقه وعن تعلقه بها...يجد جمال صعوبة في التسلل بعد المغرب من المنزل مع الرقابة اللصيقة لوالدته..
تطورت علاقة سوسن بجمال وتجرأ يوما ومد يده ليمسك بيدها فلم تمانع..كان يوم أن قبلها قبلة تشبه تقبيله لتسفاي تخلو تماما من التجربة قابلتها هي بسلبية وطار هو بها فرحا وللغرابة لم يحكي بها لزملائه.. هذا سره الكبير...

زاد إهتمام والدة جمال به وبمذاكرته فالامتحانات علي لأبواب.. هي في واد وجمال في واد آخر...
تسلل جمال وهو يمني نفسه بليلة أحلامه.. وكانت سوسن تنتظر وهي في أجمل حلة.. ترتدي فستان شفاف يكشف محاسنها...بعد أن شربا القهوة بدأ جمال في الاقتراب منها.. طلبت منه التوقف وأرسلته إلي الصيدلية.. اذهب واشتري عازل طبي..؟؟؟
ذهب جمال ودخل الصيدلية .. لسوء حظه وجدها مليئة بالمشترين وظل واقفا يمر الوقت بطيئا كما السنوات.. طالت وقفته..انتبه له الصيدلي وسأله : ماذا تطلب طالت وقفتك.. اتجه نحوه هامسا : ممكن تديني عازل طبي؟؟!! كان الصيدلي رحيما به فلم يلاويه كما توقع.. حمل العازل الطبي واتجه نحو منزل سوسن وهو يجر رجليه.. هذه تجربة جديدة .. يا له من حلم جميل...
لم ينتبه جمال وربما لفرحته الكبيرة فتخلي عن حذره المعهود وهو يدخل منزل سوسن ولسوء حظه كانت الحاجة فاطمة زهرة تتحدث إلي أولقا فشاهدته وهو يدخل المنزل..
دخل جمال وكانت الغرفة تعبق ببخور حبشي ورائحة البن ، جلس علي طرف السرير .. تعاملت معه سوسن بحنو ودراية وهو يرتجف في خليط عجيب من الخوف والرغبة المحمومة...
كان الخبر قد وصل إلي والدته فالحاجة فاطمة زهرة كال "سي إن إن" لا يفوتها (بريكنج نيوز) جاءت الوالدة مصحوبة بالحاجة فاطمة زهرة لتخبط علي الباب بشدة.. خرجت إليها سوسن والحاجة بتول منزعجتان..
حاجة آمنة: ولدي وينو..
سوسن : قاعد جوة اتفضلي يا حاجة..
حاجة آمنة : تحجي في جمل أعور ما بتخجلي أسه ده لبس تلبسيه..نادي لي ولدي..
يسمع جمال الجلبة فيخرج لمعرفة الأمر..
تجره والدته من أذنه وهي تشتمه مر الشتيمة..
تدخل سوسن وهي مصحوبة بشتائم الحاجة بتول طالبة منها إخلاء المنزل..
بكي جمال من الحرقة والحلم الضائع وعاد من جديد ذاك الطفل الحائر بعد أن كان علي بعد خطوات من أبواب الرجولة..
كان جمال وسوسن يشكلان الخبر الأساسي في النشرة المسائية للحاجة فاطمة زهرة..

..

الاخ خالد الحاج
يسلم قلمك فكم عشقت هذه الطريقة في السرد عند الاستاذ علي المك التي تجعلك تركض خلف النص ركضا.وكم عشقت القصص المستمدة من الواقع عند الاستاذ الطيب صالح وكم عشقت الجمال في الخرطوم تلاتة حيث قيل ال.......بالشفاطة والايسكريم بالشوكلاتة.
كبيده

إزيك يا أبابشير
شوق والله

يعني يالطيب الزول ما يفضفض
الشكية لله :o :o

(2)

شخصيات من حلتنا

العم أبوشوك




الساعة الرابعة صباحا .. خبط علي الباب ..
الحي الله والدائم الله .. الحاج أخوي صحي لي ولدك النجيض ماشين علي المقابر حاج إبراهيم تعيش انت .
يوقظني الوالد قائلا : قوم أمش أكسب ليك حسنات حاج إبراهيم توفي وعمك أب شوك منتظرك.
أحمل (الكوريك) الصغير وأخرج وما زال النوم يداعب أجفاني ، يبادرني العم أبو شوك :
يا زول النوم ملحوق أرح نلحق البطان ما يخربوا القبر علي الزول.
نركب في العربة (البوكس) مجموعة من الشباب في إنتظارنا تتحرك العربة نحو المقابر ، وأبو شوك يردد الدوام لله.. الدوام لله.. ويصمت فجأة ثم يقول :
يا شباب أدونا سفه باقي أنا حقتي نسيتها في البيت من العجلة .
فيعطيه أحد الشباب (حقه )تمباك فيأخذاها قائلا :
بطان أخر زمن كمان سعيتولكم (حقق) .
يضع خمشة من التمباك في فمه ويواصل الترديد من جديد الدوام لله .. الدوام لله ، نصل المقابر فينظر الكل ناحية العم أبو شوك ، هو الذي يحدد أين يحفر القبر فيشير قائلا : هنا
يبدأ الشباب بالحفر وهو يحثهم علي الإسراع ويوجههم حتى تأتي مرحلة (ود الأحد) يوقفهم ثم ينظر ناحيتي قائلا :
قوم يا زول صلح للمرحوم بكان رقادو .
أبدأ في الحفر فيبادر الشباب (أجره صل) يريدون المشاركة في الحفر فينهرهم :
لا خلوه اليتمو الشايقى نجيّض لما ماتت بتول الله يرحمها قال ليكم ود الأحد ده صغير غالطوهو أها المرا نختها ونرفعها زي الصاج في الطابونة لامن الجنا نزل صلح ود الأحد والمرا ماشاء الله نزلت مرتاحة تب دحين لا تشاغلوهو .

أذكر ذلك اليوم جيدا بعد أن انتهينا من الدفن ناداني علي جنب وسألني :
إنت يا جنا بتعاين للنسوان ولا شنو ؟
إستغربت سؤاله ولكنه لم يمهلني حتى أرد فبادر قائلا :
باين عليك ملعون يا جنا المرا عليك أمان الله تقول مفصلها جلابية ..عارف مقاسها تب .. أمش الله لا تاجرك .
كنت أداعبه أحيانا .. تعرف يا عم أب شوك لما تموت والله ( أجهبذ) ليك ود أحد ما حصل قبل كده أريحك تمام .. فيغضبه ذلك ويبدأ في شتمي :
أمش يا ملعون والله أنا أدفنك وأدفن أبوك زاتو غور من وشي الله لا كسبك ...
كانت الابتسامة والضحكة يتبعانه حيث سار وله مناكفات لطيفة مع الحاجة فاطمة والأخيرة تهوي تربية الأغنام وهو شايقي متحضر يزرع الزهور في فناء منزله والأغنام والزهور كالماء والنار لا يجتمعان ، فتراهم كل صباح في مشاداه :
يا حاجة فاطنة يعلم الله اللبن البتشربيه من غنماياتك ديل حرام عليك غنماياتك يا فاطنة بلا زهوري وأكياس النايلون كانن فطسن يا فاطنة الله يسألك في شيتن يقولولو البرسيم إشتريه للغنم تلملمي في القريشات انت شن قايلها ماك حارساهم ويومك التموتي يا فاطنة يمحقوهن البطان في السفاهة.
وترد الحاجة فاطمة :
أب شوك يموت نصك يالمابتشبه الرجال غنماياتي ديل عندي أخير من وليداتك الطالقهم في الشارع النهار كلو يا راجل ما تشوفلك شغلة غيري.

..وللحاج أبوشوك منكفاته مع مسئولي الجمعية التعاونية فهم عنده حرامية يسرقون مال الغلابة : انتوا حرامية شي سكر وشي شاي ولبن علب تمشوا من الله وين .
وكانوا يخافون لسانه فيعطونه ما يطلب إلي أن جاءت اللجان الشعبية واضمحلت (كوتة) السكر من ستة أرطال إلي ثلاثة أوقيات فصار يترحم علي أيام الحرامية ويقول:
الجماعة ديل (يقصد اللجان الشعبية ويتحاشي ذكرهم بالاسم) الله ما بعرفوه لا يرحموا لا يخلوا الله يرحم الله يقطعهم من وشينا نشفوا ريقنا.

أبو شوك كان في الستين أو نحوها ، مشارك تجده في كل أتراح وأفراح الحي ، تجده دوما حين تحتاجه ولا ينتظر شكرا ، ظل محتفظا بلهجته الشايقية رغم سنواته الطوال في الخرطوم ، أخبرتني شقيقتي أنه توفي إلي رحمة الله ، أسأل الله له الرحمة والمغفرة ، واتمني أن يكون أبو شوك قد وجد من يصلح له ود الأحد ولعن الله الغربة فقد حالت دون وفائي له بوعدي .
.

العزيز خالد الحاج
سرد رائع وجميل وواصل وانحنا منتظرين
تخريمه
انت وكت نجيض كدا ما تلمو لي العنف ضد المراة في بكان واحد
ولك اليحايا الطيبات

http://sudaniyat.net/vb/images/smilies/biggrin.gif

دا شنوووو ياخال !!

عليكـ الله يا خالد عمايل جمال دي عمايل طفل صغير حائر ؟





حائر انا يا اخوي :confused: :confused:

الحكى حلو ولذيذ ياخالد، واصل وكان امانى جننتك وغلبك تتمهم، انا بسلفك جاكولين ونقول بقت من بنات حلتكم ;)

(3)

شخصيات من حلتنا

علي ود نفيسة (علي كشه) :



ينادونه علي ود نفيسة ولا يعرف أحد سبب التسمية ولكنه لا يتضايق من الإسم علي كل حال.. أما إسم علي كشة والذي كاد يغطي علي إسم ود نفيسة فله أسباب كثيرة بعضها يحكيها علي بنفسه وهو يضحك والآخر يحكيها رفاقه ومعارفه وعلي شخص لا أعداء له ليس لأنه شخص فاشل فعلي مكنيكي ناجح جدآ لدرجة أنه يولف بعض قطع الغيار الغير متوفرة للسيارات ولكن لأنه صاحب نكتة ولا يتأخر عن مد يد المساعدة في فرح أو ترح في الحي.
سألته الحاجة فاطمة زهرة مرة :
إنت يا علي يا ولدي سموك علي كشه ليه؟
تلفت علي وردّ عليها بتهذيب كبير والله يا خالتي فاطمة السبب نميري!!؟
لم تفهم هي المقصود ولم يتبرع هو بالشرح..
كنا جالسين أما طاحونة عم حسين وجاء علي كشة وسلم كعادته وجلس.
وكالعادة أيضآ بدأ حديثه بنكتة : يا جماعة سمعتوا آخر نكتة؟
الشباب : لا . يا زول قول..
علي كشة : الفلاتي مشا للحبشية وبعد ما .... رفض يديها القروش حقتها ، الحبشية زعلت شديد وقالت ليه إن شاء الله تمرض ويجيك أيدز !! الفلاتي قال ليها : إندي .
ويختم بضحكة مجلجلة لا يفوتها في العلو إلا صوت "جعفر الموش" بصوته الجلف وهو يؤذن لصلاة الصبح.
حسن : يا علي كدي أحكي لينا ليه سموك علي كشه؟
علي كشه : إنتوا في علي كشة ولا في المصيبة فاطنة ظهرة دايرة تعرف سموني علي كشه ليه؟ بالله شفتوا المرا المكشكشة دي هو أنا ناقص والله باكر ألقي الخبر مذاع في مونتكارلو..(علي يتابع كل الإذاعات ، لندن ، مونتكارلو ، القاهرة ويردد الأخبار بفخر كدلالة علي أنه مثقف).
حسن: كدي أحكي لينا بالله يا علي السبب شنو..
علي كشه : السبب أسألو منو أبراهيم ده..
أبراهيم : يا علي يا أخوي أمرقني بره من قصصك دي يا زول إنت مشيول حال وأنا زول بقيت أبو عيال.

علي كشه : سمح ما دام أبيت تحكي بحكي أنا ويضحك مر أخري.. تعرفوا يا شباب مرة أبراهيم ده قال نمش
شارع كترينا لي بيت حقوص الحبشية ، والأيام ديك شريعة نار والبوليس كشاتو مدورة ، أها مشينا أنا وأبراهيم أخوي ده وفلان وفلان وعليكم آمان الله دخلنا كده وبدينا نستمخ الكشة جات وكان عمك الصول داؤود هو القايد الكشة .. أنا قاعد وحاتكم في السرير أم فكو زي ما الله خلقني أسمع ليك أصوات البوت وكرعين العساكر وصوت عمك داؤود الما بيغباني قمت لبست ليك البنطلون وحاتكم بدون لباس وكمان بالقلبة وإنحشرت ليك تحت السرير من حظي الكويس العسكري طلع بيعرفني رفع ليك الملاية وعاين تحت السرير وقال لي يا علي إنت قايل نفسك مندسي جزمتك دي إنت قايل في زول ما عارفها..المهم خلاني مرقت جريت ليك في زقاق ضيق كده وطلعت في الحنفية وتلبت بالحيطة وحاتكم نزلتي كده لما فيني كلب عضاني في كراعي.. مشيت بيت العزابة شحدت لي قميص ومن هناك للشفخانة الدكتور قال لي تاخد حداشر حقنة وتمش تشوف الكلب كان لقيتو حي توقف الحقن.. أخدت الحداشر حقنة ومشيت أشوف الكلب حي ولا مات والله يا جماعة وقفت ليك جنب بيت ناس حقوص يجي الكلب الما بيغباني مارق زي الطلقة ويعضيني تاني. أما الإسم جا من وين فسببو نميري الله لا تاجرو قاعدين أيامها ديك في بيت ناس سمير التمرجي نضحك ومعانا بنات يغنوا ومبتهجين وما عندنا شغلة بي زول أكان الكشة تجي وجابوني ليك في التلفزيون (علي أربعين جلدة وشهر سجن) غايتو أنا الأربعين جلدة أكلتهن جعولية ساكت لكن من اليوم داك بقيت أشهر من علي قاقرين علي كشه علي كشه الله لا كسبك يا نميري.

رهن علي منزله ليضمن أحد أبناء الحي الذي سجن في شيك من غير رصيد وعندما تسأله كيف تضمن السداد يا علي يقول لك وكيف نضمن إننا نعيش لي باكر !! الله في.؟؟

علي شخص لا يعرف الغضب إليه سبيل يساعد المحتاج ويتفقد المريض أول من يقيم "الصيوان" في فرح وترح
آخر عهدي به أنه لا يزال أعزب ويفسر الأمر بأنه ما دام إسم كشه ده موجود فسيظل أعزب ولن ترضي به فتاة عاقلة.. وشخصيآ لو كنت أملك من الأمر شيئ وتقدم علي لأحد أخواتي لما ترددت في الموافقة فهو نعم الرجل..
الله يطراك بالخير يا علي ود نفيسة.

العم الحبيب : خالد الحاج .

سرد ممتع تتداعى الذكريات اها حنيتكم ما بتفارقكم رحمة الله على الحاج ابو الشوك واصل ونحن متابعينك وياما نطلع بعبر وحكم من تجارب وحكاوى الماضى .
مع تحياتى عبده

(4)

العم صالح الحلفاوي:


الساعة ما بعد منتصف الليل شتاء أحد أعوام الثمانينات...صوت صريخ عالي يقطع صمت الليل الطاغي...حرامي..
حراميييييييي..الحرامييييييي. كان مصدر الصوت منزل الخالة مارية.. وقد أخرج الصريخ كل الحي وكان أسرعهم جعفر الموش وعصام ..قبضا علي الحرامي وأوسعاه ضربآ حتي أن بقية شباب الحي لم يجدوا بدآ من التفرج فقط فقد كان اللص المسكين ضعيف البنية ناحل الجسد. ولكنهم ربطوه إلي عامود الكهرباء علي كل حال.....
بدأت الإقتراحات من الجمع كان أعقلهم يطالب بتسليمه البوليس.. وبما أن حوادث السرقات قد تعددت في الحي في تلك الآونة فقد كان إقتراح العم صالح الحلفاوي قاطعآ ...
العم صالح : إحنا لازم نجعل منو (إكزامبل) -نموذج، عبرة- (يدخل العم صالح علي لهجته الخليط من المصرية والسودانية بعض الكلمات الإنجليزية ويقلب الخاء إلي هاء وحرف الصاد إلي سين) .

جعفر الموش: "زرقوا" ليهو الشطة الكلب ده!!

لاقت الفكرة قبول سريع من الجمع المتواجد وتبرعت أولقا بالشطة إلا أن علي ودنفيسة رفض تبرع أولقا بحجة أن الشطة الحبشية باردة ولن تترك لأثر المطلوب وأسرع إلي منزله طالبآ منهم الإنتظار ولم يطول غيابه..عاد وهو يحمل كيس "أتي" بين الليان والنشفان وقدم الكيس.. أخذ عصام الكيس في يده وهو يتبسم كأول بادرة للمرح بين الحضور فقد كانوا يتعاملون بجدية تفوق جدية أركان الحرب ، أخذ الكيس قائلآ والله ده تبرع غالي يا كشه؟؟
.
علي ود نفيسة: دي شطة "قبانيت" وارد كسلا كنت خاتيها لليوم الأسود..

تلفت صالح الحلفاوي وأعطي أوامره للنساء والأطفال بالرجوع إلي منازلهم وكان صوته قاطعآ فخلت الساحة إلا من الشباب والحاجتين فاطمة زهرة وبتول بالإضافة إلي أولقا ولم يكن الأمر مستغربآ فهن علي كل حال لا يدخلن في تصنيف العم صالح بقوله نساء.. كما أنهن لن يلقين بالآ لأوامره .

قام عصام بمساعدة الموش وعلي بعملية "تزريق" الشطة للص المسكين والذي ظل صريخه يعلو حتي أن الموش نسي أن يؤذن للفجر ذلك اليوم. وفي الصبيحة تم تسليم اللص للبوليس مع نكران تام من الجميع لعملية الشطة.

يعتبر العم صالح معجزة من معجزات الزمان بل كل الأزمنة.. متزوج من ثلاثة نساء يسكنون جميعآ في منزل واحد وللعم صالح ستة عشرة ولدآ وعدد غير معروف من البنات.. لم يرتفع لنساءه يومآ صوتآ وكل منهن تعتبر أم لجميع الأبناء، ضابط سابق في الجيش السوداني أحيل للصالح العام بعيد حركة حسن حسين الإنقلابية ..رئيس الجمعية التعاونية في الحي ..مدرب فريق كرة القدم.. وقائد لتيم الكتشينة يجيد كل أنواع اللعب من "كنكان" و "وست" و "هارت" ..
ومن معجزات العم صالح والتي أبطلتها الإنقاذ أنه جعل من زاوية الصلاة في الحي مركزآ وكنتين للجمعية التعاونية ومكان للصلاة وتجمع للعب الكتشينة بعد صلاة العشاء..
تجدهم يلعبون الكنكان حتي منتصف الليل ويطول جلوسهم في رمضان. وله نوادر تحكي مع العم علي وراق والحاج أبوشوك غريميه في اللعب.. من أشهرها تلك "الخمسين" الغير معترف بها والتي كانت حديث الحي لشهر أو نحوه.. رمي علي وراق "الدو" في لعبة الكتشينة وكان العم صالح ينتظره بجوكر "مخاواة" فسحب الكرت سريعآ قائلآ (همسين) فرفض علي وراق القبول بها مصرآ علي صالح أن عليه أن يقول (خمسين وليس همسين) وأصر صالح علي الإعتراف بالخمسين وإلا لا لعب لبقية اليوم وقد كان. إلا أن الخمسين صارت حجوة في الحي ومثار للتندر لزمن. كذلك وصفه لعلي وراق بأنه هرهار "خرخار" .
بعد خروجه من الجيش بقرار حكومي عمل العم صالح لفترة في دلالة الخرطوم وكان يخبر أثرياء الحي حين تكون بعض معروضات السفارة الأمريكية في الدلالة.. ويحكي أن العم صالح كرر علي مجموعة العجائز أن هناك بعض معروضات السفارة ستعرض وعليهم التبكير في الحضور فتأخروا وبيعت المعروضات لشخص آخر وحضر رفاقه وحين شاهدهم قال لهم موجهآ حديثه لأبي شوك : أب شوك "تو ليت" ولم يفهم أبوشوك معني كلمة تو ليت
فالتفت إلي علي وراق سائلآ عن ما قاله صالح الحلفاوي ووجدها علي وراق فرصة يمارس تنكيته عليهم فقال لأبي شوك قال ليك يا وليد.. غضب أبوشوك غضبة كبيرة ولو لا تفسير علي وراق وشرحه للنكتة لم رضي عنه علي الإطلاق وكان غياب أبوشوك من لعب الكتشينة هو سبب حرص علي وراق علي الصلح بينهم.

من أمتع ما أذكره حضور مباراة هلال مريخ في منزل العم صالح وينقسم أبناءه تقريبآ في ميولهم بين هلالاب ومريخاب والعم صالح نفسه هلالابي مريض بحب الهلال لدرجة الهوس.. وتراه يقف مع الجمع في الزاوية الجنوبية الشرقية لميدان الأمم المتحدة يمارس الغلاط ويتحدث عن الكرة وزمانها الذهبي ويحمل صحف في يده كوثائق مثل السودان اليوم وبعض الصحف القديمة.

توفي العم صالح الحلفاوي في عام 1993 وقمت شخصيآ بحفر ود الأحد له وقام العم أبوشوك بزرع شجرة نيم علي قبره كنت حريص لعام بحاله علي سقايتها مرة كل أسبوع.
غفر الله للحاج صالح وجعل الجنة مأواه.