ليست بيت أحد منا .. ( سودانيات) منبر للجميع!!
سودانيات ليست بيتنا .. هي منبر للجميع !!
ديباجه .. بمثابة توطئه: لم يكُ مشروع سودانيات في ذهن (مؤسسها) المرحوم خالد الحاج، إلاّ إضافة جديّة وجديدة ونوعية لمشروعات التنوير الإنسانيه في هذا العالم الفسيح، وبحسب حوارات كثيرة دارت بيني وبينه وبوجود آخرين ( دون إدعاءات) – فأنا مُضطر هنا لذكر ذلك في سياق المرافعة فقط – لا أدنى ولا أعلى، وضمن تلك الحوارات ( بعضها موثق)، أكدنا ( من ضمتهم الحوارات) على أن مشاريع التنوير سرعان ما تنقطع (كهربتها) متى ما فارقت دروب نُصرتها للحريات، ببساطة لأن الحرية هي أساس التكليف، وهي أُس التنوير. () بالطبع هنالك بأس شديد، وخلاف (لضيض) بين جموع الناس المطروقة رؤوسهم على سندانات الثقافة والفكر و (سك) المصطلحات و فكها. ولست هنا لذلك إلاّ عبر إشارات – كما اعتدت – أولاً : لأتجنب ولوغ (اللاغين) إلى متن هذه الكتابة لإبتزازها – تقرأ- تخريبها – إن شئتم، و أولاً أيضاً .. لأنني من عُتاة المُدًعين بأن خراباً كبيراً حاق بالمنبر من جهة (الحريات) فأقعد به وحوّله إلى (نادٍ) إليكتروني للمؤانسة، وممارسة الإجتماعيات، وربما في نظر كثيرين – جابههم البعض بغلظة – تحول إلى مكان للـ( حُبكانات)، ولا ضير في كل ذلك ، لكن أن يخشى الناس الكتابة والحوار ويحتفون أكثر بـ( عزائم) ولقاءات اجتماعيه، وفلانه (عرسوها) وبنت (فلان) نجحت، ويفردون لذلك مساحات حُرة في المنبر العام، مقابل (دسدسة) كل الحوارات الجريئة والكتابات الخلافية الكبيرة والعميقة في داخل (البيت) حتى لا يطلع العابرون على (عوراتنا) فهذا أمر محزن وضد الخط الرئيس الذي ابتدرناه في حواراتنا مع المؤسس، وبالتالي فإن المنبر بطريقة تقديره – تقرأ – رقابته – على المطروح، فإنه يجرجر العمل فيه إلى حلقات للونسه (والسفسفة) الإليكترونية، - وبالتالي فربما سيفضل كثيرون (فيس بوك) و (تويتر) و أخوانهما عليه، لأن هنالك من جيروها بحكمة مجيدة من أماكن للتنزه و الـ( حبكانات) – على حد قول أحدهم- إلى مضخات لثورات عظيمة أحدثت دوياً هائلاً ورجة عُظمى وخلخلت موازين القوي وغيرت الخرائط السياسية – وانتم تشهدون. () عبارة مثل (سودانيات) بيتنا، وأكثر من يرددها – بالطبع- الصديق ناصر يوسف- وناصر هذا – يقولها بطريقته الخاصه، وهي لأئقة معه، أنا أقدر ذلك لأني (إدعي) أني أعرف – ناصر جيداً- لكنها في الواقع و ( دون مشيئته) تشكل أكثر آليات مصادرة الحريات فعالية إذ تُدخِل (منبر عام) للحوار – هكذا اسمه إلى قعور بيوت لها خصوصياتها وطريقتها الخاصة بها في إدارة أمورها وتدبيرها، هذه العبارة (سودانيات بيتنا) تجعل كثيرون يستلون سيوفهم و يحشدون الجموع دفاعاً عن عرضهم وشرفهم و خصوصية منازلهم، سبحان الله- كيف يتسنى لإنسان (حر – بالغ – راشد) أن يصدق أن منبراً أليكترونياً هو منزله، ثم يتعامل مع الآخرين على هذا الأساس، لا تكتبوا هكذا (ناس بيتنا قاعدين)، ما عايزين (أغاني هابطة) الأولاد صاحيين، خفضوا الصوت شوية (ابوي عايز ينوم)، وبالتالي تصادر خصوصية (بيتكم) / حرية المنبر، تُذبح حريات المنبر (الحقيقي) على محراب بيوت مجازية، ويصدق الناس. هذا الذبح ، يجعل الناس تهرب، أن تسلم رقبتك لإدعاءات – محض إدعاءات زائفة بإن هذا الذي نفعله هنا – محض كتابة في بيوت أسر محافظة- نحن لا نريد ذلك- لست وحدي الآن – أنا أتكلم باسم كثيرين- ومؤثرين حاورتهم على مدى أكثر من شهر حواراً عاقلاً وعميقاً_- و كلفوني بهذه الكتابة- فلا يمكن أن تسرق مجموعة محدده هذا المنبر وتدخله بيوتها – للأسف هذا ما يحدث. |
وللأسف – ما لم يعالج الأمر – دون نواح كثير – بعقلانية- دونما ردود أفعال وتهور – لا يلزم في مثل هذه الأمور، سيغادر كثيرين، وبصراحة كثيرون غادروا بالفعل، ليس الحريص على سودانيات هو من (يبكي) المرحوم ليل نهار- الحريص هو من يفعل شيئاً من أجل رسالته- ورسالته كما أعرفها أنا- ليست إسكان الناس اليكترونيا – فهو لم يكن وزير إسكان- كان مثقفاً اعلامياً وسياسي ملتزم ناحية اليسار- أليس كذلك؟
حسناً، فهذا ليس بيت أحد ، هذا منبر للجميع، من يأتي هنا ( ذكرا كان أم أنثى) فهو يأتي بشخصة فقط ، يأتي منفرداً أحد، ولأيأتي بآبائه وأمهاته وإن علون، ولا بأولاده وبناته وإن نزلن. دعونا نقول أن هذا منبرنا جميعا، ولكل منا بيته الذي هو ليس هنا، من يأتي هنا يعتبر مكلفاً وراشداً ولا خوف عليه من الفتنة (الساحقة الماحقة). () سودانيات (منبر) يذهب بسرعة كبيره نحو (هاوية) محتمله، ما لم يحدث أختراق ما لعقليات الونسات والنميمة والثرثرة – و تذييلها المنبر، بالإعلاء من قيمة الكتابات الحرة الداعية للتفكر والتأمل والمتعة والباعثة للحياة. سنظل مختلفين.. ولكننا لن نقبل أن يستعبدنا الناس. قال لي احد أهم أركان المنبر – أول أمس- ثم أضاف: لا يمكن أن يحدد لنا (.....و ......و .......) ماذا نكتب؟ وهم لا يكتبون شيئاً؟ بالفعل هذا ما يحدث هنا، مثيرو الهرج العظيم لا يكتبون، ينتظرون من يكتب ليهرجوا ن ثم تأتي الإدارة لتصادر و (تدس) وتقصي، بناء على عبارة (سودانيات بيتنا) والبهبشنا في عقر دارنا فـ( عضلاتنا تبش)،وتلك القصص نعيد روايتها هنا والآن، لأنها قصص للدمار والخراب. نعيدها هنا لنقول أن بعض الحيل التي يعتقد (البعض) انها بارعة – يلتقطها كثيرون بسرعة ويعتبرونها (سجمانه). لكن ما لم يشعر الناس هنا بأسى حقيقي لما آل إليه الوضع مقارنة ببقية المنتديات فليشربوا قهوتهم وحدهم ، فالبيت بيتهم ، أما أنا و (صحابي العشرة) فلا يمكن أن نعيش بالإيجار عمرنا كله ونسكن في نص (الأسر) الكريمة ، فإن كانت هنالك ثمة خطة (إسكانيه) جديدة تسع الجميع فمرحب، وإن كانت الدار (هذه) عليها لافتة مثل (دار كُتيف الأقرع) فمع السلامة. () أغنية (سكارى) قديمة : الفرسان العشره البوليس الكجره قايمين في ليلهم ساكاهم صبره . العاقل فيهم تقول (ملحوسها) عمتو في راسو يتاوق يكوسها قااايمييين في ليلهم ساااكاهم صبره . ________________________ |
سلامات عبد الجليل
كلامك سمح هؤولاء السلفيين يريدون ان نكتب و رؤوسنا فى الارض تحياتى |
اقتباس:
حقيقية أريد أعرف .. (بيت من هذا) .. حتى نستأذن منه و (نلم عفشنا ونرحل)، صحيح منذ فترة كثيرون هنا يشعرون انهم (ساكنين) بالإيجار لكنهم أيضاً يدفعون (حق الإيجار) شهر بشهر، وأسياد البيت بعد دا يكوركوا وما رضيانين، أها (الخطة الإسكانيه) الجديدة المطروحة اليومين ديل تتيح للجميع قطعة أرض. نريد أن نعرف يا أم التيمان .. ماذا يريدوننا أن نكتب، يعني يجي واحد من أسياد البيت ويكلمنا بوضوح ( انت يا عبد الجليل أكتب كدا) ( وإنت يا أميره أكتبي كدا) و (يا آمال ما تقولي كدا)، عشان ناس البيت ح يزعلوا لو انتو كتبتو كدا. بالله هل هنالك منبر في هذه الدنيا الفسيحة يفعل ذلك. نريد أن ... نريد تغيير النظام .. نريد أن يكون هذا منبرا .. وليس بيتاً. لأنو لو بقي بيت . حقو نحن نمرق من بيوت الناس، ما ممكن نكون سخيفين ونقعد سنوات هنا وبعد ما نكتشف انو دا (بيت) نصر على القعاد البايخ دا. السؤال: دا منبر واللا بيت؟؟ السؤال: لو دا منبر .. البحدد الحاجات البتتكتب هنا منو. الإداره ، واللا اللائحة. ___ ورونا عديل كدا .. عشان نعرف انتو وجهتكم لوين، مش ممكن نحن نمشي في اتجاهات عمرنا كلو ضدها. المنبر دا بتاع علاقات اجتماعيه، و و نسات، وبيوت بيوت وبس، واللا فيهو حتات للكتابة والإختلاف حولها، والحوارات ، والسياسية، والدين، والجنس .. و...و ... لو بقى تعالوا نتلاقي ونتونس .. اللمة وين، وفلان قال وفلانة مرقت، نحن (مش أنا وبس) ما عندنا وقت لـ( دا). قد نجد بعض الوقت ونكتب ، كما نريد ، لا كما يريد البعض. هذا هو الأمر يا أميرة والآخرون... وهذه المرة بوضوح شديد. أقول سودانيات منبرنا .. و ما بيتنا.. لانو (بيتنا) دي كلمة مورطة ومضلله وغامضة و (قامعه) للحريات مصادرة لها. |
التحية جاليلو
كلام اعتقد مافيهو شائبه ، ولا اعتقد ستجد رافضا لعلـّة فيه ..! المنبر منبر عام ، ومفتوح لكل ذى رأي وباحث للمعلومة او مشارك . توجد من اللوائح ماتنظم كل تلك الحراكات ...خارجية !! فقط نحتاج الى بعض اللوائح والقيــّم التى تنبع من دواخل المنتسبين لضبط الايقاع وتكامله مع الاخر .. لذلك سمى ب(البيت ) فالمعنى يشتمل على تلك اللائحتان .. |
شكرا سمراء على الاضافة الثرة
اقتباس:
|
الأحباب هنا وهناك :
الكتابة أمر عسير ومُكلف. مُلكفة جداً. لذلك تُفسدها الإملاءات والشروط، يُفسدها (تقويلها)، و ..... ولكن ما يُفسدها أكثر خطفها من صُحفها وإدخالها البيوت، حيث (المطابخ) رائحة البصل النفاذة، حد السكين، الغاز ، وغرف النوم، والصالونات، والرجال بالـ( عراريق الشفافة) و (النساء بأروابهن البهية)... دا شنو يا (سودانيات) ، شنو سالفة البيوت دي، وشنو الدّخل دي في ديك، من غير بعض (ناس) سودانيات يتعامل مع منبر (تنويري) على أنه بيت، ثم يريد من الجميع أن يتجهوا وجهته الخاطئة هذه، ويقرون بكامل وعيهم أن ( فعلا دا بيتنا) عشان كدا ما عايزين الناس ينتهكوا خصوصياتنا، نحن وحدنا من يقرر لهم (لأنه بيتنا) أن يجلسوا في الصالون، أو يتجاوزوا إلى (حمام النساء) والمطبخ وغرفة النوم. دي عقلية شنو دي، الماشي بيها المنبر، وبعد دا تدق لها الطبول ويرقصون على ايقاعاتها .. المنبر دا .. لو ما اتصلح وبسرعه، سوف يشيع إلى مثواه الأخير، وهذا أمر مخيف ومزعج، وغير مقبول، فلماذا السكوت (أيا شهرزاد)؟؟ هنا وحسب معلوماتي المتواضعه، مكان للكتابة الحرة، مكانا لطرح الأفكار والإختلاف حولها والتداول فيها، وتصعيد وتيرتها إلى اقصى حد ممكن؟؟ مش منبر حوار... ما لم (نفعل) وبجدية، ما لم نطور أداءنا وبفعالية أكثر، ونتجاوز عاطلي الموهبة، قليلو الحيلة الإبداعيه، الذين يأتون هنا ليفرقوا (وقتهم) بين (قبائل) الثرثرة والمناكفات والسعي لمصادرة الحريات وقتلها و إفشاء (اللمات) و ( الونسات) بين العالمين على حساب العمل الدؤوب والجاد، مالم نفعل ذلك .. كلنا ويدا بيد .. أحسن نمشي .. ونشوف منابر تانيه .. منابر حقيقية مش (بيوت ناس) يطردونا وقت ما دايرين، ويسكنوننا معاهم بمزاجهم، نجن ذاتنا ما بنرضى نسكن في بيوت الناس ونضايقهم، عارفين الظروف، عشان كدا أخير لينا نأجر إن شاء الله في آخر الدنيا و (عيبوا لي) الصالحة وعد حسين. |
عبد الجليل سلام
من يحاول ان يقصي الاخر هنا ؟؟؟ من وجهه نظرك اعضاء ام ادارة ؟؟؟؟ ومن كمم الافواه هنا ؟؟؟ او سكب المداد ومن يصادر الحريات ؟؟؟؟ دوما تنتهي حريتنا عندما تبدئ حرية الاخرون وكل فردا يكتب كل ماتجود به قريحة ونضجة وفلسفته للاشياء وفق تبائن في الرؤي والافكار فنعم سودانيات بيتنا الذي يجمعنا باخوة واخوات تمتد اواصر الصداقة والاخوة وتتسأمي الآلفة والاحترام ولا يضير ان تطغي الاجتماعيات وتؤطد وشائج الصداقه الاسريه اما الكتابة وطقوسها ولغتها فهي تكون وفق معايير لا تخرج عن رسالتها الساميه ولا نرتقي بغث اللغة ياصديق كن بخير |
اقتباس:
المنبر يا ستي اضحى لا يحتمل سوى (الونسات)، بقي زي قعدات الشاي على كورنيش النيل، لا يحتمل شئ سوى أن (تجدع) أغنيات ، او تقدم دعوة لحضور ختان انجال فلانن وسماية بت فلانه، عشان كدا يا سمراء بقى (بيت)، ودي الخطورة .. بيت يعني ما في طريقة الواحد يخش ويكتب عن الدين، عن الجنس، عن فصل الدين عن الدوله، عن الحريات والديمقراطية (لأنو ) اصحاب البيت كيزان مثلاً ، والكلام دا ما بنفع معاهم، و عشان كدا نحن (انا وكثيرون) برضو ما تنفع معانا البيوت الزي دي. خلوهو منبر للحوار والتداول السلمي للأفكار والرؤى، وبطلوا قصة (بيت) دي، وعوائل وأولادنا وامهاتنا، يا خي أولادك وامهاتك ديل جو هنا بصفتهم الشخصية واللا كأسرة استقرت خلاص وفرشت عناقريبها والخالة تفلي في بت أختها .. والحبوبة تمشط مرة ولدها ، و الجارة تتدخن في حفرة (نسيبتها).. يا سمراء دا بقى ما منبر البتة، والسبب معروف . والعلاج موجود ... |
اقتباس:
شنو غث اللغة دي .. ومنو الـ( لغته) غثه دا. بعدين إنت سودانيات دا بيتك كيف؟؟ ورينا بس، ورينا شهادة البحث مثلاً .. عشان نشيل عفشنا ونرحل ، نخليهو ليك ونشيل معانا لغتنا الغثة دي. بعدين من الذي وضع شروطاً للكتابة. وما هي. ورينا نحن (جهلة بذلك) .. أنتو العلماء ديل تعاولوا ورونا ، افشوا (شروط الكتابة) بين العالمين، تثابوا عليها. والله غريبه. انا شخصيا ما جيت هنا عشان لأغراض (توطيديه).. جيت عشان أكتب واقول (قولي) وبس، بعدين لو جاء توطيد علاقات ما (بنباهو)، لكن هل قام المنبر لأغرض الكتابة والحوار أم لغرض (التوطيد) دا. وكوني بخير. |
عبد الجليل عساك طيب..شكلك كدا مجهز ليك قنبلة نفرازية وبتمهد ليها من هسة عشان تنزلا في رمضان:D:p
تعرف استعمال كلمة بيت لسودانيات استعمال صحيح له مبرراته..تعرف ان العلاقة بين الأعضاء فاقت العلاقة بين الأعضاء وأهلهم حتي أصبحت سودانيات هي بيت العائلة الكبير..أنا مثلا عندما أكون في زيارة للسودان تجدني أفكر في أعضاء سودانيات قبل التفكير في أهلي لدرجة اني في آخر زيارة لي اتصلت باحمد زين لملاقاتي في المطار ولم أتصل بأي فرد من أهلي ولا أذكر اني لم أقابلك في أي زيارة فأنا حريص علي مقابلة كل الأصدقاء وأنت علي رأسهم.فهل ياتري لو لم تكن سودانيات هل كنا التقينا وهل كنا تعرفنا علي بعض:confused: من هنا جاء تسمية سودانيات بالبيت. أما باقي ما ذكرته فأنا أوافقك عليه 100% فبالفعل سودانيات أصبحت مثل نادي درجة تالتة به طربيزات كوتشينة وبنج وركن لعواجيز النادي..السؤال هنا كيف نغير ذلك:confused:وكيف نعيد ضخ الدماء في شرايين المنتدي.. |
سلام يا جليل..
أعتقد إنّو البوست جيّد.. وحقو الناس تدوّر نقاش جاد وملتزم وهادف.. أوافقك في جزء ممّا ذكرت وأخالفك الرأي في جزء آخر.. الشبكة عندي ما مستقرّة بالشكل المُرْضي للكتابة المستفيضة.. لكن ما مشكلة.. واصل وأنا حأجي اقول ليك اختلاف رؤيتي عن زاوية شوفك شنو.. في ما كتبته أنت أعلاه.. لكن مبدئياً.. البوست جيّد.. وأتفق معك في جزء كبير.. تحيّاتي مُرفقة |
اقتباس:
الأخ / فتحي مسعد.. سلامات يا صديق.. ما اختلفنا على العلاقات دي، مش كدا وبس – هي ظاهرة جيده وجميله وبها روح انسانيه راقيه ، انا اتحدث هنا عن أن (البعض)، رفع من شأن هذه على حساب تلك، وبالتالي (كسروا) ظهر المنبر. صادروا حرية الكتابة، أضحوا يحتفون بالكتابات الساذجة والركيكة، هسي انا أعمل بوست عن (الدخان) الناس كلها تجي جارية، قبل كدا جربتها أسوي كدا ونجحت الفكرة، برضو ممكن واحد يكتب عن الزار والمريسه، و ابكر العجلاتي – كلها ممكنه و ليس لدي اعتراض عليها، ممكن الواحد ما يكتب حاجة ويجي يشاكل الناس البتكتب عشان (يظهر)، برضو ما فيش اعتراض، لكن البجوا داخلين ويلقوا في (بيتهم دا) كتابة ما عجبتهم و يسلوا سيوفهم للدفاع عن عرضهم وأرضهم ، هم ديل المشكله، و هي دي مشكلة مصطلح (بيتنا) .. و أكتر من كدا .. (بيتنا دي) الـ (ح توقع) سودانيات (رب) وتدق بيهو الدلجة، دا لو لسع ما وقع (شفت كيف) نجن لا زلنا نحسن الظن في (منبرنا) و (بيتهم). --- على جنبه كدا: والله يا خواجة (سودانيات) بالطريقه الماشها بيها دي، ما زول فيهو نكهة بجيها، حتى البجي بطردوهو ناس البيت، وباقي القاعدين معفشين قريب، لو لم نتدارك الأمر. وانا الكلام دا ما قلتو ساكت، قلتو من خلال حوارات عميقة ومع (مين) مش مع ناس (أي كلام)؟؟؟ |
اقتباس:
عاين جاي ياعبد الجليل قالوا الشايل بطحة بحسس عليها انت نموزج للكتابه جميله ولا اجحف حقك ولن ترغم احد علي استثاغة غثاثة كتابة اوكتاب ما او سير ,,,, مشطات البته لانه لن يخدم الاهداف التي أنشأت من اجلها سودانيات ولم تتمكن من النهوض بمستوي الحوار ومكتسباته الا في ظل تلاقح الافكار ونضجها فالعقول اذا التقت ارتقت وايه يفرق التوطيد قبل وبعد وما تفك فيني حذمة الفجل كلها :D لاني ناقشت خالد عليه رحمة الله مثلك في ماسبق في لونيه الكتابة والبوستات فرد علي هي عمليه تنفيس لا اكثر ولا اقل واحباط من الوضع الراهن وسيقدم ذو العقول الراجحة مايفيد ولن يبقي الوضع علي ما هو عليه ولا ننكر وصلت الشعوب في رفاهيتها لقمم الابداع فمبال من يعيشون تحت الاستبداد والقمع وانا لم ادعي معرفتي وعلمي الذي يفوق احد ما ولم اقصي احد لتلملم اشياءك فلن نجبر احد ما ان يكتب او نشكل له حياته لكي يصادق من واين ومتي ؟؟,,,, فالكل له مساحة من الحريه وشروط الكتابه لم احددها انا ولن يختلف عليها احمقان يافيلسوف سودانيات كن بخير |
اقتباس:
عبدالجليل ..سلامات متابع البوست منذ ميلاده الأول .. اتفقت وأختلفت معك فيما ذهبت اليه .. لكن عند هذه المداخلة أراني اختلف معك كليةً .. أولاً .. أنت تثور علي من يؤطر للآخرين كتاباتهم ويريدها وفق نهج معين .. تنتقد ذلك لتأتي هنا وتمارس ذات الفعل فتصنف الكتابة الي درجة أولي وأخري ركيكة .. موضوعات هامة وأخري سطحية ... قد يختلف معك البعض فيما هو سطحي وعميق هذه .. ثانياً .. أكثرت الحديث (عنهم) ولا أحد يدري حتي الآن إن كان داخل دائرتك هذه أم خارجها .. فإن كانت الشفافية مطلبك والصراحة نهجك فأعط هذه الضمائر حقها من التعريف.. ثالثاً .. وهذه أحسبها زلة قلم من كاتب مجيد مثلك ...وهي سطرك الأخير وتصنيفك للناس الي فئتين ناس (مش أي كلام ) وناس (أي كلام) .. فأي عضو لم تحاوره هنا سيصنف نفسه من الفئة الثانية وهذا مالا يليق في حقهم ..وحُق لهم أن تعتذر منهم بكل شجاعتك التي عهدناها فيك .. لك من الود عاطره ... |
اقتباس:
الأخ عبد الجليل .. سلامات أقدر كثيراً مجهوداتك في الكتابة، وزوايا التناول -مختلفاً او متفقاً- مع بعض جوانبها. أولاً : في البداية أؤمن على أن فكرة المنتدى( يكون بيت) بالفهم الإيجابي.. دي حالة جيدة تهدف لتعميق وتجذير العلاقات الاجتماعية بين أعضاء المنتدى، وترتقي بمستوى حميمية التواصل الاجتماعي وهذا ما لمسته وانا لي بضعة أشهر في هذا المنتدى. كنت مندهشاً جداً وانا أقرأ البوست للفهم الضيق الذي (حشرت) فيه معنى كلمة بيت بما تحمله الكلمة من حفاوة وحميمية وأريحية .. ومن واجبات تحتم على سكان هذا البيت حمياته ورعايته والعمل على تطويره .. دون الإحساس بأننا نمارس وصاية على احد او نصادر حقه. ثانياً : المنتديات عموماً هي إطار جامع لعضوية متباينة في الرؤى، هدفها الأساسي فتح مسارب للضوء ليتحول المنتدى بالنتيجة لبؤرة إشعاع إجتماعي ثقافي سياسي تنويري، وأرضية خصبة لطرح الأفكار نختلف أو نتفق معها (والحردان يحرد تحت ضل حيطة البيت). ثالثاً: حسب متابعتي لكتاباتك ومداخلاتك لم احس يوماً ان هناك مصادرة للرأي أو البوستات، وكنت اتابعك وانت تكتب خلف المنبر ما كتبت .. اتفق مع هذه الكتابات من اتفق واختلف معها من اختلف.. ولكنها لم تحجب أو تعدل. رابعاً : إن الحديث يا صديقي عن أن المنبر أصبح طارد، وأصبح منتدى (كيزان) وتتم فيه مصادرات الكتابة، أنا شخصياً اعتقد أن هذه كلها أدوات لترهيب العضوية وجعلها تحس بالغربة داخل المنتدى وهي أسلحة هروبية لا تضيف إلى المنتدى شيئاً.. والحديث بلسان الجماعة في المواقع الإسفيرية هذه (ثالثة الأثافي) حيث أن هنا لا يقص الظلم لأحد لساناً.. وكنت أتوقع استثمار الاجتماعات التي طالت لمدة شهر في فتح حوارات في المنتدى لمعالجة أوجه القصور.. وليس للتهديد بترك المنتدى والرحول إلى بيت آخر ملك حر. [frame="1 80"]اقتباس: المشاركة الأصلية كتبت بواسطة Amin Bushari [ مشاهدة المشاركة ] عبد الجليل صديق وزميل اسافير وصحفي مخضرم بلا أدنى شك هو اضافة للمنبر انتظرناه طويلا لكي يغرد بيننا .. وها هو اليوم بيننا فلا أقل من أن نرحب به في بيته وفي داره وســـودانيات وطن للجميع .. ويتسع للجميع [/frame].................................................. .............. [frame="1 80"]شكرا جاليلو لانك اوفيت بالوعد وكنت فى تمام الساعة وكفارة ليك وانشاء الله الان تكون بلغت الصحة وبكرة قلمك السنين فى الجريدة يقول يا ليل والله هذا ليس ترحيب ولكن فقط سلام لانه الزول مابيرحبو فى بيتو وفى بيتك بتكون امام حتى ولو بالاخلاص مودتى واحترامى ( وخاتنك للكبيرة ) [/frame] (هذه اقتباسات تم نقلها من شبكة سودانيات) (الترحيب بالعضو الجديد عبدالجليل في بيته الآخر عضوية رقم (404) حسب ما ورد في البوست. اذن يا صديقي الحكاية كلها بيوت.. ولا ندري ما الفرق بين البيوت اصطلاحاً. هل كان هذا البوست قراراً للرحول أم افتعال معركة لتبرير الرحول: الواضح أنك يا أخي قد قررت الرحول بلا رجعة .. فقط كنت تحتاج إلى مبررات للذهاب إلى منبر آخر .. وذلك لأنه كان عصياً عليك مفارقة منبر احتوى قلمك طيلة الفترة الماضية وقد آخيت فيه من آخيت .. فالتكن أكثر صدقاً ووفاءً لمؤسس هذا المنبر الذي استئمنكم عليه لتحملوا لواء الكتابة والتواصل والمحبة الذي عجزت يده عن حمله بعد ان اتاته المنية .. ووفياً لأعضائه بأن تسن قلمك وتكتب عن كل السلبيات التي تراها في المنتدى ومناقشتها ومعالجتها مع الأعضاء والإدارة .. وان تستنهض قلمك أيضاً في ملامسة قضايا الوطن وتناولها كبوستات للحوار والتفاكر لإثراء المنبر وتعميم الفائدة. عزيزي الفاضل .. إن الإضافة الحقيقية هي ليس اين تكتب بل هي ماذا تكتب ولمن .. يا صديقي ليس اخيراً: (ترى حين أفقأ عينيك وأثبت مكانهما جوهرتين هل ترى؟ هي أشياء لا تشترى). |
تحياتي ياعبدالجليل
أشكر لك شجاعتك في طرق هذه المشكلة التي تؤرقك وربما الكثيرين غيرك في هذا المنتدى.. ليست بيت أحد منا..(سودانيات) منبر للجميع!! وهذه المساحة من الحرية في أن (المنبر للجميع) تجعل من الصعب جدا تحديد وإستقطاب أنواع محددة من الكتاب والمواضيع. المنبر ياعبدالجليل مفتوح للجميع بإختلافات إنتماءاتهم وأفكارهم وقدراتهم مما يجعل أفكاري أو أفكارك أو غيرنا عرضة للمصادرة (المعنوية) أو الإنتقاد أو الإستهزاء أو غيره.. في تقييمي البسيط ياصديقي: المستوى النوعي للكتابات في المنتدى لا يتأتى بالقوانين واللوائح،ولا يحدده شخوص بعينهم، بل بالكتابه الهادفة التي تجد من يقدرها ويصفق لها وينتقدها..إذا كنت ترى أن المنتدى ينحدر بنوعية الكتابة التي يقدمها فهلا حملت لنا مشعلا يستنهض الهمم لكتابة أجمل.. ياسيدي هذا المجتمع الإسفيري ليس يوتوبيا، إنه يحمل سوءات مجتمعنا وهزائمنا الفكرية والسياسيةوالإجتماعية..هو صورة مصغرة لتلك التناقضات التي يحملها (سوداني) اليوم ومثقفها، وهي ساحة صغرى لمعركة التغيير التي لا تتأتى الا بالفعل المسبوق بوقفات جرد ومحاسبة للذات..أنا عن شخصي أحيي هذا النقد ولكني أختلف مع تحميل المسئولية لجهة أو أفراد بعينهم وليتنا لا نكتفي بلعن الظلام..ونوقد شموع التغيير سويا..فلنكتب ياعبدالجليل..وأنت أولنا..أكتب وأكتب وأكتب ولا يضيرك ماذا يكتب الآخرون..الكتابة الجيدة تفرض نفسها وليأتي من يعارضها ولنختلف معه..هكذا ننشر الوعي عذرا للإطالة إحترامي |
الأخ عبدالجليل سليمان
صباح الخير لك ولمن كلفوك بالكتابة انابة عنهم التحية على تداول أمر هذا المنبر الذي يهم الجميع دون شك وذاك بابٌ أوضح مايكون فيه الوفاء لرسالة هذا المنبر اذ البحث عن طرق الاسهام في بقاءه منتصباً يقوم بفعله في الأسافير مهمة الجميع دون شك ..!! محورين أساسيين تناولتهما في هذا البوست حسبما أعتقد : أحدهما يتعلق بعضوية المنبر وتعاطيها شداً وجذباً مع ما يكتب غض النظر عن اسهامها في مشقة الكتابة أو ابتدار الحوارات حولها .. وهنا يبدو لي أن امكانية " تنميط السلوك" باتجاه الابقاء على طابع المنبر يسارياً علمانياً متحرراً من كثيرٍ من المهجسات التي تقعد به عن ذلك .. مهمة جميع المؤمنين بأهمية ورجحان هذه الرؤية .. ولا يتأتى ذلك إلا بالنقد والتبصير ومزيد من الكتابة حوله وحول ما يتفرع منه فنكتب عن الدين والعلمانية والجنس والشعر والسياسة فنكتب عن الحياة من المنظور الذي نرى أنه يقودنا الى حيث نأمل .. كل ذلك مستصحبين فيه ميثاقه ولوائحه التي تنظم الكتابة فيه .. !! ولعل في التصدي بالحوار الجاد والموضوعي للرؤى المتقاطعة وغير المؤمنة بهذا الطرح حين تتعالى صيحتها في حينه يصب بالضرورة في اتجاه يرفد منبر الحوار بفعل أكثر ايجابية من التراكم وعدم المناقشة الذي يقود الى الاحتقان ومن ثم الى الانفجار .. وهكذا لاتلوح في أفق المنبر صور " السُكنى الأسرية ملاكاً أم بالايجار" اذ يستوى الجميع في الحقوق ولا يفاضل بينهم غير جهدهم في الاضافة التي تأخذ بيد الناس من ضلال الفكرة الى نورها المبين .. وذاك سجال لاينتهي ولا ينبغي له .. اذ أنه كنه الحراك .. والحوار فيه وحده تُستجلى الافكار وتوضع الرؤى حيث ينبغي لها أن تكون .. ويصبح الضيق منها والبرم بها أمراً مفيداً لجهة نقدها ونبشها نبشاً يخرج للقارئ خطلها جسداً له خوار .. !! أما المحور الآخر الذي ينصرف الى رؤية من يقومون بادارة هذا المنبر ففي تقديري أننا نصيب ونخطئ في التقييم والممارسة مافي ذلك شك ولعل أدبيات ولوائح الموقع جعلت لنا طرائق قدداً تسهم في تقويم تجربتنا الادارية حين يخالطها الزيغ ويقف النقد على رأسها اذ به تتكشف عورات البناء وفساد الرؤى وقصور النظر عن بلوغ آمال الناس وتطلعاتهم .. !! انه من المفيد أن نذكر أن أروع مافي هذا المنبر هو " تداوله السلمي" للادارة فيه فهي ليست ساكنة ورؤيتها ليست حًصاناً من أكف الأفكار الأخرى فيمكن اقالتها بسحب الثقة منها قبل أن ترتد اليها دورتها المحكومة بتاريخ محدد تترجل فتفسح المجال لآخرين ينهضون بالمهام فيضعون جهدهم الى جهد من سبقهم وهكذا تبدو الاشارة الى "الهجر الجميل " بالإيجار في ( الصالحة أو عد حسين ) احدى صور الضيق والبرم بالديمقراطية اذ ما أسهل من أن يمتطي أحدنا جمل الطريفي مفارقاً .. غير أنه تظل هناك خيارات أخرى أشد قرباً للمكان وللرسالة ولصاحبها كما أشرت بحق في التوطئة .. ويقف هذا الطرح وروحه شاهداً على ذلك .. !! لك تحياتي وتقديري |
تحياتي يا عبد الجليل
يا حبيب شكلك داير تشرد يا أخي بدل اللفة الطويلة دي، كان ترسل لينا رسائل داخلية تقول لينا: يا أخوانا أنا زول عندي إسم كبير و كتاباتي قاعد أتعب فيها، دحين عليكم الله نوع مداخلاتكم الما قاعدين تتعبوا فيها نوع: كيف؟ و ليه؟ و إشمعنا؟ ما تحشروها لي في كتاباتي، أنا داير أكب كلامي هنا من غير فلفلة عندي ليك تلاتة خيارات ممكن تمشي ليها: 1/ عكس الريح 2/ حب النيل 3/ سودانيات الإصلاح و البشارة |
اقتباس:
يعتقدون ان هذا المنتدي ملك لهم ماجرينه مفروشا بعضهم طفش الاقلام المبدعة وجلسوا على تلتها يعوس افلاسا وفراغا مواضيع ساذجة لا تسمن ولا تغني من جوع وها هم اخيرا يمهدون لمغادرة عبدالجليل بل وفرحين |
يسعد صباحك عبد الجليل انت وضيوف بيتك* الكرام
أعتقد كلنا نملك قدرا جيدا من العقل والوعى في حوزتنا ما يجعلننا نفسر ونحدد الدلالات كمفاهيم تميز أي وصف فمثلا وصف (هذا بيتنا) استطيع ان أفهمه وأشرحه بأن الصرح أو الواحة أو الحديقة أو..الخ استطيع أن أعثر على معنى مكتمل أو شبه مكتمل كإيحاء وأقصد بالإيحاء أي البعد الحجمي الذي يجعلني أرى في هذا المكان بيتي وهو في الأصل ليس ملكي رؤية تجمع ما بين الشئ وضده لذلك ترانا نتعامل مع كتابتنا بشكل أوسع أكثر مما مع محيطه يا عبد الجليل: نحن نحتاج إلى نظرية قوية ومتماسكة في النقد نخول بها وفيها أن ننظر إلى بيتنا هذا فنساهم في فهم بعضنا البعض فهم نطوره لدرجة أعمق وأفهم وأشمل لجميع ثقافاتنا في مختلف المجالات وميادين نشاطها وهذا الطموح لا يكون إلا بالتواضع وفصل العاطفة والصدق مع الكلمة الكلمة التى لا يشوهها التناحر اللفظي الذي يدمر النقاش النقاش الذي يتحول في بعض الأحيان إلى حالة غير منطقية تعيق تطور الفكر. |
اقتباس:
يااااااااا صديقي اللذيييييييييذ ( اللذيذ دي أنا قاصدها بالطبع) :) :) عبد الجليل سليمان جاليليو سلام وشوق... ياخي بالغت فيها والله ... قلت لي جملة سودانيات بيتنا دي فهمتها كيف ؟؟؟ إنتمائي ليك ولخالد الحاج ولمعتصم الطاهر ولشوقي بدري ولأروي ونبراس ومرافئ ومهند الخطيب وووووووووووو إلي آخر أسماء أهلي هنا أهل سودانيات ... أفخر بأن أناديهم بـــ ( أهل بيتي) .. وفي ترحيبي بأي عضو جديد ... أسعد كثيييييييييييراً أن أقول له / لها ... مرحب حبابك أبقي داخل لا جوه في بطُن بيتك الكبير سودانيات ... ولم أقلها إعتباطاً ... بل هذا هو عمق إحساسي بالإنتماء إلي هذا البراح .. وشايفك زي الأنقصت من المعني وألبستو ثوب شفااااااااااااااف كده يشفُ عن ما تحته هنا ... وتناولت جملتي دي بطريقة ... أو تناولت المعني من زاوية ضيييييييييييقة للغاية ... وألصقتها بنوعية الكتابة ( يا ناس ما تكتبوا هنا لأنو أهل بيتنا قاعدين يقروا وأبوي عاوز ينوم وشنو شنو ديك ) لأ يا عبد الجليل يا صاحبي ... جملتي أعمق من كده بكثير يعلم الله ... وعليك الله ما تربطها بآراء بعض الزملاء والزميلات هنا لو إنتَ فهمت منهم في تقاطعات مختلفه بإنهم تعاملوا مع كتاباتك أو كتابات غيرك بالفهم بتاع ( ما تكتبوا هنا عشان ناس بيتنا) ومعني سودانيات بيتنا أو البيت الكبير ...ما بتتقاطع مع المسألة التانية في رأيي ... مسألة منتدي الحوار وحرية الكتابة ... وحتي في ردك علي أختك سمراء : المنبر يا ستي اضحى لا يحتمل سوى (الونسات)، بقي زي قعدات الشاي على كورنيش النيل، لا يحتمل شئ سوى أن (تجدع) أغنيات ، او تقدم دعوة لحضور ختان انجال فلانن وسماية بت فلانه، عشان كدا يا سمراء بقى (بيت)، ودي الخطورة .. ياخي هنا بالغت فيها عدييييييييل كدي ... وشينه في حق قلمك يعلم الله ... حصل وناقشت أنا الأمر بإنو منتدي الحوار تحول بقدرة قادر إلي شات .. وده كان داخل رحلة (إجتماعية) إحتفاءاً بساره وعزو الحاج في مزرعة في سوبا ... وكان نقاش جيد جداً بين كل الحضور ... يعني حتي الرحلة الإجتماعية هنا بيتم فيها النقاش الجيد لأجل الإرتقاء بالمنبر يا جاليليو ... وقبل وقت قريب جداً دعيت بورداب الداخل عبر الفيس بوك وعبر الهاتف وحتي عبر النقاش المباشر مع بعضهم ... وقلت ليهم ... محتاجين نقعد مع نفسنا وونعري نفسنا بنفسنا ونشوف عيوبنا وين عشان نتداركها ... .... عن نفسي أنا مثلاً ... أنا ناصر يوسف الوااااااااااحد ده ... زول ساااااااااذج بطبعي ... بتعامل مع الناس بإنهم كلللللللهم أهل بيتي .. ( مع الفرق بيت البيت والبيت بالطبع ) أعني البيت سودانيات الجامع الناس بالمحبة والتواصل المشعلقه فوووووووووووووق ديك كعنوان للمنبر ...بتعامل مع الجميع بمحبة خااااااااااااالصة لوجه الله ... ودايماً بخت حسن النوايا بيني وبين بقية أهلي في تعاملي معاهم ... بحشر نفسي حَشِر في أي ( نقاشات أو تفلتات حااااااااااااادة بين الناس) بحاول أصلح ... وبحاول إني أنهي الخلاف علي أسرع وقت ممكن .. ( الخلافات الشخصية هنا أعني ) والممكن تصل لأبعد ما يكون ... سمعت كلام كتييييييييييييير جداً ... ممكن يكون وصل لدرجة الإهانة لشخصي ... عامل فيها حلال المشبوك ... وده دخلو هسي هنا شنو ؟؟ وإنتَ يا ناصر وصي علي الناس ؟؟؟ ودي أبويه منك ... وووووو كلام تاني كتير غيرو ... فجأة كده لقيت نفسي أنا الزول الكعب ... فشنوووووووو رجعت أفتش عن نفسي كويس وقلت يا ولد ... أعمل خط رجعه ... وخليك في براحك الضيق ده ... مالك ومال الناس ... الناس ديل فيهم الأفهم منك في الحياة دي ... خليهم يعوسوا عوسهم ... أهاااااااااااا ومن ديك وعيييييييييييييييييك ... يا عبد الجليل ... إطلاااااااااقاً جملة ( سودانيات بيتنا ) دي ما ليها أدني علاقة بالجزئية التانية من موضوعك الطرحتو هنا ده يعلم الله ... تعال وناقش بنقد يبني يا زول ... إنتَ وأنا وغيرك وغيري من الأعضاء ... تعال وأكتب المواضيع المهمه البتفيد الناس ... وتعال قول لناس الشات البتسووا فيهو ده غلط ... برضو حيقولوا ليك يا زول إنتَ مالك ومالنا ... إنتَ صاحب القلم الواااااعي والقادر يكتب الكلامات الكبار كبار ديلك ... أمشي أكتب كلامك ... ونحن ونساتنا دي عندنا أهم شئ ... فيبقي شنووووووووووووووو يا جاليليو يا صديقي ... أكتب إنتَ ما تراه مفيداً للناس ... فقطعاً سيكون مفيداً لنا ونحن نقرأك ... وبعدين ياخي أنا ما آسف للإطالة هنا ولا أي شئ ... :p لأنها ضرورة في الرد علي أخي وصديقي وبن بيتي سودانياااااااااااااااات .. هذا البيت الكبير الذي يضمنا جميعاً ... وجميعاً دي ... خت تحتها مليون خط ... حتي القُرَّاء الغير مسجلين هنا برضهم معانا داخل منظومة هذا البيت الكبير ثمَّ أخيراً ... شكراً لك بوافر المحبة |
سلام
عبد الجليل يقصد بى بيتنا ان فى بعض الاعضاء اعتبرو المنبر عبارة عن بيتهم لايجب ان يكتب الكاتب شئ غير راحة ناس البيت لان فى هذا البيت ناس لا ترضى و لا تعجبها هذه المواضيع الما محترمة فى نظرهم هم مره فى احد بوستاتى كتبت لى امال مداخلة مفروض لا اكتب مثل هذه المواضيع لان ابنتها تدخل فى منبر سودانيات |
اقتباس:
|
اقتباس:
المتأكد منو انو عبد الجليل ما ح يقرأ مداخلتي زيك، لأنه ليس طيبا مثلك و بالتأكيد ليس وفيا |
اقتباس:
هى فى النهاية اعتبرت المنبر بيتها الخاص جدآ و يجب علي ان اكتب مواضيع تناسب ابنتها لانها ما زالت صغيرة |
عبدالجليل .... سلامات يا باشا
دائماً بتعجبني كتاباتك وحرفك المرصوصة وموهط بعضهم بيقصد بالبيت الانتماء بالمكان ... وطبعاً ما اظنك قاصد هذه الفئة من الاعضاء المهم ما عايز اعلق علي بيت منو هو اصلاً بس دائماً يا عبدالجليل في مواضيعك بنلقاك بتستدرج فيها عنصر الجدل بصورة واضحة اغلب المواد الكتبتها هنا كنت دائماً بتثير جدل ما بخدم موضوعك بعكس لو النقاش دار في فكرة الموضوع من بوست النفزاوي استفذيت الناس فيهو باباحية الموضوع وتوقيته الخاطئ ثم من خلف المنبر والذي جعلت اغلبهم يتحسسون رؤوسهم .............. ثم موضوعك هذا ... لو ناقشت الفكرة الاساسية وحاولت توجه الناس لحوار هادف كان ممكن ... وبعدين في منتدي الحوار ده اغلب المواضيع هادفة يا عبدالجليل اتا من وين جاتك فكرة البيت دي وحتي في مواضيع في ظاهرا بتبدو ليك بوستات ونسة لكن لو دخلت جواها بتلقاها بوستات مهمة جداً مثلاً : SCAPTIONOZ ده عنوان بوست والاسم لعضو معانا في المنتدي اذا قريت الصفحة الاولي من البوست ده ممكن تلقاهو ونسة وترحيب بس لو اتوغلت لجوة البوست ده بتلقاهو بوست ادبي ... وفيها من اجمل شعر العامية السودانية ده نموزج لبوستات كتيرة المهم يا زول .... تحياتي |
سلام يا جليل..
مبدئياً يا صاحب.. أنا ذكرت بأن البوست بصورة إطارية وبدون الغوص في التفاصيل جيّد.. لاحظ أنا بتكلم عن مبدأ الفكرة.. فكرة النقد لوضع غير صحيح في رأيك.. لكن لو جينا للتفاصيل بنلقي كلامك مجرد "سفسفة" وبرضو لا يخلو من أسلوب همّاز لمّاز ، ودة في رأيي أسلوب ما جميل.. وإنت الكاتب الذي لا تعوزه اللغة الجيّدة.. وافقتك عبر مداخلتي الفائتة علي جزئية قلّة البوستات الحوارية.. وكنت قد فكّرت في أن نتناقش حولها بشكل جدّي وملتزم.. واختلف معك في اسلوب التناول الذي أراه يجافي الموضوعية ويفتقر للرغبة الصادقة في التطوير.. ذلك أنّ خطابك يضج بالتناقض أوّلاً، والسخريّة والاستهزاء ثانياً وثالثاً علي التوالي.. بدوت لي كأنّك تحمل سيفاً وتضرب ذات اليمين وذات الشمال بلا هوادة.. وذلك في رأيي ليس أسلوباً للتقويم.. اقتباس:
اقتباس:
أنا عن نفسي ما شايل حكاية مشروع سودانيات في ذهنية مؤسسها، والكلام العاطفي دة.. في حاجة إسمها لائحة وقوانين منظمة.. هي البتحدّد أني ما أكتب شنو.. خالد الحاج مات.. وحكاية الإجترارات دي "عموماً" بتعبّر عن إحساس عاجز ليس إلا.. ومنطق هش .. خالد الحاج مضي لحاله وسبقنا.. يبقي التلويح بفكرة إنو هذه ليست سودانيات التي كان يتمناها المؤسس.. والترحُّم الذي يشبه ضرب الكف بالكف.. ده عدم منطق ولا موضوعية لا نظير له.. يفترض انو كل زول وصل هنا لأجل هدف محدّد.. وليس لتحقيق رغبة شخص واحد، حتي وإن كان هذا الشخص الواحد هو خالد الحاج.. وفي رأيي لسنا هنا من أجل خاطر زول.. بل من أجل خاطر المعرفة.. والمعرفة فقط لا غير.. وأنا لو كنت هنا من أجل خاطر سودانيات الفي ذهنية مؤسسها.. ولقيت إنها اختلفت.. أصلاً ما حأتعب روحي.. بمشي طوّالي.. لكن لأني هنا من أجل المعرفة.. كنت داير أناقشك في موضوعة البوست الأساسية(أساسية دي بإفتراضي).. باعتبارك أحد الحادبين-افتراضاً- علي تطور سودانيات.. لكن قريت المداخلة رقم.(...) وعدلت عن الفكرة من الاساس.. لأني مرقت بفكرة مفادها انك قد نويت الرحيل.. استناداً علي غيرما اشارة وتصريح.. يبقي في ظني دة كلام مفارق..وقد أكون مخطئاً.. بالنسبة لي.. فعبد الجليل سليمان قلم يشكل اضافة اينما حلّ..مافي شك.. ولكنه مثله مثلي ومثل غيري، لا يشكل خصماً إذا ما غادر فضاءً ما.. وذلك لأنّ الاسافير هذي يا جليل، لها مقدرة هائلة علي الإلتئام.. والإحلال.. والشجرة لا يضيرها لو سقطت عنها ورقة.. مهما كان اخضرارها ورواؤها.. اقتباس:
تحيّاتي وحأجيك تاني حتماً. |
سلامات للجميع .. .. الآن في أوج (الشغل) .. فأسمحوا لي .. أن أتداتخل إجمالاً .. ثم لاحقاً ربما في (الليل) إذا كان هنالك ليل في خرطوم (السلفيين).. سأعود للإجابة تفصيلاً:
اولاً .. يا وجيده .. أنت تحدثت عن شروط للكتابه .. وسألتك عنها، ما هي تلك الشروط ، لا أكثر لا أقل. لكن فيما يختص بكتابة (غثه) فلا أعرف – ما الداعي لأن تقولي ذلك في مداخلة معي – ربما تعتبرين أن كتاباتي غثه – أو رثه – ولك حق ذلك، ولي حق الرد. - ثم يا وجيده .. انا لم أقل بفرض نوع محدد من الكتابة على الجميع، وأصلاً هذا غير ممكن. لكني في المقابل أعاني ( وغيري كثر) من محاولات للضغط علينا من مجموعات شديدة الصراخ، عالية الصوت، تؤثر على الإدارة التي سرعان ما ترضخ لها، وإلا بماذا تفسرين ما تقوم به الإدارة من مصادرات بـ( حيل) كثيره لبعض البوستات. ثانياً: قيقراوي – تحية لك، نعم أنا قسمت من (يكتبون هنا) ليس إلى فئتين بل إلى فئات كثيره، بعضها لا تعرف (الواو من الفاو)، لكني بالمقابل لم اسع إلى مصادرة حقهم / حقهن في الكتابة كما يشاءون، ويا قيقراوي أنا هنا أتحدى (أي أحد) أن يشير أو يأتي بدليل إلى أنني ألمحت يوما ما خلال سنوات وجودي في هذا المنتدي ( وانا قديم) وكثيف (العمل)، أو حرضت على ايقاف بوست أو مصادرته، بدعوى (نسوانا) قاعدات هنا، أو أخلاقنا وقيمنا، أو دينا، أو .... ألخ. من حقي أن أصنف الكتابات هنا، ومن حق الآخرين أن يصنفوني، لكن لا تصادروا ، ولا تُصادروا. هذه هي الفكرة. ثالثاً: اسامه عبد الماجد: لك الود يا سيدي .. وشكرا على المداخلة الجيده، لكني وفيما يخص عبارة (سودانيات بيتنا) قلت وبشكل واضح وقاطع أنها أضحت لدى البعض إحدى أهم آليات المصادره، ليست لدي مشكلة مع العبارة في مخزونها الذاتي، لكن لدى معها مشكلة عندما تعبُر إلى (حتات معقدة) فتصبح تحريضيه وقامعه، ويا اسامه صدقني هنالك كثيرون كتبوا هنا وحرضوا ودعوا لمصادرة بوستات وروايات و حثوا على (فصل) أعضاء مؤثرين (يمكنني أن أذكرهم بالأسماء) واحدا واحداً ، فعلوا ذلك مًستثمرين هذه العبارة، أنا قلت يا أسامه أنها عبارة (مفخخة ومضلله) وهي في ذلك تسعى لهدم (البيت) على روؤس الجميع. ثم أن (بوست) خلف المنبر تمت مصادرته، وإلا أين هو الآن يا أسامه، صادروه زمان – بس مصادرة (ناعمه) ... أنت وين يا حبيبنا. ثم أنني لن أرحل أبداً من (هنا) لأنني بنيت هنا منذ سنوات ما لم يبنه آخرون ولي (طوبات كبيره)، صحيح حصلت على عضوية في سودانيات بتاعت ناس طارق وبشاري، كثيرون هنا حصلوا على تلك العضوية، وأنا فخور بها، لكنها لا تعني الرحيل – كما فسرت، بالله انا رقمي مع الجماعة ديلاك (404) فور أو فور – (بيجو بس)!! يا أسامه .. لأن مؤسس المنبر – رحمه الله – كان داعية للحرية والديمقراطيه – نحن هنا لترسيخ تلك المفاهيم – التي لا تنفع معها – عبارة ( دا بيتنا) وأولادنا قاعدين هنا – عشان كدا أكتبوا عن الرحلات وعن اللمات وعن الأغنيات وبس. وبالمناسبة حتى الذين هذا كل همهم لم يكتبوا عنه بطريقة جيده . راجع البوستات – وقارن. وهنالك يا اسامه – وتابع أيضاً- من لم يكتبوا شيئاً أصلاً – فقط ينتظرون الآخرين ليكتبوا – ثم يسلون سيوف مداخلاتهم البائسة والتعيسه- و يخرجون حلاقيهم اللعينة المكتظة بعبارات من نوع (الحقوا – وقفوا – صادروا )، بيتنا اتخرب، ح نمشي وين، البيت ح يقع .. و .... و .... جعجعة فارغة – ولا طحن، وللأسف الإدارة تدعمهم بالرضوخ لهم، هي أيضاً تتعامل مع المنبر بهذا الفهم (بيتنا) وتخاف عليه وبهذا الفهم ايضاً- انا وآخرون ( زي عشرة كدا)، ومعنا (أغلبية صامته) ربما تتحدث بعد قليل- نقول بأن المنبر يتهاوي لسيطرة هذه العقليات البائسة عليه، ولتماهي الإدارة معها، ونريد أصلاحاً عاجلا، يبدأ من أن هذا منبر حراً يسع جميع من ارتضوا موجهاته و وقعوا عليها، وليس بيت أحدكم حتى يقرر ماذا نكتب وكيف، وإلا فلنرحل. لن نرحل أبداً لكنا لن نسكت، سنقول ما نرى، وهذه المرة بصوت عالٍ. رابعاً .. سماح .. شكرا لك، أعرف جيداً أن لا انه لا يوجد ( لا في الواقع ولا الأسافير) – إن كان هنالك ثمة فرق- مجتمعاً يوتوببياً- وانا شخصياً لا أريد أن أعيش في مجتمع كذلك – إن وجد- أن إنسان واقعي جداً – هكذا اعتقد. وهذه الواقعية – وليس سواها – هي التي تدفعني دفعاً للمطالبة بالإصلاح والتطوير وعدم الخنوع للعقليات البائسة التي تريد أن تحطم كل شئ وتستغل في ذلك عواطف السودانيين الجياشة (بيتنا – والحقونا – وحاق الخراب) ... ثم يا سماح مرحبا بالتناقضات لأنها سنة العيش المشترك بين الناس، ولولاها لما كانت هنالك حياة أصلاً. من ناحية أخرى .. من الذي يتحمل هذا التدهور المريع في المنبر – من الذي يتحمل تضييق هامش الحرية؟ ومن هم الذين يرفعون عقيرتهم بدعوات المصادرة، وما هي العبارات التي يستخدمونها في ذلك، وما هي مواقف الإداره – منها – وإلى أي جانب (يترجح) ميزانها دوماً؟؟ هنالك من يتحملون هذه المسؤوليه ولا بد من كشفهم – والإشارة إليهم بالإسم، وهذا ما سيحدث هنا. لأننا لن نتحمل معهم أية مسؤولية – لسنا مساهمين فيها- أليس كذلك؟ |
اقتباس:
ثم في (ثانيتك) يا رشيد .. انا قلت أن هنالك كثيرون يتفقون معي وحاورتهم في ذلك، و طرحت لهم فكرة انني سأكتب عن هذا الأمر، ماذا في ذلك، وماذا لو فوضوني بالكتابة نيابة عنهم في أمر عام ؟؟ ما المشكلة. يا رشيد .. أنا اريد رأيك أنت في هذا الأمر .. قله بوضوح ودعك من (دا شنو) و الترحم ما بنفع - وتقويلي ما لم أقله، ما معقول يا خي تجيب اقتباس لي اقول فيه بالحرف الواحد والعبارة الصريحة - أن البكاء لن يفيد - ما يفيد هو العمل- ثم تنسب لي عكسه وتبني عليه مداخلة كامله، صحيح أن اشرت في سياق (سودانيات بيتنا) إلى أن المرحوم خالد لم يكن وزيراً للإسكان بل كان مثقفاً تنويرياً - أين النواح والبكاء هنا ... |
اقتباس:
|
موضوع نقاش جيد جداً بدون حرابيش .. نقطة عبد الجليل واضح .. (ولكنى) .. ولكنى دى مهمة جداً .. ما يجينى زول يقول طاشى شبكة ;)
(ولكنى) أعتقد كل الذين أختلفوا مع عبد الجليل لم يولجوا الى النقطة المثارة .. لا أعتقد كلام عبد الجليل الكتير ده .. أعترض على (النقد) من حيث هو .. لا أنه سجل أعتراض على نقد لكتاباته أو كتابات غيره .. المقصود الذين يستلون أسلحتهم بمنع مثل هذه الكتابات ويعرضون أنفسهم حراس لهذا البيت من الإنحطاط .. بفرضهم أمتلاكه والوصايا عليه .. أنا ليس من الجماعة الذين ناقشوا الأمر وفوضوا جاليليو .. ولكنى أنضم لهم بكامل قواى العقلية :rolleyes: |
اقتباس:
المقتبس الأوّل كان توطئتك للدخول في الموضوع.. لذلك اقتبسته لتوضيحه حسب وجهة نظري بالمقتبس الثاني.. لأنني قرأتهما معاً.. وهذا كل شيء.. ليس من الجيّد أن نُعني بتطبيق رغبات شخص مهما كان.. ولكن يجب علينا ان نبتعد -أوان التحليل والتفاكر- عن اجترار فكرة ماضوية محدّدة، والتلويح بها عبر كل من يريد استمالة وكسب تعاطف الآخرين معه.. عندك فكرة يا جليل موضوعية قولها لينا.. وخلينا نتناقش علي أسس ومنهج تحليل واضح.. لكن لمّا تجي تغلّف لينا مناداتك من البداية بإنّو دي ما رسالة خالد الحاج.. في ظني دة كلام عاطفي.. وبعدين يا صاحب مؤسس سودانيات دة مش كان عضو زيّو زيّ الآخرين.. تسري عليه- وتُقرأ سرتْ- ذات النظم واللوائح التي تري أنت بإجحافها الآن.. فلماذا لم يقل بأنو يا خوانا دي ما الفكرة الكانت في ذهني للمنتدي حقي..؟ ولا دي ما رسالتي..؟ وبعدين أنا شايف أيّ زول بيفترض إنّو عندو رسالة بتخصّو.. ليه نأطّرو في الإخلاص لرغبة شخص ما..؟ أنا ما عندي رغبة أحقق مشروع خالد الحاج اللي كان في ذهنو.. وين المشكلة..؟ وبعدين فكرة الإخلاص دي ذاتها فكرة تحجيميّة للحد البعيد.. ومقيّدة جدّاً.. رؤيتي يا جليل أننا لو عايزين نتناقش في أمر ما يخص سودانيات.. يلزمنا الأوّل نشيل فكرة الإخلاص والأمانة والإلتزام بخط أعدّ سلفاً في ذهنيّة المؤسس.. لأنو الحياة -علي اطلاقها- زيّ البحار.. لا تثبت علي حال أبداً.. |
اقتباس:
ناصر يوسف – لك التحية .. هذه العبارة ( سودانيات بيتنا) بالنسبة لي .. وذلك مُعضد بأسانيد قوية .. راجع مداخلات من طالبوا بمصادرة كثير من البوستات والكتب والمقالات .. (كلهم) – دقق هنا- استندوا في مطالباتهم بالمصادرة والحذف والإلغاء على عبارة مفتاحية واحده – هي ( دا بيتنا)، وما عايزين زول / زوله، يكتب (الكلام دا) في بيتنا، لأنو نسوانها وأولادنا بقروهو، لذلك يا ناصر أضحت هذه العبارة أسوأ وأنجز آلية للمصادرة على حرية الكتابة في سودانيات، وأجبرت أقلام كثيرة على التوقف، أو (التخوف) أو المغادرة. ثم: يا ناصر .. انا استغرب لماذا (تنسبون) أنت وآخرين إلىّ كلام لم أقله – أنا يا ناصر ما قلت الناس ما تجي تتونس ، لكني سخرت من أن تسود هذه النوعية من الكتابة على حساب الكتابة المسؤولة، الكتابة التي يمكن أن تمنحك فكرة، أو متعة، و أرجعت (سيادة) الكتابات السطحية في هذا المنبر لسيادة العقليات المُعتمة والمغلقة التي (لا تطرح) شيئاً ولا تترك الآخرين يطرحون، بل تطاردهم وتحرض وتألب عليهم، وهذا كله ممكن و وارد – لن نستطيع منع أحد من أن ينتظر – ناصر يوسف – ليكتب- ثم يهوي بمعولة عليه و يبتز الإدارة فيجبرها على حمل معول آخر .. فينهد (بيتكم) – منبرنا على رؤوس الجميع. هسي أنت – راجع مداخلة بابكر عباس – اللي بيقول فيها وهو يخاطبني – شكلك عايز تشرد، يا خي بدل اللفة الطويلة دي، كان ترسل لينا رسائل داخلية تقول لينا ... الخ. - أنا ارسل رسائل داخلية (خلف المنبر) لـ( ناس بابكر عباس) عشان استأذن منهم وأشكى ليهم – هم منو ديل يا ناصر (ناس بابكر ديل)، هم اسياد البيت دا – هكذا تشي عباراته، وكل مداخلاته وكتاباته بإستثناء (معالجة الإقتباس) – الفائدة الوحيده – وذلك مكسب أفرحني جداً. أها يا ناصر – لي حق وما لي. هؤلاء يا ناصر استغلوا هذه العبارة الهدامه (سيئة الصيت) وفرضوا انفسهم أوصياء على ساكني (بيتهم)، لذلك وكيما يتطور المنبر ويمضي قدما في مهامه الأساسية – مهام التنوير وتكريس الحريات وتوسيع أوانيها، لذا لا بد من العمل سوياً إلى استعادة سودانيات من خاطفيها، واعادتها من قعور بيوت هؤلاء إلى كونها (لجميع) ، ومنبراً حراً، ليس بيت يُحدد لنا أهله ماذا نفعل فيه ومتى يحق لنا (أن نآخد دش) و نصلي النوافل ركعتين من (النازعات إلى الزلزلة). |
اقتباس:
فلا تلونها بالاحمر وتقصد بها معاني اخري عاوز تقول كلام خليك شجاع وقوله مباشرة فلا تتذاكي علينا فانت لاذكي ولا حاجة جلابي ليس الا تضحكني سذاجتك وهذا الخبث الذي تكتب به يكون واضحا مهما حاولت ان تتواري امكانياتك كدة ضعيفة |
اقتباس:
اها رايك شنو وبعدين عاوز توصل ياتو رسالة ولمن الخبث ينضح من مداخلاتك وكذا والطعن من الظهر كل هذا بدل مناقشة ما كتبت ياخ الفضاء اوسع من مخيلتك وارحب فلا تحقًر الناس وتضيَق واسعا |
اقتباس:
العبارة الفوق دى تعنى شنو ؟ وهل هى للتنابذ ؟ |
اقتباس:
بل يختارون من المداخلة ما يعتقدون انه يجرم ويتناسون من يلون الاباء بالوان تخدم اغراض السباب ويتدافعون للدفاع عن اصحاب البيت الواحد ضد الغريب عارفة لوبابكر كتب ياعبدالمنعم انت طيب عادي معاي هذا رايه اما اسم ابي ليس مجالا للتورية ولك كل التحايا والتقدير |
اقتباس:
تنابذ شنو ياسمراء:confused:بابكر عباس هو من أطلق علي نفسه جلابي وكان يثصد بالجلابة أغنياء التجار ووضح انو اتربي في حي الجلابة..ولكن استعمال عبد المنعم ليها لا يخلو من التهكم ودي متابعة لي ردودم علي بعض في الفترة الأخيرة العاملين فيها زي البلعبو مع بعض بنج بونج:D:D |
اقتباس:
يامنعم علي الرغم من انو الطيب هو اسم والدك وله كل الاحترام لكن مستحيل أن يقصد بابكر الاساءة الي والدك ولكنه أخذ الاسم كصفة لك هو غير مقتنع بصحتها فلا تتحسس ياصديق وأحسن الظن بأخلاق بابكر رغم خلافاتكما.. |
| الساعة الآن 08:33 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.