وآحة الترابلة،، مزارع بالواتساب!!
 

من منا لا يوجد بداخله (تربال) ؟! صغيراً كان أم كبير ؟! صراحة في ناس التربال الجواهم متملكهم وتلقى ظااااهر في مشيتهم ، وفي ناس من شدة ما تربالهم "ماكن" :biggrin: وظاهر مشيتهم في الواطة دي "غير" وحتى ولو اشتغل شغل واجباري اللبس يكون "بدلة كاملة" تلقاهو من دون ما يشعر يخلي القميص "بره البنطلون" ، ولو رابط " الكرفته" وعلى ذكر "البدلة" في ناس "ترابلة" لكن ظروفهم ساقتهم للمدينة تلقاهو لابس البدلة وأحد الكتفين بيكون مرفوع لي فوق " من الواسوق طبعاً" ويكون مُصر انو يواصل حياة المدن ، زي دا بدلتو أو بِدلو إلا يلبسهم هو !! لانها بيكونن إتفتلن من تركيبة الجسم وتغيّر شكلها وهو مازال ما مقتنع انو البدلة مااااا بدلة ترابلة !! القصة ومافيها سادتي ، التربال الجواي حماني (الهجعة) ، ومسّخ عليّ طعم النوم ، وخلاني (ازازي) لا قادر اندمج في حياة ومجتمع المدينة ! ولاني قادر على الرجعة !

السنة دي قلت أمهد للرجعة للبلد ، وآآاااااااااه يا البلد ، البلد يعني الريف ، أية ريف (ولو إني أفضّل ريفي ود حامد) ! والصورة المرفقة وصور حا تليها ، من (جزيرة نسري) جزيرة واقعة على نهر النيل ، في منطقة (ود حامد) ، غرب شندي ، شمال أم درمان ، فاجأة ابن عمي بأني عاوز أزرع السنة دي ، أزرع وانا في الغربة البعيدة " غرب أوربا" وباريس بالتحديد ، وأخترت ان ازرع بطاطس " ما ود مدن" ، حا أنقل ليكم مراحل الزراعة ، وتكلفتها ، وطريقة زراعتها وريّها ، وحراثتها ، وطرحها ، وجرها ، وتقنقتها ، ولفها ، ونظافتها ، وتسميدها ، الى حصادها إنشاء الله ، والى أن تصل لي ناس الخرطوم :smile: (إنشاء الله تنفعهم)

علماً بأن تيراب البطاطس جاي من هولندا ، والسماد من الصين ، والتراكتور من فرنسا ، " طبعاً في ناس ما حا يصدقوا"

انا مصدق لاني متاابع وكان المفروض اشتري التراكتور الاولاني
:biggrin:
مثل هذه التجارب الشخصية تفيد الاخرين كثيرا يا اخ خالد واخص منهم من لم يبارح السودان فسيفيد كثيرا من الرؤي الجديدة عليه فيتسع ماعون الخبرات وتتناقل الفائدة فيكون لك اجر السنة الحسنة ياحبيب...
اسال الله رحمن الدنيا والاخرة ان يبارك لك في الغرس ويكلاه بعينه ويجزل لك العطاء
ان الله ولي ذلك والقادر عليه

http://im88.gulfup.com/InZ6sm.jpg


بعد إستيجار الارض الزراعية " 6 فدان" ب10 الف سوداني ، مايعادل 990 يورو ، 1130 بالدولار، 4455 بالريال السعودي ، ( لمدة موسم واحد شتوي ، 4 شهور)

شراء بابور زراعة (صيني) بمبلغ 6000 ج ،ما يعادل ، 545 باليورو ، 681 بالدولار ، 2450 بالريال السعودي0

تركيب البابور على النيل ، وحرث ونظافة الارض ، ولا حقاً "تطريد الارض" وتسريبها "لاولاد المدن تقسيمها لأحواض" وترفيع الجدول الناقل للموية من النيل ، وعمل "الفاسقية" ، وأصبحت الارض جاهزة للزراعة الشغل دا كلّف 14 الف جنيه سوداني ،،، 1270 باليورو ،،، 1590 بالدولار ،،، 5715 بالريال السعودي ،،
"بواسطة 13 عامل ، ولمدة 5 أيام"
مرفق جولات البطاطس " 60 شوال تيراب بطاطس ماركة تسمى زافيرا وهي هولندية سعرها 40 الف جنيه سوداني ،،مايعادل 3630 باليورو ،،،، 4540 بالدولار ،، 16330 بالريال السعودي.

http://im88.gulfup.com/rVCtPr.jpg

تيراب مورد بواسطة البنك الزراعي السوداني.

☝️الله أكبر "بالقديم"

يا سلام يا باشمهندس ،، آمين ،، امين ،، والله متعة الزراعة والبلد ، يا اخ عادل متعة واستمتاع ، والمجربة صعب يتحمل حياة المدن ،،

بالنسبة للتراكتور " حبيب الشعب السوداني الماسي 290 ، شبه انعدم في أوربا هنا ،) ، لكن في الان ال 165 ، وال 188 ماسي فيرجسون ، الى ان يصل بورسودان بيكلف 54 الف سوداني ،، عند ناس الخرطوم ما عليهو جمارك ،، لكن رسوم الميناء و و و ، بتكلف 20 الف سوداني ، جملة 74 الف س ،،،

شكراً يا حبيب وانشاء الله تزورنا في نسري انشاء الله

كسرة :075: قضية الأخ ماجد تاج عملتو فيها شنو؟!

وليك مليون تحية أخ عبد المنعم ، وانت تهدينا هذه الكلمات الرائعة ، إذا دُرست هذه الكلمات مع الصوت الرائع للمرحوم عثمان اليمني ، أظنها كافية ليعلم الجميع ان حياتنا فعلاً اسبابها بالطورية ، وممكن تصلح تكون نشيد وطني!
شكراً تاني والف تحية

http://im64.gulfup.com/tHeZLh.jpg

عينة من التيراب زافيرا

البطاطا
عرفت البطاطا منذ أربعة قرون في بدايتها من خارج منطقة الإنديز، وأصبحت جزءاً لا يتجزأ من الكثير من المأكولات في العالم. تعتبر البطاطا رابع أكبر محصول غذائي في العالم بعد الأرز القمح، والذرة.زرعت البطاطا حديثا فى الأردن وقد دخلت الأردن فى أواخر الثلاثينيات أو الأربيعينيات . ولقد إذداد إستهلاك البطاطا فى الأردن تدريجيا حتى وصل الأستهلاك السنوى عام 1970 الى 25حوالى ألف طن معظمها مستورد من لبنان زومنذ ذلك الوقت وبمساعدات الحكومة إذدادت المساحة المنزرعة تدريجيا لتكفى الأحتياجات المحلية .

التصنيف: العائلة: الباذنجانية Solanaceaeجنس: Solanumالأهمية الإقتصادية: مناطق الزراعة: يتمركز أكثر من ثلثي إنتاج البطاطس في منطقة الخرطوم. تشير التقارير إلى أن المنطقة حول جبل مرة في الجزء الغربي من البلاد هي أكبر ثاني منطقة منتجة للبطاطس في السودان. أيضاً تزرع في دلتا القاش في كسلا. عادة زراعات البطاطس تكون في مساحات صغيرة ما بين 0.25 – 5 هكتار حيث يتم إستخدام المحاصيل من أجل الإستهلاك المحلي والتجارة على مستوى صغير (بشكل أساسي لإمداد أسواق الخرطومالأصناف الرئيسية: تشمل ألفا، ديزيريه، اركا وسبارتان. تشير التقارير أن متوسط المحصول حوالي 17 طن للهكتار الواحد ولكن يمكن زيادة إنتاجية وحدة المساحة أو نقصها.
المعلومات التسويقية والإستخدام:
الإستخدام: طازج ومصَنعالأسواق: في الغالب تعتبر الخرطوم الأكثر طلباً على البطاطس في السودان وتتوفر البطاطس بشكل موسمي في الأسواق (فبراير-مارس).إدارة المحصول:
طرق و ظروف الزراعة: نوع التربة: يتأثر نمو ونوعية البطاطس بالعوامل البيئية مثل درجة الحرارة، الرطوبة، الضوء، نوع التربة ومحتواها من العناصرالغذائية. تفضل البطاطس التهوية الجيدة، التربة الطينية وصرف جيد. إن ملوحة التربة وزيادة نسبة كربونات الكالسيوم تؤثر سلبيا على إنتاجية البطاطس ومحتوها من النشا .درجات الحرارة: يعتبر محصول البطاطس في السودان محصول شتوي، كما أنه لا يتحمل درجات الحرارة العالية في الصيف.الإحتياجات المائية: يعتبر الري وكميته وتوقيته مهم جداً لمحصول البطاطس وتعتمد كمية الري على نوع التربة وظروف الطقس، وملوحة التربة. في فصل الربيع يجتاج من 2 -4 ريات قبل الإنبات. عندما تنمو الأوراق للحد المطلوب فأن المزارع يبدأ بالري بشكل منتظم. أما في فصل الخريف إن عملية الري تبدأ فوراً بعد الزراعة ويجب إعادة الري بشكل منتظم حتى بعد الإنبات لتبقى حرارة التربة منخفضة.الإحتياجات الغذائية: يجب إجراء تحليل للتربة لمعرفة مجتواها من العناصر الغذائية و تحديد برنامج التسمييد وفقاً لذلك. عموماً في السودان يتم الأنتاج بإستخدام الحد الأدنى من التسميد ..طرق الحصاد: يحصد المحصول الشتوي في شهر فبراير ومارس بينما المحصول الصيفي يحصد من شهر سبتمبر إلى أكتوبرطرق الحصاد: بشكل أساسي يجمع يدوياً وذلك لقلة توافر الآلات.فترات الزراعة: إن محصول البطاطس حول الخرطوم وكسلا يعتبر محصولاً شتوياً. تتم الزراعة عادة بداية شهر نوفمبر وحتى الإسبوع الأول من شهر ديسمبر. الزراعة المتأخرة ودرجات الحرارة العالية في مارس وإبريل قد تسبب خسائر كبيرة في المحصول. في جبل مرة يزرع محصول البطاطس على عروتين في السنة. المحصول الشتوي يزرع في شهر نوفمبر وحتى بداية سبتمبر والعروة الثانية يزرع خلال فصل الأمطار ويزرع عادة في يونيو ويوليو (معتمداً على الأمطار).


منقول

سلامات يا ود الخير

تفاصيل اكثر حول هذه النقطة رجاء

تحياتي

الغالي خالد

مرحب بيك في واحتنا:smile: ونعل تربالك مااامتاورك؟

كانت لي تجربة في شحن عدد 3 تراكتور ماسي فيرجسون جمعتها من بعض المزارعين الفرنسين وشحنتها في حاوية 40 قدم /// 12 متر ، تكلفة شحن الحاوية بيكلف 3500 يورو تعادل في ذلك الوقت قبل 5 شهور تقريباً واليورو كان بي 12500 ج ،، فكانت تكلفة الشحن 44 الف سوداني " للكونتينر" وبداخلو ال 3 تركتور،، وصلت بورتسودا في 21 يوم ، واجهتني مشكلة الجمارك ،، بما انو مافي جمارك على الالات الزراعية ، لكن رسوم الميناء فرضت علينا 20 الف س رسوم ميناء على التراكتور الواحد ، الجملة 60 الف س ، وحتى اليوم ناس الخرطوم " التجارة الخارجية" بيقولو ليك مافي جمارك لكن ناس الميناء بواسطة ناس الجمارك بيخلصو منك رسوم بالقيمة دي!! المهم عندك عشرة يوم بس من وصول المعدة الزراعية للميناء لو ما دفعت الرسوم ، اليوم الحداشر بيحسبو عليك رسوم اضافية كأرضية ،

في ضعاف نفوس في الميتاء! يعني عادي ممكن واحد يشيل البطارية!

ود الخير

ازيك يا بلدياتي.. الصحة والعيال..

مشروع جميل.. والأدلة تبشر بإنتاج وفير...
والشتاء زاتو السنة دي مشاتر في بردو..
ربنا يخدر ضرعاتكم..

ويوفق..

حبيبنا أشرف يا رجل يا فاضل ، الله يبشرك بالخير وانشاء الله دايماً مواسم السودان وزراعتو من نجاح لي نجاح ، تعرف واحد قال لي لو السودان زرع المساحة من العيلفون وانت متجه شرقاً ليييي الحدود الأثيوبية "كل المساحة دي ارض خصبة وزايدة خصوبة " لو زرعوها بطاطس بس ، ممكن نستغنى عن البترول ! ، يعني البطاطس ممكن هي زاتها تنتج طاقة ، غير إستعمالها للأكل والتصدير !

والأثيوبين ذاتهم ممكن نكفيفهم معانا لانهم ناس مبدعين ، وبحبوا السودان ، ونحن بنحب الزراعة ، وبنحب الابداع ، " دي ذكرتني قصة الجمل ، للاخ عيدروس" فيا حبيب الله يقدرنا انو انشاء الله نوفر لمنطقة الكمر بس وممكن معانا ود الحبشي :smile: نوفر ليها او ندخل ليهم تقانة حديثة لزراعة البطاطس ، " واحد قريباً ليك قلت ليهو عاوز أجيب مكنة لقلع البطاطس ، قال لي آازول مكنة شنو !؟ والله فلان الفلاني داك يمسك الطورية دي ويبدا يقلع التراكتور ما يلحقو !! طبعاً المعدات الحديثة اهلنا تب ماهُن دايرنها !

تحياتي واتحملو البرد شوية عشان الزراعة تنجح ، ويابركة الله وسيدي علي المولى ، ريفي ود ود حامد السنة دي ببرد النرويج :biggrin: "الحقوق محفوظة لسارة"

سلامات يا ود الخير

التربال في داخلي يتململ :biggrin:

انا من النوع البيؤمن ان الزراعة هي الحل، وفعلا لو تم تمديد ترعتين من سد النهضة لغاية نهر النيل بي قصاد عطبرة، فأنا استطيع ان اجزم انو ممكن ننتج ما لاعين رأت ولا اذن سمعت من سهول البطانة بالغة الخصوبة، ولكن لاحياة لمن تنادي

المهم
انا عايز لي تركتور بكامل ملحقاتو، ومستعد ادفع المبلغ ده بكل سرور
ادينا نصايحك وشورتك في الموضوع ده

ناس الجمارك ؟!!!!! :wink: :biggrin:

احيييييييييا عاوز تتور علي النفس وترفع لي الضغط مالك يا خالد ياخ

حأحكي عن تسعة ايام من القهر مع ناس الجمارك وقبح سواكن وقرف البوليس ياخي وحتي الكله عمال المواني الزمانك ديلك ياخ ..

لا اله الا الله ...









يا زول بطاطستك مبروكه ياخ .. وتحية وسلام

معليش السلام بقي في الاخير ياخ لأنو موضوع الجمارك دي واجعني شدييييييد ياخ

يا خالد غالي يا غالي

التراكتور الماسي فيرجسون ده تراهو قاااااعد غي بطن بيتنا ليه عشرات السنين مافي زول اشتغل بيه
ابقي تعال شوف الناقصو شنو غير اللسات والبطارية ...

نحن التربله دي ما لاقين ليها زمن بس .. خلاص انغمسنا في تفاصيل المدنية الفالصو دي ياخ

سلمات ود الخير
حسب كلامك والحسابات بتاعتك تكلفة الفدان زي 10 مليون يعني اكتر من الف دولار
ما بتفتكر التكلفة دي عالية واسة حتزيد
وهل انتاجية الفدان حتغطي ليك التكلفة دي?
كدي بالله ادينا فكرة عن انتجية الفدان في الزمن دا وسعر البطاطس
باقي عندي 8 فدان في حتة و10 في حتة

د

---------------------------------------------------------
التحية لود الخير على هذا البوست الشحمان يا قول المرحوم خالد الحاج ...والتحية ليكى انتى يا ست البنات وكلامك فى محلو والحساب ولد....كلنا ترابلة والله...واول مشيريع انشأته فى ارضنا فى الرباطاب عام 1979 ومنذ ذلك التاريخ ظل منتجا الا فى الموسم الشتوى لهذا العام لسبب بسيط وهو ان جالون الجازولين سعره اليوم بلغ 22 جنيه بالجديد والبرميل(40 جالون) ب 880 جنيه..... اولاد اخوى ابلغونى انهم هذا الموسم ما زرعوا لانها ما حتقطى تكلفتها وحيركزوا على سقاية اشجار الفاكهة فقط والسعية...انا اسأل الاخ ود الخير هل حسب تكاليف الجازولين ام نساها....والسماد....

ناصر ياحبيبنا

الله يجيب الاجازة، انا مواضيعي معاك كترت، لكن كان فتوني في مشوار ضوينا ما عافي ليكم :biggrin:

أسف اخ عبد المنعم ،، فعلاً ريفي ود حامد فيهو من التنوع والتعايش رغم اختلاف وتنوع قبائل المنطقة ، وهي منطقة تجد فيها جميع الأجناس والمهنة الرئيسية هي الزراعة ، وطبعاً مشهورين بزراعة البصل والفول والفاصوليا والكبكبي وعندنا تمور بتكفي حاجة المنطقة ،،

تمام خالد حل امدك بالتفاصيل والروابط الفيها التراكتورات وانت تختار وعلينا نعمل ليك الاتصالات بالمزارع ونكمل ليك الإجراءات من هنا ،،، دا بعد ما تشوف تراكتور الأخ ناصر،،

شحن الكونتينر بيكلف حوالي 3500 يورو وبشيل 3 تراكتور ،، المهم بمدك بالتفاصيل ،،،

أوووو المُلاك ظهرو ،، مرحب أخت جيجي ،، طبعاً أنا شايل هم من هسا للشوالات الفاضية ،،، تقديرات أهل المنطقة وتجاربهم بيقولو الشوال الواحد بيجيب 20 شوال يعني لو زارع 60 شوال اذا ربنا رزقك ولو ما جابت خالص بتنتج 800 شوال ،، وبرضو قالوا سعر جوال البطاطس لما تتطلع بيكون بي 180 الف سوداني يعني حوالي 20 دولار للشوال الواحد. الجملة 16 الف دولار.

بس إنتاجية الشوال الواحد عشرين شوال تتوقف على المنطقة ونوعية تربتها

http://www.leboncoin.fr/annonces/off...assey+ferguson

رابط تركتورات معروضة من أصحابها مباشرة

مرحب دكتور حسن ،، المزارع في السودان منهكاهو مصاريف الزراعة المرتفعة وأتخيل اغلب المزارعين بيكونو مستلفين تكاليف الزراعة وحق الجاز وحراثة الارض، وبيضطروا يبيعو المحصول في ارضه لأنهم ما عندهم حتى مصاريف إرسال المحصول للاسواق !!، دا بالاضافة للمجهود المبذول من فلاحة ونظافة الارض لغياب وعدم وفرة المعدات الزراعية ، فصراحة الناس دي هناك تعبانة شديد ! رغم خصوبة الارض وسهولة الري ،،فالقصة دايرة مساعدة من الناس المرقو برة السودان وشافوا التقانات المستخدمة في الزراعة ونقلها للناس الهناك ، وأي زول مغترب لو اجباري كل سنة بيلزموه يدخل آلة زراعية للسودان بتكون دي اكبر خدمة للاهل وللوطن ،،، لكن يا خال العراقل ما تديك الدرب ! بس قول يا رب

مرحب بيك أخ طارق ،، إنتاجية الفدان 200 شوال والفدان الواحد بيستهلك 10 شوال لزراعته ، " تعرف أنا بعيني ما شفت " واتساب بس😥" أمس قالو عيّنو زول بالشهر وراتبو 1600 ج لمتابعة ال16 شربة ! تعرف قربت أقول ليهم ،، ما ممكن نحصد على كدا😣 غرقان أخوك يا أستاذ :smile: واحد قال لهم " جنا محجوب دا حايم زمنو كلو ،، كان أكلوه او خسر الاليفات ديل بيسولو شنو!!؟ غايتو ان وقعت عليّ قصة الزول العرش على متر داك ،، يا ني الجاييك تب.😂
هم البرد دايرنو ،، أماني ما دعايين ناس البلد:smile:

شكراً يا حبيب للملاحظة ،،، وبعدين الأعضاء المشاغبين ديل:075: ما تتوصوا بيهم ليكم اللحم ولينا العضم:tongue:

مشروع الواحة شرق النيل
 

يقع هذا المشروع الضخم شرق منطقة أبو قرون
وهو متخصص زراعة علف البرسيم.

نوع الري "ري محوري"

تكلفة شراء وتركيب محور واحد عدد 145 فدان 700 الف س جديد

http://im59.gulfup.com/r8wCzK.png

المانجو جنوب أفريقي
 

انتشرت زراعة المانجو الجنوب أفريقي
في السودان ، وخاصة شمال الخرطوم بحري
، وشمال أم درمان

يزرع مع المانجو علف البرسيم ، للأستفادة من
الأرض الي أن يثمر شجر المانجو ،،


http://im75.gulfup.com/lWdW02.jpg

شكرا يا ود الخير على الروابط

حا اتابع معاك تجربتك بتاعة البطاطس لغاية النهاية، ولو نجحت لازرعن الموسم الجايي ان شاء الله عشرة فدان

مرحب خالد قلت لي نظام السعيد البشوف في أخو:smile:

والله لي الان الحكاية مطمئنة

أهديك رحلة التراكتور دا من المزارع الفرنسي الي
المزارع السوداني طبعا مرورا ببورتسودان "أصعب محطة"

http://youtu.be/OJCuPWVGkNA

تراكتور ماسي فيرجيسون...massey ferguson
 

مستعمل أوربي سعره مع الشحن والتخليص 154000 ج سوداني

يظهر في الصورة الصديق ماجد والشاب المزارع


http://im54.gulfup.com/Bp9DQ6.png

تراكتور ماسي فيرجيسون...massey ferguson
 

ونفس التراكتور لكن مع فرق الموديل في السودان جديد 2012

بسعر مليار ج س "مبالغة طبعا"



هذا التراكتور سعره في السودان مليار ج عن طريق البنك :eek:

http://im79.gulfup.com/3oUVRQ.png

مواصفات هذا التراكتور

ماسي فيرجيسون

180 حصان

يجر المحراث 32 ديسك

ساعة عمل هذا التراكتور في المشاريع

الكبيرة 110 الف ج سوداني

وممكن ان يعمل 24 ساعة بدون توقف اذا ما حافظ المالك على

الصيانة الدورية.

http://im63.gulfup.com/oyaPzc.png

خالد اسالك بالله تعربن لي واحد وتحجزو لي
رسل لي رقم حسابك في الخاص وحدد المبلغ برضو في الخاص (باليورو) وجزاك الله خير يحبيب
تصدق طلعت واحد عن طريق البنك (نوع صيني) بالرغم من اني لسة ماسددت اقساطو لكن كل يوم خربان والمزارع حلف قال ماحصل اشتغل عشرة ساعات متوالية بدون مايسخن او تحصل فيهو حاجة

لعناية الاخ عادل
 

ماسي فيرجسون 285 توأم ال 290

وهو مرغوب بالسودان

سعره 7000 الف يورو

ويستخدم للمساحات الصغيرة الى 20 فدان http://im61.gulfup.com/PlgeAL.png

لعناية الاخ عادل
 

دا للمساحات والمشاريع الكبيرة..150 حصان ماسي فيرجسون