عندما كنت كوز صغيروني
.
. . . . . . . . . . . . . . على لسانه ذات قعدة على كورنيش امدرمان حيث إنداح قائلاً: كنت راجع من موعد عاطفي مع واحدة حسناء جداً ذات تضاريس تخلب الالباب حيث ارتشفنا بضع كاسات من غرام واشياء أخرى ومن ثم بديت اراجع في التفاصيل وذكريات الموعد العجيب دا لحدما وصلت بيتنا. بعد شويتين وبينما كنت بشرب في كباية شاي صاموتي من يد امي الله يديها العافية فجأة الباب يدق بطريقة مهذبة كدا لدرجة اني اتوقعت انو الزول دا واحدة شديييدة لمن غلط... المهم اختي مشت فتحت الباب وجات راجعة قالت لي في ناس عايزنك برا.. - - - - - يوووتبع بعد شوية اقول قولي هذا واستغفرالله لي.............................. |
اقتباس:
طلعو ديل اهل البت الشَرِط الكان قاعِد معاها وما جوه عشان كاسات الالغرام ،،، جوهو خبتوه خَبِت نضييييف ،،، عشان الأشياء الأخري يمكن الكلام ده مو غريب علي ظينتو حق خالك حسن فرح ده ياخ ولا شنو مشتاقين يا سجم |
اقتباس:
ولا حقت الخال دي قصة تانية يامواطن انت بس اصبر شوية ماتستعجل على رزقك:smile: ثم انو لامشتاقين ولاشتين اقول قولي هذا واستغفرالله لي....................... |
اقتباس:
بل انا مشتاقٌ وعندي لوعةٌ ،،، مش ياها البغنيها الكابلي ديك يا زول يا غناي ؟؟ بس ياهو ظااااتو ياخ |
-واصل ياخ
- طيب دقيقة خلي الحجر دا يولع كويس وقد كان يشفط من الشيشة القدامو بي مزاااج ومن ثم واصل الحكي: اها ياحبيب قمت مشيت على الباب لقيت ليك واحد سمين كدا ومربع ومعاهو واحد تاني بي جلابية وعمة صغيرونة كدا ماعارف لفاها كيف في راسو الكبير دا ولقيت ليك معاهم واحد قطيم كدا من ناس حلتنا بتاع اللجنة الشعبية سلمت عليهم ودعيتهم انهم يتفضلو وإعتذرو عن الدخول وسلموني ورقة فتحت الورقة لقيت فيها دعوة لإجتماع عام في الميدان الكبير الفي نص حلتنا الجنب الجامع داك والاجتماع بمناسبة تكوين "فرعية" جديدة لمنظمة شبابية قائمة ومشهورة في الزمن داك اها ياعمك قلت ليهم ياخوانا انا الأمور دي ماعندي بيها كبير غرض قام السمين داك ضحك براحة كدا وسلمني ورقة تانية. فتحت الورقة لقيتها أمر تكليف بالقيام بمهام أمين مكتب من مكاتب الفرعية نفسها اللي هي طبعا لسه ما اتكونت وحتتكون يادوب يوم الجمعة الجاية في الاجتماع. هنا انا يافردة دقيت جرس قلت ليهم ياخوانا انتو اكيد جايين غلط وأكيد قاصدين زول تاني عشان انا فعلا مابنفع معاكم في الشغلة دي. الجماعة ولااا اشتغلو بي كلامي بس قالو لي انت تعال يوم الجمعة ونحن بنفهمك الحاصل كلو. - - - - - برضو يوووتبع معليش مشغول شويتين اقول قولي هذا واستغفرالله لي......................... |
طلعو الكيزان
وبعد الذي منو قال الزعيم : لكن اختك ما شررررط المهم اختي لمن جابت الشاي الحركات الما هي بدت وبعد شويه ياكيزان غيب ياكيزان انا كويز معاكم طاخ طوخ وسال الدم في ارض الوادي ومن ديك وعيك وبعديها حلفت الموية ما اشربا في كوز قزاز بس |
اقتباس:
لالا يايحيى رووق المنقا شوية الغريق قدام اقول قولي هذا واستغفرالله لي................... |
اقتباس:
يعلم الله شبه كبير مع قصة الخال حسن فرح ياخ طيب ،،، هو صحي انا مستعجل كدي مالي التقول مؤجر لي عجله ياخ :tongue::tongue::tongue: اقتباس:
السلم نايلو في نايلو والرقبه قزاز هع هع هع مشتاقين يا يحي ياخ |
جات الجمعة سريييع وكنت ناوي افتح للناس الوهم ديل لكن قلت نجرب ومالو
مشيت قعدت في الخيمة الكبيرة النصبوها في نص الميدان وركبوا فيها مكرفونات وقعدت قدااام في الصف الاول مع اتنين تلاتة كدا من اولاد الحِلة البعرفهم البرنامج بدأ خطبة من دا وتصفيق من دا وبعد شوية اذاعو تكوين الفرعية وباركو لي ناس الحلة إفتتاحها وانها حتخدمهم كتير وشنو وشنو وطبعا لحد هسه ماعارفا خدمتهم في شنو. المهم اّذاعوا اسماء المسؤولين في الفرعية وكنت انا التاني بعد الامين العام واللي هو طبعا زولنا السمين المربع داك الجاني في البيت قبل كم يوم . وحددو باقي الاسماء بتاعة أمناء المكاتب وخلو ليهم -أمناء المكاتب- مسؤولية إختيار وتسجيل العضوية ودي ماصعبة طبعا بحكم انو الحفلة الاشتغلت في الخيمة بعد الاجتماع كانت كافية انها تجيب كل الشباب عشان يسجلو عضويتهم لكن الغريبة الانا ماكنت خاتي ليها حساب اني اكون انا المسؤول عن قبول العضوية الجديدة وبعد انتهاء الحفل جاني الزول السمين المربع داك واصطحبني لحد بيتنا بالبوكس الكان معاهو وهناك سلمني اوراق مروسة بإسم المنظمة ومعاها صندوق كبير وتقيل لقيت جواهو آلة كاتبة متوسطة الحجم زي الكان بدرسوها في المعاهد زمان وطبعا الوكت داك كان الكمبيوتر شيء نادر وجديد على السودان اها مع الحاجات دي سلمني كرتونتين صغيرات واحدة فيها عدد 200بطاقة عضوية جديدة وفاضية والتانية فيها أظرف بلاستيكية اللي هي تستعمل في تغليف البطاقات دي ووعدني انو بكرة يجيب لي ماكينة تسخين وتغليف البطاقات مع العلم انو حلتنا ماكان فيها كهرباء لانها لسه جديدة. يوووتبع اقول قولي هذا واستغفرالله لي...................... |
اقتباس:
اقول قولي هذا واستغفرالله لي...................... |
وحات الله الفلم ده خشيتوا قبل كده هنا فى منتدانا ..ولولا الركب المتعبانى دى كان فتشتوا ليكم فى الارششبف ....اوع واحديجيب سبره الزهايمر ..ويازول مش تزعل بس حمبك كمان ..قايلنى بخاف ولا بخاف ..الفلم ده مكرر00
|
-قول يازول
-دقيقة ياخ كلم البت دي تجيب لينا كباية قهوة تاني وتخت فيها جنزبيل -يابت يااابت ... قهوة تاني مع جنزبيل بالله ..... يللا واصل. اها ياعمك انا قلت للزول دا ياخ انتو بتعرفوني من وين عشان تسلموني الحاجات دي وهسه لو انا كبيت الزوغة ومالقيتوني حتعملو شنو؟؟؟ قال لي ماحتزوغ وماحنفتشك وانت حر لو ماعايز الشغلة دي ممكن عادي تخليها لكن انا انصحك انك تواصل معانا لي قدام وصدقني ماحتندم. هنا انا قلت لي روحي يازول انت اصلاً قاعد ساي ومفلس وماعندك لاشغل لامشغلة ف ياخ جرب الناس ديل يمكن تفتح معاك وانت في الاخر ماخسران حاجة وبعدين الناس ديل معاهم جكس نضيف يامواطن... حاول استفيد من الحاجة دي ياخ. لمن وصلت للحتة دي حسيت اني اقنعت روحي بالحاصل دا ولبست ليك وش بتاع زول مسؤول طوالي وقلت ليهو يازول مافي مشكلة ان شاءالله ربنا يوفقنا ونكون عند حسن ظنكم. المهم الزول جاني بعد يومين معاهو ماكينة تغليف البطاقات وطبعا شرح لي كيفية تشغيلها وكيفية طباعة البطاقة وجاب لي معاهو ختم المنظمة بي إسم الفرعية الجديدة وطوالي نبهتو انو الحلة مافيها كهرباء واني اذا كنت ح اغلف بطاقة لازم اطلع الزلط برا عشان هناك الكهرباء ف الزول دا طوالي قال لي ماتشيل ونحن ماممكن ننسى الحتة دي وتعال برا في البوكس حتلقاني جايب ليك جنريتر بشتغل بالجاز عشان منها تنور بيتكم ومنها تغلف بطاقاتك ودي كانت اول مكسب اناله من كوزنتي المؤقتة.. يووووتبع اقول قولي هذا واستغفرالله لي..................... |
اقتباس:
لكن انا صراحة مالاقاني والله والقصة دي حقيقية بالمناسبة وانا كنت شاهد عليها من طقطق للسلام عليكم. اقول قولي هذا واستغفرالله لي.................... |
بعد القهوة وإعادة تسليح الشيشة واصل الحكي وقال:
اليوم التاني جابو لي برميل بتاع جاز عشان الجنريتر ونزلوهو في بيتنا ومشو أجرو لينا بيت في الحلة عشان يكون مقر الفرعية وأدونا مكرفونات اتنين والجهاز بتاعهم وبرضو ادونا زي 100كرسي وطاولات كبيرة وصغيرة ومعاها فرشتين كبار للصلاة و زير بتاع موية والحاجات دي جابوها بي دفار وصاحبي السمين المربع المرة دي كان سايق موتر سوزوكي اسود جديد وقمت سألته من البوكس قال لي البوكس بتاع مهام ومهمتو معانا انتهت ومشو يفتتحو بيهو فرعية تانية. بدينا دعواتنا لإجتماعاتنا بتاعة الفرعية وكنا زي سبعة شباب وشابتين شينات كدا وكنت انا بكرر عليهم انو لازم يجيبو لينا عضوية جديدة وبالذات العنصر النسائي عشان هن العليهن الرك في عملية الدعوات للأسر والبيوت وكدا و طبعا كان حنك عاضي ساكت مني لكن قصدتو لحاجة في نفس يعقوب وقد كان ان انضم لينا اكتر من العدد المتوقعنو ومن ضمنهم اجمل بنات الحلة الأنا طبعا قمت بكل جرأة ومسؤولية بإختيار إتنين منهن يكونن مساعدات المكتب التنفيذي. وفي اول إجتماع بعد إكتمال نصاب المكتب التنفيذي طوالي جابو لينا أمر تكليف بحشد الناس لمسيرة هادرة يخاطبها الرئيس من أمام مجلس الوزراء وقاموا بتكليف المسؤول عن الحاجة دي -اللي هو العبد لله- بالحضور بكرة لمكتب فلان الفلاني عشان نستلم ميزانية الحشد. يوووتبع اقول قولي هذا واستغفرالله لي.................. |
اقتباس:
زول الله....اوعك تخبئ حاجة....القريشات كيف....خالك عارف كل حاجة وارجوك ان تكون صريحا.... ودا فى مصلحتك ....لازم تسمى الناس باسمائهم حتى لو كانوا كبارا....اقدر ظروفك فقد كنت عاطلا ومفلسا ..... ادفعك لكى تبرئ ساحتك.....ولا تنسى....عادل عسوم حسبك من الكيزان ....ورماها فينى |
اقتباس:
|
هلا وغلا بالخال العزيز
والاخ المفضال عسوم خليكم قريبين اقول قولي هذا واستغفرالله لي...................... |
اخذ نفساً عميقاً وتبعه برشفة من القهوة المزبوطة وواصل:
اليوم التاني من صباح الرحمن كنت واقف قدام مكاتب المحلية عشان اقابل الهوا الكبير واتعرف عليهو وفجأة ظهر لي واحد كدا طويل ووصف لي محل بتاع ليمون في الناصية البعيدة من الشارع مشيت عليهو لقيت البوكس المابيغباني داك وفيهو واحد شكلو محترم كدا سلمت عليهو وناولني ظرف بدون اي كلام واتحرك. فتحت الظرف لقيت فيهو ورقة بتاعة تعليمات ومبلغ كبير من ستة أصفار لمن اتخلعت زاتو يافردة وراسي ضرب عديل وقعدت اتلفت في الشارع عشان قروش قدر دي الزمن داك كانت كارثة انك تشيلا كدا في الشارع ومدلدل ايدينك. المهم ركبت أول تكسي لاقاني واتخارجت ووصلت البيت عديت القروش مرة تانية وقريت الورقة لقيتا عبارة عن طريقة حشد الناس والضيافة بتاعتهم. المساء في نفس اليوم عملت اجتماع للمكاتب بتاعتنا ووريتهم الحصل وبدينا نعد في خطة الحشد والاعلان والحاجات دي . وقبل يوم من المسيرة مشيت سوق امدرمان شارع التمارة اشتريت تمر من النوع الفاخر واشتريت جوز هند وجيت راجع لقيت الشباب اي واحد فيهم انجز المهمة بتاعتو وحضروا البراميل البلاستيكية الكحلية ديك وحجزو الثلج و أجروا الباص الحنطلع بيهو وبعد إطمأنيت على الاوضاع مشيت لـ عم جمعة البعمل الفطور في بوفيه المدرسة الابتدائية الجنبنا وإتفقت معاهو يعمل لي 250سندويتش فول وطعمية وغشيت معاي الترزي الكان الشباب اتفقو ماهو على اللافتات وجبتها منه ووديناها للخطاط كتبناها وبقينا جاهزين تب. اها في يوم الخميس بتاع المسيرة من الصباح ركبنا مكرفوناتنا في بص التاتا بتاع جكسا صاحبنا ووقفنا في الميدان والناس جات مارقة والبص إتملأ لي عينو ولمن إطمأنيت للحالة قمت وليت تلاتة من الشباب بتاعيننا وسلمتهم المسيرة وإتحركوا وانا رجعت بيتنا ووعدت الشباب اني ح أكون قدامهم هناك ولكن الحقيقة اني أصلاً الشغلات دي مابتنجح معاي وبيني وبينك كان عندي موضوع كدا في مقر الفرع بتاعنا مع واحدة من العضوات كان لازم أحسموا في اليوم داك. يووووتبع اقول قولي هذا واستغفرالله لي.................... |
- اها يازول واصل
- طيب بعد انتهت المسيرة الناس جات راجعة الحلة ولقينا كم واحد كدا مفقودين مارجعو مع البص من ناس الحلة المهم المساء عملنا اجتماع واتحاسبنا على المصاريف كلها وإستلمتَ الباقي من الشباب وإكتشفت انو المبلغ الإنصرف لايساوي ولا حتى ثُمن الميزانية الطالعة الإستلمتها اليوم داك. المهم يوم السبت مشيت وانا امتليء زهواً ههههه زهواً دي كيف معاك؟؟ مشيت عشان أرجع الباقي ومعاي ورقة فيها تفاصيل المنصرفات كلها وفي بالي إني ح أحصل على مكافئة كبيرة من العالم دي. لما وصلت لقيت زولي المحترم داك واقف في الشارع ساقني فوق لي مكتبه وقعدت معاهو جاب لي شاي واللذي منه ومديت ليهو الورقة بتاعة المنصرفات وكان معانا واحدة كدا شكلها شغالة معاهو في المكتب .. المهم صاحبك عاين للورقة بي طرف عينو كدا ورماها تحت مكتبه وقال لي شكراً جزيلاً جزاك الله خير على المجهود ونحن طبعا ماحنقصر معاك ان شاءالله وانت حتكون من أدرعتنا اليمين وشغلك نضيف ماشاءالله عليك وقام على حيلو طوالي ومد لي إيدو وقال لي مع السلامة وابقى عشرة على المستوى دا و اي صعوبات تلاقيكم طوالي بلغوا بيها فلان الفلاني اللي هو زولنا السمين المربع داك. وطبعا انا في حركة سريعة دخلت ايدي في جيبي عشان اطلع باقي المبلغ المهووول الباقي معاي لكن صاحبنا اتاريهو في اللحظة دي طلع من ورا مكتبه ووقف جنبي عديل لصق ومسك ايدي الجوه جيبي وقال لي الجماعة بلغوني انو الميزانية كفتكم تمام ولو فيها اي نقص تعال لي بكرة عشان اعوضك ليهو يللا الله معاك. طبعا مع خلفية إني فاهم الطريقة البفكرو بيها الناس ديل وطريقة لحسهم للقروش والميزانيات الخرافية البتطلع ل حاجات اصلاً مامحتاجة لي دا كلو اها مع التفكير بسرعة في الثوابت دي فهمت الحاجة الهو بلمح ليها بسرعة وطلعت ايدي من جيبي ومديتا ليهو فاضية وقلت ليهو مع السلامة. عارف يافردة انا طلعت من مكتب الزول داك وفي جيبي كم؟؟؟ ماحتصدقني المهم حاول اتخيل اني اشتريت منها موتر هوندا جديد وفتحت بيها دكان في الحلة الجنبنا وبنيت منها الحيطة بتاعة حوش ابوي البي ورا عشان المطرة وقعتها وبرضو كان لسه باقيها موجود. ودي كانت اول دفعة من قروش الكيزان تدخل جيبي يووووتبع اقول قولي هذا واستغفرالله لي....................... |
اقتباس:
انشاء الله السودان كلو يبقى حرامية زي الكيزان ! آلة كاتبة ، وزير وفرشات للصلاة في التسعينات !! لله درك يا إنقاذ ! كانو بيفتشو لي رجال ، كانو بيفتشو لمنقذين ، كانو بيفتشو لدماء حارة نضيفة توصل القليل من الميزانية للقرى والمناطق البعيدة ، الميزانيات دي يا زول الله لغياب الضمير ولكثرة ضعاف النفوس ، من زمن الاستقلال الى حضور الناس ابان مواتر ديل وتفتيشهم في الأحياء عن منو الامين النضيف السمعتو كويسة عشان يسلموهو الفرشات والزير ، كانت الميزانيات دي حدها بوابة وزارة المالية وتوزع ، وأنتو في القرية بيصلكم وتقبلو تحيات الريّس !! |
اقتباس:
انشاء الله السودان كلو يبقى حرامية زي الكيزان ! ---------------------------------------------------------- وتانى ( انشاء الله ) انت فى الخلوة شيخك كان كوز طبعا ....عشان كدا كلك غلط ...تفكيرك مسجم ولغتك مسجمة والله يستر من عينتك دى |
اقتباس:
ادفعو ضريبة الوطن دا يا عمك ، وبطلو إدعاء النضال !! |
اقتباس:
قووووووووول واحد يا ود الخير اقتباس:
قول 2 يا ود الخير اقتباس:
يا ود الخير يعلم الله ماك نصيح ماك نصييييييييييييييح ياخي الله ينعل ابو الإنقاذ علي أبو اليوم الخلاها تقعد لينا في حلقوم بلدنا دي ياخ ثُم ياخي إحترم قرعوباتنا دي ياخ الله يرضي عليك ،،، إحترم عقولنا ودقنوساتنا دي ياخ بلا إنقاذ بلا سجم رماد ياخ :biggrin::biggrin::biggrin::biggrin: |
اقتباس:
هسي كدي خلي الشيوعيين ديل يغيروا إسم الحزب زي ما قالوا ،، ويجيهوهوا ويعملوا عمرة لمكنتو ،، ويسمكروا البودي بتاعو ،، وياريت لو غيروا ليهو راس!! ويقدموا نفسهم للسودانيين بأنهم جايين مشمرين وجايين ناس شغل وخدمة للشعب ،، والله الشعب دا كلو يؤيدهم ،، نحن يا اخوي ناقصين إنجاز وقلبنا واقف ،، وناس الإنقاذ كتروا عليهم محبين السلطة ،، وجرسة الشيوعيين ناس حلقوا لي ، والقزازة ، وو وو و ،، وكلو من اجل السلطة والمال ،، همّت الإنقاذيين زاتها جابتلها لوجة ،، لكن الشعب لِسَّه ما قنع منهم ! |
ودالخير الكوز الأصلي كيفك عساك فاين
خلي الزول يكمل ياخ بعدين تعال بي مراقاتك دي ثم انو الكلام دا جوووه امدرمان دي لاقرية ولايحزنون اقول قولي هذا واستغفرالله لي.................... |
اقتباس:
ناصر نهارك باسم ياخى لا تضيع وقتك مع ناس ود الخير ديل دراويش ساكت ....ولو انو الكيزان ديل كلهم كبيرهم وصغيرهم محترفو سرقة وودالخير اهو اعترف بيها عيانا بيانا.... المشكلة فى الكبير المحترم دا ....والله لو الناس تعرفوا منو الا تنفقع مرارتهم اعوز بالله |
-واصل ياخينا
- طيب دقيقة خليني اغير الحجر دا بعد كم يوم من حكاية المسيرة دي لاحظت ليك انو ناس الحلة بقو يحترمو اخوك اكتر من الاول وبعضهم بقى إحترامو ممزوج بي شوية خوف كدا والغريبة انو تعاملي معاهم مااتغير ياهو زاتو زي الاول بصلي معاهم في الجامع وألعب الدافوري وبالليل بتكون معاي واحدة شديييدة حايم معاها في الزقاقات زي كل مرة ورغم كدا حسيت بالناس بقو قريبين مني او عايزين يبقو قريبين والحاجة دي ماريحتني وح اشرح ليك السبب قدام. المهم ياصاحبي الايامات ديك كانت الدفارات بتصطاد الشباب من الشوارع ومن المواصلات ومن اي مكان وإكتشفت بالصدفة انو البطاقة بتاعتنا بتخارج الزول عادي من الناس ديل ودا لمن جاني زولنا السمين المربع داك ومعاهو اتنين من الشباب المابعرفهم وقال لي اعمل ليهم بطاقات عشان يتخارجو بيها من كشات الالزامية المهم انا استغربت من الحاجة دي وكنت مامصدق لكن عملت ليهم البطاقات وبعد مشو سألتو عن الحكاية دي وأكد لي الموضوع وأداني مبلغ قروش محترم كدا وقال لي (بالنص يافردة) طبعا بالنص دي ماوقعت لي في البداية لكن فهمت منه انه بيبيع البطاقات للشباب بقروش وانو دا نصيبي من البيعة دي. طبعا اخوك يافردة اتكيف للطيش وطوالي طلبت منه يجيب كرتون تاني بتاع بطاقات فاضية وبديت الشغل الجديد ولاحظ معاي انو اي حاجة بجيبوها ليك مافي بعدها مسائلة ولا اي متابعة من اي زول يعني مفكوكة في الهواء كدا بس بدون اي حاجة تتخيل من يوم بديت مع الناس ديل لحدما خليتهم ماحصل كتبت اي ايصال او اي توقيع على اي شيء سواء كان تسليم أو تسلم. المهم يوم في اجتماع طرحت موضوع بتاع تشجير الحي ورفعت الاقتراح دا للتنفيذ طوالي وكان من اجمل الحاجات العملتها وأول حاجة طلبت من ناس اللجنة الشعبية يدوني بيان بي عدد البيوت الفيها سكان في الحي لانو الحي بتاعنا كان جديد ولسه فيهو بيوت كتيرة فاضية ومشيت تاني يوم للزول بتاع البوكس داك وأداني ورقة للمشاتل الفي حي المقرن واصطحبت معاي تلاتة بنات من عضويتنا وولد واحد ومشينا لقينا الامور واضحة وإخترنا عدد كبير من الشتول وطوالي حددت ليهم الجمعة القدامنا انو اي زول في الحي يحفر تلاتة حفر قدام بيتهم وحضرنا العدة حفارات وطوريات وكواريك -من كوريك- والجمعة من الصباح كان الشباب كلهم لابسين لبس خمسة وحتى البنات المعانا شايلين العدة والحفارات وكل الناس بتحفر ولحد الساعة 3العصر كان الحي كله جاهز للشتول. واحد من الشباب إقترح اننا نسلم اي بيت الشتول بتاعته عشان تنزرع لكن كان رأيي اننا مادام حفرنا بيوت الناس يبقى لازم نحن النزرع الشتول ونزبط الوضع عشان يمكن يتكاسلو وينسو الحكاية وفعلاً بدينا في تنزيل الشتول لحدما خلصناها تقريباً الساعة عشرة بالليل ووصينا اي زول يسقي الشتول دي بإنتظام ويعمل ليها سلك او اي حاجة يحاوطا بيها عشان الاغنام وكدا. المهم يافردة هسه الاشجار الانت شايفا في حلتنا دي كلها كانت فكرة اخوك لقيتني كيف بالله؟؟ يووووتبع اقول قولي هذا واستغفرالله لي...................... |
اقتباس:
شلفتك الشلفتني ليها في ان شاء الله الغلط ديك نافخاني من الصباح :biggrin: يا اخ والله أني احبك في الله ،،، لكن يا اخ خفف مساخة الرباطاب دي شوية! |
- الدنيا ليلت يازول احكي ياخ خلينا نقوم نمشي
- ههههه انت نعست وللا شنو طبعا بعد ايام من حكاية التشجير جاني زولنا السمين المربع وقعدنا نتونس ونشرب في الشاي وجاب لي سيرة الشتول وقعد يشكر لي في النوع الاخترناهو وقال انها شتول مستوردة وغالية شديد رغم اني عارف انها عادية جدا ومنتشرة ومعروفة كمان وموجودة في اي زقاق لكن صاحبنا بقى يبالغ في شكرها لغاية ماقال انه شخصياً جاب الشيك حقها سلمه للزول "الكبير المحترم داك" بمبلغ كذا مليون:eek::eek: انا راسي ضرب وبقيت احسب فيها يمين شمال اصلو ابت تركب معاي لانو الكلام دا معناهو ان الميزانية حقتا طلعت ملايين وهي اصلا مابتفوت ألفين تلاتة. قمت مشيت تاني يوم المشتل في المقرن وسألت من سعر الشتلة الواحدة من نفس النوع لقيتو حاجة كدا لاتُذكر وفي متناول اي زول وفهمت الحاصل. تاني يوم لاقيت الزول السمين المربع في مقر الفرع واتناقشنا في الموضوع دا وصاحبك حذرني بشدة من الكلام او بحيت المواضيع الزي دي وطبعا انا الحاجة دي ماريحتني وخفت تكون اتسجلت بإسمي والمسؤولية بتاعتا وماعارف شنو المهم الزول دا طمني من الناحية دي. انا صراحة زي بطني طمت من الشغلة دي واصلا بقت تعمل لي قلق حتى مع ناس بيتنا اجتماعات مفاجئة ومرقات ومشاوير بدون ترتيب ولقاءات مع ناس مابعرفهم وجلسات قراءة قرآن ومدارسة كان يغلب على تفاسيرها التوجه بتاعهم لدرجة انهم اي آية بيفسروا نتيجتا وكأنها نزلت مخصوص ليهم ولوضعهم والحاجة الحققوها او العايزين يحققوها وانهم الفئة الناجية والباقيين ضلاليين ساكت وألقاب وتوصيات تعمل دقن خفيفة وماعارف شنو وانا جني وجن العندهم دقون ديل لأنو أغلبهم كذابين المهم بقيت اتكاسل عن الاجتماعات والمشاوير وأغيب احياناً عن الفرع وقمت سلمت أمينة مكتب المرأة جزء من العُهد العندي وسلمت البطاقات والورق المروس والختم لواحد من امناء المكاتب وبقى عندي بس الآلة الكاتبة ونقلت الجنريتر لمقر الفرع بعدما كنت عامل ليهو كيبل طويل جداً من بيتنا لغاية المقر والجماعة حسو اني بقيت افرفر قامو سلطو علي الزول السمين المربع داك وبقى يقرب لي شديد لدرجة انه بقى يبيت في المقر بتاع الفرع أيام وأيام وبقيت اضطر للسهر معاهو بسبب اننا لازم نقعد لغاية آخر الليل كل يوم ونتكلم ونتفاكر وفي يوم من الايام كان أسود الملامح لقيت الزول السمين المربع بجيب لي سيرة اني زول بتاع جكس وانه ممكن يعوضني عن الجكس والبنات وبكل بجاحة ولو.....طه عرض لي نفسه وعايزني استعمله جنسياً:eek: اللحظة ديك يافردة جنوني الفي راسي كلها قامت وكدايسي كلها اتعكننت وكان نتيجة الليلة ديك انو الزول السمين المربع رقد في المستشفى زي اسبوعين والموتر بتاعو اتحرق بالجاز بتاع الجنريتر والغريبة الحادثة دي إتسجلت على اساس انو الفاعل حرامية كانوا عايزين يسرقو المقر:confused: ومن اليوم داك ولزمن طويل كنت بلاقي مضايقات من جهات كتيرة حتى من بتاع الدكان الفي الحلة يمكن يووووتبع اقول قولي هذا واستغفرالله لي.................... |
غايتو يا زولي
حضر نفسك وردودك تكون رباطابية كاملة الدسم ....النهاية المهببة دي الجماعة ما حيفوتوها ليك بأخوي وأخوك تحياتي |
اقتباس:
الناس قاعدين لي يومي ويومك دا السمين المربع قاعد والكبير المحترم بقى كبيييير وقاعد والحي بتاعنا رغم اني رحلت منه لكنه قااااعد والشباب قاعدييين والشتول بقت غابة هسه والنهاية لسه ماجات اقول قولي هذا واستغفرالله لي..................... |
- يازول ماوريتنا الحصل شنو بعد داك
- طيب اصبر ياخ ماتسكني كدا اها بعد فترة بسيطة لقيت ليك زولنا السمين المربع اشترى قطعة ارض في حلتنا واللي تعتبر درجة أولى يعني غالية شديد وبدا يبني فيها وجاب اخوه الصغير العسكري وبقو ساكنين فيها مع بعض وطبعاً بقى سايق موتر جديد وبدأ يتجنب حتى المرور بي شارعنا وبعد فترة جاب اهله كلهم وسكنوا في البيت الجديد المبني بطريقة جميلة ومكلفة جداً وشوية شوية بدأ اهتمامهم بالمقر بتاع الفرع يقل نسبة الى انو كتير من الشباب انسحبوا وبالذات العنصر النسائي واعتقد انسحاب عدد كبير منهم بسببي انا حسب ماقال واحد منهم فيما بعد وبدأت تظهر حكايات عن السمين المربع حصلت زمان يعني ايام كان الفرع شغال وكل القصص كانت تؤيد حكايتي ونظرتي للزول دا بعد الحصل منه واكتشفت اني آخر زول عرف الموضوع دا. دي كل القصة بس بالجد رغم اني خليت الناس ديل عشان كذبهم وسرقاتهم المكشوفة دي لكن الحق يقال لاقيت فيهم ناس اقسم بالله زي الدهب الخام ناس فعلاً ماسكين درب الله عديل بس المشكلة انهم بالعدد وعشان كويسين ماحيلقو فرصة ابداً والغالبية السيئة مغطية عليهم عشان كدا ضايعين وسط الكيمان دي. لكن تعرف أكتر حاجة هاردة فشفاشي في الموضوع دا كله؟؟؟ انو قطعتي الاشتريتا بقروشي -مابقروش الناس ديل- واقعة قريب من بيت الزول السمين المربع عشان كدا ماختيت فيها طوبة لحد هسه وبفكر ابيعا عندك لي زبون؟؟؟؟؟ اقول قولي هذا واستغفرالله لي..................... |
خلاص إنتهت ؟؟ !!!!!
ياخي دي قصة بايخة جنس بوووووووووخ كرهتنا ظاتو ياخ :wink: :wink: |
اقتباس:
اها لقيتا كيف زي حقت الخال وللا واحدة تانية؟؟؟ اقول قولي هذا واستغفرالله لي.......................... |
اقتباس:
زول الله هسع الخال دخله شنو بافعالك المشينة دى.....تحلل على طريقة الكيزان ...والله مش لو تطعم ستين مسكينا حتى لو اطعمت كل مساكين الثورات مش حتكسب رضاء الناس خليك من رضاء الله |
اقتباس:
لالا ياخال ناصر وقرقاش قالو القصة دي بتشبه قصة حقتك انت وقالو يمكن تكون هي زاتا هسه انا بسأل ناصر لقاها كيف اقول قولي هذا واستغفرالله لي........................ |
اقتباس:
كل الصور واحدة بالمناسبة ،،، ذات الأفعال ،، ذات السرقات بإسم التابعية للنظام وبإسم الدين ذات الممارسات اللا أخلاقية دي قصة تانية ،،، لكنها في بدايتها بتشبه قصة الخال عن محاولات الإسلاميين إنهم يكسبوا ولاءه ليهم زماااااانك كده ( راجع بوست ابو اماني الشهير ضيف علي مائدة سودانيات ) اقتباس:
يا زول الله إنشاء الله ما ينفعن بطل القصة البايخة دي ياخ :075: |
اقتباس:
لكن لقيت قلبك كبير* يا خلف ،، الوطن شبعان خذلان مني ومنك ومن الدكاترة زاتووو ! صبحك الله بالخير انت والدكتور وكل أعضاء وزوار سودانيات. * القصة دي مقطعة قطيع في الخال والعم والجد وفي كل سوداني ،، أخذ من الوطن اكثر مما أعطاهو !! |
اقتباس:
--------------------------------------------------------- ود الخير... الله يقطع لسانك تعال قولى انا اخذت من الوطن شنو.... السرقوا الوطن هم جماعتك ديل.... والكبير اللحاول يعلم زول الله السرقة انا عارفو.... تراهو كل يوم فى التلفزيون وعلى اعمدة الصحف يلعلع بالخطب الجوفاء...يحدث الناس عن الوطنية والاخلاق وهو ابعد الناس عن كل ذلك همه جيبه الذى لن يمتلئ حتى لو افرغوا فيه كل اموال الدنيا ....الله يهديك ويفتح عينيك المعمشة دى |
اقتباس:
معقولة مجرد الشعور بأنك مديون للوطن ما عندك ؟؟ |
| الساعة الآن 11:03 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.