القاعد يشرب موية السلطة و يتنحنح و يتمطق يقول أناااووووو؟؟!!
.
كان العنوان الأصلي للبوست هو الأكل بالأيتيكيت ..أم الأكل في بطن البيت؟؟ نحن (أهل العوض) نرتكب الأيتيكيت كل ما فرضته علينا ظروف طارئة:( و نزعم أنه دخيل علينا جميعآ :p و لا نسعى هنا لاختبار هذه الفرضية بل هي ونيسة حول عادات الأكل يرى البعض أن الأيتيكيت تطور حميد و (حضاري) و (ثقافي)!!.. و لا نود الخوض في تعريفات حضارة و ثقافة رفقآ بالقاريء و يدخل في اطار الأيتيكيت الأكل بالشوكة و السكين و الملاعق و حتى العيدان الصينية التي تحل بديلة لتلكم الأدوات متى انتهى بك نداء الجوع في China Town.. الأكل بالأدوات..يعكس شكل حياة قوم و (لهط) العصيدة و (لغف) باقي الروب و (الحترب) المذاب بالقاع هو الآخر ..يعكس شكل حياة قوم و طريقة تعاملهم مع برنامج الأكل و (الطقوس) المصاحبة لانتاجه و طبخه و تقديمه. نحن هنا نجفل من تقديم تعريف أكاديمي لمفردات ذات طرق شائكة مثل (حضاري) و (ثقافي)..لكننا نحوم حول حماها بالضرورة. و البعد عن المباشرة يوفر لنا غطاء (الزوغة) من المنهج الجاف;) و يعطي هذه الونيسة ما نزعم أنه جمال أووكيي؟؟ طيب نبدأ بالأكل في البيت.. و هنا.. أنا أكلت في بيوت وصفها القرآن(بيوت خالاتكم و بيوت عماتكم) الى آخر الآية الكريمة..و بيوت أكثر حميمية ..هي بيوت أصحابنا ..أمثال أسامة عبدالعزيز ود خالتي أم سلمى بت حاج الصديق في دولة الحضراب المجاورة لحدود اقليم أعالي شمبات و ولايات الصافية الشمالية و عاصمتها مدينة مربع تسعة ..و لم يتميز أكل (صفاء عمر حضرة) على أكل الخالة أم سلمة الا بفارق السن و عولمة التجربة و الخبرات الدولية التي أتاحتها سنوات الدراسة بالخارج لصفاء و تفوقت عليها الخالة أم سلمة (بالقدحة) التقليدية و شيء من ثقافة البحيرات العظمى أيام غربتها مع (عريسها) البروف عبدالعزيز الطيب. في تلكم البيوت كنت ضيفآ أقرب لسيد بيت.. لكنني لم أستطع شرب أو (جغم) (موية) السلطة الناتجة عن (تحلل و تخلل) الطماطم ..و تشرب البهارات و الحرارات في قعر صحن السلطة. قدر ما حاولت غلبني!! حتى لمن كانت صفاء تطلع و تخليني أنا و أسامة براااانا برضو غلبني..غلبني طب في بيت أختي أحلام غلبني في بيت نسابتي ..لوووول ..هو أنا أقدر:cool: :rolleyes: بس في بطن بيت أمي حاجة بتول يديها الصحة و العافية (زمن الجهلة) و بيت سوما هسع.. تاني .. أبى لي طب ..و طار لي حطب طبعآ لمن أكون ضيف و أشوف الصينية راجعة و موية السلطة كتييييرة لعابي يسيل.. و أعالجها بغمستين من لب الرغيف و لبعضه لب يخلب الألباب يا أولي الألباب هذه الغمسة بالكاد تفشني أما السلطة المسييييييخة (و هي أيضآ شكل جديد) و يقال حضاري!! هه حضاري الما بخلي؟؟ ما بدورها أبدآ... و لو في أي طريقة بقول لي ناس البيت شيلو السلطة دي أملوها بهارات و جيبوها. و طبعآ أحيانآ أسكت أو بالأحرى أنطم.. طيب منو معاي في حكاية موية السلطة دي؟؟ و منو القاعد مؤدب و مربع يدينو؟ زي الطيب بشير في بيت نسابتو..لوووول تعالوا و بجيكم تاني ملهوزة كان لتقلية ميسز عبدالباقي و ضلع الحنينة أثر كبير في (تطعيم) فكرة البوست . |
اقتباس:
تحياتي تحضرني هنا طرفة لشيخ العرب ( أبوسن ) يقال ( والعهدة على الرواة ) أنه كان معزوم في بيت أحد ( الكبارات ) على الفطور وكان من ضمن ما حضر ضمن الصينية ( المدنكلة ) العصيدة ولمح شيخنا بقية الضيوف يأكلونها ( بالملعقة ) وكان مرافقه أصر عليه أن يلتزم ( بالإتيكيت ) ومايغمس يده في الأكل وحينها أضطر الشيخ للأكل بالملعقة وكانت العصيدة ساخنة ( ليها بوخ ) وعندما أدخلها ( اللقمة ) إلى فمه كانت كجمرة لهب تحرق ( لهاته ) فما كان أن قال قولته الشهيرة في الملعقة ( الله يلعنك الما بتدي خبر ) أو كما قال . الشاهد أن هذه الواقعة تلخص كل مآخذنا على ( الإتيكيت ) لأنه بصراحة بيحرمنا الإستمتاع بالأكل . بالنسبة لموية السلطة ( موية الطماطم وباقي مزيج الليمون والملح ) دي ما ظنيت زول بيشربها إلا يكون (( متمرس )) كما يقول حبيبنا الجيلي ... أنا البعرفو ممكن ترمي فيها باقي ( الكسرة ) و( الخبز أو العيش ) لكن شراب ده إلا تسأل طارق الحسن تحياتي ليك وللعيال |
.
اقتباس:
في البداية أحيي ادانتك لسيء الذكر الاتيكيت و أعجبني تعليق زعيمي المفضل (ود أب سن) ..الله يلعنك يا الما بتدي خبر.. أما قصة (( متمرس )) :confused: فواضح انو انتا و حبيبنا الجيلي عاوزني أعترف زندية بمعاقرة البوقنية التي تفيد الكلى و لها تجشؤ كريه ناجم عن صراحة فحل البصل الذي يعتبر شرط صحة و لا سيما ان غشيها شاطر فجل جريء و كان العبار ماهلآ ذي جنة من كوز الخميرة القديمة و لي فوق..لكن أنا مااااا (( متمرس )) يا من تريدون اغوائي..دة خيال كاتب ساي...:rolleyes: . |
اقتباس:
أذكر مرة صديق لنا أثيوبي في شركة بيطار في الخرطوم كان يتمضمض بعد الأكل ثم يبلع الماء... قلت له يا أخي بتعمل حاجة مقرفة :D قال لي : لما كانوا صغار أهلهم كانوا بيقولوا ليهم بعد الأكل غسلوا أياديكم ما تبقو زي السودانيين الواحد ياكل ويلحس أيدو زي الكلب . طبعا خلاني سرحت في الحكاية دي للحظات وقلت ليه : قبل كده مشيت مناسبة عامة ؟ قال أيوة قلت ليه : غسلو ليك إيدك بعد الأكل ؟ (كنت أشير للأولاد الذين يحملون الإبريق مساعدة في غسل أيادي الضيوف ) عادة سودانية 100% قال لي أيوة قلت ليه: شفت منظر الصابونة ؟:D بيكون ملاح التقلية مخلي لون الصابونة رمادي أها نحن بنلحس أصابعينا عشان ما نوسخ الصابونة ;) عادات الأكل يا طيب غريبة ومدهش الإختلاف من مكان لآخر، من ملاحظاتي تشابه طبيعة أكل الشعوب حسب قربهم وابتعادهم من خط الإستواء. السرلانكيين والهنود يشبهوننا في أكلنا حتى في حبهم للبهار و الشطوط " جمع شطة وليس هضبة الشطوط " وقس علي ذلك. نفسي أجيب لي صيني بي العصايات الراهاف البياكلو بيها ديك وأخت ليه صحن عصيدة وأكون شايل الفيديو كاميرا وزول يمسكني عشان الضحك ما يطلع الفلم مهزوز .:D يديك العافية يا طيب |
.
اقتباس:
ما شايقي و الله جننت الصيني جن و قلت لي الحبشي الله يصرفو بيتمضمض و يبلع ..لوووول أنا شفت الأمريكان بيعملوا الحركة دي لمن يضوقوا الخمرة الجديدة و الله شيء مزعج بالجد لكن زي ما تفضلت هي عادات شعوب في طريقة الأكل تبدو لنا مختلفة ..لكنا نحترمها جرب موية السلطة دي ..بقة بقتين;) . |
اقتباس:
يضحك مساكم |
بوليص زمان تحياتى وللاولاد كمان
والله من ما قريت كلامك ده مسكتنى ام هله هله والرياله سالت وجرى على التلاجة وطلعت الضلع بس ما طلع زى ضلع فاطمة بت محمود ( دى امى ) الله اديها العافية والولية قطعت السلطه وجد مطعمة والليمون ريحتو طاغة وتعال شوف الهرس بس يا حليل الطيانة ولمة الناس البياكلوا الضلع بايديهم الاتنين ويا لعجب لمن تكون انت اصغر زول فى الناس وتمسك الابريق وتكب للناس ويقوم واحد اديك دشوة من نوع ارض ارض , وحليل زمان الناس تشيل الكمونية وتتوجة على الانداية ولمن اشبع عيش وما ياكل يدخل اصبعوا فى حلقو ويفضى مكان للكمونية . دحين يا الطيب ناس الجيلى والخال بعرفوا كنبو(جبنات وترير) وسلام للكل ...... معانى الكلمات= الطيانة + كلمة اطلقتها على بعض الطلبة القاعدين معاها لانهم بنهزو ريكة كسرة فى الفطور وريكة كسرة فى الغدى والعشى مرة فطير بلبن ومرة الغوة . دشوة +قول باع بس ما حقت الخروف كنبوجبنات _وكنبو ترير +اسالو البوليص بكون عارف ........................................مع محبتى هنداوى |
الطيب البشير
يطراك الله بالخير... في السودان هنا في كثير من الاحيان السلطة بقت رفاهية... خاصة لمن الكيلو بتاع الطماطم يصل 8 الف جنيه.. دي تمن كيلو لحمة عديل.... (بدون المقارنة بأيهما اصح الخضار ام اللحمة)... صحيح الاتكييت في حاجات ما بجي فيها، وفي حاجات لازمة... ده كان انا فهمت معنى الاتكييت شنو، لكن بعض العادات والله قبيحة جدا، يعني في ناس بعملوا عملة الاثيوبي القالها خالد الحاج بطريقة تانية، الواحد بيغسل ايدو في الصحن الاكل فيهو وبشرب مويتها ( في قرف اكتر من كده)... موية السلطة ما جربتها شراب، لكن غمسنها فيها جنس غاموس.... بيني وبينك مغرية، كمان الايد العملتها ليها اثر في طعامتها، يعني انا عندي صاحبي لمن كنا عذابه في بلاد بره كان عمل شنو شنو داك تلقي اكله مسيخ مساخة التابا البنات... في فترة في اسمرا كنت عامل فيها باكل اكل صحي... بمشي السوق وبشتري كمية من الخضروات والطماطم، وتعال شوف ليك جنس قطيع للسلطة طماطم، بصل اخضر، فلفل رومي، شطة خضرا، جزر، خس + ليمون وشوية خل بالكورة الكبيرة وهاك يا لهط بالملعقة لكن... (المخاخيت تسيل، والشطة تحرقك في خشمك، والدموع نازلة) في تلك الاثناء طبعا الزول بكون براهو بعمل الهو عايزه.... جوعتنا ... بديك العافية |
أبوموحي
شفت الجيلي قاعد ليك بالمرصاد ... أها أمشيي أرميها برضو في ( خيال كاتب ) :D :D أعترف ياجنابو . . قصر علينا المشوار :D :D |
اقتباس:
.. .. |
العزيز الطيب البشير
يا ود يا (متمرس)! أمتعتني والله، فهذا موضوع طريف ومهم! نبدأ بالأدوات (شوكة وسكين وملعقة وعصيات، وطورية ومغرافة و...)، وطبعاً من الأصابع وهلم جرا.. الغرض منها تسهيل تناول الطعام بأيسر وسيلة، لذا، فهي اختراع حاجة (التي هي أم الاختراع). وقد تعجبون أن أكثر هذه الأدوات، وبما في ذلك بقية الإتيكيت المتعلق بالمائدة، منذ وضع الطعام على طاولة و...الخ، هي ابتكار عربي وليس غربي، وبالتحديد من ابتكارات زرياب، والذي اشتهر عند الناس بالغناء وإضافة الوتر الخامس إلى العود، وإبداعه الموسيقي، ولعل ذلك قد طغا على مساهماته القيمة في علم الإتيكيت، وقد لا يعلم الناس أنه هو الذي أدخل، عند قدومه الأندلس فن الأزياء، لكل فصل، وغير ذلك الكثير من أدوات الحضارة التي كانت جديدة على أوربا (آنذاك)! على الرغم من أدوات الطعام المذكورة، والشوكة والسكين ووالملحقات، فقد يبدو أن تناول الطعام بالأصابع يظل أكثر نظافة (على النطاق الفردي) من الأدوات التي تعاد غسلها مرة إثر مرة، لكن الموضوع عادات! بالنسبة إلي، مثلاً، لا أحبذ أكل الأرز بدون أداة كالملعقة مثلاً، وكذلك السلطة (الناعمة)، ببساطة لأنني لا أتمكن من التحكم فيها بالأصابع المجردة، (وأما العصيدة، ففيها قولان: فالملعقة تعطيك مجالاً للتتحكم في كمية الملاح المصاحب للقمة، وهي ميزة، ومن ناحية أخرى، فالعصيدة، على رأي شيخنا ود البدري، بالملعقة فيها مقلب، وحرج، إذا كانت العصيدة "بوخها لاوي"، وهي التي نحبذ، فكيف تؤكل بمتعة بغير الأصابع المجردة، وتكون مأمونة العواقب من الجرسة والحريق وما يلزم من التردد في التصرف في اللقمة الحارقة بلعاً أو لفظاً؟) الطعام وآدابه مبحث واسع، ومما يروى في هذا الشأن أنه كان الرسول صلوات الله عليه وسلامه، يأكل بأصابعه الثلاث فحسب، فتأمل الأناقة في التناول! بعضهم يدخل يده في الطعام حتى يسيل الإدام أو الدهن إلى كوعه، وكأنه في معركة! (لعله)! نعود لموية السلطة. موية السلطة، كنت من محبيها، (إذا وجدت خلوة وانفرادا، عند اللزوم)، وهي ممتعة(لي)، حسب المزاج، وذلك منذ الصغر، (لكن السلطات خشم بيوت، مُش كدة يا أهل لبنان، وناس دارفور؟)! أدوات المائدة، ابتداءً من ُكمَش (أم جنقر، والقدوقدو)، وحتى (تبساية البغو و الكوشيب)، مجال للأدوات العديدة لتستعرض وظائفها، وكلها تلبي حاجات، وعادات، وكلها لتجعل الطعام أكثر متعة! وتعلمنا من فاضل السلوك أن الطعام لا يُعيّب، أياً كان، فقد ورد في الأثر: (ما عاب رسول الله طعاماً قط، إذا أعجبه أكله وإن لم يعجبه تركه)، ألا ما أحرانا الاقتداء به! والطعام ثقافات ومناهج وأذواق، وعجائب! من الكافيار حتى الكول و التركين والمرس والملوحة والفسيخ والجبنة الفرنسية والطعام الصيني والكوري وال.. وعييييييك! لكن يا الطيب يا خوي، " البوش" و "أم فتفت" و "المناصيص" التي تأكلها وكأنك تعزف "هارمونيكا"، يعني وكمان عندك الكسرة مع مفروكة بامية"مدنكلة" أو خضرة مسبكة، دحين ياتو شوكة ولا سكين يمكنك من السيطرة على اللقمة! أقول لك يا سعادتو ود البشير (صوموا تصحوا) وبالهنا ليك، ولعدوك بالسم الهاري! |
الطيب الشهى
وحضور وليمة حروفك الباذخة الكرام السلام عليكم و "لحمة" الملاح وسلطاته أما بعد أنا علاقتى بالأكل عامة كده، زى علاقة مالك بالخمر خاصة اللحوم، لأنه "اللحوم" بى جنبها بتعوق طوالى عشان كده معولق ومسحوت ومعصعص زى عود القنا، الفطا ليهو خريف عشان كده يقيت نباتى والله قربت أمشى كلية الزراعة وأول حاجة بعاين فيها لما الأكل يبدأ هى السلطة "فتحة على السين" وابدا "أتسلطن" ليك فيها وغالبا ما بكون أى مجال "لجغم" ما تبقى من مياهها نسبة لوجود هذا المدعو ب ألإتيكيت، لكين ونسبة لقعاد الزول براهو فى "أرض الطشيش" بقيت أتحكم براى وبكامل "سلطتى: المخولة لى فى مصادر مياه السلطة شى جغم وشى شفط وشى تكرع أما إذا دار سؤالكم عن أحوال الجغم الأخرى فنفيدكم باننا من محبى "العكاره" أو "الموص" بحسب رواية جغمان بن حفص الأكوع، وقريبتها "النشا" خاصة لما يكون عليها ليمون خفيف كده ودائما بكون سقايته على شكرا يا ابا البشير على المأدبة الحلوة من أطايب الكلام |
اقتباس:
. أيوة كدة يا جيلي فكها شوية لكن ما عيب عليك تشمت فيني ابو مناهل يعني ما لقيت اقتباس غير (بقة بقتين) دي؟ البقة و البقنية و البغو..حالات من (البغبغة) المتوالية يا متمرسين حبابك . |
.
اقتباس:
مرحبتين حبيبنا عبد الوهاب هنداوى ناس الجيلى والخال بعرفوا كتيييير..أحسن ما (تباريهم) :p أنحن كنابي المريسة عندنا لا تحمل أسماء لطيفة زي دي.. عندنا كمبو (ودع أمك) كمبو (جابك أجلك) كمبو (ك.... أم الجلابة):mad: و الباقيات ما بقدر أكتبهن لخروج أسماء بعضها عن اللائق! الطريف أن هذه الأسماء لم تخضع لسلطات المشروع الحضاري..:eek: و تعجبني لافتة في كرتون كسلا بالحاج يوسف مكتوب عليها بخط عريييييض (هنا تنتهي سلطة الدولة)!!:D :D ناس المباحث بيقولوا للعساكر المتحمسين: لو مشيت بي ورا اللافتة دي ما تكلمنا في الجهاز لأننا ما راح نجيك و لا نشتغل بيك! تسلم يا حبوب . |
اقتباس:
. حبيبنا أبو العز الجنوبي ..يا بتاع الشطوط و الليمون المظبوط تسلم..و انت اللي فتحت شهية النقاش باتجاه أجمل طبعآ الشطة مهيجة لتلك السوائل التي تفضل الأنف مخرجآ..و يأتي شكلها محرجآ!! اللطيف أن هذا الحرج أيضآ (ثقافي) هو الآخر..فالأمريكان مثلآ (و ربما بعض الغربيين) لا يتأذون من ... (المخاخيت) مثلنا!! و يكفي منديل ورق أنيق لاحتواء الموقف و تسمع الزييييط في المطعم الهندي عاااادي..و زي ما قال ابو العز..مهم جدآ انو الزول ياخد راحتو في الشطة بالانفراد بها أو أكلها بعيد عن الجنس اللطيف (حماة الاتيكيت) ..و لمن يتأمن الموقف تاكل بمزاج و لا تأبه ل(المخاخيت).. حبابك يا عز . |
اقتباس:
الحبيب أبومناهل انت عارف الجيلي دة خطر و راكب القطر و ما بتفوت عليهو حاجة.. خيال كاتب ما بتنفع معاهو..أنا البوقنية الحاااامضة البتلسع في نهاية الجضوم دي البوديني أشربها شنو..دة شغل زول شق المقابر ساي! (الجو) هنا جو شطة و سلطة و ليمون..أبعد السياسة يا السيد لسلامة الوجبة . |
اقتباس:
. مرحبتين العزيزة اشراق بالهنا يا باش و يا سرورة و الست الوالدة بالله لما يكون معاكم ضيف..طنشوهو و أجغموها عادي شكرآ لزيارتكم و دعم موقف موية السلتة.. . |
يا الطيب أخوي ما سمعت بي أهلنا ديلك العزاز
قالو لمن الجاهل بكي حبوبتو قالت ليهم الوليد دا مالو ببكي ؟؟ بزتو مليانة مريسة وبصلتوا في أيدوا ؟؟ نعم الأكل فعلا له طقوس وتقاليد تختلف حاليا حتي في البيت الواحد ولا كمان نقول الحوش الواحد أت يا الطيب أكلت النيفة من الدحلوب المدفون في الواطا وبعدين يوم الجمعة شفت العسلية كيف بتبقبق ومعاها قزازة بيبسي باردة وأمفتفت وكبدة الأبل بس دي وين مع الشوكة والسكين وحاجات تانية تحت تحت ما تعزمونا معاكم يا جماعة ، أسمو شنو داك يا الطيب باربيكيو ، بس نحنا ناس أكل ساكت ما دايرين أيتها قزازات حتي لو كان نبيذ تسفاي بس المزة مطلوبة عشان تعمل فرشة وفي حاجات بتشتغل أستيكة يا حليل زمان وزمان ، يديكم الصحة والعافية |
اقتباس:
حبيبنا البسام العلام ..عالم عباس مرحبتين و الله أنا كنت أعرف أن الفنان زرياب كان حائكآ بارعآ ..لكن (تباخ) دي جديدة.. (تباخ) ..كسرة بملاخ؟؟ و لكن (تباخ) راجل?.. و لا كان بيجهز البنبر و يخت يدو في نصو لوووول؟؟ أها ..الحكاية التانية قلت لي الرز بالملعقة أفضل؟..و الفتة بتاعة الفقرا كييييف؟ ياخ نحن في مسيد أبوك الشيخ الطيب لمن نمشي أم مرحي فوق جبلنا..بيقوموا يجيبو لينا الفتة بطعم اللحم و الرغيف الحااااار و الرز المصري( و قد كان رفاهية)..أها مع الحواريين و المريدين مافي دبارة ملاعق..كنا (نلت و نعجن) اللقمة برزها و عدسها و فومها و بصلها..و نتفاضل في قطعة لحم أخطأت طريقها للمغراف..كما أن الفتة ليس معها سلطة ..و الشطة منع من ظهورها التعذر.. قلت لي الكافيار...لوووول و الله كلماأقول أمشي أتعرف عليه يغلب علي الفقير القروي بداخلي و أقول (يا واد عييييب) ..لكن من باب العلم بالشيء و لا الجهل به سأغافل ذلك الانسان القابع بسقف رأسي يوجه سلوكي بلا هوادة و سأتذوق الكافيار قبل انهاء غربتي لأني لا أضمن وجوده في (الجزر) بتاع طابت أو حتى الحصاحيصا ذات نفسها!! و قلت لي ملاح البامية المفروكة:cool: :cool: ..بالشمار يا أستاذ؟؟ و بالبمبار؟؟ و السطة معاها شطة خدرة؟؟ و فجل و بصل؟ و (المسخوط) عماد أحمد الطيب معزوم؟..هل تصدق يا أستاذ أن ابن عمي هذا (جاب لينا بيرة في الحج)؟؟و في مكة؟؟بس قال مافيها كحول!! و شربناها بفتوى المغني!! شفت الحرص على الدين عند حجة الفريضة! عالم يا عباس أدرى الناس بالطعام في منطقة أفريقيا و العالم العربي هم أهل دارفور..و أنا هنا (من رأى) و ليس كمن سمع..فقد أمضيت بجبل مرة تلاتين يوم (ق.ش) يعني شنو؟؟ ;) ;) بالعربي كان منتصف 1983!! و أسبوع في نيالا..سكر شتت و حي الوادي و تكساس ...لووووول..انتو يا ناس دارفور تعرفو كتير..شعر و غنا و قرآن و شطة و شية و موية سلطة و دواس و.. دواس ودي .. يديك و يديهم العافية آآبتجي تاني؟؟ . |
sorry
|
اقتباس:
ياااا مطر عز الحريق..حبابك ألف قاتل الله الاتيكيت..سيء الذكر الذي يحول بيننا و بين تلك الجغيمات.. و عن أحوال الجغم الأخرى وصفت لنا جغمآ بريئآ و ذكرت شيئآ و غابت عنك أشياء انا و الجيلي أخوي..برعاية أبي مناهل..نرمز بالجغم لأشياء أخرى يتوجب شراؤها بأمريكا لابراز بطاقة تفيد أن عمرك فاق الواحد و عشرين لكن في السودان بيبيعوهو ناس بسط الأمن الشامل .. أوله عين مفتوحة..و أوسطه يجهد الألثغ..و آخره يحرج السودانيين مخرج حرفه!! فهل عرفته..يعبأ في أكياس لندرة العبوءات الأفضل..و ينافس التمباك في تسمية (الفرح المعبأ بالأكياس) و يسميه المتأخرون بالكريستال للشفافية التي تميزه و هو متاح متى هززت اليك بجذع نخل يتساقط عليك لمن تآمن:) و ان عاقرت أهلنا المفلسين فلك في الذرة متسعآ من الرخص و تجشؤ كريه:p لكن خليك مع الليمون انت زول أديب و ظريف..ما زي الواردة أسماؤهم فوق ..ديل أصحاب البوليس.. و اسق ليمونك ما شاءت التروية لذلك من سبيل . |
اقتباس:
و الله ذكرتني أهلنا المتهمين بمحبة الشواء و البصل و كافة مستلزماته.. الشافع طبعو شين ساي..كل مستلزمات تهدئته متوفرة!! اقتباس:
زيها زي بيض بالبيض ...ما عجبني زيو زي لحمة الكوارع...ما عجبتني...لكن شوربتها بشاكل فيها..كان لدي زبونة في سوق الموردة (أهمهمهمهمهممممم) كانت مبسوطة من اني بدفع حق الطلب و باخد الشوربة بس و بحلي بي مديدة حلبة..يعني زبون بيدفع كويس..كانت لنا بنابر في ذلك الحي..و بنتها سمحة و غمازة تحب الظباط و تخدمهم بلا حياد..ما تكلم زول.. الدحلوب دة ما عرفتو..و من السياق شكلو زي برمة سغيرونة مدفونة في الأرض..لكن الشغل دة بتاعنا ولا دارفوري..دفن الأكل في الواطة دة مهارة لا تمت لأهل العوض بصلة..أقبل التصحيح. اقتباس:
الغريب أنني لأول مرة باكل كبدة الابل كان في مكة!! و انا عااااارف حجتي مع الفنان عماد عاوزة اعادة..بس ربك يتقبل بكرمو ساي.. اقتباس:
لكن و الله أنا لمن ينزل مني و أقوم أبهر الشية بي فهم..قادر الله..تاكل ما تدي الجنبك..و حكمة الله غيرها ما بعرف أعمل شاي ذاتو!! بس الشية و السلطة و خلاس. . |
سعادة الخير صباحك .. زمان مشيت ناس عمي , و هو دنقلاوي بليغ العجمة , حلوها .. عجمته هذه تباريه في كل أحواله . فهو يعجم في المشي و في الونسة و في النوم و في الرأي و حتى في التجارة .. فقد كان رحمه الله من أعيان سوق السجانة . و يعيب علينا ( محركة ) ولاد الخرتوم اللي ما أندهم دم ولا أدب . المهم .. زرناه في البيت انا و أخوتي لتقديم فروض الولاء , فأكرمنا بتركين ( ملوحة نيه ) , و هو لو تعلمون لا يفعلها إلا لمن خصه بحبه و رضاه . و كانت تلك الملوحة النية شلللو .. سائلة تماما و غير مطبوخة .. فقط مصفاة و مضاف لها الليمون و البصل كبار كبار و فوقها اتردمت قراصتها بسماكة و غلظة تأبى علينا قطعها نحن الصبية الجهال . أكلنا يا صاحبي ( على مضض و حمرة عين ) , حتى تبقت قطع ذائبات من تلك القراصة المسكينة عائمات فوق حامض التركينيك , ما جعل السائل في قعر الصحن متماسكا و كثيفا أشبه بالمديدة , ليفاجأنا عمي برفع الصحن و جغمه جغمة باتعة ماكنة تبعها بكريعة عريضة ثم و ضع الصحن : كُلو يا ولاد . أسلمنا الأمر لصاحب الأمر و ولغنا في ذاك الحامض الكبريتي الكريعي اللعابي ولا على كيفنا . كل هذا مقدور عليه .. لكن أن يبادر عمي بهدوء عجيب إلى قلب طبق الحلو ( الكاسترد ) في ما تبقى من ذاك الحامض سيء الطعم و اللون و الرائحة , ثم يديها واحد صواطة و يكرر : كُلو يا ولاد .. فذاك ما دفع بأخي وحيد ( و هو زميلك البوليس المسلط وحيد عبدالله ) إلى التصريح متنرفزا : عمي .. ناكل شنو ؟ قول لينا ودوها المعمل أفحصوها عينة ( فسحة ) . لنخرج بعدها من جنات عمي و رضوانه , قليلي الأدب و الترباية و عديمي الأخلاق . و هكذا صنعت تلك الواقعة بيننا و عمي ما صنع الحداد . و قام العداء إلى يومنا بيني و التركين الني قاتله الله . الطيب , جربت سعادتك شربت موية تركين ( و هي ضربٌ من أسلحة الدمار الشامل ) ؟؟ نصيحة لله و الرسول .. لا تفعل . مودتي . |
الطيب بشير وضيوفه كلهم بدون فرز وخاصة الجماعة الزادو الخلطة تسبيكة
ارحمونا يا جماعة ما منكن موية سلطة وقلت فى سرى يا ود بشير شكيتك لبوليص الحركة الخواجة يدفعك غرامة تنسيك موية السلطة وما جاورها تجوا انتو تتموا الناقصة ؟؟؟؟؟؟؟؟؟؟؟ نطالب الادارة بسودانيات بوضع حد لهذا الاستفزاز :mad: لقد جوعتونا وخليتوا مصارينا تكركر وانا قاعدة شايلة رغيفتى فى ايدى وبغمس فى كلو مشاركة علا قصة الملوحة خطيرة وترمى فى الشوك انتو يديكم العافية وانا اللقمة الدافية بعد الجوعة الدخلت فينى تانى شكيتكم:mad: :mad: |
اقتباس:
اخيييييييييييييييي مابنشربها بناكلها ...! .. .. |
اقتباس:
لا تزال بحاطري الجملة الاعتراضية التي تحدث عن القربينة اس (تلك التي تتكون من حديد و خشب).. علاقتي بالملوحة مثل علاقتي بالمنسف الفلسطيني..سمعت بكليهما و سعيت لتذوقهما..و فشلت محاولات عديدة ..و بالمناسبة وصفك لها جعلني أشتهيها...و ربما أسعى لارتكابها في أقرب زيارة لأرض الوطن ..لأنني متأكد أن مطاعم السودانيين بالخارج مغشوشة ..تبيع المشاعر لا الطعام الجيد..لي تجارب سيئة مع أربعة منها ..كل واحد في قارة براهو!! اقتباس:
اقتباس:
و أنا أساند البوليس في الحركة التصحيحية لمسار الموقف كلو لا ...لا..كلو عيلا الكاسترد داااام ...زي ما بيقولوا الامريكان و بعد دة كمان كُلو يا ولاد !! المرحوم فيهو غتاتة زايدة اقتباس:
لكن ساكيها أها بمناسبة نصيحتك دي ما راح أشرب الموية لكن التركين أو الميلوحة ..ما بخلي ..ما بخلي لقيت لمة في الكول مرتين..و ربنا ما وفقني في (المرس) لي هسع لكن كلها عضات مؤجلة تسلم يا حبيب و ربنا يرحم عمك ياخ الليلة أضحك مساءنا بالحيل . |
(المتمرس) طيبنا ,
تعرف ياجنابو مسألة الإتكيت دى محرجه..!! وعايزة صبر, الطليان يأكلون حوالى الواحدة ظهرآ وجبة (منتصف اليوم) وتحوى دائمآ أسبكيتى أومعكرونة ويدمجا معآ (باستا).. الأكل دون (الخبز) مشكلة, لاذلت متذكرآ لتهاوى الطعام نحو باطن معدتى دون حاجز, وحين شبعت قاربت ليلتها على الموت..!! معدتى تعرف كفايتها عن طريق الخبز .. لاحقآ أرفدتنى الحياة الرأسمالية بنشرات توضح طرق الغذاء والتبضع, فى مجتمعات إستهلاكية بحته... لاذلت أتخير طعام تلعق أصابعك خلفه.. خبز و(سلته) وياريت كوارع وعكو ونيفة, أو على رأى جنابو:D |
|
يا سعادة الطيبة
وطيب السعادة مساكم /صباحكم رويان وتريان على ذكر سيرة "الجغم" الأخرانى داك يا حليلنا منها الدنيا يا الطيب والله بدينا زماااااااااااااااااااان من ايام "ألبيون" ده بكون متذكره خالد الحاج فى الزاوية القدام كمبونى جيهة الشمال ثم مرورا ب "الرويال" وما أدراك ما حوش الرويال وبعد داك "زابنا" ناس "كوبا كوبانا" وقعاد الفَسَحه والهوا العليل وشوية هوا معطر وقليل من النوع العذرى وبعد ما بقينا عاملين فيها أولاد راقين ، بقينا نخفس على على "الجى بى" لكين لما كنا "نرغب فى تشجيع الصناعة الوطنية" لم يكن ثمة سبيل غير "عشه ووكر" فى "الخرتوم" و"أمين" فى أمدرمان كان عندنا قبل 83 فى ودراوة "إنداية" باهت لونها تسر الناظرين حيث كانت تدور "عبابير" الهناء، وشى نميم وشى دوباى وشى "رمى ضرس" وبعد ما تمسى، يتوفر لدينا أفخر أنواع "السلاف" بلونه الأبيض الوهاج لكين جنت عليها أيدى الغدر بعد داك فأضحت بلقعا وصعيدا زلقا عليك أمان الله يا ابو البشير كله راح لينا هسه خاصة وإنه الزول حاليا قاعد ليهو فى بلدا "مش طيره عجمى" وبس ده طير عطشان ونشفان كمان أضف إلى ذلك محاورة أمراض "التقدم فى العمر" لكين بينى وبينك كده، الزول كان لقى ليهو "جُغمة" "داب" أو "هينيكين" ولا بالميت كده "حَبيبة أمستل" ما بياباها إتا قول لى كدى لِم فيها أول حاجة الله كريم |
الحبيب الطيب بشير غايتو مويت السلطه دى ماتجقما كلها خلى منها شويه
علشان اجيب ليك معاها 77 حرف ( مع فتح الحاء وكسر الراء ) والملاح سبروق الجرف ابقى من ( البوليس ) مطرف وانبسط متل المخرف .......... وهو حديث تراث من وحى الزاكره الشعبيه ......... جوعتنا يالطيب بى موية السلطه دى وقلت اجوعك معاى وبقية المعزومين هنا ..... السلطه هينا لاكن سبروق الجرف ده نلقاهو وين يالطيب اخوى:D :D |
.
اقتباس:
مرحبتين حبابك انت بس جربي موية السلطة دي;) ..عشان تتعلمي شوية شوية..ما تشربيها على طول .. لا ..لا..أغمسي فيها قطعة العيشة و أكلي بيها عاااادي..سينتقل طعم (التبولة) بتاعة السلطة و توابلها و يمتزج مع طعم الغموس بتاعك أو الملاح أو الايدام..طبعآ لازم يكون فيها ليمون أو خل..و بهار مظبوط..أضعف الايمان فلفل حار..و لو كنت في البيت و براحتك شوية بصل (حر) و أنا ما بكلم زول طيب؟؟ بعدين يا حبيبة عيش البلاد الباردة دي ناااااشف و مهما تدخلو في الميكرويف برضو بجرح لهاتك..الغميسة في موية السلطة بتديهو بلل يسهل المضغ كمرحلة أساسية للهضم..دع عنك طعمه البديع. و بعد داك تنتقلي لمرحلة الملعقة.. و برضو أبدي معانا بملعقة الشاي السغيروووووونة ديك ع شان البقة بقتين دي لناس الجيلي و أبومناهل و خالد الحاج و البوليس:) كوني بألف خير يا أخيتي . |
اقتباس:
أحيلك لوصفة المبتدئين فرغت للتو من شرحها لسارة واحدة و احدة في طريق (الجغم):D ;) :D :) :o :p :rolleyes: :cool: :D :D . |
اقتباس:
قلت لي عكو؟؟ يا جماعة الزول دة ما غلتان؟ و كمان ..جبت لينا (الله فوقها القراصة جات....شقوا فوقها تمانية بصلات) و الله الشباب ديل رايعين كيف و كمان توصيف قراصة القمح بالتفصيل و قلت لي الشطة ام قرينات هااااه؟ بل أنت المتمرس يديك العافية . |
سلام سعادتك
والله بسوي سواتك لكن انا فايتاك في بيت النسابة بدون وجود العم والاخوة وكمان شراب بالمعلقة في كل المحافل ولك سلطة مكربة عند العودة للدوحة ومعاك السلطة(بضم السين) ونتقاسم الموية |
اقتباس:
(جي.. ام.. اتش) I was told later it is Gordon Music Hall.. دفرتها و خشيت..هي هي هي ..لكن أظني ما طولت.:rolleyes: البنات بيجو يقولوا لي: تعال يا انتا ..شميت النسيم؟؟:cool: أقول ليهم لع..:( يقوموا يقربوا مني و يشمموني عود صندل معمول بخور ..لكنه مغموس في صندلية و عطور أخرى..و أنا أحترق قبل العود..و يتضاحكن..و يجرن..و انا لابس قميص من خياطة العم فضل علي سلامة (أشهر خياط جلاليب في طابت:D )..و شعري الخنفس مالي الهول..و شكلي زي ابو الهول..استمتعت بالتضاحك معهن لكنني رجعت حركة ورا.:) .و لا أعرف لماذا قصرت جرأتي شقاوتئذ. اقتباس:
أنا ..كظابط بوليس ..أعلم الناس بأن الخمر لم يفارق الخرطوم لحظة واحدة! ناهيك عن ابادته و انهاء وجوده و كلام القضاة الذين لا يفرقون بين الخمور المهربة و العطور المركبة! الذي حدث أن المسطول نميري استبدل الذي هو أدنى بالذي هو خير..قام على البارات قفلك قفلك..و فتح باب (رزق) واسع للخمور المصنعة محليآ و هو لا يعلم أنه لن يتمكن من محاربتها..الآن معظم أكشاك بسط الأمن الشامل تبيع الخمور المصادرة!! تتم الكشة.. يتم التحفظ على المقبوض لابادته حسب القانون.. يقوم (بعض) رجال الشرطة الأوفياء باستبدال أكياس العرقي النضيف بي موية عااااادية .. يضاف لكل كيس موية..كاس عرقي وااااحد.. بتبقى ريحتو عرقي عرقي و هو كل ما يحتاجه مولانا خريج القرآن الكريم.. قاضي قضاة الخراتيم يقوم يقول أوفففووووووا..ابيدووووووه.. يقوموا يبيدوه.. و هم بالفعل يبيعوه.. العرقي نسبة الكحول فيهو تفوق الستين في المائة في الشري قرابة الستة و عشرين في المية :( في البيرة اطناشر في المية بس!!;) (أبو مناهل) دي خبرات مهنية..ما تحمر لي ;) أها ..الناس الكانوا بيمشوا البارات نضيفين و ظريفين و يشربوا خمر مصنعة بمواصفات صحية اتفرض عليهم جالون خجيجة دة:confused: و نسبة كحولو أعلى:o و ما دافعة ضرايب بالله الفايدة المرتجاة هنا شنو؟؟ اقتباس:
أبو ذر و الله مرحب.. . |
اقتباس:
كيف حالك يا زول يا زين ذكرتني السبروق و لزوجتو المتفردة..أخدااااار كدة ..و قلت لي بالتحديد (حرف)..ما نغلط نقول قراصة و لا كسرة..لا بالضبط حرف...زي الزول السمين زمان كانوا بيقولوا (متعشي و شايل حرف)...ذكرتنا زمن سمح يا زول يا سمح. لكن مهما بقيت مطرف من البوليص بيلم فيك..;) أحسن انبسط متل المخرف ساي اقتباس:
أنا جوعتكم بالوصف ساي انتو جايبين لينا التقلية و الضلع:mad: أنحن ناس معانا عوايل في البورد دة!!:confused: قمت طواااالي قلت لام بشير هسسسسع دي عاوزين تقلية قامت شكتكم لي الله و النبي المولى تسلم يا عزيز . |
اقتباس:
لا انت عندك جرأة زايدة تشربي موية السلطة في بيت نسابتك؟؟؟...لوووول كدي لمن نشوف راي الباش في الموضوع دة ;) بالنسبة لعودتنا للدوحة نسأل الله أن يجمعنا طيبين و يخرجنا من هذه البلدة الظالم أهلها.. لكن لو فيها موية سلطة نغشاكم في طريق العطلة بس معاي الاولاد دي ح تكون فيها أدب و كدة تسلمي سؤال بالملعقة السغيرونة و لا ام دكنة؟؟ :D :D . |
.
واحشاني جدآ صينية الغداء كبييييرة و نيكل على جوانبها صحون متوسطة بها ما بها يتوسطها صحن الباشري الما خمج.. و فيهو ملوخية..أو بامية فروك ..زي بتاعة عالم عباس..بالشمار و البمبار السلطة مبهرة.. و بعد الغداء .. تغسل يديك في مواسير الصالون..حوض الوضوء..تلاتة.. أربعة مواسير..و البلاط فقير..و الصابونة زي بروة..أها..الفتحة بتاعة الماسورة الرئيسية الفي الحيطة عاملة جحر وااااسع في فتحة دخولها للبيت..و في البلف الرئيسي (عامل زي مفتاح الدش) تلقى أهلنا ناس الجزيرة الجونا البارح مغزغزين فرش الأسنان بتاعتهم ..ماركتها الصينية تشي بدناءة قيمتها المادية. بعد الغداء ..الكباية بتاعة الليمون مندية من برة..ساااااقطة.. و الشاي بالمستكة.. البنيات قالبين الكبابي.. و البخور مغبون جواها..زي المشوكش يوم رقيص السمحة! . |
.
بلغني أن طريقة السعوديين في أكل الكبسة لا تتناسب مع طريقة عنطزتهم علينا!! و بالذات.. الرز الباقي في اليد الجاية راجعة من الفم بعد توصيل اللقمة لمثواها الأخير.. قيل و العهدة على الراوي انو بيكون اليد فيها رز (جايي راجع من اللقمة) و ..بيرموهو في الصينية بتاعة الكبسة بطريقة كشششش:mad: ..و يتفرق دم الرز بين أبناء القبايل..و بعد داك يتم (تمليك) لقمة جديدة..فقط يكبر احتمال أن تحتوي اللقمة الجديدة على بعض أرز كان في فم أخ تاني:o !! و هكذا.. . |
اقتباس:
ولازم يتربعوا ليهو في الواطة ...كمان مرة كنت معزومة عند جيرانا رز ( عيش زي ما بسموهو ) ... وزي ما قلتا هم لازم يعفِصوهو في يديهم حتى ياكلو وانا مابعرف .. إلا الرز دة بالملعقة.. سألت ست الدار .. ممكن أطلب ملعقة .. ؟؟!! قالت لي وليش ما تاكلين بي ايدج .. عا يّل ليش ربنا عاطج ها الايد ؟؟ قلت ليها بزهج .. عشان امسك بيها الملعقة .. :mad: !!! انا شخصياً ما شفتا أرقى من الصينين مع الرز ... رُزايا رُزايا بالترتيب.. بالعصايتين ديل.. ونرجع لعروس المائدة .. التي ما أجمل مويتها + رز أبيض + ملوخية مظبووطة = أكلة هنية ما حتكفي مية ... !! جنابو .. هوّ انت كل يوم عازمنا حاجة .. :p تحياااتي و احتراااماتي ..سعادتك وبالهناء والشفاء دائماً ... |
| الساعة الآن 06:21 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.