الجهالة والعمالة
زماااااان يعني زمنا كان في قولة لناس المباحث والهم حسي ناس الأمن بتقول:
مغفل نافع وهي نفسها ذي البتنقال أو مشابهة البي العربية الفصحى: عدو عاقل خير من صديق جاهل.. حسي والثورة يادوبك جمعوا ليها الطلح ويادوبك حضرو الشملة ويادوبك حننو العريس وخلاص العروس في اللمسات الأخيرة للدخلة. ينط ليك واحد من ديكة العدة ويرش الموية في الطلح قبل ما يولع. يطبزها بي جهالة وتبقى تخدم الخصم أكثر مما كان يفوز بيهو من أهل العمالة... الناس مشحونة وجاهزة. الجهلاء بقصد أو بعدم دراية يقوم يصرفوا الأنظار عن المهم والأهم بمواضيع جانبية سئم منها القراء ونفر منها العقلاء والأسطوانة المشروخة دايرآ، أبوهو منهو وأمه منهو.. بالله عليكم خلونا في ثورتنا وأبعدو عنا كراهياتكم الغير مؤسسة. يعني حسي فلان قال ولا فرتكان قال وإستمراء القوالة الفارغة فايدتها شنهو.. شعبي الكريم أنت البطل ولست بحاجة لفلان وعلان أن يصرفوك عن همك في إقتلاع الإنقاصيين.. للجهلاء خير لنا أن تكفونا عن مهاتراتكم وللعملاء حلوا عن سمانا.. والفي رأسهو ريشة يتحسسها... إن شاء الله ثورة ونصر |
اقتباس:
ثورة ثورة حتي النصر ثورة ثورة حتي النصر ثورة ثورة حتي النصر ثورة ثورة حتي النصر المجد و الخلود لشهدائنا الكرام |
معك يا دكتور بابكر في كل ما قلته
|
موضوع ديك العدة ودوره في إجهاض الثورات أو قول على الأقله إفراغها من محتواها.
"المرصد السوري" كان ديك عدة كبييييييييير، حسب الكان بيقولهو كان الجيش الحر إتنصب ملك لي سوريا. الصدق في المعلومة خطوة في طريق الصواب وأريتنا نتعامل بيها ونتصف بيها ونثق فيها وهي أقوى درع لصد إختراقات الأمن.. بينقفل قدامهم الطعن في المعلومات.. شيخنا فرح ود تكتوك قال: الصدق إن ما نجاك الكضب ما بنجيك وكما قيل؛ الكضب حبله قصير.. في الكُبر الكضب الأبيض علي ضهر من يشيل لكن برضك العواجيز بيكرهو البكضب لأنه بيشعروا أنه فيهو إستخفاف بي عقولهم وقلة إحترام لي فهمهم.. يعني بصحي غريزة العجز المرافقة للعُجز ;) |
سلام مخير.
السيد الصادق المهدي مشهور بتناول الامثال الشعبية في خطابه السياسي وفي رأيي ده تكنيك خطابي بارع وليس وحده كذلك الاستاذ محمد ابراهيم نقد رحمه الله ....... وغالبا ما يكون طابعها فكاهي لتوصيل اكبر قدر ممكن من الفكرة ... قبل كده ايام زيارة اردوغان للسودان وموضوع سواكن اورد السيد الصادق في خطابه (عفوية الشعقيبة) هذه المفردة كادت ان تندثر وبالنسبة لي تحديدا كانت جديدة فما بال الاجيال الجديدة فأعادها الي الذهنية السودانية في خطاب سياسي ... لما بحثت عن الكلمة وجدت انها عبارة عن احتفال يُمارس في الختان في بعض مناطق السودان ... عموما الموضوع لا يستحق ردة الفعل العنيفة هذه في الكارثة العولمية المسماه سوشال مديا لدرجة الافراغ من محتواه . مودتي وتحية لشعب السودان العظيم. |
العزيز عابد
قالوا: زرزور في يد جهال وقالوا: المابعرف .... دي مشكلة الميديا الهي سلاح ذو حدين والأخطر أنه حديينه سنينات، يعني بضرب ويقطع لكن المشكلة "الفايرباك" وهو راجع برضك بيقطع.. أنا في رأيي المتواضع جداً في مثلة حالتنا الحسي دي. الناس تلتزم بتداول الأخبار المؤكدة حتى لا ندي فرصة للسلاح دآ يضرب وهو راجع.. حبي لسوداني الجآي إن شاء الله وبتوفيقه وثورة مباركة توصل لنصر مبين |
اقتباس:
حقيقة سلاح ذو حدين الا ان السلبية فيها اي السوشال مديا هو الجانب الاكثر بشاعة فالسؤال المهم هو كيفية مقاومة اهداف المديا التي تستهدف المجتمعات لضربها في خاصرتها ؟.. يمكن محيطنا الاقليمي يفتقر للدراسات الاكاديمية ولكن في الغرب التيارات الاكاديمية المناهضة للعولمة اخضعت ادوات التواصل لدراسات دقيقة وورش عمل. ان الله مد في الاجال الواحد يتناولها باذن الله . مودتي |
اقتباس:
في إنتظار مناظرتك الحبيب |
فكرة من الإبن محمد عادل ربما تطرح للتفاكر بشأنها وتادولها في الميديا؛ ليييييييييه ما تتم دعوة جماهير الثورة لصلاة الجمعة في نفس المسجد الذي يصلي فيه رئيس الإنقاذ... |
بي تأريخي وبي سني بقول كلامي دآ...
بعد قريت كلام د. ممدوح محمد الحسن في الجارة "الراكوبة" أولن تبادي شعرت جلدي كلبت من شجاعته هو والبروفسرات المعاهو وقولهم القالوهو.. بس برضك عاينت في الموضوع وشفتا فيهو أمرين كلاهم حلو... كونهم السادة ديل قالوا الكلام دآ بكل القوة دي لنايب مدير الأمن فدآ فيهو نسايم حرية وتقبل من الطرف المتلقي الكلام.. طيب هنا سؤال.. هل تعلم ناس الإنقاذ بعض من دروس الحرية والديمقراطية وتقبل الرأي الآخر ولا؟؟؟ الجماعة ديل إنكسرو عديل وبقآ ما ليهم غير يكونو كدآ... لكن برضك في الحالتين.. إن إتعلموا ولا إنكسروا فدي بداية النهاية لأنهم كانو عندهم خط والبيحيد من خطهو ومعناها ما بيصل.. وربنا يجيب العواقب سليمة ويتغلب قلب حب الوطن على عقل الأيدولجية الكوزانية... وينحاز الجيش والبوليس وناس االأمن ظاتهم للشعب ودي ياها الميديا الإيجابية https://ara.alrakoba.net/alrakoba-sudan-news3165536 |
رجال والله عفيت منهم
|
في مسيرة أيتها ثورة في مطبات وحفر في بداية الطريق.
خلافات بين الثوار أنفسهم (الثورة الفرنسية) ويقيف قصادها تجانس قوي بين الثوار (البلشفية) الأوليين ما كان عندهم الصبر "من صبر ظفر" والتانيين إتوافقوا على أن هناك صف وكل واحد بيجيهو وكتهو وبيلقى نصيبة وعشان كدآ إستمرت سنيين. دحن حسي إحنا في ثورتنا دي بقدر ما نجاحيين في أنها (سلمية) برضنا محتاجين لي عنصر هام جدن... الغلبة بتغلب القلة (يتكرسن أحادا) وجمع الناس حوالينا بقوينا وكترتنا بتصعب الإستفراد بينا. نعم هناك مصلحجية وهناك ضعاف نفوس وهناك من يركب صحبة ودون عطاء وديل الناس ما تهملهم فهم لست الخطر والعدو المستهدف. " تأبى الرِّماحُ إذا اجتمعنَّ تكسُّراً ... وإذا افتــــرقَنّ تكــسّرتْ آحادا " إذن ببعض من روح التسامح بيننا بنسد الطريق أمام الإستقطاب من الطرف التاني حتى لا يكثرو وتتساوى كفتي الميزان.. أنا واحد من الناس مسامح لكل من إختلفت معه في وجهات النظر وحتى لولائك ممن أجزم بأن عطائهم سطحي ومصلحي. |
في الوكت الشايفين فيهو الأمور ماشة تمام والشعب كمل تلاحمهو وكل المثلثات والمربعات والمخمسات من البنيات يحفظهن الكريم والوليدات يغطيهم صاحب الشأن العظيم والمهنين والساسة والناس الحلة ووالقرى والمدن...
بعضهم وعن جهالة ودون وعي وما تقدر تلقى سبب وجيه في أنه لساتهو عايش في وهم ويفتح مواضيع شقاق وفتنة بين أمة إلتحتمت صفوفها في وجه الباغي المجرم.. إن كان الأمر جهالة والتي هي (على قولهم فاقد تربوي أو تعليمي أو أخلاقي ولا قول حنان) أنا شايف أنه أخف مليون مرة ضررن من الشيتن التاني... ما هو يا أخوانا في ناس بينطبق عليها قولة: الجن بتادوى بس كعبة الإندراوة والتي هي ممكن ينقال عليها وهي عدم التوفيق في: القول؛ من الكذب والتضليل التعامل؛ في عدم إحترام عقول الغير في رواية حكاوي هي من نسج عقل مريض و"حاسد" الغرور؛ وبرضك النرجسية في أن يترأى الكمال والغريبة، تصديق الحبك المفبرك الكاذب الصادر من الذات المريضة.. أها أنا في تصنيفي لي زولن ذي دآ ما ممكن يتختا إلا في مرتبة واااااااااااااااااااحدة؟؟ أنه عميل والعميل طبعن أخس أنواع البشر فهو عديم القيم والإخلاقيات.. همه أمور مادية أو حسية .. بعضهم بالقرش وبعضهم حسياً ليوصف بأنه زول كدآ وكدآ وكدآ وراسهو يكبر لمن يتقل ويرميهو لمذبلة التأريخ حين تنكشف كل الأعيبهو وعمالتهو.... حسي وكت نتلم وناس البيكتبو لتأجيج نار الفرقة أخير تكفونا بي سكاتكم لأننا إتلمينا للتغير تحالفات ثلاثة تمثل الشعب كله قال فلان شنهو وفرتكان شنهو طيب إتا منهو؟؟؟؟ هنانا أقول ليك: قال المولى عز وجل؛ (وَاجْتَنِبُوا قَوْلَ الزُّورِ) (إن الله لا يهدي من هو مسرف كذاب) وعن ما قال الصديق رض الله عنه؛ أكذب الكذِب الخيانة. والصدق والصادق في قوله. قال عنه تعالى في محكم تنزيله؛ "إنَّمَا الْمُؤْمِنُونَ الَّذِينَ آمَنُوا بِاللّهِ وَ رَسُولِهِ ثُمَّ لَمْ يَرْتابُوا وَ جاهَدُوا بِأَمْوالِهِمْ وَ أَنْفُسِهِمْ فِي سَبِيلِ اللّهِ أُولئِكَ هُمُ الصّادِقُونَ". وحنشوف يا عملاء الدس واللخبتة أي منقلب تنقلبون :mad::mad::mad::mad::mad::mad: |
من الأقوال كثيرة الترديد؛
نآطنا بسكاتك... فاليوم وذي ما قلتا في المداخلة الفاتت.. إتلمين كل جماعتنا في تحالف وااااااسع وعريض... لكن فاقدي الأهليه وأحقية الحديث عن الوطن وعن التضحيات من أجل السودااااااااااااااان الوااااااااااااااااااحد دآ مش التشدق ببطولات في بلدانن تانية.. يحاولوا أن يصطادو في الماء العكر.. وصدق من قال: عدو عاقل خير من صديق جاهل.... فيا ريت لو؟ ينأطنا بي سكاتهو :mad::mad::mad::mad: |
سيف الدولة حمدنا الله
قلم سنين بس المشكلة أنه ناس فترة الإنقاذ..
عاشوا في الشمولية وما تنعوا بريحة ديمقراطية.. في رد علي واحد من مواضيعهو... رديتي بس عشان شبابنا يتعلموا... يابا قولة أستاذ تصرف في سوداننا مثل ما يصرف لقب دكتور جزافاً.. عليه هنا وأنا ما ارف كيف أخت من القاب قدام إسمك وعليه بختصررها وبقول: سيف قريت موضوعك في الراكوبة عن سيد صادق كله موضوعي كوجهة نظر مخالفة لكن أنك تحمله عدم الحفاظ علي الديمقراطية فيابا دي فيها إجحاف... نحنا إتولدنا في زمن الإستعمار وعشنا الإنجليز يمارسو رغم أنه مستعمر كم هائل من الديمقراطية وشربناها وعليه إستقلينا بهدوء وتمت إنتخابات وهي كانت أول تجربة لينا ومشت بهدوء وكأننا متمرسين عليها.. نطو العسكر ورمينها في الحكومة أنها جابت العسكر وهي الحكومة الإحنا إنتخبناها ومسكناها عشان تحكمنا بس ما حميناها وتكرر الأمر تاني وتالت وكل مرة نرميها في الحكومة الديمقراطية المنتخبة مننا وسيبناها براها في الخلآ لذئاب الكآكي عشان تنهش أحشائها... ما عارف لكن لو إتا أكتر من خمسين سنة في العمر.. بتكون متذكر أنه الطيف السياسي قبل إنقلاب الكيزان كان إتفق أنه يوقع علي ميثاق في مدني لحماية الديمقراطية وقام الإنقلاب وموقعي الميثاق لم يحركوا ساكن بل البعث والشيوعي ونقابات لافة لف الإتنين ديل والجياشة أصحاب المذكرة كلهم باركوها ظانين أنها حقت كل واحد منهم. يابا إحنا أمة معشعش في دماغها أنه السلطة والحكم شمولية وسيادية.. شيخ القبيلة والنظار والعمد هم وذي ما بنقول: أهل الحل والربط يعني السلطة في يدهم ولا غير وعليه عبود ممكن يحكم سبع ما دام هو براهو الأمر والناهي ونميري 16 سنة نجضنا فيها والبشير قبح الله وجهه تلاتييييييييييييييين سنة لييييه تفتكر لأنهم بالعصى والسوط والرصاص.. لكن سيد صادق ما قعد إلا مجموع خمسة في فترتين بسبب أنه كان كما يقول الجهلاء ما قوي وكما يقول أعدائه أنه شضعيف والبعض ممن في داخله عارف الديمقراطية ماهي أخنق فطس يقولوا ليك: ما بيأخد قرارات حاسمة... يعني إتا يابا تفتكر أنه سيد صادق كان مفروض يحكم منفرد.. ويبقى شرطي المرور ومفتش البلدية ومهندس الكهرباء وفي كل مكان وشايل سوطه وعصاته وبندقيته ويكتم الحريات ويمنع الأفراح ويتسبب في الأحزان... يابا فترة حرجة فترة مواجهة عدو واحد .. قالوا في القولة "يقدر طبقكم يطبق طبقنا ذي ما طبقنا بيطبق طبقكم".. فأنتم كان إعلامييين ولا أصحاب وجود في الميديا.. طبقنا عارفيين حتى ولا واحد في المية من طبقكم وعليه المسئولية عليكم أكبر... في فترة ذي دي شوف المصلحة العامة ووحدو الصفوف ضد أعداء الثورة الحقيقين... نصيحة من عمك بابكر مخير؛ يابا والله لو تقربت من حيدر إبراهيم بتستفيد بالزيادة... وبالمناسبة عمك برضهو يعني بيشارك قدر قدراته... وخليناك عافية وربنا يهدئ النفوس ويهدي من يشاء الله أكبر ولله الحمد |
متين ننحلآ من ديل
قال ليك؛ أمس قناة إسكاينيوز العربية إستضافت واحد إسمه بابكر ابراهيم "أبرآ من تطابق الأسماء" وعرفهو أنه محلل إستراتيجي أمني ودي تعني أنه "كان" في واحدة من أذرع مؤسسات القوات النظامية.. وكان دي لأنه وحسب عمره الباين لساتهو مفروض يكون في تلك المؤسسة لكنه يبدو أنه حسي مدني وكمان مفروض لو لسة في الخدمة يكون فريق أو فريق أول لكن كان جينا للحقيقة فهو خارج تلك الموسسة ويعني بالعربي مفصول وبالسوداني العام محال للصالح العام..
وعامل حريف جدن وشطورة وكل سؤال يسألوهو يرد بالقول تشعر أنه في جهة قالت ليهو قول كدآ وكدآ ولمن يحاول يتشاطر ويقول قوله بيطبزها. إستنتاجي في أنه قوات نظامية جآية بأنهو عرفهو بإستراتيجي أمني وأنا بإجتهاداتي الخاصة برشح أنه كان في الأمن لأنه إسلوبهو أمنجي. طيب زول ذي دآ.. كان ضابط ولسة دفعته في الخدمة ورتبهم فريق فما فوق.. شنهو السبب أنه صالح عام ولا كادر متخفي ولا فقد الحيلة وبقى مرتزق عند المجلس وأولائك كثر... ما علينا نقول: لاحظت أنه قال: هو غير محيط بدواخل منظومة القرار في "المجلس المأفون" لكنه كان بطلاقة لسان وعلم الملم ببواطن هذا المجلس تطلع منهو قولة حيكون العمل الأمني للمجلس في شكل حظر المظاهرات في الأحياء وإغلاق الكباري وأنه المجلس سوف وسيكون ولا يعني نقول الود مقددآ في الخطط الإستراتيجية "الما شفعت ليهو أنه لسة يكون في الخدمة" ودي إستنتاجات. ساذجته تجلت في خطاب ناس الإنقاذ النتنة وكانت تفوح من حديثه فتزكم الأَنُوف فهو عامل شاطر وبيمارس سياسة فرق تسد.. ناسي ولا لي سبب في نفسه ينكر أنه حزب الأمة القومي الذي ينتمي ليهو سيد صادق جزء أساسي من "قحت" ففي كل كلمة والتانية لو "قحت" سمعوا كلام سيد صادق في أمر التصعيد. ما كان وما كان.. طيب ما هو الزول دآ قال لي ناس المجلس وقال وقال ونصحهم ووراهم الخط المفروض يتبعهو لكن منهو فيهم البيفهم همبوت ولا "توحة" ولا كيبش ولا هم طرش وجهلاء ذيك.. سيد صادق لمن إتكلم عن التصعيد راسالته كانت واضحة وبتقول؛ يا أخونا خلونا نسك الكضاب لي خشم الباب ونشوف ناس المجلس لمن يكملوا كضبهم بعدها بيبقى لك حدث حديث... " إِنَّمَا يَفْتَرِي الْكَذِبَ الَّذِينَ لا يُؤْمِنُونَ بِآيَاتِ اللَّهِ وَأُولَئِكَ هُمُ الْكَاذِبُونَ" |
يا أخوانا خلاااااااااص قربنا نتحل من الكيزآن البحلنا من الشيوعين شنهو... إتينتهم جانبين لعملة عديمة القيمة وااااااااااحدة |
طبزها عضو قحت..
باشمهندس صديق يوسف لمن قال: - اصعب مرحلة هي ان نقنع قواعدنا المتخوفين من وجود اعضاء عسكريين في الفترة الانتقالية باننا نستطيع تحييد دور العسكر ونطوي صفحتهم الي الأبد.. دآ قبل يركب لولح كرعينهو... هو ناسي أنه قواعدهو دي... شباب ثائر، شيب ناير.. بيتحدث بصفوية مبالغة لا تغيب عنها نوع خطاب حميدتي وكباشي لمن قال: بأننا نستطيع وناسي أنهو لولا القواعد دي هو براهو ما بيقدر علي شئ.. بشيش يا أبو الشباب ثورتنا ما إتا وصي عليها وكلفناك تتكلم بإسمنا مع إنه بيناتنا الأوعى والأعلم.... قلنا عدو عاقل خير من صديق جاهل.. خوفي ياهو من جنس دآ.. نفس الناس الركبو رأسهم يوم تم الإتفاق الأول وقالوا: المجلس الرئاسي كلهو مدنيين وإتلويقوا وصعدوها لمن حصدنا كم من الشهداء كان لهم ةأن يكونوا في مقدمة المحتفلين من شهر وشوية.. والله خوفي من جنس دآ وديل..... |
حيروني الشعوعويون (بالأخص الدفعة ناس الثقيل دآك "الكُبر")
أصنفهم شنهو.. صعبة تقول عملاء لأنه والحمد لله الإتحاد السوفيتي لحق السمحين وما عندهم جهة يتعاملوا معاها.. صعبة كمان توصفهم بالجهالة لأنه بيناتم نوابغ.. إلا غايتهو بس؟! ما تجيبوها البر ولو مر في حياتكم |
كل ما تتحل مشكلة في مسيرة الثورة.. يزداد بيا القلق علي مستقبل البلد...
يا أخونا حنقدر (قصدي إتوا اللسة قاعدين ليها، ما إحنا خلاص) نحافظ عليها وكما قال: حافظ عليها يا فتى تسمو على الأجيال.. حتستمر ديمقراطية وكما يدعو سيد صادق دوما؛ مستدامة.. حيقتنع العسكر أنه مهما حكموا وظلموا بيجي يوم تنشال منهم.. وحتمر مرة في العمر 4 سنوات لي حكومة منتخبة وتعقبها أربعة تانية لي الحكومة ظاتها أو تانية عن إنتخابات نزيهة.. بالله عليكم لمن نتلاقى بي هناك! أحكوا لينا وإن شاء الله تقولوا لينا.. شعبنا ديمقراطيتهو دايمة وبقت حديث العالم ذي الثورة الأخير الحضرتوها.. يا رب ما كتيرآ عليك وشعب السودان بيستاهل.... |
الشريف زين العابدين الهندي الله يرحمه. في الجمعية التأسيسية وكان الحال مشابه لليوم فوضى ضاربة بين نقابات والأحزاب والحكومة الديمقراطية..
قال قولته وفي وسط المبنى البيمثل قوة الحكم. قال: والله قبل ما أحل دكة سروالي البلد حتنقلب.. أتذكر لاقيتهو في القاهرة في بداية الهجرة وصارحت بأنه هو المحرض الأول لإنقلاب الجبهة بفضحك تفكك وضعف حكومتكم. طبعن هو وكتها كان نائب رئيس الوزراء قبل فك الائتلاف بين الأمة القومي والإتحادي. تلاتين سنة ويمكن كتيييييير منكم ما حضرها كان قبلها فترة حكم ديمقراطي وليهو حكومة ومنتخبة وللأسف سقطنا في مستنقع المغالطات والنزاعات بين المكون السياسي والمهني داخليا بين نفسها ومحليا بين بعضها. حينها والبلد لساتهو سنتين مرق من حكم دكتاتوري عسكري والناس تتنسم الحرية بعد ستاشر سنة أخدت تبالغ في الإستمتاع بهذه النعمة فبالغ البعض في إساءة إستعمالها وكان تقريبا كل يوم والتاني دعوة لإضراب ومطالبة بحقوق علي حق أو دونه وكان مقف الحكومة هش فهي مناصفة بين حزبين بيناتهم صعب تكون عامرة وإنسحب واحد في قمة صعوبة هذه الأجواء وترك للتاني أمرين أحلاهم أمرآ من العلقم.. فراغ حكومي والبلد بي حالتها دي ولا إئتلاف مع الشيطان للعبور لفترة إنتهاء السنة ونص الباقية وإنتخابات تانية. بتذكر سيد صادق كان ديمة بيدعو أنه نوصلها الميز والقصد أنه دورة تانية من الإنتخابات وكان متمنيها ديمقراطية مستدامة. لكن حدث ما حدث.. اليوم إحنا بلا حكومة والمتربصين بينا كتار والشمات بس راجيين يدقوا الطآر.. ثورتنا الأدهشت العالم تمشي في مهب الريح.. فهل إحنا يا حمدوك وقحت والمهنيين وناس بورسودان والفاشر وبحري شاعرين الخطر المحدق ولا هي ياتها.. جهالة ودي أهون ولا عمالة ودي مصيبة |
اقتباس:
يديك الصحة التامة وطولت العمر يابا إحنا يبسنا وام لينا فيها وكتن طويل.. منتظرينك يابا |
داخلين في السنة الرابعة من تأريخ البوست دآ..
وكآنا يا عمر لا روحنا ولا جينا.. لا هناك عدو عاقل و"صديق" ذاد جهالة... العدو زاد تزمت و"صديق مع كُبرهو دآ" ربنا إن شاء الله ينعم ليهو بي رحمة في قلبهو وكفآ لخبطة |
الناس في شنيي والحسانية في شني
والجمع يتوافق والرغبة في جمع الصف.. يخرج علينا الشيوعي؟؟ (ربّ ملوم لا ذنب له) هكذا هم وهذا نهجهم... قال صديقي محمد محمد خير "صديقي وأخي، رغم الإختلاف" إن الحزب الشيوعي خُلق ليعارض.. ;) |
اقتباس:
تحياتي بابكر وعساك بألف خير الحزب الشيوعي؛ أو كل الأحزاب اليسارية بصورة أصح؛ أو كل الأحزاب الشمولية بصورة دقيقة وصحيحة .... هي تجميع للمتطرفين حول فكرة باطلة ... فلا المنطق يقر النظرية الماركسية ... ولا القرآن الكريم أو المنطق السليم يقران أكذوبة تطبيق الشريعة. ولهذا عندما كتب الأستاذ عادل عبد العاطي مقاله الشهير: (الحزب الشيوعي تاريخ من العمالة والانحطاط) وتحداهم قائلاً أعلى ما في حميركم أركبوه ... لم يستطيعوا أن يلسموا شعرة منه. فهم والكيزان في مركب واحد ويتقافزون بين طرفي المركب كل بدوره. فلا تنتظروا خيراً منهم فالطرفين كونهم اليهود ... هنري كوريل مؤسس الحزب الشيوعي السوداني يهودي إيطالي ... وحسن البنا يهودي مغربي بشاهدة العقاد. والتفاصيل حول يهودية حسن البنا في هذا الرابط : حسن البنا يهودي مغربي زرعته الماسونية لتأسيس الجماعة |
اقتباس:
نان نعمل شنهو.. يا دأ الله وياها دي حكمتهو.. قالوا: وإذا إبتليتم فاستتروا،، كونهو في سودانيين كدآ، ياها دي الفضيحة أم جلاجل.. فتم وعصيدة فيها السم:(:( |
| الساعة الآن 10:03 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.