مواقف متفرقة من الواقع ..
بمناسبة الغتاتة شوفوا الموقف دة : واحد ساكن فى منطقتنا هنا إسمو ( بيبو ) شخصية محبوبة من قبل كل من يصادفه وهو من اصول يونانية وايطالية خلطة كدة عجيبة , كان مقيم مدة طويلة بالسودان بتكلم لهجة سودانية بطلاقة إضافة لإجادته ل( اليونانية , الايطالية , الإنجليزية , الهولندية ) المهم سكن مع اثنين شباب سودانيين وصلوا البلد هنا بعده بفترة , وهم فاكرنو ما بتكلم عربى من شكلو طبعا ومشى معاهم الحال على كدة لمدة ستة شهوروعجبواالدور دة . وهو عامل ليهم ما ناقش ابوالنوم والكلام كلو شاقى أضانو بس قام يوم زهج من الدور دة وفى اثناء هم جالسين بالصالون عاين ليهم مسافة كدة وضحك .. هم إستغربوا قالوا الزول دة مالو الليلة ..وفجاءة خاطبهم : - يا شباب لو قلت ليكم بتكلم عربى بتصدقونى ؟؟؟؟ .. الشباب أصابهم الذهول والدهشة والصمت التام .... تخيلوا فى تلك اللحظة إنه الزول دة عندو شيطان خاطبهم ... عملو شنو ؟؟؟ قاموا جارين سابو ليهو البيت ذاتو :D :D ... وأصبح موقف طريف نذكره كلما جاءت مناسبة .. ملحوظة بسيطة : ( بيبو ) توفى إثر حادث حركة مشؤم فى أثينا عند اواخر عام 2005 .. |
قارسيا سلامات
لكن القتاته ما عندكم |
العزيزة ام راشد
سلامات .. قتاتة صاااح لكن مش كدة :D تسلمى لمرورك من هنا .. |
موقف من المرحلة الإبتدائية :
كنت أكره حفظ القصائد والتسميع الإجبارى , لا احفظ إلا القصيدة التى تعجبنى ولا اهتم بما لا يعجبنى ابدا , ليس نوع من الكسل فقط بل من باب التمرد .. فى الصف السادس من حسن حظى كان ناظر المدرسة ( كسلان اكثر منى ) :p هو أستاذ اللغة العربية وكان عنده طريقة عجيبة بيسمع للفصل كله مرة واحدة , وكان يمر على الطلبة كنبة تلو أخرى وينظر فى الافواه للتأكد من الحفظ من مخارج الحروف ... كنت اكلف نفسى عناء حفظ البيتين الاوائل فقط والباقى اردد مع الفصل ومرات اضع كتاب المحفوظات تحت الشنطة لاى طارئ ;) , الامور مشت تمام لفترة طويلة لكن مرة لسؤ حظى كانت قصيدة عصماء و الناظر ركز معى لمدة وقال لى اقراء براك طبعا كنت فى حالة لا يحسد عليها إختصرت له الطريق وقلت ليهو ما حافظ , كان يعانى من مرض القلب واوكل غفير المدرسة بجلدى دون رحمة ,وطلب منى ان احضر تانى يوم حافظ القصيدة ( طبعا حفظت القصيدة وسمعتها .لكن لوسألنى بعد يومين فلن اتمكن من تذكرها لأنه حفظ مبنى على القهر فقط ) . فى إمتحان الشهادة الإبتدائية دخلت الإمتحان وانا حافظ قصيدة واحدة وكان لى حدس انها ستكون فى الإمتحان ولم يخب ظنى على الإطلاق فقد وجدتها مثلما توقعت تماما تحت سؤال ( أكمل بقية الأبيات ) ... |
قارسيا العزيز
سلام و مودة اقتباس:
فهذا التصرف يشعر الطالب و كأنه في معسكر إعتقال أو سجن ... لأن المعلم إذا عاقب بأي شكل من الأشكال و بنفسه بتكون النتيجة نفسياً ذات أثر على الطالب. عشان كدة زمان آباءنا كانوا بيقولوا للمعلم : ليكم اللحم و لينا العضم. و لكن العقاب بالوكالة يتجه بالنتيجة إلى مناحٍ أخرى. ربنا يسامحو المدير دة. قصة زولنا ( متعدد اللغات داك ) ... فعلاً منتهى الغتاتة. غايتو أنا اللغة ال بعرفا لو ما إتكلمت بيها حتى لو كلمة كلمتين ( خشمي بيتعوج ) .. فالزول دة إستحمل المدة دي كلها كيف؟:D دمتم واصل |
العزيز أبوجهينة
تحايا طيبة لشخصك العزيز .. تعرف الحاجة الظريفة كمان غفيرنا كان زول طيبان وما عندوا كتير , فى حكاية الجلد دى وجلدنى اول مرة بلطف شديد .. قام المدير كورك فيهو مش كدة يا سليمان ووراهو عينة بيان بالعمل :D اما صاحبنا بتاع اللغات بيبو الله إرحمة دة حكايتو حكاية عندو طولة بال بصورة عجيبة ومقلب الشباب احلى مقلب , وكانوا أكثر الناس حزنا لخبر وفاته بتلك الحادثة الأليمة ... |
دة موقف من المرحلة الإبتدائية ( كتبته مرة فى بوست للأخ الطيب بشير ) : فى سادسة ابتدائى كان معنا طالب فى فصلنا بسف تمباك والحصة شغالة .. وصاحبنا إتعود على كدة ليهو فترة ... مرة لى حظو الكعب عندنا استاذ تاريخ اسمه حسن الاشول الظاهر شامى ريحة التمباك فى الفصل من فترة .. مرة وقف الحصة وقام اعاين للطلبة وإشمشم فى الفصل زى الكلب البوليسى:D وفجاءة مرق صاحبنا ذااتو قال ليهو انت بتسف قال ليهو لا .. قام الطالب دساها فى راسو قبل ما إساله الأستاذ , المهم الاستاذ باغتوا وضربو كف.. تصوروا الحصل شنو ؟؟؟؟ السفة جات واقعة من راسو فى الكنبة :p , وعينكم ما تشوف الا النور جلد وكفوف وإنزار وجيب ابوك وجيب عمك :D :D |
اقتباس:
صاحبك البسف من سادسة إبتدائي دا وين هسي؟؟ :p يا حليل زمن الأساتذة البشموا زي الكلاب البوليسية :D :D :D ويا حليل سنة سادسة ذاتهااااااا:confused: ويا حليل زمن الكوليرا :D :D :D |
اقتباس:
لسان حالنا يقول كما تغنوا عقد الجلاد : يا حليل زمان وسنين زمان تعرف صاحبنا بتاع السفة إكون زهج منو لحدى أسى وسابوا:D قبل أن اغادر البلد خليتوا هناك , والغريبة بعد الجلدة والزرة ديك يا أمير كان مواصل فى السف بإستثناء حصة التاريخ طبعا :p |
هذا الموقف ايام كنا برالمة فى جامعة القاهرة و فى اول محاضرة
لينا بكلية القانون المحاضرة كانت شريعة إسلامية مع أستاذ مصرى معروف ( د. عفيفى عجلان ) رحمه الله ... ومادته دى كانت عاملة عقدة للكثيرين من الطلبة فى تلك الفترة .. المهم إستخدم لأكثر من مرة مصطلحات الإستاتيكية والديناميكية بلغة فرنسية رصينة.. قاعد جمبى صاحبى ساخر جدا قال لى : - يااااخ نحن ما نكون دخلنا مدرج بالغلط ؟؟.. :eek: دى محاضرة عن الشريعة الإسلامية ولا ميكانيكا ... :D :D |
قارسيا يا قتاتة
عندنا خالنا بنخاف منو خوف الموت مرة اتفقنا شلة نمقلبوا نفك حمارو عشان يهرب وهو يمشى السوق كدارى ونحنا نلقى راحتنا نمشى نعوم فى النيل لانه متعود يمشى يشترى الخضار ويغشى اسقى حمارة من النيل وامشى البيت ,نحنا الليلة مقلبناهو وفكينا الحمار و ما ح يمشى النيل , والشباب نزلوا يعوموا ونلعب وماخدين راحتنا تماما وفى غفلة نسمع والله الليلة واحد فيكم يجرى كدة ولا كدة السوط ده يقطع لحموا وبهت الذى كفر والجماعة تجهموا ,الخال لملم الهديمات والسفنجات وقال تعالوا قدامى( القتاتة وين يا قارسيا) لمن الخال قال شفتو الدرب ده امشوا فيهوا ونحنا حفيانين والضريسة ما ضريسة وناشفة واقل واحدة فيها تلاتة شوكات وبعد داك كان فيها تفتيش للحمار وجرى وراهوا عليك امان الله طيرنى من العوم فى النيل وحرمنى من السباحة فى حيضان السباحة الدافية وبعد داك الليل كلو فاطمة بت محمود تتطلع فى الضريسة والدموع جارية .................قتاتة وبهدلة جد..... .....................................هنداوى |
اقتباس:
:D :D :D :D :D دايرين تمغلبوا الخال قام إسداها فيكم بمغلب دولى ;) :p إتخيلت شكلكم وسط أشواك الضريسة والبحث عن الحمار :D تسلم ياهنداوى للمرور والإضافة وشكلوا جرابك مليان حكاوى .. |
موقف بمناسبة الخوف والخلعة التى تحدث للإنسان فجاءة ودون
سابق إنذار , كتبت هذا الموقف مرة فى بوست للعزيزة قمر الزمان .. ايام الامتحانات بالجامعة كنت بذاكر مع واحد صاحبى فى حلتنا المهم الزمن سرقنى فى المذاكرة والساعة طلعت اربعة صباحا قلت ليهو انا ماشى البيت وفعلا خرجت الشارع ظلام حالك لدرجة إنعدام الرؤية ومع دخلتى على شارع بيتنا نط ليك حرامى شايل ليهو بقجة:eek: هدوم كبيرة على بعد خطوتين منى كأنه نازل من السماء صوت عالى هز الأرض بقوة شديدة, لقد تفاجاء وأصيب برهبة أكثر منى .. صاحبنا ماشى وانا ماشى وتفصل بيننا خطوات قليلة وبعد مسافة قام جارى بأقصى سرعة وجدع الهدوم فى الأرض .. ما اتخلعت ولا خفت ؟ لانى منذ خروجى من بيت صاحبى كنت متوقع حدوث ذلك الامر ورسمت عدة سيناريوهات فى خيالى لأى موقف وظللت افكر فيهم بذهنى حتى حدث امامى فعلا لكن لو لم افكر فيه كانت الخلعة لحدى يوم الليلة ما مرقت منى ...:D :D |
قارسيــــــا .. سلامــــات ..
بدخل أقرأ وابتسم وأطلع .. لكن ماااااا شاء الله عليييييك .. كيف متذكر الحاجات دي إلى الآن .. و من الابتدائي كمان.. يعني الواحد بيحصل ليه موقف معين .. وبيكون متذكره فترة و ينساه .. الكلام دة لي أنا طبعاً .. عشان بحاول أتذكر لي حاجة معينة وما لاقية في راسي حاجة .. معقولة ماحصل لي أي موقف قبل كدة :confused: maybe By the way العنوان الجديد أحلى من الأولاني عشان.. مواقف .. مواقف .. مواقف شكلك كان زي واقف بتبيع ليك في parking :D واصـــــــــــل ومتابعين معاك .. تحياتـــــــــــــــــي .. |
العزيز قارسيا
تحياتي الطيبة لك ... الغتاتة عندكم.... مرة وانا في الابتدائي حصلت لي مشكلة مع واحد من اولاد الحلة قدامنا بسنة، وحلفت الا اضع يدي في يده، على الرغم من ان الشلة واحدة واللعب في مكان واحد.. استمريت في موقفي لأكثر من ثلاث سنوات.... والله هو ندم على شكلتو معاي وندم على اليوم العرفني فيهو... المهم بعد كل تلك السنوات افلح تدخل العقلاء مننا في المصالحة بيننا لكن كل الشلة أخدت درس.... موقف آخر: في المدرسة الثانوية كنا بناخد في حصة جغرافية، وكانت حغرافية حوض النيل، الاستاذ متمكن تماما من المادة، وكنا في الجنوب المدرسة الثانوية مختلطة .. يعني بنين وبنات... وحتى الجلوس في الفصل مختلط اي زول يقعد في المحل البعجبو... المهم الاستاذ واصل في الحصة وتحدث عن ارتفاع نسبة الخصوبة في المرأة المصرية.. استفاض في شرحه عن الفلاحين في مصر ما بيكون عندهم اماكن للترفيه ويبقي الترفيه الوحيد ليهو هو مع مرتو.. وعشان كده بنلقى الولادة عندهم كتيرة ... واستفاض كذلك في شرح العلاقة الزوجية... قامت واحدة من الطالبات قالت ليهو يا استاذ هس دي حصة جغرافية ولّ حصة علوم؟؟؟ قال ليها : دي جغرافية بشرية... .. واستمر في شرحه |
| الساعة الآن 12:13 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.