[مهند بشير]

اولا
عجوز : يا ولدي نحن زمنا كانت الشوارع نضيفة تجي عربية النضافة كل يوم الساعة 6 مِسا تقش و ترش .
الشاب : اها
العجوز : ديوان الخدمة المدنية تلقى الموظف من الساعة 8:30 ص قاعد في المكتب و لابس بدلة و كرفتا و قاعد محترم جدا ورا مكتبو يلبي ليك طلباتك و ما بطلع من مكتبو الا الساعة 2:30 م .
الشاب : تمام
العجوز : السكة حديد دي القطر كان بخش مع دقات الساعة حقت الاخبار في امدرمان تسمع صوت عمك عبدالرحمن احمد و معهو صوت القطر في المحطة .
الشاب : حلو يا حاج
العجوز : نظام التعليم يا ابني كان اربعات لكل مرحلة و الكان بمرق من المتوسطة يتكلم انجليزي زي البلبل . اما خريجي الثانويات خصوصا الناس الزينا ديل ...
الشاب مقاطعا : ناس منو يا حاج (طبعا ما شاب شفقان )
العجوز : ناس حنتوب كان عندنا نظام و انضباط شديد لى درجة انو نحن اول مدرسة يتلغى فيها الجرس و الحصص تبقى بالساعة تبدا 7:30 و تنتهى الساعة 3 و طوالى على الصفرة تخلص من الغدا الساعة 4 تبدا فترة الرياضة و باقي النشاطات الساعة 6 الناس ماشى على المذاكرة الساعة 8 الناس راجعة من المذاكرة على الصفرة تتعشى الساعة 10 بطفوا النور
الشاب : ممتاز و الله
العجوز : اصبر لسه يا ولد و كانت في منافسة قوية جدا جدا و كل الطلبة كانو بجيبو قريد 1 و لا 2 و كلهم كانو بخشوا جامعة الخرطوم و الناس الكان بتحب القراية كان بتقرى بالرتينة بالدس .و خرجت علماء استفاد منهم العالم كلو , الخليج دا كلو قام على اكتافم , حتى اوروبا و امريكا عندنا كمية من العلماء الما بتصاقعوا قاعدين فيها بتعرف الرتينة يا ولد
الشاب : حليييييل موسى ( انا البفكني من الورطة دي شنو )
ايييي بعرفا يابا
العجوز : و الغنا كان سمح و جميل انت عارف يا ابني ام كلثوم جات هنا سنة 1968 و لا كم ما عرف عملت حفلة محترمة جدا كل الشعب السوداني دا كان مبسوط بيها .
الشاب بتحت : هسي نانسي عجرم مالا يا حاج
العجوز : قولت شنو يا ولد
الشاب : لا يا حاج سلامتك
العجوز : انت عارف يا ولد المقولة الشهيرة البتقول القاهرة تكتب و بيروت تطبع و الخرطوم تقرأ .
الشاب : ايي يا حاج الا اسألك سؤال
العجوز : اها يا ولد
الشاب بشماتة : الكلام دا كلو راح وين ؟؟؟؟؟


راجعين