ح أبدأ باحدث الحكايات لكن أوعي تطمئنوا شديد
-----------------------------
يوم الجمعة الفاتت عندنا قريبنا وصل عمر الموت و مات ....
هو عيان ليه سنين يعني موته ما أمر ذو بال لكن تقول شنو؟
ضرب لي أخوي المهذب و مجامل شديد علي فكرة كل أخواني مهذبين و أنا ذاتي مهذب صح؟.... بعدين الزول دا مات في حر كدا انسي بس ... المهم جاني تلفون من أخوي المجامل و دارت المحادثة الأتية:
الوو حافظ عم إسماعيل دا اتوفي
أنا: أها و المطلوب مني شنو؟
أخوي: البركة في أمة محمد (أنا ولله لا قلت البركة في اي زول براهو اتبرع) خلاص تعال في بيت البكاء
أنا: شوف حسك عندك انت لا كلمتني لا حاجة أو أتصلت علي و تلفوني قافل
أخوي: أسمع نحن قربنا نطلع علي المقابر و انت بعيد تعال المقابر طوالي
أنا: يا زول مقابر شنو انا قلت ليك في الحر دي لو مات منو ما طالع
أخوي: لا ما في داعي تجي البيت تعال علي المقابر طوالي ... مقابر حمد النيل ... أيوة مقابر حمد النيل
و الخط قفل .... أنا براي قلت أخوي دا مسكين جن هسي, لكن قلت الجن بداوي و بمشي ليه بعد الفطور اشوف موضوع الجن دا .. و تاني أستبعدت قصة الجن قلت ربما انخفاض السكر في الدم بسبب الصيام بخلي الزول يتكلم برا رأسو لكن الشي العارفو اني ما ماشي أي مقابر و لو ما مشيت ما أظن ح يحردوا يدفنوه يا خي.... قبل اخت رأسي كويس ضرب تلفوني تاني ضرب و نمرة أخوي المجامل تاني
الوووو في شنو يا خي؟
أخوي: يا أهبل أولاد الزول جنبي ....
يعني ما عندك سكة تجي تجي أنا ضربت ليك قدامهم و عارفين أنك قاعد في الخرطوم ...
و برضو ما مشيت لكن الليله لو الله رفع القدم بمشي
|