رغم انك بتحب بن لان يا فيصل سعد لكن برضو بنريدك و الكلام الاتكتب ما كان مبعثه سوي الريدة و من الريد ما قتل ... أي ممكن تقول لي ريدتك ما لازماني و ريدة الضكير للضكير النوم أخير أو هكذا قيل لكن مش فارقة معاي أو هكذا هدلت سيدة الغناء فيروز .... يا فيصل لو تدري كم تؤذيني شرح محبتي لمن أحب لما اضطرتتني لمثل هذا الفعل لانه صراحة يدخلني في دور الاستجداء الذي أمقته... بامكاني أن ارد عليك في نفس المفترع لكن خيرت فتح بوست منفصل لسببين:
أولاً: كي لا أحرف بوست العم قرقاش و في تقديري انه إذا قدر له و بطبيعته الفرايحية (قاصد البوست يا أخوانا عشان ما قرقاش يجي ناطي لي في حلقي).... بطبيعة البوست الفريحية ممكن يساهم في تخفيف الاختناق الذي يعم المنبر هذه الأيام.
ثانياً: انت تستحق و أنا مداخلتي التي أذتك كانت في العام و لذا فضلت الرد في العام
يلا خلينا نجي لتفكيك رد و ابراز صك ريدتي عندما أوردت عبارة (غير مجتهد في تسويق ذاته كإنسان محترم) و اتبعتها ب هذا لا ينفي الاحترام كان مقصدي في تقديري واضح....
عبارة تسويق كما تعلم يا باذخ تعني بالنسبة لي إقناع الآخر بجودة السلعة صرف النظر عن المضمون و المحتوي ... يعني اولاد شندي في سوق ليبيا بحنك وايز بحاولوا يقنعوك ان القميص الصيني أمريكي و الزغاوة يقولوا ليك صيني لو داير تشيله شيله و لو ما بتقدر اتخارج (هنا دي ما عنصرية لكن مفهوم المضمون السياسي و الايدلوجي لأولاد شندي و الزغاوة) .... العبارة دي قصدت بيها انك انسان حر الدواخل و غير محتاج لتسويق ذاتك بكرفتة الأحترام الزائفة و من هنا جات اسئلتي الصعبة أو المحرجة .... و أسئلتي الصعبة دي كانت محاربة للمألوف و الروتين من اسئلة علي شاكلة
(العمر, النوع, الحالة الاجتماعية, ماذا تعني لفيصل الأم و الخ من اسئلة عاضة )
و صدقني لو بليت الابري كانت الاسئلة دي ممتدة لكانديك, عم رأفت, الجيلي, أمال الشيخ و الخ من ناس غير محترمين
و الاحترام عندي يا باذخ ابداً لم يعني في يوم من الايام أو يختص بسلالة (شكراً علي مرورك الجميل, اسعدني النبأ و الخ من عبارات الزيف الإجتماعي), و أنما يعني الانسان حال كونه ذاته و حتي لا أتهم بالتملق فانت ذاتك يا باذخ و لذا جاءت مثل هكذا كفاوي و محن ....
لعمري يا باذخ صداقتي أو حبي لم تضع في ميزان التثاقف الزائف أو الايدلوجيا اللواكة بلا عمل أو أي من قول الزيف و عيشة النزيف , فأنا في الانسان أحبه كون هو انسان واحد و في أي لحظة حسيت انه بكم نسخة سوف أسقطه من حساباتي غير ماسوف عليه للابد ..... بدليل اني في المنبر دا بحب بابكر عباس رغم جلافته, كيشو بسلفيته و دقنه الطويلة دي, رأفت ميلاد الكافر و أمال الشيخ الحاسدة و أخرون نعلمهم أنا و الله فقط
بالنسبة لنجل الشفيع خضر و الله صدقني الموضوع لا حسادة لا عنصرية , و الله ما ركزت علي موضوع انه اتزوج صينية خالص, و بعدين و الله ولد الشفيع دا انا ما بعرفه عشان أحسده أصلاً, لكن بعرف ابوه الطارح نفسه شخصية عامة و داير يعيد صياغة الانسان السوداني و كم مسكين ايها الفأر السوداني. بعرف أبوه و أعتراضي أصلاً ما علي زواجه من صينية اصلية أو تايونية و انما الاعتراض علي القيم السياسي, لعبة الرمة و الحباس القاعدين يمثلوها الساسة بتاعين شعبنا العظيم .... إعتراضي يا فيصل علي غازي صلاح الدين و سبدرات الأصلاً ما ممكن يكونوا جوا ضهب الحفلة لكن جوا بدعوة رسمية و حميمية, إعتراضي علي اللعب بدقون الشعب السوداني تحت شعارات سوف نصلبهم عرايا علي مسارح التاريخ .... دم بدم و موية بموية دا اعتراضي علي العدو عند الطلب و عند نفس الطلب يكون صديق ... إعتراضي علي الناس البينا و بينهم دم لكن نصافحهم زي الترتيب و نحضنهم و نقرقر معاهم محولين دماء القتلي موية ... يا حبيب ليس بالأمر عنصرية ... (هسي عليك الله في داعي تطلع لي ..... الابتدائي دي)
كامل أعتذاري يا فيصل علي ما سببته لك من أذي و صدقني لم يكن مقصود و إنما هي اللغة حمالة الأوجه و المطبات و هذا قصور مني و أتحمل كل تبعاته وكل أملي في صفحك و صدقني لم أكن أقصد الإساءة أو التقليل من شأنك لا سمح الله .... و رجاء أخير عليك الله ما تجاوب علي اسئلتي التافهة ديك و صدقني ما بكون زعلان لكن بزعل لو حاولت الاجابة و أسئلتي التانية لو سألت حتكون في كامل الاحتشام
قدري اني أعبر عن محبتي بطرق ملتوية لكن صدقني من الآن فصاعداً بحاول أشوف طرق الأخرين أو أصمت للأبد و اقطع هذه المحبة في الأحشاء
فتك بعافية
