الان الان .... مجتمعين في بيت من بيوت سودانيات

[ناصر يوسف]

المشاركة الأصلية كتبت بواسطة عكــود

ناصر الحبوب
ليك السلام مطبوق

التحية للبروف والأمنيات بقضاء أيام ممتعة بين الأهل والصحاب.

فرقت 10 يوم بس وكنا قابلناهو

دايماً قدّامي يا ناصر وزول واجب،
الله يديك العافية.

يا حبوب يعلم الله الواجب ده ترانا بنحاكي فيكم ياخ
كرمكم ومحبتكم الفايضه دي
منكم تعلمنا معني الواجب
وسلامك يوصل

[ناصر يوسف]

المشاركة الأصلية كتبت بواسطة معتصم الطاهر

و روح سودانيات ..

مو ياهو السويتو معاي في مطار الدوحه سنة 2008 يا باش ولا شيتا تاني ..

ما قلنا ليكم نحن تلاميذكم في المحبة والتواصل ياخ

المشاركة الأصلية كتبت بواسطة معتصم الطاهر

الرئيس المرتقب ..

زى سماح بعد يفرشوا الدرب سجاد احمر مطرز بقلوب فيها سهام ..موزعة فيهو شجرات ليمون بالطرف و توقف الشيخات كلهن .. بعدين سعادتك .. تترجاها تسلم عليك ..


والله ياهو ؟

مش كده بالله ..

ياخي كاتبي المفضل ده بكابر ساااااكت يعلم الله
وتحت تحت كده .. عليك امان الله البت النسمه سماح مج دي تجي ماره في شارع ساي ..
تلقاه بفرش في الشارع بالياسمين

ههههههه

[ناصر يوسف]

المشاركة الأصلية كتبت بواسطة عبد المنعم حضيري

الفول دا يا ناصر .... أهم زول

ياخ ما تستهين لينا بحبيب الشعب دا كدة ....

أنا برضو ختني في صف المشتهين فول ...

يا ناصر إنت حضرت زمن اليمانية ماسكين البقالات وبيسوا الفول؟؟؟؟

يا زول إنت ما اكلت ليك فول بالسمن البلدي في مطعم سلوى بالسوق العربي زماااااااااااااااااااااان.

يا زول إنت ما ضقت (سندوتش .... لاحظ ... سندوتش فول) من أبو العباس والعشرة الكرام.

التحية للبروف

والتحية للعظيم ناصر

والتحية لكل بورداب الداخل

عبد المنعم الحضيري

تحية ومحبة خالصة لوجه الله يا زول يا حبوب

اليمانيه ما حضرتهم في الخرطوم دي والله
لكن فول ابو العباس جربناه
وياااا حليلو فول ابو العباس
هسي في مكانه في زي خرتمية ابو العباس تقليد ساي ياخ

[ناصر يوسف]

اهااااااا

زي ما قلت الليله دي ...



الله يعديها علي خير غايتو


محمد صديق سجمان الحبوب برضو متوهط هنا

ياخي اقول ليكم قوله ...

احبطم جت عليكم

اليوم كلنا جنتلاقي في براحات سودانيات

[ناصر يوسف]

ساره المو ضاره
بروف امين محمد سليمان
محمد صديق سجمان
عمنا وابونا جعفر بدري
طارق كانديك سيد بيت سودانيات ( نحن في ضيافتو في مكتبو الان )
احمد محمد زين
ابراهيم فرح .. ابرا
ود فداسي

وربما يصلنا حافظ حسين بالرغم من انو مسافر الصومال بعد ساعات

لكم احب هذا البيت سودانيات

يا الله ياخ

ليكم محبة من القلب

[الرشيد اسماعيل محمود]

شايف السودان الأيام دي مليان متسكعين، مع انو متسكع دي بتديني إحساس زول مصنقع راسو فوووق كدا وماشي
عموماً،،
مرحب بالمتسكعين في الخرطوم بما فيهم سارة

[الرشيد اسماعيل محمود]

تحياتنا وسلامنا لكل الرهط بما فيهم صلعة البروف. لكن عليك الله يا ناصر لو حافظ حسين وصلكم، ما تقوم كمان تفتح بوست جديدعشان تورينا انو برضو الآن الآن السلفي متسكعا، ضيف تسكعوا لمن سبقه ونحن حنساعدك بالفطنة بتاعة عزيزي القارئ.

[عادل عسوم]

ماشاء الله علي لمة الشيب والشباب...
بس ياناصر ماتعصروا على الراجل والمكتب يادوب في أبتدارات الاستواء على سوقه (أن شاء الله)...
والحساب خلوهو بالكرونة الترويجية
التحية ليكم جميعا وملمومين دايما في الخير والرضوان يارب

[ناصر يوسف]

المشاركة الأصلية كتبت بواسطة الرشيد اسماعيل محمود

تحياتنا وسلامنا لكل الرهط بما فيهم صلعة البروف. لكن عليك الله يا ناصر لو حافظ حسين وصلكم، ما تقوم كمان تفتح بوست جديدعشان تورينا انو برضو الآن الآن السلفي متسكعا، ضيف تسكعوا لمن سبقه ونحن حنساعدك بالفطنة بتاعة عزيزي القارئ.

في البداية احب ان ازكي ايات الشكر والعرفان لفطنة القارئ الحصييييييف

زول كده من دمازين الخير

وصلنا خبر وصول ابو صلعه ده ياخ

فشنوووووو الواحد عامل فيها فرحان شدييييييد كده وقام صنقر وانجعص فوق واطاة الله دي وفتحت بوست بهذه المناسبة الطنية العظييييييمه ياخ

اهااااااا ....

بعدبها بشويتينك كده اقوم اعرف ليك ست روحك ساره المو ضاره

قلت شنو يا ولد .. علي بالجزيمه علا اسويلها بوست منفصل

اهااااااا قوووووم يا كانديك اتصل علي وانا في طريقي لساره ويقول لي الود الجمل سجمان برضو متسككككككعا ههنا ياخ

اهاااااا اسوي شنو عاد ياخ ...

واترك الفرصة لفطنة القارئ الحصيف ...


يعلم الله فاقدك يا حبوب

المشاركة الأصلية كتبت بواسطة عادل عسوم

ماشاء الله علي لمة الشيب والشباب...
بس ياناصر ماتعصروا على الراجل والمكتب يادوب في أبتدارات الاستواء على سوقه (أن شاء الله)...
والحساب خلوهو بالكرونة الترويجية
التحية ليكم جميعا وملمومين دايما في الخير والرضوان يارب

تعرف ما عصرنا عليه شدييييييد يا عادل ...

طلعنا مشينا اولاد امدرمان للمشويات

ووحاتك الفول ما نسيناه جبناهو لي ابو صلعة ده كمان

[ناصر يوسف]

شكرا لمشرف منتدي الحوار لحزف البوستات المشابهه المحتفيه بهؤلاء القوم الكرام

الصور جاياكم باكر

غايتو في صور كده بروف امين الا يدفع لي حبيبة سنتات حتي ما انزلها

ولا شنو يا سجمان

لمه ما احلاها

[مشرف منتدى الحوار1]

المشاركة الأصلية كتبت بواسطة ناصر يوسف

شكرا لمشرف منتدي الحوار لحزف البوستات المشابهه المحتفيه بهؤلاء القوم الكرام

تصحيحاً لما اورده الاخ ناصر يوسف
تم دمج كل بوستات ( التسكع) في بوست لمة سودانيات للكاتب ناصر يوسف لانها كلها تؤدي نفس الغرض( وعشان خاطر الرشيد برضو )

[آخـر المواني]

غايتو أغلب المتسكعين الهنا والهناك ديل عرفناهم

يا ربي ودفداسي دا جمال الوالي












غايتو جنس خيار و فقوس

[ناصر يوسف]

المشاركة الأصلية كتبت بواسطة مشرف منتدى الحوار1

تصحيحاً لما اورده الاخ ناصر يوسف
تم دمج كل بوستات ( التسكع) في بوست لمة سودانيات للكاتب ناصر يوسف لانها كلها تؤدي نفس الغرض( وعشان خاطر الرشيد برضو )

صااااااااح ،،،

دمج وليس حزف ،،،

شكراً يا إشراف

المشاركة الأصلية كتبت بواسطة آخـر المواني

غايتو أغلب المتسكعين الهنا والهناك ديل عرفناهم

يا ربي ودفداسي دا جمال الوالي

غايتو جنس خيار و فقوس

يا حبوب ،،، يعلم الله المسعله لا خيار لا فقوس لا فقوش
ود فداسي ( ود العمارات ) والمنتقل حديثاً إلي لسعودية بنين ده وكتين جانا
كانت البوستات في خبر كان
تم دمجها ياخ

وود فداسي جايكم في الصور

امس قلت ليكم بتجيكم باكر ، يعني اليوم
وهسي بقول ليكم حتجيكم باااااكر لو ربنا مدي في الأيام
لأني هسسسسسسسسي دي مارق ماشي البيت آخد لي غمده
في شوية إرهاق حاصل ياخ

[طارق صديق كانديك]

كانت ليلة استتثنائية، وقبل أن أقول فيها حرفاً واحداً دعوني أشكر الجميع فقد شرفوني ابتداءً بالحضور الى مكتبي كان أولهم بروف أمين (مع انو حديقة القرشي راحت ليهو مرة واحدة) ثم وانا أقالده كان صديقي سجمان يحوم حولها ولما عرف طريق الوصول حضر ابراهيم فرح واحمد الزين فانضم سجمان لنا وأوجعوا الأكف و(الضهور) ضربا غير مبرح يالكم من أعزاء.

ثم صعدنا الى المكتب في انتظار البقية، وماهي إلا لحظات حتى دخل علينا أستاذنا الكبير جعفر بدري مبتسماً كمن يحمل البشرى وتلك عادته كلما الفيته كان بشوشاً وديعاً له محبتي العظيمة، ثم كانت سارة تمشي من خلفه فنعم الوفد وضج المكتب من جديد بالسلام والمحبات التي توزعت على الجميع حتى اذا ما دخل ناصر يوسف يحمل الكاميرا يوثق تارة ويسلم تارة أخرى كنا قد تبينا الملامح والحنين.

وما أن جلسنا بضع دقائق حتى التحق بنا الأخ ودفداسي (آي جمال الوالي يا آخر المواني). جلسنا نحو ساعة كانت من أجمل اللحظات ثم انتقلنا الى مكان آخر سمرنا وتحدثنا وتعالت الضحكات الصادقات، وعندها وافانا الدكتور وليد الأمين وهاتفنا حافظ حسين معتذراً إذ الآن في بلاد الصومال حفظه الله وأعاده سالماً.


شكري للجميع شكراً جميلاً

لكم محبتي وتقديري

[ناصر يوسف]

لمة ما منظور مثيلها ياخ

وقوفا من اليمين د. وليد ،،، البروف ابو صلعة امين ،،، طارق كانديك بالنيو لوك ،، البت المحكره جوه القلب ساره ،،، ود فداسي الجميل ،،، د. احمد محمد زين ابونا وحبيبنا جعفر بدري ،، وحُراس المرمي ديل ،،، ابو جلابية وطاقية ده سجمان سيد الراكوبة ،،، حتي ابر ،،، ابراهيم خرافي