نظرية..

[عبدالرحمن حمد]

اضاءة اولى :

الحب هو استحسان روحانى وامتزاج نفسانى مرجعه اتصال بين اجزاء النفس المقسومة فى هذه الطبيعة فى اصل عنصرها الرفيع......

........................ الامام ابن حزم الاندلسى .

اضاءة : ميثولوجيا :

يعتقد قدماء الاغريق ان كبير الالهة زيورس خلق الانسان على شاكلته ثم زوده باربعة ايدى واربعة اقدام , وبدأ هذا المخلوق فى استكشاف الكون واستكشاف مقدراته الامر الذى ازعج الالهة وكبيرهم فقام كبير الارباب بشطر الانسان الى نصفين وجعل الهم الشاغل لكل واحد منهما البحث عن النصف الاخر ...

اضاءة : سينما :

العلاقات من صنع الله .....

(شاروخان فى فلم هندى)

.........
ورد فى بعض الاثار ان الناس عندما كانوا فى عالم الذر , كانوا يجلسون ارواحا" متجاورة وعندما انزلوا الارض , ربما نزل كل واحد منهم فى مكان وزمان مختلف يعنى مثلا" تكون انت نزلت فى السودان فى السبعينات , بينما روحك المجاورة (المكملة) نزلت باسم ايزابيلا فى المكسيك فى الاربعينات ... وتكون عشت حياتك كلها مع نصف اخر ((مزيف)) ماحقك..

.. واثبتت الدراسات (وهمة كل الكتابات) انو فى 4% فقط من سكان العالم ربنا وفقهم ووصلوا لاستكمال روحهم , والبقية دى عايشة حياتها العاطفية والزوجية وهمة ساكت وتامين الموضوع الفة وعشرة وانتاج مشترك (عيال)...
وبالمناسبة الموضوع دا خاشى فى ابتلاءات ربنا لعبادو لانو ممكن يشكل سبب شقاء رهيب يعوقك عن مهمتك الكبرى فى الوجود (خلافة الله فى الارض) وممكن اعتبارو من ((الكبد)) البعايشو الزول فى الحياة الدنيا .....
.....
المهم يا شباب/ات الموضوع كالاتى : انت عبارة عن نقطة محددة فى نهاية خط مستقيم نهايته التانية روحك المكملة وخريطة الطريق بتكون فيها بعض الاشارات والعلامات للاستدلال ومبدئيا" كده لو ربنا هون ليك تكون انت وروحك الاخرى نزلتوا فى ظروف زمكانية قريبة من بعض ودا بسهل مهمة التلاقى .....

ويلا نشوف ال96% الماوصلوا صاح :

ممكن تكون ماشى فى طريقك الرئيسى تجى تحاول تتجاوز ليك مطب او حفرة(ازمة اقتصادية او اجتماعية ....) تقوم تخش فى شارع فرعى (ماحقك) ولما تبدأ تلاحظ اختلاف بين الخريطة العندك واشارات الطريق الانت خشيت فيهو بتحاول تتجاوز الموضوع ((مكتوب بقالة الامانة ودى بقالة الثقة .... لكن ما مشكلة المعنى واحد ... ممكن خطأ مطبعى ..)) ودى بتفسر الاشكالات البتظهر فى بدايات بعض العلاقات ومن هنا بتختلف احتمالات الناس :

* ممكن تواصل فى الشارع الغلط ده ((يبدو صاح)) حتى النهاية وتصل الطرف الاخر وتتزوج وعمرك كلو تتمو وهمة .....

* ممكن تصل لكن بعد زمن تلقى دربك الحقيقى وتخش فى اشكالية بين التزامك تجاه اسرتك وبين ضغط مشاعرك .... ممكن تتحمل وممكن لأ .. وتكون النتيجة ((عليك الله مابخجل متزوجها ليهو 12 سنة وعندو منها عيال يجى يعرس بعد العمر دا كلو ...))

* فى احتمال انت ماشى فى شارعك الغلط دا يجى سيد الشارع الاساسى شايل خريطتو فى ايدو ويكسحك ويصل قبالك (شاكوش) وطبعا" ما بالضرورة الزول الوصل ده يكون سيد الشارع ممكن يكون تايه زيك كده ويكون ربنا لطف بيك وبرضو بختلفوا الناس فى طريقة التعامل مع المسألة دى ... فى ناس برجعوا سرييع شارعهم وفى ناس عربياتهم بتكسر عمود نص ويقعدوا فى الشارع الماحقيقى دا زمن طويييييل (( والله اتزوجوها ليها سنيين لكن لحدى هسع الزول دا ماقادر ينساها ورفض انو يتزوج بعديها...))

* ممكن يكون الشارع حقك ويجى زول بالغلط ((الغلط المقصود هنا ممكن يكون بحسابات الدنيا العقلانية صاح كبييير))....

*** بالمناسبة حوا عندها دور كبير فى النظرية دى لانها ممكن تزيد ليك الاضاءة فى الشارع وتردم الحفر وغيرها من اعمال الصيانة البتسهل وصولك ليها .........


استخلاصات من النظرية :


*** كل حب يبقى (( اول واخر حب)) لحين اشعار اخر ..

ويبقى السؤال الاصعب بدون اجابة : كيف تتأكد ان هذا الحب هو .. هو؟؟

ماهى علامات واشارات الوصول ل(روحك المكملة )زى مابقول محمود محمد طه ..



خليتكم بعافية وربنا (يعدل طريقكم).....