الآن تم تهكير موقع سودانيس ثانية !!!

[رأفت ميلاد]

المشاركة الأصلية كتبت بواسطة لنا جعفر

شوف يارافت عابد اخوي الاطربك ده ما عبرني ولا قال لي سلام
وشكلو عابد بيتكلم مع سوبر مودريتور وانت طالع ...ونحنا ناس قريعتي راحت ديل لينا الله
وعيشة السوق زي ما بتقول منال

لنا جعفر سلام كبير وشوق شديد ياخ
يعنى كلامك لى عابد وصلنى .. وإياك أعنى ياجارة ..

المشاركة الأصلية كتبت بواسطة لنا جعفر

قلت شنو يللا في موضوع البوست؟شفت اللياقه دي كيف؟؟؟

المشاركة الأصلية كتبت بواسطة لنا جعفر

يارأفت سلام ياخي وكل سنه وانت طيب والاسرة بخير يارب
افتقدتك بعد عودتي وسألت عنك
انت قلت اي شي متعلق بالنفسية والذهنية السودانية ونسيت موضوع سودانيس يامان.

وأنتى طيبة يا لنا .. الحقيقة ما تجاهلت موضوع سودانيز ومتابع بكل إهتمام آراء الجميع .. والرد على عابد ليس من وحى مداخلة بيان .. ولكن من بيان الهكر المليئ بالحقودات الطفولية .. والأفكار الهزيلة .. ومعلوماته عن المهجر المكندش الحقودة .. وده برضو عايز بوست .. حاولت من قبل هنا فى سودانيات الكتابة فى هذا الموضوع .. وإنقطع حبل التسلسل .. بهكر برضو ..


متابع معاكم يا لنا .. وأقول لى بيان .. لا لتكميم الأفواه .. تعنى (لا) للهكر .. أى تبرير غير مقبول .. ورأيك فى المعارضة مكفول ليك .. أوافقك فى البعض .. وأخالفك فى الإطار .. بالنسبة لى النظام أعداء .. ومهادنتهم عداء لعامة الشعب .. وليس الأحزاب .. وبذلك أقبل كل أنواع المعارضة كإطار ثورة على الظلم .. وأناقش الجزئيات معآ .. بإعتبارهم رفقاء ثورة .. نختلف ونتفق .. حسب مجريات الأمور ..
شكرآ على حفاوة الرد يا لنا

مودتى

[أمير الشعراني]

[overline] الهكر الدمر الموقع عضوء فى سودانيزاون لاين، وبالامس تابعت بوست لواحد اسمو تمبس يهدد بنشر الرسائل ..!
اما الحديث عن الأمن والحكومة دا تعظيم فايت الحد واظهار للموقع فى صورة المناضل العظيم والمعارض الأوحد، فالموقع يعتبره كثيرون (منفس) للشعب ..!

حاجة تانية الاغانى- نورا - عم عبدالرحيم - شيخ تلب - الحاج ود عجبنا - ووووو تباع فى السوق اشرطة واسطوانات يعنى حكاية الأغانى المحظورة دى شوفوا غيره..
للاسف الموقع انضرب من الداخل او بايادى صديقة ، وفى الحالتين فقدنا منبراً للرأى والرأى الأخر ..
اتمنى ان يعود الموقع وقلبى مع خالد .[/overline]

[لنا جعفر]

المشاركة الأصلية كتبت بواسطة bayan

اتمنى لو اتعرضنا لتجارب من القى القبض عليهم بسبب الكتابة في المنابر..
لناسس لمعارضة يستحقها الشعب السوداني العظيم
علينا ان ندلل على اي كتابة مثل هذه بدقة واحضار شواهد ..انا اكتب في المنابر من سنة 1999
ولدي علاقات واسعة جدا مع مختلف الاتجاهات الفكرية..
لم اسمع ابدا بشخص تم القاء القبض عليه بسبب ما يكتبه..في المنابر اللالكتورنية
التي اثرها محدود جدا في الداخل..
احترم وجه نظرك لانها وجهة نظرك واختلف معك في تقدير دور البورد في التغير..

يادكتورة ياجميله سلام
شكرا لردك واهتمامك
لكن يادكتورة أنا وللدقه لم آتي مطلقا على ذكر تجارب لناس تم القاء القبض عليهم!!!!
القاء القبض عليهم هذه اتيتي بها انت وانا غير مسئولة عنها بالمرة لاني لم اوردها
والاستجواب لايعني بالضرورة القاء قبض ياستي انا وانت تعين ذلك بحمد الله
انا قلت بالحرف يقتضي التعريف التعرض لمماحكات كثير من الزملاء لمماحكات الامن ....
ويمكنك الرجوع لكلامي ....اضافة لذلك انا عندي اسانيد ودلائل حية تتمثل في بعض الزملاء الاعزاء الذين تعرضو لهذه الممارسات واتكلم من موقع ثقة وعلاقة مباشرة بالحدث يادكتور
واحترم فترة علاقتك بالمنابر جدا لكن لايحيط بخلقه الا الله يادكتور
كا ن غرضي من ايراد هذه الجزئية التدليل على ضيق السلطات ببعض الذين يكتبون وكلامك صحيح ينبغي ان نؤسس لمعارضة جادة بتأريخ وأرشفة تجارب من تعرضو لمضايقات
واحيي افكارك جدا وجديتك
واختلافك معي لتقدير دور البورد هو في النهاية اختلاف لن يذيبه الا الحوار المسئول
فهيا تذكري معي انه لدينا مقترح بنقاش دور البورد وانا على يقين اننا سنأتي النقاش بأذرع مفتوحة وعقول مفتوحة
اشكر جدا احترامك لوجهة نظري
وانا بدوري احترمك واحترم تجربتك وكل آرائك
ولك مني تام السلاك والتقدير
وشكرا ع الطلة

[عابد عقيد]

حاجة تانية الاغانى- نورا - عم عبدالرحيم - شيخ تلب - الحاج ود عجبنا - ووووو تباع فى السوق اشرطة واسطوانات يعنى حكاية الأغانى المحظورة دى شوفوا غيره..
للاسف الموقع انضرب من الداخل او بايادى صديقة ، وفى الحالتين فقدنا منبراً للرأى والرأى الأخر ..
اتمنى ان يعود الموقع وقلبى مع خالد .

الاخ شعراني عساك طيب
بالنسبة للأغاني انا ذكرت وقلت في يوم من الايام واما الان فهي كما ذكرت تباع في الاسواق
ونتمني عودة المنبر وقلبي مع كل المنابر الحرة .

في امان الله

[wadosman]

المشاركة الأصلية كتبت بواسطة محمد أبوعاقلة

لنا
عارفه
ما قدرت ادخل موضوعك عشان ارد عليك
ذاكرة حب......صديقي وبحري وبعضهم......(يوميات متناثرة)
وطبعن محمد عثمان هو السبب
كيف دا موضوع طويل
المستعرض بتاعي سفاري ... وطلع بعيد عن الموضوع في الميديا وما ادراكي بالميديا
فبقوم اعمل شنو
بختها ليك هنا وانتي انسخيها وديها هناك وبكدا بكون ارضيت ضميري
لانو حاقص لي شديد
لا لا لا
خلاص اتذكرت
ما موضوعك ياخ
موضوع خربشات شاردة
سوري لكن الكلام فيهو ريحتك
و موضوعك ما بفتح معاي برضو عشان تكوني عارفه
خلاص
اقوم اتقمص شخصية ميكافييلي وبعرف ادخل كيف

منو دا..؟؟؟

بعدين انت ما سمعت الصفارة لمن ضربت
المقعدك شنو تانى..؟؟؟

[عابد عقيد]

المشاركة الأصلية كتبت بواسطة bayan

سلامات يا عابد
يا زول ما قصدت اظهر زعلانة بس ما بحب الناستحاول تحاصر الزول بانها ترفض وجهة نظرو بوضعو
تحت لافتة...
سؤالي عن الاغاني موش لعدم التصديق فقط لانه افتكر توثيق هذه الاشياء هام جدا
ولا يجب انه يقال خفافي لانه بالجد المفرو ض الناس تبدا في التوثيق
لمحاربة الحكومة للفنون,,
خالتك زهجانة بس من الناس البتأطرها...
لك المودة والاحترام
وانا سعيدة بوجودكم في المنبر ومرحب بيك في اثراء الحوارات بكل ما هو مفيد
وجميل انتو ياكم الجيل النحنا قافلين عليه بعد موت الديناصورات الحزبية
فتك بعافية..

د. بيان اهم حاجة ماتكوني زعلانة والزهج مقدور عليهو بس اتقني حرفة النمل
وكم انا سعيد بان نكون رفقاء درب في الاسافير .

تقبلي وافر احترامي

[مواطن]

الأستاذة لنا ،
أعطرالتحايا أزفها لك وللمشاركين في هذا البوست والذي أرى أنه قد غلب عليه طابع المناظرة في أمر {حسب تقديري} لا يتناطح فيه عنزان.

• العمل إرهابي أياً كانت دوافعه ومبرراته

• إدانته لا يعارضها إلا مكابر وما أحسب أن بيننا مكابر

• هو عمل ضد الكلمة الحرة وحق التعبير بغض النظر عن تقويم البعض للموقع المستهدف

• ضلوع السلطات أم براءتها أمر يمكن إيضاحه بالمتابعة القضائية

• على الأخ بكري إقامة دعوى قضائية ضد كنار وآخرين بغرض الوصول إلى الفاعل الأصلي، ومن هنا سيتبين موقف السلطة سلباً أو إيجاباً

• تأثير المواقع الألكترونية على الرأي العام الداخلي ينمو طردياً مع نمو مستخدمي أجهزة الحاسوب، والدليل هو عدد المعاهـد والكليات التي تدرس علوم الحاسوب قبل 7 سنوات مثلا وعددها الآن في مدن السودان المختلفة وعدد الدارسين فيها .. هذا إذا غضضنا النظر عن الذين يبتاعون أجهزة الحاسوب لتصريف أعمالهم .
  ودليل آخر على أهمية وتأثير الحاسوب على الرأي العام الداخلي هي الإعتقالات المتتالية لأصحاب مواقع المدونات "BLOGGERS" في مصر .. وإستغلال المرشح أوباما لمواقع الشبكة في دعايته الإنتخابية.. أدرك الفارق في الإستخدام .. ولكني أعني أن السودان قادم أيضاً.
  ودمتـم.

[رأفت ميلاد]

المشاركة الأصلية كتبت بواسطة bayan

يا رافت اصلح معاي وما تقولي بتبرري للحكومة عشان تضرب المنبر

تعرفى يا بيان مافى زول بقدر يقول الحكومة هكرت المنبر .. حتى كان تورط فيها زول جاهل من طرف الحكومة .. وبتخيل لى من وحى مداخلتك .. الزول الهكر سودان نت .. يا شجع غيره .. أو هو نفسه الواصل الهكر .. وبعدين الهكر أيآ كان هو .. فهو شخصية مريضة .. ومداخلتى ما غلاط معاكى فى موضوع الهكر .. لأنك وصفتيه بأنه (إقصائى) .. ودى حقيقة أتفق معك فيها ..

وضحت ليك إقتناعى بأن المعارضة حقيقة يجب الإعتراف بها .. بإقتناعى بوجود عدو مشترك .. أوافقك فى الجزئيات .. ولكن فى مجريات الأمور .. فكل له فلسفته فى الرأى كما قال عابد .. فنتفق هنا ونختلف هناك .. لكن إختلفت معك بفكرة .. إقصاء المعارضة .. وتسمياتهم بتسمية مثل مناضلى الكي بورد ..

وبعدين لا أتفق معك بأن السايبير ليس له وزن فى السياسة .. فإذا أهملته أو إزدرته الحكومة والأحزاب .. فبلا شك ثّقف كثير من السودانيين سياسيآ وثقافيآ وتاريخيآ .. وأوجد كُتّاب من الجنسين .. سيكون لهم شأن ..

ولكن أيضآ أخالفك بأن الحكومة لا تقيم له وزن .. وليس المقصود الآراء الشخصية للكُتاب .. بل المقالات التى تفضحهم .. وهى كثر مدعمة بالصور .. وأكثر من يفضحوهم هم االموالين لهم مثل محمد حامد جمعة و محمد فرح ..

مودتى

[مكي محمد الحسن]

الاخوة والاخوات أعضاء وقراء سودانيات الاعزاء
التهكير أراه قد طال مواقع أخري ..مثلاً..
احيانا ادخل علي موقع المشاهير والذي لا أملك فيه عضوية http://www.almshaheer.com/ فاذا بي أجد ( مهكراً ) هناك ايضاً
نفس الرسالة والتي نصها :

makaveli
site Hacked by
makaveli


Dear Lord can ya hear me ? , it's just me
A young nigga tryin to make it on these rough streets

GOD I'm on my knees beggin please come and SAVE ME

THE WHOLE WORLD done made ME crazy!
Now am I wrong if I am don't worry me
Cause do or die gettin high till they bury me

And even in the darkest nights, I'm a Thug for Life
I got the heart to fight now
why i'm cry ?
That's just life in the ghetto, do or die

ان شاء الله ربنا يحفظ ( موقعنا ) سودانيات من كل شر ..
ليتني أخبر هذه التكنلوجيا فارسل لمثل هؤلاء ( المخربين ) ما لا رأت عين ولا سمع به أحد من قبل ..

الاخت لنا جعفر ارجو ان تغفري لي خروجي عن موضوع البوست الي تعميم ان ( المشكلة ) في منتديات اخري أزورها لحاجة في ( نفس يعقوب ) قد نتفق علي ما فيها او نختلف ولكنها قد خربت أيضاً ...
أرجو واتمني من الاخ الباشمهندس خالد الحاج أن يستعد وأن ( ينفجل عينه زي دائرة القراصة ) لمثل هذه التخريبات ..

[رأفت ميلاد]

على إذنك يا لنا .. أتونس شوية مع بيان
مرحب يا دكتورة

المشاركة الأصلية كتبت بواسطة bayan

ديل اكثر من يشرف الكيزان,,,لانهم اظهروا انضباط عالي جدا في النقاشات
لم يثبت على اي من جمعة ولا محمد فرح استخدام كلام بذئ ولم يهبشوا عرض اي زول
وصبروا على اذي الاقصائيين واكاذيبهم الدائمة

تعرفى يا دكتورة أنا أعرف معرفتك الشخصية بمحمد حامد جمعة .. وأنا هنا لا أناقش شخصيات بصورة شخصية .. ومعروف فى السايبير هناك شخصيات تتلبس مواقف بطريقة عملية وليس شخصية .. مثلآ سمعت من أخ كريم عن شخصية عبدالرازق (أبو رزقة) بأنه رجل حبوب وهادئ .. وعن ملاسى سمعت من أخت عزيزة كل خير .. وصديقى هبانى أعرفه جيدآ وتهذيبه ..
الموضوع ليس إنفصام شخصية بل أسلوب فى الأداء .. وقطعآ الفاتح جبرة ليس كما هو يكتب ولا أبو الجعافر ولا سجيمان .. لا د. محمد عبدالله الريح
محمد حامد جمعة لدية طريقة إستفزازية عالية .. ودائمآ لا يستعملها فى موضوع بقدر ما تكون أهدافه صرف النظر عن موضوع آخر .. يستعمل أسلوب أشبه بضحكة الترابى الصفراء لمسخرة المخالفين وجذبهم الى فخ السقوط .. طريقته تذكرنى بالمساطب الجانبية لدار الرياضة أمدرمان .. أتفاداه لهذا السبب .. وحدث أن هددنى بحديث مبطن بأنه يتركنى فى حالى فقط أبتعد منه .. وفعلت ..
أما محمد فرح ينتهج نفس الأسلوب الإنصرافى ولكن بطريقة أخرى .. لا يستعمل نابى الكلام ولا الإستفزاز المباشر .. يأتى بمواضيع فى قالبها أقرب من السذاجة.. مواضيع من النوع الذى يعرضه إعلام النظام .. مواضيع يدرى ليس هناك من يصدقها أو يهضمها .. مثل خروج مسيرة تأييد تجتاح الخرطوم مبايعة للبشير .. وتأتى بعدها الردود المغتاظة الذين يرد عليهم بمنتهى البراءة .. لا أحسبه ساذج ولا "عوير" .. بل أتخيله يضحك حتى ينكفى على وجهه من إنفعالية الردود ..
وهذا هو أسلوب الكيزان فى هزيمة الآخر .. بالطبع إعتمادآ على تملك السلطة والطرف الآخر أعزل ..

المشاركة الأصلية كتبت بواسطة bayan

الى الان الكيزان والجمهورين هم اكثر الناس قدرة على النقاش الجاد المثمر والتهذيب العالي والاعتذار عند الخطأ.. تربية جزبية عالية جدا...

تعرفى ده أغرب تشبيه أسمعه فى حياتى .. لأن الجمهوريين ديدنهم الحجة والصبر والجدال الجاد .. والكيزان تنقصهم الحجة .. ويلجأون للعنف اللفظى (التكفير) والعنف الفعلى (السيخ) لحسم نقاشاتهم .. هدوئهم الآن مثل التحقيق من واقع وضع القوى مع الضعيف .. مثل ضابط الأمن المسلح الذى يجادل معتقل "بأدب" .. ولكنهم خارج السلطة يطير عقلهم ..
وجعل الكيزان فى مصاف (حزب) دى مصيبة .. هؤلاء الناس فى قاموسى فقط معتدين على السلطة بالنهب والسرقة .. ربما بعد سقوطهم وتجريدهم .. ونصب حكومة ديمقراطية كاملة متكاملة بدونهم .. يمكن أن تنظر الديمقراطية فيهم دستوريآ لمنحهم حق التمثيل الحزبى .. الآن هم الآن فقط "أعداء" سلبوا السلطة وإخترقوا الدستور .. وسلطتهم لا تمثل حزب أو حكومة .. بعد المحاكمة الدولية نصبوا الى العدالة الداخلية .. والعقاب بداية بالجريمة الأولى .. سرقة السلطة .. الى آخر جريمة طفل مشرد سوى فى دار فور أو فى ملجأ المايقوما ..

صباحاتك خير .. وشايف الأونلاين ظهرت ..

مودتى

[AMAL]

لنا وضيوفها الاعزاء
ان كان لهؤلاء المخربين من حسنة فهو مثل هذا النقاش والذي حتي لو اختلفنا فيه في النهاية يفضي باذن الله لما فيه خير الجميع واضعف الايمان انه يفتح بابا لكثير من التساؤلات اولها واهما

هل الكتابة في السايبر فعلا محدودة التاثير؟

وهل نكتب فقط للتنفيس وتزجية الوقت ؟

وبالتالي كل ما ندلقه هنا هو مجرد هدر للباندوث

وكل سؤال من هذه الاسئلة موضوع لبوست كامل

اتمني ان يتواصل النقاش وبذات العمق والنفس الهادي واكيد حنصل لاجابات صحيحة وقبل ان اغادر

عايزة ارد علي الاخ مندوب جريدة حكايات

الهكر الدمر الموقع عضوء فى سودانيزاون لاين، وبالامس تابعت بوست لواحد اسمو تمبس يهدد بنشر الرسائل ..!

اكيد انت ما متابع ولإ كنتا عرفتا مين هو تمبس وماهو اسلوب كتابتو

اما الحديث عن الأمن والحكومة دا تعظيم فايت الحد واظهار للموقع فى صورة المناضل العظيم والمعارض الأوحد، فالموقع يعتبره كثيرون (منفس) للشعب ..!

من المداخله دي نقدر نطلع كم حاجة
الموقع المخرب ليس له قيمة او خطورة تذكر بالتالي لا الحكومه ولا امنها من هواجسم انهم يخربوه

الموقع مجرد منفس للشعب المنفوخ يعني برضو عندو دور واثر علي الشعب حتي لو كان مجرد تنفيس طيب هل دا رايك في باقي المواقع بما فيها سودانيات البنفس فيها قصدي البنكتب فيها دي
تحياتي للجميع

[رأفت ميلاد]

حاولت أفتح سودانيات أكتر من نص ساعة .. ولم أجد الصفحة .. تيقنت من إنها وقعت فى قبضة الهكر .. كتبت فى سودانيز أسب وألعن .. نبهونى أن سودانيات موجودة ..
رجعت لقيتا .. رجعت سودانيز لقيتا وقعت تانى تحت قبضة ميكافيلى ..

ما عارف النهاية شنو .. لكن إنتابنى شعور غريب بأن الهكر من الداخل .. بوردابى يعنى ولا مزيد من التعليق ..

آخر أحقاده ..

[AMAL]

المشاركة الأصلية كتبت بواسطة رأفت ميلاد

حاولت أفتح سودانيات أكتر من نص ساعة .. ولم أجد الصفحة .. تيقنت من إنها وقعت فى قبضة الهكر .. كتبت فى سودانيز أسب وألعن .. نبهونى أن سودانيات موجودة ..
رجعت لقيتا .. رجعت سودانيز لقيتا وقعت تانى تحت قبضة ميكافيلى ..

ما عارف النهاية شنو .. لكن إنتابنى شعور غريب بأن الهكر من الداخل .. بوردابى يعنى ولا مزيد من التعليق ..

آخر أحقاده ..

دي فعلا بقت حكاية بايخة وممجوجة سؤال هل مجرد تكرار عملية الهاكنق بقوي فرضية انو المخرب عضو في البورد ولا في اسباب تانية وليه بكري ماظهر من خلال اي منفذ تاني عشان ينور الناس ويوضح اسباب فشلو في تامين الموقع وسايب الناس يتخبطو يقعو فريسة للتخمينات ونظرية المؤامرة

[رأفت ميلاد]

المشاركة الأصلية كتبت بواسطة AMAL

دي فعلا بقت حكاية بايخة وممجوجة سؤال هل مجرد تكرار عملية الهاكنق بقوي فرضية انو المخرب عضو في البورد ولا في اسباب تانية وليه بكري ماظهر من خلال اي منفذ تاني عشان ينور الناس ويوضح اسباب فشلو في تامين الموقع وسايب الناس يتخبطو يقعو فريسة للتخمينات ونظرية المؤامرة

تعرفى يا أمال .. فى أشياء أخرى نزلا الهكر لقيت ما من اللياقة أنشرا هنا .. هى الخلتنى أفكر إنو الهاكنق من الداخل .. لأنه المنشور القصد منه الفضح لا ينتبه له إلا عضو أومتابع لصيق .. ويوجد صراع حقيقى الآن بين الأعضاء ..

لكن برضو تظل فرضية وحاسة إضافية وليست سادسة ..

عمومآ أتمنى أن ينتهى هذا الفصل الممجوج

[wadosman]

المشاركة الأصلية كتبت بواسطة رأفت ميلاد

تعرفى يا أمال .. فى أشياء أخرى نزلا الهكر لقيت ما من اللياقة أنشرا هنا .. هى الخلتنى أفكر إنو الهاكنق من الداخل .. لأنه المنشور القصد منه الفضح لا ينتبه له إلا عضو أومتابع لصيق .. ويوجد صراع حقيقى الآن بين الأعضاء ..

لكن برضو تظل فرضية وحاسة إضافية وليست سادسة ..

عمومآ أتمنى أن ينتهى هذا الفصل الممجوج

رافت...

سلاااام

شفت البتقول عليه...فعلا حاجة غريبة
لكن فعلا بدات بعض الامور توضح من الشى الشفناهو...

تخريمة:

ماسنجراتك كيف.؟؟؟