نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > نــــــوافــــــــــــــذ > أوراق

إضافة رد
 
أدوات الموضوع انواع عرض الموضوع
قديم 23-12-2007, 04:43 AM   #[1]
تاج السر الملك
:: كــاتب نشــط::
الصورة الرمزية تاج السر الملك
 
افتراضي عرق المحبة..مشهد العشق القديم

عرق المحبة
مشهد العشق القديم

أصاب ( صلاح بن البادية) موقع الأكثر رواجا فى موسم واحد ثلاث طلقات لحنية متتابعه ، ( يا جنا) ،( ننساك) ، (تعال ياليل و فوت يانهار)!! و رفرف بطائر ( أين مى) و دار دورتين وسيمتين قبل ان يتسلل الملح الى فوديه ، فيكتسى هيبة ووقارا ...كتبنا على عهده رسائل الغرام اللاهبة ، و علت العقائر..ننساااااااااااااااااااااااك ..انت انت بتتنسى...
فذهبت مَثَلاً‏.‏ يضرب في الذرابة على العاثر الذي يتكلَّفُ ما قد كُفِيَ ..كتبنا بخط مونق منمق الى العصافير اللواتى كن يلبسن الأزرق الضارب الى بعض رماد ، بياقة بيضاء مقلوبة غير ( مهوزنة) ، و شككنا السهم فى القلب على الحوائط بالفحم و الطباشير و التباشير ، أحتفاء بالضفائر و فستان ( بحرية) فى اول ايام العيد ،- حلمنا و استحلمنا بهن جميعا و نحن اسرى خدر ( الفول) فى الثالثة اليتيمة، تجرأنا فى أحلامنا، تحسسنا الساعد البض و قبلنا الخدود حتى يعيدنا الى الصواب صوت مولانا الأجش...
حديث ( الكيس و العاجز)..مقرر السنة دى..
تفر العصافير مثلما أتت..الى مكان بعيد الأسوار ، و تصطدم الأحلام الطفلة المراهقة بأسلاك الأعراف الشائكة و حرقة الشغف الفائر الى حين. و كان فيمن بيننا ( الدون جوان) الكازانوفا ، الحبيب و يسمى ( الرياد) ، أشاع بأنه يمتلك ( عرقا للمحبة) !! آمنا و صدقنا ، حين شهدناه يصول و يجول كفحل البط وسط الشباب( الربة)..يناغمنه بيسر و صفاء ( عليك الله يا عماد كان ما ضقتا دى) ..وهو فى افوافهن قادل زى ملايكة عليهن نازل..سامية ازيك، يمشى مشية العقرباء و يتحول الى نصف انثى بين الأناث كما حكى ( مختار عجوبة)
..بالغتى يا منال ..سكرة لكن عسل..خبرك؟؟؟ و حين يرتد الى فحيح غيظنا فى النهار التالى يؤول الى فج بذىء..برواية لا نمل سماعها عن كل بنت فى الفريق..و الله قطعت ليك فيها جنس قدوم!!!! كم تاقت نفسى الى حيازة هذا العرق ، و كم تكثفت حول حيازته لهفتى و شبقى الصبى ، كم تمنيته لأقهر به حتى طير السما و قداديمه، قصدنا سوق ( التشاشة) و ( طارق) ، و نحن فى الطريق تهيأ لى عظم القداديم التى قطعها الفنانون و اللعيبة و حائزى العرق فأمتلأت حسرة وغص حلقى ،.فى سوق ( التشاشة) أذهلنى فرح اللقاء بالشواويل المفروشة و مفاتيح الجنة المبروشة ، عروق يا صديقى عروق، لكل نوع ( فيتشر) و ( كاباسيتى) ، فيها النوع الذى يصلح لمعالجة الصبيات من العام و حتى الجامعى منهن ، من سن سبعة الى سن سبعة و سبعين مثلها فى ذلك مثل مجلة ( ميكى) ، وآخر معقوف للمطلقات و القانتات و الصابئات ، و بعض ( بيرسونالايزد) ، يذكر اسم الحبيبة و ( يتف) عليه ، عروق عروق ، بعضها لأشياء غير المحبة ،مثال تلكم التى اتى ذكرها فى مناحة جارتنا فى رثاء زوجها ( يالكتبوك ..بالعرقوك) .
و امتد شريط البنيات اللطيفات ..لكل رايت عرقا يناسبها ،فزال عنى اليأس و أمتلأت أملا و شوقا الى الحياة.
توكلنا على الله و دفعنا ( أبخمسة) لكل ، و فى الطريق أنشدنا..وداعا كتاب الرسائل العصرية ..وداعا عمود النور ، وداعا ( صلاح بن البادية) ، سحقا لعهود التسول العاطفى و المكوة السنينة ( بتحرمنى منك قميصا) ، وداعا للسخرة و المراسيل ( للبنات الكبار) و الهزء و التغامز و الشرة ، سنقطع القداديم يا رجل و ما أطيبه من قطع. خبأت عرق محبتى فى الجلباب ، و تحرشت فى احلام تلك الليلة بالصبايا اللواتى شالن منام عينى من قبل ، مطقت شفتى ( بالجرسلين) كما يدعى ، و نمت قرير العين جذلانا.
ثم جاء اليوم الفصل، ذهبنا لزيارة معارف ، رزقوا فيما رزقوا بأمة من أماء الف ليلة و ليلة حسنا و بهاء و اسطورية، كنا ندعوها فى أجتماع ضلالنا ( نهوية) ، كانت قطعا من النوع الذى ( فات الكبار و القدرو) ، متعدية بصلف على ذخائرنا من الصبر و الأحتساب ، قضينا سحابة يومنا ضيوفا ، اكلنا و شربنا و انبسطنا ، وكان كل شغلى تحسس العرق داخل جيب القميص ، و انا اهمهم فى سرى ( تعال يا ليل و فوت يا نهار ) ، ما رأيت الجنى و لكنى احسست بوجوده بيننا....و اتت ساعة خلا فيها الديوان لنا، تفرق القوم فى الحوش ، و خر بعضهم صرعى لفقد السوائل ، تلفت يمنة و يسرة ..بلعت الريق و سمعت صوتى يصعد لوحده دون أذن منى ....نهوية...اجابت و كأنى بها سكرى...شنو يا ابو السرة ...فركت العرق بلهف يقطر منه الندى..صعد صوتى درجة ما عهدت جمالها فيه من قبل...ادينى قدوم!!..و كأنى بعرق السقف ينشق و الجنى ينفذ مثل الريح العاصف و صفعة على قفاى ..قدوم يابن الكلب ..عم على بيد فى خشونة المركوب يقف من ورائى ..و ( نهوية) تبصق على الأرض تقززا..يخسى..
طويل اليوم امامى لن يفوت.


تاج السر الملك



تاج السر الملك غير متصل   رد مع اقتباس
قديم 23-12-2007, 05:54 AM   #[2]
فيصل سعد
:: كــاتب نشــط::
الصورة الرمزية فيصل سعد
 
افتراضي

الاخ/ تاج السر
كل عام و انت بخير، سرد جميل ،صلاح ابن البادية فنان قوي و غناو سمح بالحيل لكن انت الشلاقة العليك شنو؟ بجيك الخواجة صاحبك هسة و بصحح العثرات و بستعدل ليك الدرب. و انت جيتوا في خيتو تمام المرة دي و بخبرته و تجاربه بجي يبراك صاح و ما بقصر معاك تب

تحياتي.



التوقيع: اللهم اغفر لعبدك خالد الحاج و
تغمده بواسع رحمتك..

سيبقى رغم سجن الموت
غير محدود الاقامة
فيصل سعد غير متصل   رد مع اقتباس
قديم 23-12-2007, 04:41 PM   #[3]
تاج السر الملك
:: كــاتب نشــط::
الصورة الرمزية تاج السر الملك
 
افتراضي

فيصل ود سعد
يا أخى كل سنة و انت طيب وبالصحة و السلامة انشاء الله
انا خاتى قلوبيتى للخواجه..هسة تسمع ...جب.



تاج السر الملك غير متصل   رد مع اقتباس
قديم 23-12-2007, 04:49 PM   #[4]
الفاتح
:: كــاتب نشــط::
الصورة الرمزية الفاتح
 
افتراضي

إزيك يا ملك وكل سنه وإنت طيب
والظاهر عليك إنك راجل طيب
إروق مهبًه
عشان فد قدًوم!!



الفاتح غير متصل   رد مع اقتباس
قديم 23-12-2007, 05:24 PM   #[5]
تاج السر الملك
:: كــاتب نشــط::
الصورة الرمزية تاج السر الملك
 
افتراضي

و انت طيب يا شليل و ربنا يمتعك بالصحة.
يا زول نحنا كان سلام ساكت كفايه علينا.



تاج السر الملك غير متصل   رد مع اقتباس
قديم 23-12-2007, 05:25 PM   #[6]
تاج السر الملك
:: كــاتب نشــط::
الصورة الرمزية تاج السر الملك
 
افتراضي

و انت طيب يا شليل و ربنا يمتعك بالصحة.
يا زول نحنا كان سلام ساكت كفايه علينا.



تاج السر الملك غير متصل   رد مع اقتباس
قديم 23-12-2007, 07:30 PM   #[7]
فتحي مسعد حنفي
:: كــاتب نشــط::
الصورة الرمزية فتحي مسعد حنفي
 
افتراضي

اقتباس:
المشاركة الأصلية كتبت بواسطة تاج السر الملك مشاهدة المشاركة
فيصل ود سعد
يا أخى كل سنة و انت طيب وبالصحة و السلامة انشاء الله
انا خاتى قلوبيتى للخواجه..هسة تسمع ...جب.
قلوبيتك بي وين ياعينيا خليني أنط ليك فيها شويا0 ياخي انت غبت خليتني زي اليتيم ما لاقي زول يفهمني ويشد من أزري في الانتخابات البقيت الطيش فيها وقربتا أبقي ملطشة لي ناس بري كمان0
وأنا اللئيم دا ما ببرد ليهو قلبو وحأخش بس عشان أقول ليك كل سنة وانت طيب وعندي بعيد عنك وجع سنون وسيرة القداديم دي بتاور علي الوجع واحنا ذاتو أيامنا كنا بنستعمل ابو الرقيع المنشف ومدقوق بدرة ودا وصفتو ما بتجلي بس دا ما بديهو الا بالقروش والدايرو لازم يدفع.
يوم الخميس أنا قايم السودان انشاءالله فلو عندك وصية ألحقني بيها قبل ما أقوم قالوا في بتاع تنباك فتح جديد ماشي أجربو وأرجع طوالي وما تخاف بجيب ليك معاي وأشوف طريقة أرسلو ليك مع أي زول قايم أمريكا وحأكتب عليهو Sudanese special dope عشان ما يصادروهو منو
عموما عودا حميدا وتاني ما تطول الغيبة وكل سنة وألأسرة بألف خير وعافية



التوقيع: شيخ البلد خلف ولد..
سماهو قال عبد الصمد..
كبر الولد ولامن كبر نهب البلد..
ما خلي زول ما قشطو..
وآخر المطاف بقي شيخ بلد..
عجبي..
فتحي..
فتحي مسعد حنفي غير متصل   رد مع اقتباس
قديم 24-12-2007, 12:20 AM   #[8]
تاج السر الملك
:: كــاتب نشــط::
الصورة الرمزية تاج السر الملك
 
افتراضي

يا خواجه حنفى
الكريسماس دايما بكون شغلو كتير ..فتيتمت يا رجل
و الأنتخابات الجاية على الطلاق خاشى خاشى و رمزك الفانوس!!
هسة بدل تقولى اجيب ليك عرق محبة . تجيب تمباك؟؟
خلاص تمباك تمباك
ربنا يوديك و يجيبك بالسلامة..



تاج السر الملك غير متصل   رد مع اقتباس
قديم 24-12-2007, 10:04 AM   #[9]
فتحي مسعد حنفي
:: كــاتب نشــط::
الصورة الرمزية فتحي مسعد حنفي
 
افتراضي

اقتباس:
المشاركة الأصلية كتبت بواسطة تاج السر الملك مشاهدة المشاركة
يا خواجه حنفى
الكريسماس دايما بكون شغلو كتير ..فتيتمت يا رجل
و الأنتخابات الجاية على الطلاق خاشى خاشى و رمزك الفانوس!!
هسة بدل تقولى اجيب ليك عرق محبة . تجيب تمباك؟؟
خلاص تمباك تمباك
ربنا يوديك و يجيبك بالسلامة..
(الأمير السر مش هو برضو ود الملك أميركل كريسماس وانت بخير واحنا الحمدلله ربنا عفانا من سنين من حضور الكريسماس وأعياد الخواجات الما بتكمل ولعلمك الكريسماس دا كان رمز للحزن والكآبة بالنسبة لينا لأن دا عيد لم الشمل العائلي واحنا كنا مقاطيع بدون أهل وفي أيام الكريسماس الطلبة الخواجات كانوا بيسافروا لي أهلهم والشوارع العصر بتفضي لان العوايل بتتلم لي غداء الكريسماس ويضربو السمك وديك الرومي تقول عندهم الحمي النزفية0
بعدين يا تاج الفضايح لزوما شنو وانت عارف احنا عندنا شفرة وانا تمباكك كتبتو ليك بالانجليزي0
أما عرق المحبة حقك دا الناس خلوهو من ما ظهر ال spanish fly والزمن دا مافي شواكيش أي جكساية بترد طوالي وبقوا هم العندهم عرق المحبة لأن الشباب كلوا اتغرب كايس اكل العيش والنسبة اختلت والعنوسة زادت. وهسة تجي تنط ليك واحدة من بناتنا في المنتدي تقول ليك دا كلام شنو يا عمو البتقول فيهو دا يعني قصدك احنا بايرين مع انو والله العظيم دا ما قصدي وأها من هسع أنا بعلن حسن النوايا ومساندتي ليهم في محنتهن ومن هذا المنبر انا أشجب هروب الأولاد الصعاليق من مسؤولياتهم بحجة أكل العيش ومن هذا المنبر أناشدهم بالرجوع الي أرض الوطن لأداء دورهم في الحفاظ علي النسب كما كانت حتي لا يتشردوا أخواننا الفلاتة الذين بارت بضاعتهم من العروق مما اضطرهم لبيعها كمساويك برخص التراب. وهذا شيئ لا يرضي الله ولا يرضينا.
بعدين تعال ياولد الفانوس دا انت قاصد بيهو شنو؟انت ما عارف في السودان لما تقول فلان دا فانوس معناها شنو ولا يعني بقيت خواجة وليه مثلا ما قلت رمز القندول لاني بحب البوب كورن(الفشار) كنت وافقت وللا انت قاصد اني مولع ولا بتتكلم عن نطيط العيون وللا قصدك شنو يالحبيب وقول ما تخاف وكان عايزني أجيك أناقشك شخصيا مافي مشكلة البت آلاء مسئولة في شركة سياحة ممكن تخارج لي تزكرة لي جامايكا أو كولومبيا وطبعا ديل قراب منك وممكن تجيني ونقسم البلا نصين.
ياتاج كفاية كدا انا قايم عندي تجهيزات للسفر وأخير ليك تبعد قلوبيتك دي مني



التعديل الأخير تم بواسطة فتحي مسعد حنفي ; 24-12-2007 الساعة 08:23 PM.
التوقيع: شيخ البلد خلف ولد..
سماهو قال عبد الصمد..
كبر الولد ولامن كبر نهب البلد..
ما خلي زول ما قشطو..
وآخر المطاف بقي شيخ بلد..
عجبي..
فتحي..
فتحي مسعد حنفي غير متصل   رد مع اقتباس
قديم 03-03-2008, 12:48 PM   #[10]
فيصل سعد
:: كــاتب نشــط::
الصورة الرمزية فيصل سعد
 
افتراضي

واصل يا ود الملك و زيدنا من قصصك كتير



التوقيع: اللهم اغفر لعبدك خالد الحاج و
تغمده بواسع رحمتك..

سيبقى رغم سجن الموت
غير محدود الاقامة
فيصل سعد غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 12:15 PM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.