تفاصيل فى " تفاصيل " .... " إهداء لجعفر بدري"

[معتصم الطاهر]

هذه القصيدة ..( تفاصيل ) تحتاج لأكثر من شرح ..

تحتاج لأكثر من نقد ..

هي تفاصيل العلاقات بين الأصدقاء و الرفاق ..

و ما الحياة إلا تفاصيل صغيرة ..

فلنسمع .. و ننصت ..

ثم نقرأ ..

ثم .. نتحدث ..

ثم نكتب ..

و نعيد القراءة والاستماع ..




ملحوظة :

بعيد عن كل موقف شخصي ..

[معتصم الطاهر]

[rams]http://youtu.be/rLpqM-mxBBs[/rams]

[معتصم الطاهر]

[flash=http://youtu.be/rLpqM-mxBBs]WIDTH=350 HEIGHT=400[/flash]

[معتصم الطاهر]

تفاصيل


يا رفيق الخطوة
لو عزّ الرفيق
يا بشوش العشرة
والحس الرشيق
ضيق المتاهات إتـّسع
ماخلّى لا عدو لا صديق
وشوف كل حاجة مشت،
مشت معاك
ودخلنا يا داب في الغريق
كل الحواس عاديتا
بالضِحك المعافى
بالطيبة والحِس الأنيق
أخضر وريف الفِطرة
فانوس النفوس
تصبح صباح النجمة
والطير الطليق
وتمر مرور النسمة
في بيوت الفريق
تدّى العصافير وجهتا
وتفتح طلاسم الكلمة
للشعراء الصعاليق
وتتدفق بشارة خير
و ضل ممدود وفكـّة ريق
ولِي وصدِّيق
وصادق والزمن زنديق

الليل كفيف
يفتح منافي الأغنيات
والبيت خفيف
علّقنا فى النضِم السُكات
ودخلنا من باب النزيف
بشّرنا فى الحزن العتيق
ومرقنا من شرف الرهان
شرّينا فى التعب العراريق
ساقونا فى الليل للبُطان
وركزنا جلابة ورقيق
وصنقرنا فى ضل الدخان
نتسلى بورق الحريق
هبشنا ما لقينا البنات
مرقن بنات الواطة
والوجع المطاليق
مرقن وراك
مرقن ينقـّن من خطاك
وجع الطريق , ضجر المكان
والحيرة
فى صمت الستاير والشبابيك
والمقعد الفاضي الملان
والدنيا يوم توسع تضيق
والفراشات
لو ضيعت حلم الوصول
ما ضيعت
إحساسا بطعم الرحيق
وأنا في انتظار وش الصباح
يمرق خيوط الضو
من الفج العميق

أطراك يشرقنى الأسف
تخنقني بالعبرة التفاصيل
كل الهواجس و الظنون
تـترصَ قدامي و تقيف
باب الحكايات ينفتح
تدخل زقاق الكتمة
زخات الخريف
فى حسّى حسَّك حِس طشت
يجرح سكون الحلة
فى الليل الكفيف

أطراك .. يضربني اللـّرو
جواى تلكلِك باب حراز
فى دمي تـِتشرقط دلو
تكبر دوايرك و تكـتمِل
سرّفت كاسات النعاس
أنا لسه فى صحوك ثمِل
بنده على ولاد الشتات
نتحجى بيك ما الليل كمل
غنينا غنوات البنات
على قدر ما الشوق يحتمل
أدخل على الهم من سكات
أنساهو جرحك يندمل
نقط براك عسل الكلام
بنجيك زى صف النمل

أنا بيك حمدني الزمن
ود صرة فى خـتّـة ودِع
غالطني فى جيتك غلاط
ذماني في ذلة لسان
يوم ذل خطوك فى السراط
علّقتَ ضُلك في الضُلمة
ولجت فى سم الخياط
ما تشمت بنات اللهفة فيك
لو جيتنا خسران الشراط
اركز على هوس الدلاليك والسياط
و امرق من الخدر اللذيذ
فى الحضرة آخر انبساط

و إتدبا فى جلد النميمة الطاعمة
سلطان مجالس الونسة
قعدات المشاط
يبدنو الكلام بى كـُر
يشيلنك بشارة خير
من العين العنية دقـُر

يا متخبي فى سر السريرة بريق
كامن فى المعاني مقـُر
منو الهبّاك
فى عصب الأغاني حريق!
و شالك في القصيدة نضُر
و عبّد لى دروبك تاني
أعود و ألقاك فى سِر الغنا
و تلقاني
فى الدم السرَف فى عروقك
دخلت عليك من باب السما
الوراني

حويت ضرع السحاب
حلبتها الغيمة التنقنق فوقك
كتفت البحر من جنو
بى جنو البموت فى شوقك
حفيان فى الطلاق
سارقت فى طرف الحنين
بى نوقك
هشيت النحل .. صحيتو
صحيتو من عسلو الحلاتو تضوقك
فجيت العطش نقـّعتَ
ناداني التراب " حلـُّوقك!"

سرت الأحاسيس سلسبيل
عطشان بشوفك
فى النهارات و الرمض
واقف على طرف الأصابع مُـنفلت
تاوقت ليك
من حافة الزير فى السبيل
تاوقت من نفسك
على نفس الفراغ
فى القاع
و أنا كنت زى عابر سبيل
لوّحتِ ليك
أنا ذاتي غرقان في شِبر
تضحك معاى
أضحك عليك
قايلني نبى الله الخضر!

أديني يا صاحب ايديك
ما نحن اتنين في العدم
نحن امتداد الذكرى
والشوق و الندم
نحن إكتمال المتعة
بى طعم الألم
زى شوكة فى راحة القدم
تقعد تنقبها بالصبُر
تكريها بى عسل الأضان
و النشوة تتحتحت برم
بيناتنا هم من كيف و كم
بينا الأغاني الهابطة
و الصوت النشاز
مفطومة من لبن النغم

بينا
إنجذاب الغنوة للحن الخلود
انفتاح الذات على الذات
و الشهود
ووجع المسافة الواقعة
بين نون و القلم
البينا يا صاحب " نعم"
أحراش و غابات من حريق
بينا المتاهات تنفتح
و تِنصَرَّ زى شهقة غريق
بيناتنا شبق الوردة
لى ركة فراش
تمتص من روحها الرحيق
ألقاك
و أفيق

وانده عليك
" يا رفيق الخطوة
لو عزّ الرفيق
يا بشوش العشرة
والحس الرشيق
ضيق المتاهات إتـّسع
ماخلّى لا عدو لا صديق
وشوف كل حاجة مشت،
مشت معاك
ودخلنا يا داب في الغريق

[معتصم الطاهر]

هذا البوست كله إهداء لعم جعفر بدرى

معنى القصيدة
و محتواها
و تحليلها ..

هذا البوست بتحريض منه ..

[معتصم الطاهر]

المشاركة الأصلية كتبت بواسطة معتصم الطاهر

سرت الأحاسيس سلسبيل
عطشان بشوفك
فى النهارات و الرمض
واقف على طرف الأصابع مُـنفلت
تاوقت ليك
من حافة الزير فى السبيل
تاوقت من نفسك
على نفس الفراغ
فى القاع
و أنا كنت زى عابر سبيل
لوّحتِ ليك
أنا ذاتي غرقان في شِبر
تضحك معاى
أضحك عليك
قايلني نبى الله الخضر!

بما أن البوست موجه الى عم بدرى

فلنبدأ بهذا المقطع ..

للذين كانوا يلعبون فى صغرهم فى رمضاء الفريق .. ثم يتسابقون الى اقرب سبيل موية ..
والعطش يزداد " الشمس من فوقك وتحتك الرمضاء"
تقف على أطلااف اصابعك على حافة الزير .. لتصل للماء ..
و ينفلت الجزء الأعلى من جسدك منحنيا ..
لكن الماء فى قعر الزير ..
و تنظر للفراغ الذى بينك والماء ...لا ترى إلا صورتك ..
هي أنت ..
و أنت صورة لصديقك .. ورفيقك ..
ثم تضحك للصورة المنعكسة فى الماء .. فتضحك معاك كما يضحك معك الصديق عندما تلتقيه
تتبادلان البسمات و هذا يعبر عن كل ما بينكما
و تلوح للصورة .. و تلوح لك .. و ربما تخرج لها لسانك مداعبا ..
و الصورة غرقانة فى شبر ماء ..
من الشوق لرفيقك .. الذى أنت فى عطش للقائه ..

[الفاتح]

حويت ضرع السحاب
حلبتها الغيمة التنقنق فوقك
كتفت البحر من جنو
بى جنو البموت فى شوقك
حفيان فى الطلاق
سارقت فى طرف الحنين
بى نوقك
هشيت النحل .. صحيتو
صحيتو من عسلو الحلاتو تضوقك
فجيت العطش نقـّعتَ
ناداني التراب " حلـُّوقك!"

جميل المقطع ده يا باش.. جميل للدين
إلا _حفيان في الطلاق دي ما واقعه لي..

[ود المامون]

....


... لك التحية ياباش ..


... ولك استاذي الحبيب / جعفر بدري ..
.. يا بشوش العشرة
.. والحس الرشيق

..

... أنا لسه فى صحوك ثمِل



......

أطراك .. يضربني اللـّرو

.. ياسلام .. عليك يا ازهري ...

.. سوف يصعب علي الكثير تفسير مفردة (يضربني اللـّرو ) والتي يستخدمها اهلي في منطقة (المكنية ) .. ونظرا للصداقة التي تجمع استاذي الحبيب جعفر بدري مع الشاعر محجوب الحاج ( ود العمدة ) .. ابن اخت الشاعر ازهري محمد علي ..

يرجي ايضاح لمعني المفردة للجميع ..


.. كل الحب ..

[معتصم الطاهر]

المشاركة الأصلية كتبت بواسطة شليل

حويت ضرع السحاب
حلبتها الغيمة التنقنق فوقك
كتفت البحر من جنو
بى جنو البموت فى شوقك
حفيان فى الطلاق
سارقت فى طرف الحنين
بى نوقك
هشيت النحل .. صحيتو
صحيتو من عسلو الحلاتو تضوقك
فجيت العطش نقـّعتَ
ناداني التراب " حلـُّوقك!"


جميل المقطع ده يا باش.. جميل للدين
إلا _حفيان في الطلاق دي ما واقعه لي..

مرات يا فاتح بحِس إنك حنكوشة ..
أو تربية خرتوم ..

ويمكن التشكيل عصى عليك ..
الطُلاق ..يا زول .. ما الطـَـلاق
ما حصل مرقت مرة كدا فى وكت الطُُلاق حفيان بعراقى ساكوبيس ..
أو مدمدم بى كم توب !!!

[معتصم الطاهر]

المشاركة الأصلية كتبت بواسطة سيد احمد محمد علي المامون

....


... لك التحية ياباش ..


... ولك استاذي الحبيب / جعفر بدري ..
.. يا بشوش العشرة
.. والحس الرشيق

..

... أنا لسه فى صحوك ثمِل



......

أطراك .. يضربني اللـّرو

.. ياسلام .. عليك يا ازهري ...

.. سوف يصعب علي الكثير تفسير مفردة (يضربني اللـّرو ) والتي يستخدمها اهلي في منطقة (المكنية ) .. ونظرا للصداقة التي تجمع استاذي الحبيب جعفر بدري مع الشاعر محجوب الحاج ( ود العمدة ) .. ابن اخت الشاعر ازهري محمد علي ..

يرجي ايضاح لمعني المفردة للجميع ..


.. كل الحب ..

دا تفسير أزهرى للحالة :-

اللرو احساس نفسى بوقوع امر جلل له تأثير عضوى تحسه فى حالة فتور وعدم تركيز لا اعلم تفسير الحالة علميا ولكن يسميها اهلنا اللرو

[الفاتح]

المشاركة الأصلية كتبت بواسطة معتصم الطاهر

مرات يا فاتح بحِس إنك حنكوشة ..
أو تربية خرتوم ..

ويمكن التشكيل عصى عليك ..
الطُلاق ..يا زول .. ما الطـَـلاق
ما حصل مرقت مرة كدا فى وكت الطُُلاق حفيان بعراقى ساكوبيس ..
أو مدمدم بى كم توب !!!

ده كلام شنو ده.. حنكوشة شنو يا باشا .. وتربية الخرتوم مالا !
هسي بدل القطامه دي مش كان أحسن ليك تشًكًل/ تنوًن بدل ما تخش في دور أستاذيه !.. غلطان الزول البيعتًب خشم باب بوستاتك..

[معتصم الطاهر]

المشاركة الأصلية كتبت بواسطة شليل

ده كلام شنو ده.. حنكوشة شنو يا باشا .. وتربية الخرتوم مالا !
هسي بدل القطامه دي مش كان أحسن ليك تشًكًل/ تنوًن بدل ما تخش في دور أستاذيه !.. غلطان الزول البيعتًب خشم باب بوستاتك..

يا فاتح عدم التشكيل ..غلطتنا ..
و بنقصد تربية الخرطوم اللغوية .. التى ضاعت فيها مفردات الحبوبات ..
و هذا البوست مقصود به صور قديمة و مفردات أقدم ..

ويا زول بوست ما بتعبّب بابو شن فايتو ..
استفزازنا طلع سلبى ..

و كثير من المفردات هنا تحتاج لتفسير ..

حِس طشت
اللـّرو
تلكلِك باب حراز
سرّفت كاسات النعاس
إتدبا
دقـُر

حمّدني الزمن
ود صرة فى خـتّـة ودِع
دقـُر
كـُر
مقـُر
نضُر
التنقنق
الطُلاق
سارقت
" حلـُّوقك!"
تنقِبها بالصبُر
تكريها
عسل الأضان
بَرَم

[ود المامون]

اقتباس:
المشاركة الأصلية كتبت بواسطة معتصم الطاهر
تلكلِك باب حراز




... تعرف ياباش دائما كلما استمع لمقطع :
قايمي الصباح متكفلتي .. شايلة الحليلة علي المراح ..
.. احس بان الصورة مبتورة ... وتكتمل عندي ( بتلكلك باب الحراز) ... في الصباح ... وتعرف ياباش اول ما اسمع ..تلكلك باب الحراز .. في ساعة الصباح .. اعرف انها ماشة علي المراح ..

.. تمنيت لو ان الشاعر السر عثمان الطيب .. اضاف صورة شعرية .. لتكلك باب الحراز في الصباح ... حتي يكتمل المشهد ...


.. كل الحب ...


... يالله ياباش ... صوت تلكلك باب الحراز في الصباح .. له وقع ساحر ...

[جعفر بدرى]

اقتباس:
المشاركة الأصلية كتبت بواسطة معتصم الطاهر

هذا البوست كله إهداء لعم جعفر بدرى

معنى القصيدة
و محتواها
و تحليلها ..

هذا البوست بتحريض منه ..



ــــــــــــــــــــــــــــــــــــــــــــــــــ ـــــــــــــــــــــــــــــــ

يا باش
يا فعلا هاش

( نقـّط براك عسل الكلام
بنجيك زى صف النمل )

حتى و إن تأخرنا قليلا ... و تبّا لهذه الغيابات القهرية ... و الغفلات ... و شكرا للإبن طارق الذى نبّأنى بهذا الإهداء السخى ... و كنت قد سمعتهم يقولون ...
إن الهدية لا تهدى ولا تباع ... لكن هناك رجلا ( طَلْق ) اليدين !

ليست هى المرة الأولى التى أسمع أو أقرا فيها هذه القصيدة ... فقد استمعت إليها أكثر من مرة من صاحبها ... أزهرى محمد على ... وهى فعلا تفاصيل العلاقة بين الناس والناس .

وعلى مهل أرحو أن أعود
بكامل تقديرى .

[جعفر بدرى]

اقتباس:
المشاركة الأصلية كتبت بواسطة

حويت ضرع السحاب
حلبتها الغيمة التنقنق فوقك
كتفت البحر من جنو
بى جنو البموت فى شوقك
حفيان فى الطلاق
سارقت فى طرف الحنين
بى نوقك
هشيت النحل .. صحيتو
صحيتو من عسلو الحلاتو تضوقك
فجيت العطش نقـّعتَ
ناداني التراب " حلـُّوقك!"


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ


من الأمور المتفق عليها ... أن أول وأهم وظيفة للشعر و الشعراء الملتزمين ... تجميل وجه الحياة ... من بثور القبح التى تلازمها أغلب الأحيان ... وهذا الجمال لا يمنحه إلا من يملكه ... وأزهرى شاعر جميل ... جميل جدا ... وهو يحوّل حتى النميمة إلى شىء محبب !!

وأزهرى محمد على ... الذى يبدو فى لغته الشعرية ... موغلا فى عامية السودان ... ينطلق لسانه من قواعد متينة فى اللغة العربية الفصحى ... كما سنبين ... فى المقطع المقتبس أعلاه ... وهو نفس المقطع الذى استحسنه ... شليل ... وقدم به لمداخلته وتساءل عن بعض العبارات .

أعلم أن هذه القصيدة قد كتبها ... أزهرى ... لصديقه الباشمهندس ... معتصم الطاهر ... وأعلن ذلك عندما قرأها فى أحد المنتديات التى استضفناه فيها ... بمركز الوافر ... وأعلم أيضا أن الاستطراد فى الشرح ربما يفسد على القارىء ... متعة تذوق النص ... لكن هناك بعض الصور التى تستوجب الوقوف عندها ولو قليلا.

الصورة الأولى تمركزت فى قوله ...

( حفيان فى الطُلاق
سارقت فى طرف الحنين
بى نوقك )

فحسب رؤيتى ... لا أشاهد إلا مضمارا للسباق ... أو الطلاق ... بفتح الطاء وهى فى العربية الفصحى تعنى الشوط الواحد فى السباق ... عندما يشتمل على عدد من الأشواط ... و لما أحيلت للعامية ... ضمت الطاء فأصبحت ... الطُلاق ... و للكلمة معانى متعددة منها ... أطلق رجله ... بمعنى استعجله فى أمر ما ... وأطلق خيله فى الحلبة أجراها ... و استطلق الظبى ... أسرع فى عدوه لا يلوى على شىء ... ومن استعمالاتها ... طلق اللسان ... وطلق المحيا ... وطلق اليدين ... ويوم طلق ... و تعنى أيضا وجع الولادة عند الإنسان والحيوان ... ولها معانى أخرى سواء كانت فى القصحى أو العامية .

ولكن ما الذى دعانى لاستحضار صورة السباق و المضمار ...؟؟
ليست كلمة ( حفيان ) لوحدها ... بل هذه المسارقة التى لجأ إليها الشاعر حتى يفوز بالسباق .
و المعروف لدى الجوكية و المتسابقين ... أن طرف الميدان ... خاصة اليسار ... هو آمن وأنسب مكان للفوز بالسباق ... وكثيرا ما كان الجوكى الشهير... عثمان قسم السيد ... يربح السباقات فى ميدان الفروسية بالخرطوم بهذه المسارقة التى تحتاج للذكاء و البراعة !

ثم كلمة ( نوقك ) التى لا يمكن إبعادها بأى حال ... عن معنى الجمع لكلمة ( ناقة )
فالسباق إذن سباق هجن ... فى ظاهره ... ولكنه حقيقة ... سباق حنين وأشواق ... ومعروف بالتأكيد ارتباط هذه الوجدانات عند الإنسان العربى ... بالإبل فى البادية .

قلت إننا لا نستطيع إبعاد الناقة من هذه الصورة ... رغم أن ... نوق ... فى الفصحى قد تعنى جسن المظهر فى الملبس ... والوجاهة ... فمنها اشتقت كلمة ( أناقة ) ... وكل ذلك مربوط بالناقة التى تحظى بقدر سام عند العرب ... فبقدر ما تغتنى من النياق تكون ... وجاهتك بينهم !


أما الصورة الأخرى فتتمركز فى ...

( فجيت العطش نقعت
نادانى التراب .. حلوقك )

وهى لا تقل أناقة عن الصورة السابقة ...
وأرجو أن أعود إليها ... وإليك صديقى الحبيب ... سيد احمد