القتامة .. ما لها هي الخرطوم ضلّمت ..!

[معتصم الطاهر]

خصنا الأستاذ الشاعر أزهري محمد على بهذه القصيدة ..
وهي تنشر لأول مرة ..
بل إن أعضاء سودانيات سيكونون أول من يطلع عليها ..
ولى عودة للتعقيب على هذا العمل ..



[frame="7 60"][align=right]ما لها هى الخرطوم ضلّمت!
إتلفحت توب السواد
طَفت الثعالب ضحكتا .. وطوّلت ليل السُهاد
إنفضّ سامر فرحتا.. اللّمة والناس، والوداد
الساقية، والحزن النبيل ..ومن غير ميعاد
فلق الصباح .. الشجر أقلام جميع والنيل مداد
طال الشتات .. و دابت حشاشات القرى
فى المدن ذات العماد
والليلة لا بان لك صباح لا ملت البوح شهر زاد
وأنا كلّما غابت سعاد
غابات من الشك تشتعل
يشتعل شوقي وأقول "بانت سعاد"
بانت سعاد دلاّني آخر الليل نجم
انزع مخاوفك واتحد
واصعد وسيم للمشنقة
واضحك على وهج الزناد
اصعد كما صعد الفراش جذوة النار
واحترق ..
لملِم رفاتك ..وانتفض تحت الرماد
خلّيهو جرحك للهوام.. الخوف على جرح البلاد
البلاد في حافة النار و انت الوحيد المُشْـتَـبَه
إنت الوحيد فى حضرة الموت إنْتَـبَـه
بصرك حديد .. وطيفك يجِينا شبه شبه
الريح محت ريحة خطاك
ودلّت عليك دابة الأرض.. وغناك
دلّت عليك فى العتمة دعوات الخلاص
والأرض ماعون التعب
ضاقت بما رحبت خلاص
اشتعل غضب الحريق
وخطوك على خط التماس
الهواجس لوّعت صحو الحنين
ونعنعت خدر النعاس
والصحاب من كل ناحية مصوبين
وجسدك على مرمى الرصاص
أترك وراك .. والفخاخ نصبت على هذا الأساس
وروحك من تسامى النشوه
رقصت تحت حبل القصاص
لا جرحك الفاتح بريء
لا مدّ ضل العافية لعصب الحواس
ضاقت خلاص ..
و الدودرك للطعم من فوق الشرك
دغدغ مشاعر الطيبة فى حس الدباس
ضاقت خلاص
و انت بِتدّارى الفرحة من حزن المغارب
انت بتقاوم لانتزاع الوردة
من وسط العقارب
فاتك قطار الأمنيات .. ندبت حظك
وارتديت زى المحارب
ندمان على حلم السنين
الضائعة فى حقل التجارب
وخائف على العمر الفضل
والناس تسالمك بالمخالب
الناس تسالمك .. والصحاب ضحكاتا
زى طعم الطحالب
ضاقت خلاص من كل جانب
أمسينا فى حد الكفاف
و أصبحنا كلنا فى البلد
نحن المواطنين الأجانب
ضاقت خلاص[/align][/frame]

[jezabell]

ازهري محمد علي..
يا سلام عليو وعلي شعره وابداعه..
القصيدة مواكبة الحالة الكربة الفي البلد.. بس ليه ما عارفة عندي احساس يا معتصم انو النص فاقد السلاسة الاتميزت بيها كتابات ازهري.. انا ما ناقدة لكن بتذوق الشعر غايتو وبستعمل اضاني الواااحدة دي في وزنتو (في زول عندو اعتراض؟؟ ).. حاسة بالموسيقى فلتت منو كتير ودي ما عادتو.. بس الصور الجمالية والتشبيهات البلاغية الموغلة في الابداع حد الادهاش دي الحاجة الوحيدة الما قاعدة تفلت من هذا الرجل الجميل..

تحياتي

[الفاتح]

الساقية، والحزن النبيل ..ومن غير ميعاد
فلق الصباح .. الشجر أقلام جميع والنيل مداد

أترك وراك .. والفخاخ نصبت على هذا الأساس
وروحك من تسامى النشوه
رقصت تحت حبل القصاص

هل هنالك خطأ طباعي في كتابة النص أم أنني لم أقرأه جيداً أم أن أبو الزهور غير إسلوب كتابته؟

[معتصم الطاهر]

المشاركة الأصلية كتبت بواسطة Rasha Hatim

ازهري محمد علي..
يا سلام عليو وعلي شعره وابداعه..
القصيدة مواكبة الحالة الكربة الفي البلد.. بس ليه ما عارفة عندي احساس يا معتصم انو النص فاقد السلاسة الاتميزت بيها كتابات ازهري.. انا ما ناقدة لكن بتذوق الشعر غايتو وبستعمل اضاني الواااحدة دي في وزنتو (في زول عندو اعتراض؟؟ ).. حاسة بالموسيقى فلتت منو كتير ودي ما عادتو.. بس الصور الجمالية والتشبيهات البلاغية الموغلة في الابداع حد الادهاش دي الحاجة الوحيدة الما قاعدة تفلت من هذا الرجل الجميل..

تحياتي

رشا
سلامات
القصيدة هي ما يحدث و شعور كل زول لافى فى البلد المافى
ما يغيب عنك هي طريقة الكتابة مع طريقة إلقاء ازهرى ..
القصيدة موزونة نعم ..
أما عن السلاسة فالقصيدة تدعى القتامة ..و لذا تختفى مفردات العذوبة

[معتصم الطاهر]

المشاركة الأصلية كتبت بواسطة شليل07

هل هنالك خطأ طباعي في كتابة النص أم أنني لم أقرأه جيداً أم أن أبو الزهور غير إسلوب كتابته؟

جميع زائدة فعلا ..
وأظنه حاول ايراد المقطع جميعه و هذا يخل بالوزن ..
ليته يحذف مفردة جميع ..

اترك وراك ...

مفردة ليست عالية .. كما اعتاد ازهرى شحن مفرداته واستخدام المحسنات البديعية ..

[بابكر مخير]

غايتو أنا شعرت جلدي كلبت
قريتا بتلذذ أول حاجة
وتبحر، تاني مرة
وبعد داك مرات
وبما اني زول سطحي في حكاية الشعر،
ما شوفتا فيها، إلا الجمال في عكس حال،،، ممكون
بصورة سهلة القراية والهضم...
شايفكم بتتكلموا عن
"الشجر أقلام جميع والنيل مداد "
لكني فهمتها بمعنى:، (الود يعني أبو الأفهام)
الشجر من المفرد الشجرة، يبقى توضيح أنها كل الشجر ال في الأرض وكلو أقلام،،،
مش برضو بنقول الشجر، جميع أو جميعو.........
أما النيل ما هو واحد وكلو بقى مداد وما بيتقال جميع المداد لأنو ذي الماء والهواء
،،، أُخدوني قدر فهمي ،،،

[الفاتح]

اترك وراك ...

مفردة ليست عالية .. كما اعتاد ازهرى شحن مفرداته واستخدام المحسنات البديعية ..
__________________

أترك وراك.. والفخاخ نصبت على هذا الأساس
أترك وراي شنو
والواو دي معطوفه على شنو
على هذا الأساس؟؟؟

[somiaadam]

التحيه والشكرلأخونا معتصم الطاهر وهو يخصنا بقرأة قصيده
من أحد شعراء بلادي المتفردين بنظم الكلمه والتعبير
وبعدين يارشا وشليل هي القصيده قتامه وتحكي عن ظلام وين دايرين ليكم محسنات بديعيه والذي منه
انا لمن قريت القتامه ..مالها الخرطوم ضلمت قلت ماعادي أمكن الكهرباء قاطعه دي دايره ليها سؤال؟
معليش ياأستاذ معتصم اصلي................
لكن هو لقيت أجابه ذي الورد.
ودمت لقطف الثمار

[diya_altahir]

يا سلام على الشعر الجميل
كان فى فرقة ندخل منها موسيقيا
قول لينا
ورمضان كريم
ضياء

[مواطن]

الكاتب:شليل
أترك وراك.. والفخاخ نصبت على هذا الأساس
أترك وراي شنو
والواو دي معطوفه على شنو
على هذا الأساس؟؟؟

الأخ العزيز شليـل،
سلامات يا رايق.
أسـمح لي أقول إني قريت النص كالتالي ( أتـرك وراك ) أتر دارجية من الأثـر الفصحى وليس (أترك بمعنى دع) كما يوحي النص، وبالتالي أصبح باقي الشطرة "والفخاخ معطوفة على الأثر"، وكده وضحـت ليّ.
مع عميق محبتي

[فيصل سعد]

إنفضّ سامر فرحتا.. اللّمة والناس، والوداد
الساقية، والحزن النبيل ..ومن غير ميعاد
فلق الصباح .. الشجر أقلام جميع والنيل مداد

السلام و التحايا لمعتصم و ضيوفه الكرام :

اعتقد ان الشاعر يسترسل في استرجاع ذكرى تلك الاغنيات الخالدة الساقية، الحزن النبيل ،من غير ميعاد، فلق الصباح ، " و الشجر أقلام جميع والنيل مداد لو كتب اشواقي ليك ما عددها" هو المقطع الاخير في رائعة الراحل عمر البنا اغنية " يا سمير بنظرتك اوفي الميعاد العيون الشافتك ما اسعدها" و مالها فاتت و راحت عليك يا ود مخير و خلتك تنجر و تساسق و انت ابن البقعة الصافي ما مصقول ..
مجدد تحياتي ..

[flash=http://www.youtube.com/v/6V_aZvTx6m4&autoplay=1]WIDTH=400 HEIGHT=350[/flash]

[بابكر مخير]

المشاركة الأصلية كتبت بواسطة فيصل سعد

السلام و التحايا لمعتصم و ضيوفه الكرام :
اعتقد ان الشاعر يسترسل في استرجاع ذكرى تلك الاغنيات الخالدة الساقية، الحزن النبيل ،من غير ميعاد، فلق الصباح ، " و الشجر أقلام جميع والنيل مداد لو كتب اشواقي ليك ما عددها" هو المقطع الاخير في رائعة الراحل عمر البنا اغنية " يا سمير بنظرتك اوفي الميعاد العيون الشافتك ما اسعدها" و مالها فاتت و راحت عليك يا ود مخير و خلتك تنجر و تساسق و انت ابن البقعة الصافي ما مصقول ..
مجدد تحياتي ..

الحبيب فوفو
تعرف لمن تقرا لشاعر غنائي، ذي البتسمع للحن من ملحن غنائي
بتكون ذي الحلقة،،، كلمة منك، كلمة مني، كلمة من داك ومن دا،،،،،، تلقى الغنية مجموعة كلمات مستعملة من مجموع كلمات أغاني سابقة،،، واللحن برضو، بتذكر قبل كم إسبوع قلتا نفس الكلام للحبيب دكتور علي في خصوص أغنية ليهو وغناها كمال ترباس،، واللحن مشابه للحن أغنية تانية ولي ترباس برضو (جنا البابي)، تقلها شوية وسلكت مع كلماتو،،،،
أبو صلاح، عمر البنا وغيرهم من أفذاذ الحقيبة هم أصحاب المدرسة دي،،، شوف يعني؛ قافية خلي العيش حرام،، مرة تلقاها باللآم (كحيل، هميل ،،، وكدا) ذي ما بغنيها كمال ترباس بجمال وإتقان، بس ما حافظها كلها،،،، آها تاني تلقاها باللام (أنتا خصيمي وأنتا الحكم) ذي عند عاصم البنا بي حلاوة وإبداع وبفتكر أنو حافظها كدا.............
غايتو دا قدر قدرتي
وليك المحبة،،
ولعمدتنا شكر، فتح لينا موضوع ثر وجميل
البقعة، مدارس وكورة، إذاعة وتلفزيون،، حضارة وجمال،، سياسة وعلم،،، أصل وحسب ونسب
كيتن في عمر البشير
(يكفينا فخر ما فينا زول من أمدرمان)

[معتصم الطاهر]

المشاركة الأصلية كتبت بواسطة فيصل سعد

السلام و التحايا لمعتصم و ضيوفه الكرام :

اعتقد ان الشاعر يسترسل في استرجاع ذكرى تلك الاغنيات الخالدة الساقية، الحزن النبيل ،من غير ميعاد، فلق الصباح ، " و الشجر أقلام جميع والنيل مداد لو كتب اشواقي ليك ما عددها" هو المقطع الاخير في رائعة الراحل عمر البنا اغنية " يا سمير بنظرتك اوفي الميعاد العيون الشافتك ما اسعدها" و مالها فاتت و راحت عليك يا ود مخير و خلتك تنجر و تساسق و انت ابن البقعة الصافي ما مصقول ..
مجدد تحياتي ..

سلام يا فيصل
ويا بابكر

نعم .. ازهري يتذكر و يتحسر على الغناء الجميل( شعر ولحن وأداء) فى كل مراحله السابقة .. مرحلة الحقيبة - مرحلة وردى - مرحلة مصطفى سيد أحمد .. ثم القتامة ( راجل المرة) والذى منو ..
لكن يجوز له لدواعي التفعيلة اسقاط مفردة جميع .. وهي فى أصل الأغنية ..

[معتصم الطاهر]

المشاركة الأصلية كتبت بواسطة شليل07

أترك وراك.. والفخاخ نصبت على هذا الأساس
أترك وراي شنو
والواو دي معطوفه على شنو
على هذا الأساس؟؟؟

معليش الفاتح ..عدم التشكيل ضيّع فهمك للقصيدة ..
أتَرَك وراك ..
وهي أن تدى الأمر ظهرك .. هذا ما قصد ازهرى ..
وعندما تترك الأمر وراءك .. وتنشغل بغير الوطن .. تكون وقعت فى الفخ ..
يعنى الحكومة دى خلّت اى زول مشغول بنفسه عن الوطن ..

[خضر حسين خليل]

البلاد في حافة النار و انت الوحيد المُشْـتَـبَه
إنت الوحيد فى حضرة الموت إنْتَـبَـه
بصرك حديد .. وطيفك يجِينا شبه شبه
الريح محت ريحة خطاك


شكراً أزهري

شكراً لهذا النص