أنا بعتـذِر ،،

[معتصم الطاهر]

أنا بعتـذِر ،،

أنا بعتـذِر ،،
عن كلِ حرْف ما حسّ بيكِ واعتدل
باهى الكلام .. ما طال ملامحِك
أو عَدلْ
عن طلّتو ..
على وجه مخلوق من غزلْ
أو أغنيات حاولت
تحشدنحو و بيان
وتعرِب جمالِك فى جُملْ
أنا أعتذر ،،
عن أى عاشِق قرّب حبيبتو من الزعل
ليه ما سأل ..
عن رغبة فى القول و الكلام
رغم التردد والخجل ..
عن حاجتا تسمع " بريدِك " !
ليه ما أجاب بالحيرة أو بالانبهار ..
وعاد سأل
أنا أعتـذر ،،
عن السنابل تمتلى بذرة حنان
لو ما انحنت ..
عِـزّة هواك بتمنعا ،،
و الرياح لو نسّـمت
هوج العواصف عاندت
فرطت لِجَاما ..
يوم شافتِـك متمنِّـعة
كل المناخات فى انتظار
والطقس فى بَنبَر
هناك بيحتسى
فنجان عِشِق ، بى جنزبيلة منعنعة

أنا أعتذر
عن كل دا ..
وعن الحَصَل ..
والمحتمل من الخَطا
عن مشاعرى الهادية ليك
والأحاسيس المفرطة
والمنتظر من إشتهاء
المشاوير الّلسه فى خاطر الخُطى
ليك ما مشت
رغم عزم الحيل جواك
رغم شوق الوطا
الأدهشت أطول طريق
يوم قصّرت مشوارك ..
تصل

أنا أعتـذر
سجنت روحى مع الحزن
مافرحت بيك
قدر اللي فيك ..من ريد
وقدر فيني من حظوة شجن
لا اتحررت من ألمى وبكيت
لا اتعذرت من جور زمن
أنا أعتذر
عن كل حوش
صنّ بابو من الضيوف
أو انتحل صفة الكريم
واعتذر
عن الجهل بيك ..
قِـصر المدارك والمعرفة .. ما طالتك
وَرِّينى كيف
اتهجى بيك فصل ا لـ خـ ر يـ ف
واتهادى بيك
وردة فى يد الحبيبة ،
حالة تَسَاب،
لحظة تشابى الموجة فوق الرمال
فى العصير .. والدنيا صيف،
غيمة رشاش،
هبة دعاش ،
لافحة ريحة
من قصب الصريف،
دمعة من عين اتغوررت
من الضحك
ونوّرت
زى الهلال حد الطريف
وبعتذر ..

الدوحة 2002

[أبوجهينة]

أنا أعتذر ،،
عن أى عاشِق قرّب حبيبتو من الزعل
ليه ما سأل ..
عن رغبة فى القول و الكلام
رغم التردد والخجل ..
عن حاجتا تسمع " بريدِك " !


***

الزول السمح
دة كلام مليان جمال و نقاء و صدق و واقعية
تحياتي معتصم

[معتصم الطاهر]

اقتباس:
المشاركة الأصلية كتبت بواسطة أبوجهينة

***

الزول السمح
دة كلام مليان جمال و نقاء و صدق و واقعية
تحياتي معتصم

أبو جهينة و كل السمحين ..
كيفنك ..

ياخ نحن خشومنا مطبولات رغم إننا أكتر حنية منهن ..

فهل فى الامكان فهم ذلك أو تغيير وسائل التعبير ..

[بابكر مخير]

لابد من أنه في شئ
خلاك تجيبهو من أخره
مع أنه أوله ونصه وكله
جميل..
شنهو هو الفي..
باش وهاش ديما يا الحبيب

[معتصم الطاهر]

اقتباس:
المشاركة الأصلية كتبت بواسطة بابكر مخير

لابد من أنه في شئ
خلاك تجيبهو من أخره
مع أنه أوله ونصه وكله
جميل..
شنهو هو الفي..
باش وهاش ديما يا الحبيب

ذاك الشيء لمسه حافظ حسين .. حين قال
"هذه القصيدة كتبت من العصب بالعصب .."

معصوب العينين .. مفتوح القلب ..

[بله محمد الفاضل]

المشاركة الأصلية كتبت بواسطة معتصم الطاهر

اقتباس:
المشاركة الأصلية كتبت بواسطة أبوجهينة



أبو جهينة و كل السمحين ..
كيفنك ..

ياخ نحن خشومنا مطبولات رغم إننا أكتر حنية منهن ..

فهل فى الامكان فهم ذلك أو تغيير وسائل التعبير ..

أصدقاء الهوى والهوية
ظني أنهن يرمن قولاً
لكنما أبلغ الحب أفعالا
فوردة فواحة تقل ما لم يقله قيس أو صاحبي أعلاه
لعلي لا زلت أقف عند ناصية أبلغ الحديث لغة لا تقال


لكما كامل احترامي ومن قبل محبتي
وتحاياي عبركما للأسرتين الكريمتين

[مرافي]

الباش الهاش
اعتذارك ما بفيدك
ودموعك ما بتعيدك
العملتو كان بحروفك..
غايتو بعد جميل الاحرف دي لو ماقبلت الاعتذار تكون بالغت..

[شهاب كرار]

أنا أعتـذر
سجنت روحى مع الحزن
مافرحت بيك
قدر اللي فيك ..من ريد
وقدر فيني من حظوة شجن
لا اتحررت من ألمى وبكيت
لا اتعذرت من جور زمن
أنا أعتذر
عن كل حوش
صنّ بابو من الضيوف
أو انتحل صفة الكريم
واعتذر
عن الجهل بيك ..
قِـصر المدارك والمعرفة .. ما طالتك

الشعر ينساب..

[معتصم الطاهر]

اقتباس:
المشاركة الأصلية كتبت بواسطة مرافي

غايتو بعد جميل الاحرف دي لو ماقبلت الاعتذار تكون بالغت..

أى فى الأعذار هذه تغفرين ذنبى ؟

[معتصم الطاهر]

اقتباس:
المشاركة الأصلية كتبت بواسطة بله محمد الفاضل

أصدقاء الهوى والهوية
ظني أنهن يرمن قولاً
لكنما أبلغ الحب أفعالا
فوردة فواحة تقل ما لم يقله قيس أو صاحبي أعلاه

لكما كامل احترامي ومن قبل محبتي
وتحاياي عبركما للأسرتين الكريمتين

بلة يا فاضل .. نعم .. هي لا تقال ..

فهل على أن اصمت ..؟

" القصيدة ولا صمة الخشم .."