يا أخي الكُبر دآ حاجة ثقيلة بشكل

[بابكر مخير]

أتذكر يوم علي أخوي ضرب ليا تلفون الصباح وقال ليا: خد الأرقام وهي دي أكيييييد كسبانة اللوتري.
ضحكت وقلت ليهو: ما تلعبها إتا. وكان رده: أنا لو كسبت ما ظنيتكم تتحظو بنسب منها لكن إتا بتوزعها وبيكون للكثيرين منها نصيب.
دآ حصل وأني عميد آل مخير وترجمته أنه علي ثقته فيني كبيرآ أني حأتصرف بموجب الوضعية (رأس العايلة).
ما هو رب البيت، عميد الأسرة، قايد الجماعة والرأس الرئيس.
عليهم واجبات علي الهم حقينهم وهو حقهم.
طيب إحنا الشعب الكمين وتلاتين ولا كمين أربعين مليون، رئيسنا دآ والهو متأكد حسب هترشته وأنه إلا الإنتخابات تشيلهو ذي ما (إحنا جبناهو) ما ينصفنا. قول حتى فتات من الكيكة والك... التحميهو المشي.
ملاحظة: مشيي عمر البشير (ذي زولن مك..) وحال الواقع متشابهان بي شكل غريب وأمرهم باين وبذكرني بالمثل البيقول:
..... بيبين عند المخاضة..
كدي لاحظوها
ومش أكيييييييييييييييد حتبين....

[بابكر مخير]

[youtube]https://www.youtube.com/watch?v=tl1DxVi3GxI[/youtube]

[بابكر مخير]

حين بلغ السيل الزبى وإتحرقتا خلااااااااااص. لابدن تتقال

قالوا الأمير شيخ الدين ود سيدي خليفة المهدي في يوم كرري كان أول المتقديمين بحصانه لملاقاة الغزاة. سيدي الأمير يعقوب لمن شافهو، غمز فرسته وقال: الوليد بدور يسبقنا علي الشهادة وكانوا بيتسابقوا مع إبن أخيه للفوز بمرتبة أول شهيد...
دآ حسي شنهو؟؟
ناس أنا والشيوخ الهم قدري وأكبر.
نقعدو نعاييينو. بس نشوفو جنس أبن إتناشر وأبو عشرين وتلاتين يسبقونا علي الشهادة.
أها كدي خليك مننا إحنا ناس قريحتي رآحت القيادات صانآ مالها.
إن لي الكُبر والكِبر والجاه وإستحقاق حق هم فايتيننا ملايين.
صورة غير فتوغرافية لواقع حالنا ولكن في إطارها "فريمها" سؤال..
في البلاد الديمقراطية لمن تكون في مظاهرة وهي أصلن بتكون سلمية، تلقى القيادات متشابكة الأيادي تسير في الصف الأمامي وما بتتعرض لآذى.
لكن برضك في خلفية الصورة نشوف قادتهم الزمان في زمن الحروب بالسيوف والحرآب والموت الحاااااااااار برضك بيتقدموا الجيوش بلا رهبة أو خوف (وذي ما ذكرنا في قصة سيدي الأمير يعقوب الذي كان النائب الأول ويقال بأنه كان الماسك الفعلي بزمام الحكم يعني الزعيم)..
الإحتجاجات وهي تسمية تحمل معها مدلول بأنها "سلمية" ما حسب المفهوم في دولنا مظاهرة معناها أقلهو بمبان وخبت بالعصي من الأجهزة الأمنية وممكن حتى الوصول لي الرصاص في آخر الأمر..
سؤال مشروع؟؟
ما دام دعينا للحل السلمي وبالتراضي وأهو بقت "سلمية"..
ويييييييييييييين الناس الذي ما قلنا:
أكبر وفي الجاه أعظم وبالإستحقاق أسبق وفايتيننا ملايين في العمر

[imported_عبدالله الشقليني]

حبيبنا دكتور بابكر ، ذهبت للسودان 13 يوم ، وعملنا عقد في جامع النيلين ، وقابلت صديقنا أحمد كوريا ، قال قبضوه ونبزوه جنس نبز ...
لكن سلامة ، ما بقدروا الراجل خواجة

[imported_عبدالله الشقليني]

العقد لبنتنا إيناس
خلاس كبرنا واتجدّعنا في الكُبُر

[بابكر مخير]

المشاركة الأصلية كتبت بواسطة عبدالله الشقليني

العقد لبنتنا إيناس
خلاس كبرنا واتجدّعنا في الكُبُر

سلامات أخي الصغير..
يومتها كان عقد أشقائي علي وعزيزة ولم تمض فترة على ذلك وإلا تغير الوضع في السودان وكانت رجب أبريل..
يا ربي عقد بنيتي إيناس يكون ذي حق عمها وخالتها؟؟
الف مبروك يا سيدي الحبيب وإن شاء الله تملاك أحفاد تتمتع بيهم كما هو حالي

[بابكر مخير]

بتذكر أيام مايو، لمن نميري يكون بيلقي خطاب متلفز، الوالدة كانت أول الجالسين قدام التلفزيون ولو عندها شنهو وشنهو دآك تأجله ليين ينتهي الخطاب.
ما كانت عليها الرحمة بتهتم بالجزء المقرئ لأنه دآ عادتن ما بيكون حقهو والبركة كان في ناس "منصور خالد وأحمد عبد الحليم وعمر الحاج موسى وكدآ" لكن يرفع رأسه من الورقة القدامه تأمر جميع من حولها بالسكوت التام وتقول: كدي بس شوفهو ماش يقول شنهو.. كانت تلك الكلمات المضحكة المحزنة ناس بتاعت في معناها أنه مرتهو يحق ليها تلبس أفخر الملابس لأنها ما مرت نجار وأمثال كتيرة علي شاكلة كلام بتاع مسرحية مدرسة المشاغبين "يونس شلبي"..
الشاهد أنه رئيسنا الحسي برضك بيخرج عن النص..
أول أيام كان عدواني لأقصى الدرجات وهناك مجموعة ضاغطة فرضت عليه حسن التأدب في مخاطبة شعبه. قال فئران وحسي بيقول الشباب (موضوع عبد الواحد الناس تمشيهو ليهو ما ما بقدر يجر واطي لي الدرجة الفرضت عليهو وأعطي سماح للتنفس)
يا أخوانا البشير دآ متصور أنهو هو لي شخصه عنده أصدقاء وناسي أنه لو ما كان "سوداني" ما في زولن بيعبرهو.
أصدقاهو ديل والهم في الأصل أصدقاء السودان القال ليهو: خفض اللهجة وخفف من البتعمل فيهو من أمور ودت القبلك في داهية. ودي هي ديمة طريقة أصدقائنا إحنا الشعوب المتهضة بي خلقهم الراقي وفهمهم الواعي وبسياسة بينصحوا الطغاة بالهداوة وممكن حتى يوفروا ليهم مركب نجاة ودآ كله عشان خاطر تلك الشعوب ورفع البلاء عنها لأنهم أصدقائها وما أصدقاء أفراد وهاكذا يدير الحكماء بلادهم وهم يخاطبون شعبهم بأحسن القول:
أيها الإخوة
أبناء بلدي الأعزاء
أهلي
ويا أريتنا منهم نتعلم

________________
لما الزول يفصل ويطربق
[youtube]https://www.youtube.com/watch?v=OuNu5HCMywI[/youtube]

[بابكر مخير]

في حاجة إسمها الملطشة ودي بيعرفها المثل السوداني البيقول:
فلان بقآ زرزور في يد جوهال "الأطفال الصغار".
مع الكُبر بنتابك شعور المملطش، يعني لا بتقدر تمشي مع الناس وتساويهم سرعة. ما تقدر تلاوي ولا تقاوي يعني تلقى أنك تميل وين النسمة هابآ...
حسي شايف أنه دي الباقي علي حكومة ناس هاشم عثمان وعمر.
بقوا ملطشة. عينك عينك الناس تسبهم وتلعنهم في الشارع وفي التلفزيونات والإذاعات. في السودان وين مكان في أرضنا الطيبة الكريمة العظيمة وفي أوربا وأمريكا..
لكن صحي كيف فاتت عليا ما هم برضهم حقيقتن عجزو أكان عمر فعلي أكان إفتراضي...
تسنين أكبر مني وفي الكرسي 30 سنة...
دحن حسي حفيداتي وأحفادي ما شاء وربنا يحفظهم ويغطيهم وبنياتي ووليداتي الهم ياهم دخري الحوبة ما بقوهم ذي الزرزور دآك..
وربنا ينصر شعب السودان

[بابكر مخير]

في صُغرنا كااااااااان عندنا قولة وهي ذي الغلوطية:
يقدر طبقكم يطبق طبقنا ذي ما طبقنا طبق طبقكم
وهي تعني بأن طبقنا الأكبر والأوسع لدرجة أن طبقكم قدر ما كيبر فهو صغير برضك بينطبق جووووآ طبقنا..
نلقى الغلوطية دي هي نفس الحالة الحسي حاصلة في السودان فالحرآك أكبر معونا من قدرات الحيكومة.
وأن إدعاءات ومكابرة رئيس أو مدير الأمن بتاعت أنه المظاهرات بس قوامها 800 نفر ما صآح وممكن يتعمل ليها "بيان بالعمل".
وهنا حيبين ال عند المخاضة ونعرف ياتهو طبق أكبر الطباقة..
لمعرفة آي الطباقة أكبر، بقترح أنه يتم السماح للمحتجين أن يمشوا "البتاعة الخضرآ" ديك وبس ناس الخرطوم والخرطوم بس المدينة ما العاصمة القومية كلها وشريطة أنهم يمشوا بي كرعينهم ما بي بصات ودفارات وسبل نقل وسندوتشات وموية مدفوعة الأجر من الخزنة المنهوبة..
سي صلاح لو راقت ليك الفكرة تواصل مع شباب الحراك ونسق معاهم ومن ناحيتي؛ إن بقآ طبقكم أكبر من طبقنا..
بسكت تِم والعصيدة فيها السِم

[بابكر مخير]

قلنا أنه الشايع ولاحظ شايع مش شائع وبين الإتنين والإتنين غير تأكيد لقول.
شايع ممكن جاية من إشاعة والهي خبر ممكن يكون مؤكد وممكن غير ذلك
وشائع بمعني منتشر ولمن تجي للقول برضك ممكن يكون وممكن لا...
والقول الشايع أو المنتشر هو؛ مع الكُبر يزداد النضوج (مشكلة النضوج أنه بيقود لي درجة الصوفان ذي الفاكهة لمن تنضج ولا البيضة لمن تبذر)..
الشيخ فرح ود تكتوك، كبير وناضج وقوله حكم وأمثلة تضرب في الأوقات المماثلة ودي قصة للناس تتعظ بيها.
قالوا واحد جآي هارب وملاحقينهو جماعة. وأثناء هروبه مرآ بالشيخ فرح وطلب منهو أن "يدسهو" في مكان يخفيه من الملاحقينهو.. وكمن وافق، أشر الشيخ لكومة قش كبيرة وقال ليهو أدخل فيها. جاء الملاحقين للهارب وسألوا الشيخ إن شاف زولهم. رد الشيخ قال ليهم بالحليل وأهو دآك جوو كومة القش دي. ضحكوا وقالوا الزول دآ مخرف وأرحكاكم نواصل تفتيشنا. لمن خرج العارب من كومة القش زعل من الشيخ وقال ليهو كيف توريهم محلي وإتا قلتا (بدسني)...
قالهو الشيخ:
يا وليدي؛ إن الصدق ما نجاك. الكضب ما بنجيك...
دحن يا ناس حسي ويا القدامنا بي دفع (ما تسنين سآكت بي تلاتة سنين)
ويا البتجو في التلفزيونات وتكضبوا..
قالوا: الكِذب حبله قصير....
وقولة الحق طوف نجاة "دي ما من زول. دي قولتي برآآآآآآآآآآآآي"

[بابكر مخير]

نقطة اللاعودة
دي قلنا مع الكُبر حقيقة ولا تحتاج لعلاج أو تعديل..
زمان بعد سنون اللبن بتقوم ليك سنون تانية، حسي إلا طقم وتقنية الزرع مصايبها أكتر، غير تقدقد حنكك ما في أيتها فايدة بالله عليك ينصلن من محلتهن ذي ما لمن تدوس ليك فص ترمس وتنزلق اللحمة من الغطاء وطبعن ما الكبر لو قلتا تأكل لحمة الترمساية جزئيتها يبهدلنك بهدلة مع خروم السنون ويبقن ذي الحشوة الختاها نطاسي حذك..
ما علينا والقصد من إسترجاع نقط اللاعودة حسي جأي من ما هو حال الحاصل في السودان...
حكومة بقت ولا حكومة ولا شئ
ضباط جيش عيانك بيانك يقدموا إستقالة مسببة ودي حسب الأنظمة العسكرية وظنيتهو حتى وسط الكشافة يعني هذا قمة الخلل..
أساتذة جامعة الخرطوم عديييييييييييييل كدآ بسجلوا فيديو لمؤتمر يعلنوا فيهو بحنكة الأكاديميين مطالبة البشير يمشي وبكل جراءة (ما هو معاهم سيدة وإلا الواحد كان قال رجالة) وقوة يعلنوا إنحيازهم "للمحتجين"
الفنانين والإذاعيين والكتاب ديل كسروها تب..
شيختو يا الدفعة القبالنا وماااااااااااااااافي بعد دآ عودة..
بقت عليكم نقطة اللاعودة وأخير سيبوها حكومة وسيبوهو حكم وإتوكلوا إتخارجو..

[بابكر مخير]

قلناها لمن بقت ممجوجة حكاية النسيان في الكِبر..
بالله عليك تقول تقرب تنسى إسمك لمن زول يناديك لو ما الفطرة البتميز بيها الإنسان وهي الفراسة في أنك تلحظ أنه الزول النادى الإسم بعاين ليك جووا عيونك..
تنسى الإحداث وتنسى الأقوال القلتها..
دحن حسي زولي دآ البيكبرني بي سنتين (مع ملاحظة أنه تسنين) ما هو مصاب بي متلازمة الكِبر (النسيان) بس الحكمة أنه نسيانه أسرع ودي طبعن حاجة بديهية ما أنا بنسى الحاجة أو الكلام الحدث قبل سنتين وبما أنه هو أكبر بي سنتين (مع ملاحظة أنه تسنين) فيبقى أنه بينسى الحاجة الحصلت أمس أو الكلام القالهو أمس...
في الساحة الخضراء قال: فيران وأمس قال: الشباب ليهم حق في إحتجاجهم لأنهم مظلومين...
أنا غايتهو لاقي ليهو العذر ما مسكين ضربه الكِبر في موجع (الذاكرة)...
قالوا:
لو الكلام من فضة فلسوكات من ذهب..
يا أخي !!!
ما تسكت بس

[بابكر مخير]

يا أخوانا دآ عدل دآ...
في أوربا وكل العالم المتحضر والتاني الفي عمرنا دآ وهم في إجازة مفتوحة لمن ياخد الأمانة باريها. همهم تعويض الفات من فرجة وفسحة في الدنيا، همومهم منحصرة في ياتهو بلد لسة ما شافوها وياتو أكلة ما جربوها..
شوراب صوف ودفاية و"فجان" حاجة خاصة وجلسة علي كرسي هزاز وفاتح ليهو كتاب غلييييد بيقرآ فيهو...
لكن ناس إحنا وفي باقي العمر المفروض يكون راحة وإستراحة..
مشلهتين بين محطات التلفاز وحيطان الفيسبوك ومساحات التواصل نشوف ونتابع أخبار البلد وناس ياسين وعمر وبابكر حنين وهاشم عثمان..
نراعي لي وليدات جنونا ينضربوا وبنياتنا بناتنا ينهانن وشذاذ أفاق يهينو السادة واللساتك نارها وقادة في الشارع ومنظر التاتشرات تحرق القلب والفشفاش...
شوف البروف ود خالي بلالي حسن فرح والفرح فارقهو زعلن علي إعتقال دفعتنا إلا سنين مستر أحمد عبد الله الشيخ وشوف علي عبد الرحيم مسكين يتابع في الأخبار ودمهو يغلي...
بالله عليكم دآ عدل دآ.
بدل راحة جسد نتملي تعب قلب وبدل فسحة ونزهة تبقى قعدة قدام التلفزيون نتلقط خبيرات البلد.
بس برضك بنفرح لمن نشوف الحفيدة والحفيد بملء حناجرهم يصرخو؛
تسقط بس
تسقط تسقط
تسقط بس

[imported_عبدالله الشقليني]

لازم نرفع الملف ... والكبر دخل ومرق بيغادي

[بابكر مخير]

المشاركة الأصلية كتبت بواسطة عبدالله الشقليني

لازم نرفع الملف ... والكبر دخل ومرق بيغادي

ترانا كبرنا والحمد لله
وكبرنا يابا ما شين
لا ختينا ولا إتعدينا
كعب الكِبروا وكبرت مصايبهم
أكبر بتلات سنين وهن تسنين
كتل، سرق وكضب...
وياهو دآ الكُبر الكعب وبالعربي الفصيح ؟؟
دا ياهو سوء الخاتمة