سلامات يا شباب / شابات
بداية نرحب بكل الأقلام الجديده إللي إنضمت لينا وإللي نتنمنى ليها كل الأمنيات الطيبة بطيب الإقامة ، ونشكر كل زول شارك في إنجاح المسابقة سواء كان ساهم برأيو ، أو بنصو القصصي.
أما بعد :
البوست ده لتلقي كل الأراء النقدية ( السالبه ) إللي صاحبت مشروع المسابقة.. أي نعم في عضوية جديده سجلت في سودانيات ولينا عظيم الشرف بإنو نتعرف عليهم ، وأي نعم خامة المواد المكتوبة كانت طازجة ، خلافاً عن المسابقة بتاعة 2009.. لكن نحن بيهمنا الرأي النقدي السالب ، عشان نثبت إرث هنا في نوافذ.. إنو نعير العضوية كل الإهتمام في آراؤها ، ونحاول نعالج العثرات إللي صاحبت مسيرتنا ، عشان لاحقا مشيتنا تتصلح.
باخد على التجربة دي الآتي :
1/ البطء في المساهمة في تنزيل النصوص : هل السبب كان في إنو المسألة دي ما إتعممت إعلامياً بالشكل الكافي ؟ ما إعتقد.. لأنو كان في بوست مثبت عباره عن تنويه لإنطلاق المسابقة ، خلافاً للبوست النزلتو في صدر منتدى الحوار ووضحت فيهو خطة العمل بتاعتي بالمسا والمتعلقة بالمسابقة ..
هل فكرة إنو الواحد ينزل بوست جديد ما راقت ليكم ؟ إذا ما راقت ليكم بتقبيكم رايكم.. لكن أنا دايما مع الجديد.. ضد إنتاج القديم.. ومن هسي شيلو شيلتكم
.. أي مسابقة جديدة فكرتها الرئيسية إنتاج نص جديد
2/ صعوبة تحديد سقف زمني : نسبة لإنو كنت متوقف على إنو تتشكل لجنة فنية - ولحدي ما إتشكلت أخدت زمن ما ساهل - + كنت بشفق على الأخوان في اللجنة الفنية إنو تكتر ن عليهم النصوص.. وأنا مقدر وبثمن إنو إقتطعو زمن من وكتهم عشان يفرتقوا النصوص.. فعشان كده كان الإعلان الأول لفترة المساقة ضيق ، بعد داك قمت بتمديدو..
فالربكه في تحديد السقف الزمني قد توصل إحساس ما جادًي للمتسابق ، والقارئ..
عموما ً إعتقد فترة 45 يوم كافية لتحديد لجان فنية ولقفل اي مسابقة لاحقاُ.
3/ تعديل شروط المسابقة أثناء إستلام النصوص : ده خطأ جسيم ..
3/1نموذج : قمت بتعديل الشرط البيتعلق بعدد الكلمات وإستثنيت منو نص كان نزل قبل التعديل..
بعتقد لو كان في رفرنس.. كان قدرت إتلافى الأخطاء دي..
ومشكورا العمده والزول قاموا بإنشاء فلودرز حول المسابقات 2009 ، 2013
3/2 في شرط المسابقة ما إضمنت اللغة .. هل ممكن تتم المشاركة باللغة الإنجليزية ؟
3/3 في شرط المسابقة : ما كان في حوجة لكلمة ( سودانيين ) لأنو هنا في عضوية ما سودانية.
4/ فكرة الترميز إللي أشارت ليها العزيزة مي جديره بالعمل عليها في مسابقات تانية.. وتعني بالترميز.. إنو يتم إرسال كل المشاركات لمشرف منتدى نوافذ ، وإللي مفروض يقوم بترميز النصوص وإرسالها للأخوان في اللجنة الفنية.. لأنو إسم الكاتب قد يكون ليهو وزنو أكتر من النص الكاتبو.. وهنا ما بتشكك في نزاهة الأخوان الفي اللجنة الفنية ولا في ذائقتم الأدبية.. لكن فقط لمزيد من الشفافية.
5/ النقطة الخامسة دي تهمني جدا وياريت لو سمعت منكم فيها :
شابت تجربة إفطار طالب بعض القصور إتمثلت في عدم تمليك العضوية حركة الوارد والمنصرف ، الحاجه الثبطت من همتنا.. عمدت من فكرة إنشاء بوست المسابقة ده بالإضافة لإثراء العمل الثقافي ، إنو نحرك بوست إفطار طالب.. بإنو نخت جوائز ، يمشي نصها لمشروع إفطار طالب..
ولحدي هسي البوست ده في بداياتو.. بالرغم من إنو بوست المسابقة إتقفل..
ممكن أعرف لو سمحتو : ليه البوست بتاع إفطار طالب ، والبوستات الإتناسلت منو كان ملان بالمبادرين وأغاني العميري بتاعة ( لو أعيش زول ليهو قيمة ) ووو.. وهنا إختفت المسألة دي.. علما بإنو أي تحويلة تجيني حأقوم بعمل scan ليها وحأنزلها هنا -بعد مسح الإسم وإخطار المرسل -..
بعدين ما مشروع إفطار طالب وبس ، بل قبليها برضو كان مشروع النفاج.. إللي كان ملان بالخطب الحماسية والأغاني وو.. الفكرة شنو ؟ ظهور إجتماعي على حساب إنك تقوم بأبسط واجباتك - إن وجدت لذلك سبيلا - وللا الفلس حاصل وللا شنو ؟ أنا القصة دي مزعجاني والله ، وسبق إني ذكرت تاني ما حأفتح بوست بتاع عمل خيري ، وإتراجعت عن الفكرة دي ..
هسي رجاء أي زول عايز يشارك ، يقوم بعمل اللازم ، ويبتعد عن الأغاني الثورية.
تحياتي.
