حادي المنى

[اسراء المهدي]

ليه بتدندن بي ريق نسيانك
ياحادي الزمن الغادر...
كيف افراحك ودمعات الليل
اتلاقت في اعماق الخاطر..
وكيف همساتك وطيف ضحكاتك
صبحن اغلال القلب الصابر..

ليه بتاوق من فوق زقاق احلامي
وانا الفاتح ليك الريدة معابر..

ماتتناكس وترجع تاني تزمر
بأنغامي خليك ذي ماكنت مكابر..

لا تتفاني ربيع متساقط في وديان
الشوق الكاسر
ولاتتمدد جذر رجوع وتهد الشطء الفاتر..

دمدم باقي جراحنا واهدئ اعياد الذكرى دفاتر..

بارح صورتك واحرق غابات عينيك
يازول وزف اوجاعي ويلا تسافر..

طفل الليل مهدود الحيل يحبي
ولسه دريب الصبح طويل..

وراجي الشمس تعود والشمس
تمني الليل من بعد الليل..

ياشمس فراغ وياشعاع
متلفح توب الضيف الضاع..

مادلاك تقاب اوجاعي علي ابواب
حزنا فاتح الشوق مصراع..

مادلاك انين افراحي ولا جبل الرمل الشالو
الريح وفي احضانك ماع..

مالو البخل اصبح اسمى صفاتك
ومجوع من ذاتك ذاتك ومولم بالاوجاع
.. اتقاود تاني علي اهديلي شوية ضي اعماني ضباب خذلانك
وصماني انين احزانك
وخليت فجيعتي اتنين يوم غطي ذاكرتي نزيف اكفانك..

انا ايه بسرد فوق القلتو وافرد حروفي سجاد من شانك..

خليك ذي ماانت لارمال البين تأخد رجليك
بعيد لايجيبك سراب حنينيك علي اوطانك