ليه ياوطن
الصبر زاد الغلابة
والوجع مسدار تعابة
والغربة فرحة
للممكون ضهيرو
ودنيا يفرح بي عذابها
الجوع كفر الريد
وعدم الناس الولاية
خلى العشم
لقمة ثريد
وسترة في زمن الرزاية
ورينا يا وطن ايه
اصل الحكاية
نكبر عشان خاطر نفوتك
مادام صدودك باقي راية
كبرت ليه احلامي فيك
واهديتها لي يد المنايا
كبرت في كنفك قنوع
همي في البيت
والسعايا
والنفير ساعة يدق
اشد ضراعي مع المعايا
همي كان
في قطية حداها زير
وفاطنة بت موسى الغفير
نتلم في بيت الحلال
اكسيها بي حبي الحرير
واحميها من حر الهجير
وقتين تتابق من تحت اللتام
مارقة للحطب العصير
ما مهم اصبح يوم وزير
اوحتى بس مسؤل كبير
الا السبب كان العلام
والنور البهر وسط الظلام
وقتين مشيت المدرسة
اعربت زين
وحسبت زين
ونجحت زين
واحترت وقتين
ادونو الحصاد
في فد وريقة مغلفة
واحترت جد
لمن صبحت كتب الاماني
مؤلفة
عشان نقراها
وساعة ضجر نتأسفها
كبرت ليه حلمي الزمان
واخترت ليه المعرفة
كان خلوني في حلمي القبيل
اصون روحيتي واعففها
دام الختام شنطة
والام كتيرة مستفة
اها ياوطن كل ماافرد حلمي عليك
يتلقاني جحودك باب
وكل ما اعذر ضيمك لي
ارجع تاني اصوغو عتاب
ايه البدل حالك
وبدل حال احبابك
الغربة تصبح لينا صراح
والمنفى يصبح لينا رحابك
ليه ياوطن
ليه نتعلم
معنى حضورك
ساعة ندثر صمت غيابك
وليه نتناشد وجعك غنية
ونتقاسم في صمت عذابك
ليه ياوطن
التعديل الأخير تم بواسطة اسراء المهدي ; 17-08-2014 الساعة 05:46 PM.
|
