مصابيح السماء التامني وطشيش
[align=center]
مصابيح السماء التامني وطشيش مرثية مصطفى سيد أحمد محمد الحسن سالم حميد (1) يا جايي مارق من دخول الغيث شرايين التراب السايفة أوردة الوطن قشره اليباب نشره العطش كلما سرت قطرات دِرِبَّ الرحمة في جوفو ارتعش بال الشجر حال العصافير الخياله مع الدغش مشدوه متل خاطر طفل من ضل ضهر راكوبة فوق حافة حجر واقع سجر واقف يعد نقط المطر ويتمطق إحساس السحاب بين لهفة الطين والشمش لمَّت ورا طرف الحقاب آخر رمش باقيله في عِب الشفق والليل ملقِّيله الطرف شفق المغيب قفا غيم بِهِت كان نفضة الريشة الأخيرة حَمَاره .. فوق لُوحةْ الوكت يَا كرْكُدَايْةَ الله إترشق ناقع عصيره من إيد ملاك فوق المغارب بي تحت كانت مراكيب حين صلاة والترعة قِدّامن .. طشِت ولاّ المراكب من بعيد ودعات على النيل والنخيل المتكي دار يقرا البَخِت قنّب يحِت قلّــع زريزير غفوتو عضَّ إنطلاقة غنوتو وقام منحفِت والكمبو ينشاف .. من مسافة قطر بضاعة العربجية الطيبين سبّابة والمتسببين شعراء ومغنين الأنادي أنصاص لصوص حلب البلد عرب الجبال منسللين من لاتحت والريح يشيل للنيل مع هرج المغنين الدعايات نشرة أخبار الولايات الوفيات الملايات العبايات المرايات التصاوير التعابير الحكايات النِكــــِتْ عشم البنيات في الضراع الضاع وكت حرَّ الكفِت زاغ الصراع ذات جمعة قدَّت من وطن توب السبت (2) نقد الحمام خُرج الوكِت طارتلو نقطة لحظة من موية ملح في حلقو مرّرت الهديل كَمَد الجرح جبد السكات لكنو فات وأبى يتلفت ؟ بال الطفل يرقل على ضهر الحَمَار يجمع مصابيح السما التامنة ويطش ينكربش الحلم البعد قرب يوافينا ابتعد لو مدّت ايد كان إنجبد يا الدنيا بي ريحة الدعاش لو تنعرش ...؟ أو تنفرش تحت الفراشات بالبَرَد ؟ فوقُو الوعد صادق يمش لو يلقى راس رسن الزمان ديك لحظة ما كانت تمش شان يندهش أو ينبرش بين نجمة الملكوت ونسمة رضية من رب العرش يا غادي منك فوت كلام الشوق من القلب الخشم بابو البلد لو خشَّ هدهد في رماد ما فيهو يمرق قانقرد والقانقرد بابُو الحمام راجيهو لمليم الطيور ضمَّة جناح صمّة عدد إيدين بنيات الفريق قادرات على صد الحِدَيْ جاسرات على صقر النكد إيدين بنيات الفريق بتهدهد الطفل الرضيع بتعدي شيخ دومة الحفير تشلخ لبق .. تسقي الخدير بتعوس وتفرك للملاح بتورِّق اللوبي وتحش تمسك مراح تحلب ، تخُش تغسل هموم أيامه في طشت الحلم تنفض تشر الشوق هِدِم تنشل من البير أم تلاتين باع تعتِّل تفزع الطيّانة لو ما تجدع التبّانة بتجيّه بيوت تغزل خيوت بتطرز المنديل تخيِّت لي طواقي العيد صبر بتَتَبِبْ السجاج مع الفجاج تقوم إيدين بنيات الفريق بتحش تمر تخرت سبيط بتعتِّق الدكّاي وتخبز للصفاح بتكفّي عيزومة وضيوف بتغني قيدومة وتطوف بتهني بتودي وتجيب بتحني بتدلك حبيب بتولِّد الأمات تربِّي على الصلاح زي ماب تضمِّد للجراح إيدين بنيات الفريق إن داهم الحلاّل خطر قادرات على شيل السلاح يا مناحته وبلاّله يا .. رجع اللي راح يا ود عيون فِرْحَن .. بكن تِرْحَن يغطْسِن في الدموع الدنيا عامرابك تظل وإن كان رحيلك فرتكه أو يا لسان نار الصراع لهليبه بعدك لو هكَع مين شالُّو شيلة بلا اتكَّأ ؟ مع إنو صبرك .. ما نفد برشمت .. أو كبسلت كيف سعة الوجود في ضيق لحد ؟[/align] |
«®°·.¸.•°°·.¸¸.•°°·.¸.•°®»البت نصيرة سنة محل
بت الدهب بنيات ما فاتوا الركب حزنت على الكيل الكرب والدنيا غابة وسط حريق تصبح كرب تتمسى ضيق قامت نصيرة تحت تعب برت الفريق يا اخواتى ستات البيوت ناولونى قوت قبال اموت دور والمعاى ما فكوا ريق دهب الجبال صافى البريق بمد دقيق لو كان مريق الرائعة المسافة الشعر وحده القادر على تحويل اليومى والمعيش الى سحر واعجاز اشكر على الاختيار فى فترة ما وربما الى الان مبهورا بهذه المرثية «®°·.¸.•°°·.¸¸.•°°·.¸.•°®» |
المسافه ياصديقي العزيز
اين انت كل سنه وانت طيب ياغالي ورحم الله استاذنا مصطفي سيد احمد واطال عمر شاعرنا الحبوب (محمد الحسن سالم حميد) وتاليك مني هذه مرسية الاستاذه عفاف الصادق بعد وفاة (ابو السيد رحمة الله عليه) [align=center] يالكحلت عيون الدنيا بلون الغنوه يالضفرت ضفاير احساس الكلمه الحلوه يالشتت نجوم الليل في وش النيل عقدا فوق القمره بيقدح فينا الضو يالطقطقت اصابع السحب الشالن جو دفق عسل المطره و نقط ..كبت شو نضمت..غنت ..سكتت ..صنت مرقت ..دخلت ..قامت ..قعدت شن بتسو ؟ تقشقش فوق رقراق الدمع الكاسي العين بهدمة دم كل ما اتعرى يجدد توبو يضاري الريحه الكست الجو تساسك بين تيار الموج الكسر الجدول ودفق شو تسارق فوق نجماتا برقن هجن لجن ..باتن قو تضاير فوق وديانا شبعن ..رضعن ضرع السحب الشالن برا ..جو تصنت غنوة سيره عريسه مهقد ..مكسي ..مجرتك يفوح الصندل ..وعطر المحلب منو مدفق امو تعدل ..واختو الرقصت ..وخالو يبشر ... وعمو بيعرض وسط السهله ..وخيرو مدفق غنوه بتعزف نغم اتشتت ..رعدا صفق بردا هز اتباطن صوتو اتطانن حر لوح و هوا وظهرا فارسا تب ما اتلوى وزغرد ليك ايقاع المطر اتلبب حضن الارض ونام ود سيد احمد دق المحلب جوه الفكره وخت الذكرى ذكرى الليله وذكرة بكره ابيه و حره مبدأ و عزه سيما وعبره درايا و خبره شموخ بيت عازه الما بتهزه برغم الضيم وليد ضكران هز و رز , تب ما فز اتقطر نز ادفق ضي ود سيد احمد شال الريشه ورسم اللوحه وشتت لونها وتيرب بيهو سما السودان وكانت النبته عصارة الغنوه الفيها ثقافه .. وحب .. وسياسه مزيجها بلدنا وفيها ولدنا اتعطن الريد والبت الحلوه ..الوطن الغالي وسرج بيهو و شد ضهر سودانا القام وكيف بتفوت وكيف بتفوت .. يالولد الغنى وشنا ورنا وخالدا حي ما بتتضارى بشوفك قاعد بين الرمش الفوق عيني يالدفيت اعضاء الكلمه في ليل البرد ..الريح ..الصي يالنديت اغصان الحرف بصيفا حرا و شد الكي وكيف بتفوت يالولد الضوا وشيشو قليب الوتر الغنا وطربا غطى فجاج الحي تمرق بين ورتاب الزرع الفرهد تمرق بين حبات المطر الطقطق نقط يحضن ليلا سود ..هج ..وهود تمرق بين النيل الكتر ادفق و نمرق تمرق بين الوترالصفق غنا و زغرد تمرق بين صفقات الشجر اخضر و ورق قام اتشابى و عانق كتف الليل اتطاول باس القمره و قبل عين الشمس كيف نبكيك يا راجل الليله و بكره و امس كيف نبكيك ونحنا بنسمع صوتك سرا.. وجهرا ..وهمس كيف نبكيك و انت معانا تشيل و تخت ترص و تقص تفج السهله وتحكي الغنوه اللبست صوتك وشالت حسك ..ونفسك ..وروحك وسمحت زي وانت معانا بقيت جوانا و ماك بتفوت حتلت حنينا جوه القلب بصمت عليهو وجود موجود ..برغم الموج وسفر الجسد الما محدود غلبت تفوت كسرت الحاجز الراكز جسرو على المسدود رقعت الهدم الراسي خيوطو على المقدود مسحت ..مسحت البعد الارضي المامحدود نسفت مسافة الزمن الروح و مامعدود سكنت مسامة النغم المن ايقاع النبض بقيت الدم ..و الروح ..و القلب هزمت الموج ..غلبت تفوت تفوت لي وين ؟؟ وانت الزول الباقي وحي انت النور الوج الضي وانت البحر الدفق ري تفوت على وين ؟؟..ونحنا زرعنا لسع ني النيل الابيض لاقى و عانق حضن الازرق باس الابيض خد الزنجي اتقلدوا.. اتقادوا اتوحدوا ..فاتوا مات العنصر و داب الفارق من بيناتن صدر العين اتملى بالعبره اتنهد نفس الكلمه الحلوه ..اتأوه آهة طفت القمره و نفخت قلب الجمره وكبت فينا ضلام يا انسان .. يا فنان يالقاومت الذاكره و النسيان دخلت بوين ؟ سكنت الدم الجاري على الشريان لوليت جوانا عصاية الكلمه ..الشرف ..العزه العايش فينا في كل زمان جرجرت علينا حروف النغم الطربا يهز يفرح كل مكان ختيت الرأي صريح قولا و فعلا و فكرا سجل اكتب يا تاريخ يا استاذ .. يا ممتاز ختيت الدرس مفيد و صحيح درسا ما دايرلو وسايلا للتوضيح ونحنا فهمنا كتبنا درسنا على الكراس انتهت الحصه و ناحن سكلبن الاجراس مرقت صحيح ؟؟؟ مشيت بي وين ؟؟ وكيف خليتنا بدون تصحيح ؟!؟ نصحح وين !!؟ شلنا الهم نصحح وين جينا الكم نصحح وين وكل اقلامنا تقطر دم كمل احمر دفق لونها فحم ونحنا كبرنا وعينا و زدنا فهم عرفنا اهداف الدرس تمام ختينا النقطه ,الهمزه ,الشوله ,الاستفهام خلصنا خلاص جمعنا قلمنا حبرنا كتابنا مع الكراس يالوحدت بسفرك كل الناس يامقياس يا ميراث واساس المعنى الحب ..المبدأ ..و الاحساس نعم الارث الباقي و اعظم ساس وكيف بتفوت و افتش ليك انا جاي بي جاي و أهلك و ناسك مرقوا يكوسو عليك معاي وانادي عليك ارتى عليا فوت بي وشك ارجع جاي وفجأه ...و فجأه بتطلع من جواي متل النور الضوا حداي وموج النيل الرايح جاي وهج العين الفكر الراي ومن الشمس بريق ضواي وصدر الام الليك غطاي حديثها يناغم فيك لولاي وصوتها يهدهد فيك هداي هوها..يا هوها واحد ..اتنين ..تلاته ابرة الخياطه فيها م وفيها ص وفيها ط و ف وفيها جميع المصطفى [/align] وابقي شمس مابتغيب ياغالي حمدي اب جقادو [align=center]http://sudaniyat.net/vb/images/uploa...8cde650290.jpg[/align] |
المسافه
هذه القصيده رائعه وهي بمثابه نظريه متكامله ومدرسه بصوت مصطفى سيد أحمد تحياتي لك http://sudaniyat.net/upload/uploading/37.JPG |
[align=center]الاعزاء عمرََ مهدي و حمدي شكرا للمرور الجميل و ما تغيبوا
(3) باغتنا ريح الفجعة ليل فرنب في جوفنا مرابنات الصبر شات سعن الجلد صادنا الذهول .. زي التكنو قبل دا ما فارقنا زول بعد الرسول واللاّ التقول أول قلوب في الدنيا يغشاها القدر بعدن تضيع منّو الدروب تنطمبج الساحات حريق يدغي الطريق المحتمل كل الفريق سوقر وراك يا جرحنا الكيف يندمل ما بار وراك شهد الغنا ونحل الحناجر ما همل صادر خلايا أبو الدبر صاقر حناياه نمل .. نمل وين ماشي .. يا نبض الرحيق سايب المشاعر ريق دقيق نهب المغنين التِفِل غنواتن الورطانة أو لوطانة في الريد المقق حُترب صفق .. في طين ذبل أوصاف على جسد الحبيبة بهق .. بهق تحت احتماله مرضرضة زي لعبة ما استهوت طفل وين داجي يا قمر الهنا الكرّمنا عند مغرب مرق سايب لياليك لي نجوم واقفات وجوم على فد رجِل وفرع الغُناء الميَّل هنا على مين وراكَ . . حيتِّكل والشيل تِقِلْ ؟ قَدْر اليشيلو الشيلة في لكِن ظروفن هل تفي ؟ تحتاج جماعة من الرجال الليها كنت براك تقل دارت قبيلة من الحبال الكان يقيله فرد حبل ... الخوف قلوبنا التشتهيك .. تنشك في ذاته وتنقفل من بعد ما اتوحدنا فيك ننفك قبائل وتنكتل وينشعنفِن مسّار بعد فتل الحبل حب يا خيالي الوين وصل دُر يا لساني وماك فَسِل أطهر وزيزيناً يعوم في النيل ، مع الصير منشغل ولاّ اليقوم يوم بعدِ يوم يغسل دمومو عديل غسل .. ولاّ الوطن قال ماب ينوم إلاّ الفجر يا ليل يهِل ماسك وضوهو من الغيوم السالو سيل ساعة محِل ؟؟ كيف الدبارة ؟ و ما العمل ؟ لمّا القبيلة تشيل سيوفه السوق تبيعه على عجل .. تغشى الكناتين العويش عُقُب المغارات الحشيش تاخد بخور ، ودخان ولفّافات سطل ؟ ورق المواثيق إنبهل كاويق جريح طلوحبو ريح كيمان مقنبرة للمديح والطار مجلّد من حشا الفي القبّة عصب الفي الضريح ؟ حلقات قمار تحت النخل والخيل مجهزة للرهان آخر النهار فوق السهل لما الجدل يبقى الدجل والأيدولوجيا هي الملاججه واللواجه بلا عمل اللخبطة الخمج البوليس كتا كتل ليش البلاد ما تستباح يوماتي كل ما الليل دخل اشمعنا يا شوفنا الرحل ما انصدقت زرقا غناك ما كان حصل الحصل والبت نصيرة سنة محل بَنَت الدهب بنيانه ما فات الرُكب حزنت على التِقِي والتِبِن وين تِبني لِبني أبى يتلقي .. والكيل كرب ساعة الرجال سكنوا التُرَبْ .. والدنيا موية وسط حريق تصبح كُرَب تتمسى ضيق قامت نصيرة تحِت تعب بِرَت الفريق .. يا اخواتي ستات البيوت ناولني قوت قبّال أموت دور والعيال ما فكُّوا ريق طبق الدهب بي مِدْ دقيق دهب الجبال صافي البريق بي مد دقيق أُن كان مريق يا أخواتي ستّات البيوت أدِّني قوت .. عربون أموت ؟" مطفية نيران التكول رغم الدخان والحلة زي المافي زول رغم البطان ؟؟ يا اخواتي ستات البيوت صافي البريق ... .. بي مد دقيق .. أدني قوت ... عربون أموت ... عين الشمش زي التقول متشوشة أو مرشوشة بي حمرة غضب.. زبد الحَمار زي رغبة المالح بعد خجة غريق .. والليل دخل كبت الفريق قنعت نصيرة من البلد قنعت نصيرة من الدقيق كشحت على كوشة الدهب وجات صادِّي بي نفس الطريق لا رحمة غير الموت قبل لمّت عياله على عجل اتشهدت واستغفروا وقفلت على روحه الجبل . كانت نصبرة بتفتكر جوف الجبال أولابه من عيشـة الوبال أولابه من حرس الرجال ساعة يصيب البال خلل والحال مو يا .. كم من نصيرة بلا نصيرة اتريحت .. وفضَّل براك رغم الفشل والإستياء من مسخرة هادي الحياة بي إيد تدهده للأجل .. وبي إيد تهدهد .. في الجراح بي إيدين تفتِّح للدروب في كبرياء .. .. والسايقي لابد من تصل . ضُلْ النهار .. الليل .. مُو .. يا .. تبرد غبينتك ولوعتك .. طول الأزل ويا روعتك لامن تجادل دمعتك دائماً تكون فوق العيون مرحيبة بالداخل عليك من دنيتك عبّيت مصابيح الصباح ببياض ضميرك ونيتك بعرق جبينك وبنيتك وبالشمشِ ماروق الرجال وجّت جنائن غنيتك ما كان رحيلك غير دليل للجايي ماسك سكتك يا شدو عصفورنا البسيط كل الحلوق إتوكتك إن ماب تبيت فوق السبيط طوِّل مسافة ركتك ما صمتك مطراً غتيت لا ريح لديح .. يوم سكتك عذراً إذا حال الوطن بالجاتو ذات ليل بكتك سايقين بأيادينا الزمان شادِّين خيوطو الفكتك يا بئر تكلة الناس عليه وما قطَّ .. يي شنو دلو إنهتك ؟[/align] |
[align=center](4)
يا صاحنا في الزمن الغلط يا سابلو دمك كالغيوم لا صرَّ وشك لا عبس إيش يعني لو سالن نقط من كل عابر نقطة بس يصبح شرايين الظلط تبقى الشوارع أوردة وجسد البلد عافية عريس لاف العتامير قرمصيص لأجمل عروس النيل رحط والكون صحابك وإنبسط فاتحة صحابك ولاّ موج دا برش فراشك ولاّ شط ؟ سيل الدموع الما انحبَس في الواطة بيقوِّم تَبَسْ ..؟ شهى المدائن تنتفض ما تمتعض .. موكب زفافك للأرض شهداء الوجود تتلقى ليك محتفية بيك ... شوقة الربط مركب شرط .. هوجة البحار شايل خبار الهاربين كان البشارة لكل شط عِلت إبتسامتك حين هبط ما من جواز غير راحة إيديك لا من ربط عملة وشنط نية رسول .. إنسان فقط . ما بينا بيناتك ربط بي أسمى مبدأ .. وأقوى خط ما جانا عشقك من فراغ لا نحنَ غنيناك عبط جرح الوطن خطالنا خط ختالنا قول ما منو نط والليلة يا موت يا حياة خاتي البيختار الوسط . .. ويا بلد فوق اللِمِيلِس لا تَهِمْ لاب تميد الأرض تحتك لا مغنيك بتردِم مادلك نغمو اليكاجر للبتاجر بالنضم يشطب الشخمت مشاعرك ويرسم الإحساس رسم في الزمانات الكتم غنوة تدخل .. زي نسيمة زي شعاع قمرة ونجيمة لا خشم باب لا تدق .. لا في إمضاء رقيب غريب .. لا تراويس لا ختم . غنوة من بق المغني وفي القلوب بالفال تبق تحرق السقط التدني وبي تأني .. واثقة تفتح في الدروب المارقة منك وداخلة منِّي المارقة فيك وداخلة فيِّ الداخلة فيكَ ومارقة منِّي وشايلة حنِّي .. ضريرة .. حُق سيرة .. دلوكة وتدُق وتنطلق من بُق لِبُقْ تنهرد دارات تغنِّي رابَّة حس درويش مفرتك صانّة زي شيخي التبنِّي ومن بعد دا ولا يهِم المغنِّي مع قضيتو يقضوا ليلات القِسِم ؟ كلما تنبح كلاب كلما اِنكشَّح عذاب كلما طفّح سِباب كلما عانى الجسم كلما غرّوهو سِم كلما كان المغني كما المعاتيه يبتسم على التجني كأنو جِنِّي سديد بصيرة وملتزم ويا ... المغني الما نِدِم يوجد غنوتو وينعدم خاتم المغنين الوفاء سي يا خَتِم .. سلِّم على الشهداء وكفى وإنجم من بعد السلام يا ال … مصطفى طابت عينيك والحب عليك يبراك وسِم يكسيك هدم .. أرقد .. قَفَا ويكفيك إسم الشتلة طالت .. والسبيقة بعد دا لاشنو التنهدم ؟ قول للبلاد .. الطلوحت عينيها في دمع السواد قول الله فِي . قول ليها ما غنَّى الأسف تتأسفي لا حضَّ نمُّو على الحداد تتكتفي عد عود ما ودّع شهيد إنقريفي في السكة يوت في شهيد جديد لأيام جداد هيّا أنزفي لمَّا الشوارع تكتفي وينهض جواده المنكفي وتتكيفي قول للعباد الطلوحت عينيها في دمع السواد ذات مرَّة .. ما خِبر السأم لما البلاد صاده الوخم صار المضاد الما اتلخم دغم النغم في حرفو وانفرطق لغم ينسف مطاميس الألم بي سن قلم كل القواميس الوهم جرفه المداد لمّا الأماسي بقن رماد خرم الزمان بي غادي قاد وإندقّه في الخازوق سهم[/align] |
[align=center](5)
دُودر نويرات الفريق قِربَن بعد كانن بعاد كورك لنا .. وما كُنَّا في بعنا السيوف في السوق أخدنابه السطل هايصين كُتُر والخيل حِفِي كورك لنا .. ( قبل المصابيح تنطفي وينزل سواد إنفقدوا الخيل والعتاد إتمعنوا الدرب العديل إتضحوا بالصبر الجميل زمن الخساسات الخفي إن زالف الشوق في الرقاد قدح المواعيد بنكفي في الضلمة برد الليل مخيف قاسي إحتمالو مع التعب والجوف خفيف صعب إحتمالو على الضعيف فِطْنَ النويرات الرغيف فِطن الرغيف لِب الدِفي فطن الدِفي إحساس الصباح فِطن الصباح كل العصافير تحتفي بي روعة الكون والعباد.. فطِن العباد جية البعاد فطن البعاد الماهو في) رجّع صداهو أعاد .. وعاد زي أيِّ درويش إندغم في نقرة النوبة الأرض بين باطو يا دوبك شتم أو قوق حمامة مولِّفِي فوق راس بيوت سبلوقه دم "إياكي تشربي يا طيور في الترعة موية الترعة سَم إياكي تقربي لي بذور فوق القبور تحتن لغم إياكي تضهبي والصقور بيشموا شم قوقت حمامة إلى الديار بعد السلام متقريفي قوقت فجر قوقت ضهر قوقت عصر بعد العشاتين كيْكَت .. سفهوها قالوا مخرِّفِي ؟؟ كورك وراها وكنَّا في صانين زهاجي كما التراب حين كل غيمة مطرِّفِي .. على قَدْرِ ما اتحزم يلملم فينا من نتش السموم الدنيا تصحى مخرِّفِي يجي ريح يسوق غيمو المعوَّق ويختفي . غلبو التعب كوَّع على جرحو اليسار وسكت .. سكت قيرة الكمنجات إتكت فوقو وبكت أنشودة الفوت الوفي أغرودة أو زغرودة الموت الحفِي . فيا مَن تحيَّر في سرُّو الفنا إذا الهاربين الجدد خيَّروك يا تفوت يا تخون البيوت تكون من أنا ؟ إذا الغالبين في أحُد أجبروك يا تموت يا تعضِّي السكوت فكيف الغنا ؟ وكت ما الشفوت بصوتك تصوت تعلِّق بكرتو على الميضنة تحرِّم عليك مناجاة ولوفك ملاقاة طيوفك وراء المشجنة تغمد تشوفك تتبِّن حروفك قبُل توزنه تقلبن كلامك تعد إحتلامك بباكر زنا فنم لا تهم لامن السلطنة تكشُر الألسنة يسري قول الشعوب من مسام دندنة مش يسد الدروب المطر بالهبوب والخبوب والخنا وماب تعوذ الخلوق من طريق ممكنة مُش في هادي الدنا من قشيش الجبال التطاهو النعال باقي نال الرجال في بعض يفتنه بين فرقة النبال والقميري الوبال والحياة المحزنة الجنات الجهال والبنات أم حجال ضو بيوت الحلال من هنا ولي هِنا فجُّوا فورة الفنا البقيرة أم ضروع نقَّعن دم .. دموع شمموها الجنا والشديرة أم فروع ركَّعن في خشوع شعبُّوها القنا طيَّبوها التلال من خبوب الكتال بي حبوب السنا سوُّوا قيرة ومطيرة أرووا شوق الرمال غنُّوا .. يا هودَنَا "لعبة قديمة عندنا كان شبعت يا جنا ما شبعت قول لنا بت العسكر تمشي وتسكر بت النوبة تغني طروبة من الحنِّية مع عرُّوبَه تقلب الهوبة في الراكوبة على اللالوبة تشر لي توبة ترسِّي الغربة تنسِّي التربة مآسى حروبة تكسر الحربة بعود الحربة تدق النوبة " ربُّوا .. يا سودنة ... بقَّروا الطير رجع والبلد كع كرَع ركَّ في الميضنة دكَّ للميضنة الهِي ما مئذنة كانت الميضنة الهِي ما مئذنة ضاربة في نصنا حقنة لي مصَّنا مدخنة حربنا مدمنة سبَّنا وإحنا ما ذنبنا بي طريق ربنا جينا لي ها البلد وإنولد حبنا ليها لي شعبنا والله عالم بنا وعارف الميضنة الهي ما ميضنة ساسه مما إنبنى ماها لي ربنا ميضنة بشتنة والرسول كجنة ميضنة كشتنة والله قد لجَّنا من مياضن الدمار الله هوي نجَّنا وأبني فينا الوقار لي جنا الكم جنا إنت فارج الكروب للبطولبو العنا يا مخارج الدروب من متاه الضنا حكمتك في القلوب بس ندور نتْبِنَا إنت ياك طبَّنا وياك خلاص قلبنا من دواس شعبنا سو رصاص حربنا فاس لقى وعبَّنا بالصلاح رضّنا لي فلاح أرضنا نبني للميضنة التبر فرضنا التصون عرضنا وما تضر بعضنا " إنها السودنة منّها الهودنة ويبقى يا حاكمين كلمة العالمين مافي من يلكنة وحكمة الآدمين مافي من يسجنة ولاَّ ماب ننكتم ننهزم .. ننهزم إلاَّ ماب ينحكم بالضلال شعبنا فنم لا تهم كشكشة كوزنة والبغُش الغبش ماب يغش ربنا حزب من كذب ماب يقوِّم بناء وبناء منخرب ماب يعمِّر بنا فهِدَّ الرديف العليه حقّنا وأبن لك صريف من عضاك أو قنا .. وطن قول وطن وطن يا جنا وطن من تِبن ولاّ قمحة هَناوطن ثم من وطن ثم من وطن لا ثمن باعك الزنزنة وطن واحتمل وطن واحتلم برجع الحبيب من متاه الضنى في ناساً عزاز مشتهنك رزاز في ناس الرزاز مشتهيهن هِنا يغيض الحراز حين يفيض البحر عشان يذدهر طول فصول السنة قوانين تجوز حتى في الأزمنة هو الضد يكون سكون في الغضب غضب في السكون هو المستقيم هو المستدير هو اللولبي هو المنحنى هي الكائنات في الطيور مسكنة وتستخف بالصقور والحِدَيْ إن دنا بالصراخ بالضفور بالجناح اليفور حين تفقِّع جنا نِم .. حين تهِم هِم وإدلهم عليك الصدام سرَّة المأمنة عليك الكلام الجديد الحديد عليك النشيد يا شهيد الغناء تموت ماب تفوت تموت أو تفوت ... الشفوت العنا ... ويظل الوطن سيِّد الأمكنة ريِّس الأزمنة وأروح يات بكان ألاقيك .. معمِّر .. مقيل أمهاتنا أماسي أبهاتنا ونهار البطان يصنُّوا الجنات يغنُّوا البنات بذات المعاشم يحاكوا الكمان تصدِّق لقيتك في شافع في خلوة صباحاتو حلوة مدنقِّر في لوحو ينقِّر ..يدندن .. بصوتو الملان غناكَ المسخِّن يبرِّد جروحو ويدفِّي الكيان .. وكت تمرق آهة تصنقِّع تراها يصنقِّع تراها يشوف الدخان تجمَّع سحابة تكوس في الغلابة وترابه الزمان ... لقيتك في قهوة ودا شيْ عادي كان بس الماهو عادي خلا ويا بلادي صحارى وبوادي جروحو الحجارة التقرِّب تحارب قبُل ما تعادي دخلة المغارب تبردب .. تقارب كهارب.. كهارب ترازي وتزازي صواقع ترجف بروقاً …توقِّف قلوب الروادي .. ورواديك معادي غنا الإعتيادي شريطك حدودي حجارتك وسادي مسجِّل صحاك المنام الزيادي . بس الماهو عادى دا من وادى حلفا ودا من كاجو كاجى ودا من ريره غادى ودا من كردفان ودا من كل حته ... عقاباتو شتّى وجميعن يغنّوا يغنّوا ... ويصنّوا يصنّوا ... ويحنّوا يذات الكيان لذات الكيان ناس ولا انشافوا عنوه يتعارفوا فلان ود فلان ودفلان قلنا سرك تعدى الزمان والمكان هبشتك ,.. نقشتك مغمِّد حدرتك منو المن شدرتك طعم كم لسان ؟؟ أظل فيكَ حائر كما العش في طائر يا سِر الرحيق كما البرتكان شنو أصلك غمائم ؟ حمائم ؟ هديله ؟ نسائم ؟ جنان ؟ طبول القبيلة سيوفه وحصان اليقيف فوق قتيله لغاية الأمان محل نمشي فينا مهقد عديلة وبشائر تجينا شنو أصلك أذان ؟ جرس من كنيسة إذا رنَّ عيسى يصِن في الكهان ؟ ألوص فيِّ حافي أكوس في اللي مافي أظل فيكَ مدرك لخافي البيان[/align] |
[align=center](6)
وتظل نبع المياه والضو قمحنا .. كسانا .. عافي .. سكن . وين ما نسكتك .. نسمع عصيفير الحكاوي رطن متين ما نفقدك نلقاك تحانِن بالغناوي وطن مع إنو حباكَ ميتة الغربة وإستكتر عليكَ كفن قدُر وطنك مع الأوطان إذا ما كانن سحايبو أبن يمرقن قش من الوديان عشان تدِّي السعية لبن قدُر وطنك إذا هلكان قدِر ينقذ قرف دركان قدِر يقسى ويخيِّب ظن حِبَيْبُو .. الطيِّب .. الإنسان يطفِّر ريحو .. روح الفن وطن .. ؟ لكنو .. ما هولك ولا الزول القبيل بي خيرو بات زولك .. وطن محتل بشوف مختل رؤى ووجدان خيال مكسور وشن جابرو ينوم والجنّة في خاطرو صُرُف غلمان بنيات حور خمور وقصور يشِب من تل بخور تيمان بلا رحمة وبلا رحمن يقع يابس على دابرو يرجِّع شهوتو الشيطان إلى الدنيا ويقوم مبتل وطن من هولو ما هولك ولاك الهولو من هُولك فما معنى الأرض بالضبطِ .. أو بالربط ..؟ شن قولك وكت تكدح تكد حولك تباصر الموية بالسرقة غرامة ودردرة وعلقة ويصادر الوالي محصولك ؟ يلز ضل المقيل تعبك ينصِّل منجلك قصبك يهز لك راسو قندولك ولادة التابى ماب تابى تحت باطك تجر الريح بدل مسدار وورتابة ؟؟ وطن ما ليكَ فيهو وطن بحر لي جرفو يتغابى لو ما ترمي فطنو حجر كركجايي .. دُرَّابة لو ما هبَّ ريح الشيم وريح الشيمة هبّابة تقول مرسوم ؟ أو أنو الغيم ملقّى عليهو رقّابة ؟؟ بحر يا أخيْ خسارة .. أفي عوارضو الجَنْ يحندك فينا بالمي الني يملِّينا الشراب ألجن !؟ نصاقر لامتين الصيْ والعالم صحاري سِقن إشن عبّاك وقالك غن أو غبَّاك وقالك عن ؟!؟ وطن خلوهو للأقدار فِتَن ما خلُّوا فيهو خدار خلاف الطرفي طرفِ أغن وطن ما خلُّوا فيهو وطن معلَّق بين لهات عربيهو والزول الحويلو رطن ولكنك تغنِّي وطن بعد دا ,,, وطن بي دا ,,, وطن يي دا وطن لاكلَّت مزاميرك ولا ضرب الربابة وهن عشان تتفتح الأبواب تغنِّي حقيقة مو هوّاب تغني صواب تغني وشن فيا دخلت هِبَيْب الرحمة يا مرق الحِبَيِّب إذن تغني طليق كما الطالق تغنِّي .. تغني ما اتيقن تبشِّر في التقانتو بكن يكون المدفع الخاذوق مكانو مكن بدل ها الدم من الأمّات رضيعاتنا اللبن مكّن ومن بعد المناحة الضيق زغاريد الفرج طقَّن نقاقيرو اليسوِّن ... دُن تطمِّن في المرق وحِّيدو لا خوفاً عليك لا حزن تغني من التعب لامَن كلاك دمَّن ولا شكراً رجيت لا مَن . فهل يعني النهاية الموت وينبعزق غناكَ سدىً أم أن الغيم حينسابق على الأرض العزيزة فدىً ؟؟ وطنّا حبيبنا رغم البين هي الأشواق حنينا إليكَ زين .. يا زين يظل دفّاق ما حوجتنا وندِّيك وغيمنا عليك دوَم ساساق يلاقي البينا بين واديك أناقي غزيرة ماها أفراق نحبّك من طرف من جم برغم قطائع الإملاق ماب تنذم .. علاقة دم وفاء وتاريخ على الإطلاق إذا ما الغربة لمتنا على ذات الخلق وأخلاق وطن وين كان في ذمتنا فكيف يبقى الزمن فرّاق هي الأشواق .. وما بين السماء والأرض مد أشواق وما طال المطر بيصب طبيعي إنو البحر .. ما راق كما إنو العكار من طين كمان من طين يجي الروّاق صحيح إنو المطر رائق ولكن السحاب قد ضاق خبارو الريح بشِن سائق وكت كبد التراب مشتاق إذا ما العشق منسابق ومنطابق على الأعماق كذلك حضرة العشاق مع غيبوبة الأشواق[/align] |
[align=center](7)
يا مسكون هيام وقيام مع ليل الحنين الطاق قسمتك من شتا الأيام تضوق زي الوطن ما ضاق وطن ساكت وطن نضّام وطن ما فيهو أي كلام وطن صابر وطن علاّم وطن آخر وطن قدّام وطن ساهل ولاب ينحام وطن ماهل وطن قوّام فرد واحد عديد أقوام وطن خالد على الأيام وطن ساكت وطنّا وبس في جوفنا إندس ألف ميم لام متين ينبث يلم قدّام رمز لي مجدو صانو تمام نحوت العزة ماها أصنام مسيحيتو وسماحة إسلام تقول للفوق حويتو سلام بطن بطراني يا مريام ويا مريوم هي الأرحام ويا أدروب وتيّة أمام وطنّا ونيتو بيضا تمام إذا إنهبشت هويتو حرام عندها بندقيتو كلام وطن لا جوع .. وطن آمن تبس في الصحراء لا ألغام مصابيح السما التامن تغيب في الغابة غيم وأنغام دقر يا عين وطنا الزين ولا تنضرا لا ننعاق نظل في حبلك الواحد حبيببين مافي بينا فراق وهيط شايلنا شيلة السيبي سعن الباشِّي والمعلاق عشيوة الداج أواخر الليل كهاربو ضي النجم بوّاغ يسد لبق الأسى الشايل بلد فاتحلو غلبو بلاغ !؟ جروحو .. جروح ويا النبي نوح شقييان والدهر لدّاغ متينك يا غربة الجن نسكِّت صنِّك النقناق بلد جية المطور للطين نجيها وتصدق الأشواق لا زنزانة تترجانا حي الشعب يا إشلاق بلد وأحضانة تتلقانا جنة الجدول الرقراق نطلق همبريب الحن على لفح النوى الحرّاق وفي وش الطراوة دحين منو اليطبل سماك بأطواق يا وطن النفوس البكرة يا وادي الحشا البرّاق إذا ما الريح جرح لليح وصيفاً حتحت الأوراق حطبنا نصيح أتبني الساق أمان يا غيمة مو البتّاق يا وطناً قريب للحي وسرّك للبعيد لحّاق حلُّو حلاوة ماب تنضاق ومراً كلُو كلُو إن ضاق من كنّاك ما خنّاك لا فينا الضلالي العاق ويا حاسب سكاتنا رضاك أماني بطونّا ماها غُراق صدورنا على البعادي زقاق ضهورنا إلى المنادي رقاق رضينا بلا قرن ننساق وحين نحرن جبل يا ساق الجرَّب يطير ماب يمشي لو حرّت عليه الأشواق ومن قولب لهيب الشمشِ ما كوَّش من الرقراق [/align] |
[align=center]( 8 )
وطن لو رزّه يكسر الرزّة وإنت المالي عيونو معزّة وين متراوح سايب عزة ودابه اشتغلت فيها الغنيه دابو ضمير الدنيا اهتز وبدا في القدح الكوني يتبّن شوقه يضوق للعالم لذه وين متراوح .. وين يا طالي باب النيل بحنين الوزة وعمرك كلو تغني عليها وتترجاها تعالي ... تعالي أول ما هي بدت عينيها نهمة غيمة مشيت طوّالي كوركنا لك كوركنا لك كوركنا لك يا ... الله ... سبعة أيام في سبعة ليالي رجع الصوت الطالع ... آه ... سرسار جدول رادُّو العالي كنّا غلابة وليل وربابة متلمين فوق قوز ونغني قلنا الصحراء تشهِّل غابة حلم قريِّب ماهو تمني تنسف فجأة الشوق دبّابة وفينا غنانا يصن فد صَنِّي اتنقطت سحابة سحابة وبدا يتلقط طير الجنِّي نفس الريح الحرق الغابة قطَّم فرحك ليلة الحِنِّي رغم بهاظة وعظمة فقدك إلا إنو الحياة ما وقفت إلا إنو في ناس بيغنو عشان تخضر الأرض النشفت ناس من بعدك بعضها بعضك أرضها أرضك وناس لا عرفت ليك لا سمعت بيك وتكنُّو غناك الليهُن ماشي عليهُن تتلافاهو الريح وتفنُّوا ......... ورا الأحلام الجفّت ورهفت رهفت وخفّت خفّت وطارت طارت ورفّت روحك فوق الغنية إتلفت بي بشكير الصبرِ إندفت وإنشتت كواني كواني قلنا الله بيخون الخائن لملمناك والعين بتعاين مدَّ النيل الوافي ضراعو سوِّيناك باجور .. وجنائن شيدنابك دور ومدائن حندكنابك حز الريح حركنابك شوقنا الكامن أو قلنابك .. ظل مطّامن إنو حيشرق فجر العالم بي بني آدم طيِّب ... وآمن ونفضل نطلق نار الغنية تالا الذمم الخاتي نظامن تنسف ونجرف دبش الدنيا وغَش الفجر الكاذب لامِن تبرق ويمرق شخب الباكر وتضوي سماك يا يومه التامن لما وطاك ما خِبِر البوت برفع قدرك للملكوت مافي القِدْرَك حتى الموت حيَّر قَدَرَك هادي الصوت حيّر صوتك هادي الروح حيّر روحك عشق الناس الوين ما تروحك تأبى تفوت من يتأمل فيك يتجمل من يتجمل بيك يتكمل إنو الحق مبسوط مبسوط يا الخلِّيت الزمن الأطرق زمن الموت مضبوط مظبوط[/align] |
[align=center]
(9) يا زول يا حبيب يا الأروع مافي الدنيا الغيب إتجمع بيك إتوزع فيك ومرقت في رقّة شوارع أزقة ونفاجات أبواب السر بتودِّي تجيب وتندِّي الأرض تلاقي قلوب الناس بي بعض بلا ترتيب إنتاوق فينا ولا تثريب على خوفنا عليك بتلاقي الحب في عيون كدّاح للشغلة تخب تنباخت بيك مع كل صباح يا زول يا كيك لو راح الحب لو ضاع في القاع الدنيا دي راح تنقرقر جُب قدّام عينينك مرّت قافلة وكانت غافلة يا يوسف في الدنيا القافلة منو اليترجل ينزل ليك أو يتروجل ينشل بيك النجمة .. الحب عوّد عينيك في الضلمة تشوف حفِّر بي إيديك عتبات للجب سمُّو .. أنسف جوف صنّات الخوف الشوف الرعب يا ألزم فيك درّابة الصبر أنا دربي عليك جاييك جاييك فسراع .. فسراع قلَّعت أشميق الشوق ملتاع .. أنتل وأفتل فضَّل فد باع والحبلِ يتم كمل الأشميق ما تحتي نِكِت تنْقِت .. تنْقِت فوق أرض حجر لفِّيت .. لفِّيت دُخْ بالسيسيق يا جاو وسجر يا نخلِ طوال وأنا رجلي عضير أنا نفسي قصير من شرب القامشة الشيشة ... البنقو ومضغ القات سف التمباك لف الحبشاي في ورق قصتير شم البنزين الجن .. الطين برد الأحراش حر الزنازين من يسقط وعاش أضرُب بي إيديْ قرَّبت أطير في الوضع الكير تبَّنتَ عضاي حين شفت الريح ينتق في دلق من لكدة جير ما احترتَ كتير الرب فزّاع يا الفطْن القاع شرَّطت هدومي وتمَّ الباع برطع .. برطاع صدِّيت البير أمسك .. يا .. يوسف ... هاك أمسك يوسف سامعني .. وماب يمسك طمِّني عليك لو ماك مارق أمرق حسَّك يوسف قول خير أربط نصَّك .. وأمسك في الحبلِ وما تنتق .. يا انقطع الحبلِ ويا إنشقلَبفي الفيها معاك لاحظ يا يوسف إنِّي ضعيف والحبلِ أضعف من حيل موقف سيل ريق الفِقَر العربية قدّام اللقمة الغربية خلِّيك حريف .. بالذات أحرف من عِرق الغضبة الشعبية الهبَّة النار المطرية ... كل إيد في جدار شمشِم وإتحسس بأقدامك كل الأجحار ما عِدم الجب قبل إعدامك من عكن أحجار .. الحفر الجب زول قدّامك مو قبيلة فار ..؟ ولابدَّ أكيد ساعة تمَّ لابدَّ طلع من دربٍ ما تبِّن بي إيديك كوس الجحّار ... لابُدْ .. لابُدْ يوسف سامعني ومابي يرُدْ يا سيِّد .. حرِّ الشمش شديد وأنا بين حجرين واقف ويحيد نازف ... حفيان رادف غلبين وراجف ...عريان ... سايف ... عطشان ... وآبار الأرض العربية آباره جميعِن .. قد قطَّن والنهر جريح .. وبعيد جداً ده درب مقطوع .. حداً .. حداً بي فوقو قوافل ما عدّن من صلبِ يسوع الإنعرْبَن .. حِرْدَن .. وصدَّنْ من عهد محمد ما جابن جيهاتو الأربعة ما ودَّن ..؟ من عهد صلاح الدين وجمال .. كل الينابيع طينن قطَّن والغيم الزنجي دقس لندن والمطر العربي مشى أمريكا وبأمريكا .. إنجنس .. وإستوطن القال يتمدين جا مديَّن والكان إنديَّن جا مطيَّن ؟! أأطلع عينيكَ توريكا وين وصِل الحال الإنقطع مع إنك يكفيك الفيكَ أمريكا.. وأنصاص أمريكا مارشات الناتو مزازيكا البوسنة الهرسك وصربيكَا الله يرضاكَ ويرضيك يا يوسف أخوي أطلع .. نطلع يا يوسف هوي ما عاد يسمع أنا حافي وساحت كرعيّا فوق زفتِ الأرض العربية عسمت كلماتي مع الرقبة وداخت يا ساكت عينيّا شاخت أيامي الشمسية وباخت أحلامي القمرية أطلع .. ياخي أطلع .. ياخي أطلع لا إنعلق يوسف في حبلي لا إنفكَّ الصبرِ من إيديّا يا يوسف يوسف يا يوسف يؤسفني ما ردَّ عليّا[/align] |
[align=center]
(10) من نخلة على أختها متكيّة أومت لي نسيمة العصرية قيّلت إنصنّت وإنكربش كدرومي الحالة بعينيّا إنكرفس فيْ ضل النخلة وإنكفت اللحظة المبكية قمرية تراحم قمرية وتحكيله بحرقة وراثية قمرية من القمري الشاهِد على خطو الميتة الدغرية تحكيله وعينيها تناهد عن كيف إنشرمت أغنيّة وإنترمت أحرف من كلمة إنسهكت روحه المقرية حين سابه مغنّيها براها في سفرة بعيدة وأبدية كيف شمط الوتر الموّال وإنفلت النم من صقرية وإنشابط في لمينة الآهة بي غم الفجعة الكونية المرِق السانِد والشال طقطقبو الدمع الهطّال إنشقق حائط كان ساتر وإترقرق سقف الآمال الكان بيبشِّر بالفال والبسمة عيون الأطفال الكان بيوزِّع في العتمة للضو على كل الحلاّل الكان بيفرِّق في الزحمة عن كيف تتلمه العمّال في الكتمة يرطِّب بي كلمة عرق المسهوك الشغّال طوّالي يصبِّر في العالم مو الصبر الفاوة الهقّال الصبر المنو البني آدم يعدل للزالف في الحال ظل صابر قالت أميّة دفنت لها كمِّين تربال كم بِت شيّالة علانية الريج جزّاها كما النال قالت والخاطر جوّال استغفر يا وتر الباكر والدنيا قديمة يا موّال قمرية تقاطع الأميّة خلِّيهن يرتاحوا شوية ما الفجع الواقع غلاّب والدمع يريِّح .. يا أخيَّة انفتق المرتِق بي صفحة الزافرة الجات دافرة قويّة ضلعاً ممنوعة من الفرحة من حقَّها تبكي بحريَّة البينا وبينو من الإلفة ما بين الأرضِ وطورية إحساس روّاسي لقى الضفَّة عاذب في الجنَّة وحورية ما حيلة العمر إن ما كفَّى نفساً مطّامنة ومرضية ترجع لي ربّها والمنفى لي شعبها ماب ينسى قضية الغُصّة تشرق القمرية وتنعشرق في حلوق الخِلَّة وين غائب .. سائب ليلاتك يا شهر أحلامه بلا هلَّة ولسَّع في مطاليق من غادي بيجارطوا بنيات الحلِّة في ربابيط تقطع في الوادي للبطلع لأهلو ويندلَّى عكازك مرمي وسيف صادي وخيلك .. من غلبها .. لا حولة لسّع في فوارق ..في طوابق تتعلاَّ .. ولازم تتعلاَّ ما طال الرزق اليجي مارق للناس تنصلبطُوا باسم الله وين غائب سائب للعالم يا تامن أيامو بلا طلَّة ولسّع في جزائر مخجوجة وفي خلائج لائجة على ملَّة في عراق والرؤية المختلة يا معاين في الغبن البائن يطعن في أخيُّو وما يضلَّه معنى القومية العربية ما دلاَّ .. الضلَّ .. وما دلّه 1 أن تقلب للسلطة ... بالدعم الأجنبي والخطّة 2 تنسلط في شعبك بالشرطة المقصلة والبلطة .. بالحمم الشعبية 3 تمرق من ورطة عشان تدخل بالأمّة وبلدك في ورطة وبي دينه .. تدِينه .. وماب تفرِق 4 أن تحرق بي نارك قطِّية جارك ,, إيديَّة 5 وتنسلبط لي طينو .. لي مويتو .. سماهو المهرية تحت الشرعية الثورية 6 وكان أسمح .. لو تفتّح نفّاج ما بينك وما بينو عوّانك وعوّانو يشبوا عاصرين على بعضِ ويتربوا .. من شطرٍ عربيٍ واحد راضعين .. في الأول ينحبوا وفي الآخر .. راح يرموا الحيطة وعلى بعضِ قلوبن ينكبَّوا على صدر الأرض العربية بالنور الأخضر ينعبُّوا جنيات السلمِ مباديها الموية البينا تعدِّيها لا شرطة ... لا نقطة .. تلاقيها كل إجراءاته الرسمية أن تشرح ويفصح ما فيها من عشق محبّة وحنِّية لي كل الأرض العربية بالشوق بتلوِّح أياديها على نخلة قديمة على الشاطئ في طيبة تتذكر أساميها والحيطة التقفل ترميها بي ريح الوجد القومية عقبان الحيطة البعديها والحيطة البعد البعديها لي آخر الحيَط الوهمية على خدر حبيبتي العربية بتَّاً حبُّوبة ودغرية لا رحطاً يقطعوا همباتي .. لا رحماً فضُّوا حرامية .. 7 وماب ننسى المتلبد اليانكي المشكي على الله متسبب كايس لي علَّة يدخل بها في الربع الخالي ولا حاشا تحوشو ولا كلاَّ .. ولسّع في فلسطين محتلّة وفي فلسطينات دار تُحتلّه ؟؟؟ ؟؟؟ ؟؟ ؟؟؟ وين غائب ..سائب للعالم يا شايل همُّو بلا كلُّة ولسّع في إفريقيا المحنانة نشفانة سهوله المبتلّة آسيا الكحيانة .. وصبيانه تنفرج على رمي الجلَّة ؟ لسّع في أوربا الغنيانة فقرانة روح دار تنسلّه لسّع في بعايض في العالم بي دم الآدمي تنسلّى ولسّع في هوائل في بلدي بي إسمي .. وإسمك واسم الله ؟؟ كيفنك يا وطني المافي عوافي يا ارضي المحتلة ولسّع .. يا المِن خيتك بنسع سنّارة الصبرِ .. في جبّادة عشم الأيام اللي هسّع ... لا نتَّق كورا ولا داير من بحر الحاصل أفوت أقنع لسّع دم فاير في وطني ولسِّع هم تائر فيْ يلسع لسّع حكاية عزة زاد عن خيل رهاب متشرفه مرق المغني يجيب مطر لي نخلة روحه مشحتفة هبش السحابة .. أبت تصُب صبّت عليهو العاصفة فنّت من إيديهو الوتر والغنوة خرّت نازفة في حلقو ينعارض حجر ساد الغناوي العازفة وهج النجيمة الشايفة بي ليلو ينطاير شرر فوق راس نخلتو الناشفة النار عديل .. النار قَبَل حرق العطش .. ما كان كفى قِدر المغني .. على دموعو يوقفة .. قضَف الحجر والعاصفة ... حين لمَّه في عضم المطر بعد الصراعات والحَفا .. النخلة كانت في الكُبُت .. جمراية ترفِس واقِفة .. خالفاله شتلة عمر شهر محنة مغني .. وعاصفة . غلبت عليهو العاطفة ضرّع على الشتلة أم سهر وفي لُجَّة النار إختفى .. داخل على حوش المطر والشتلة بينو ملفلفة الباقي من ساق نخلتو فوق كتفو بىْ جمرو انكفَى يا أمّة .. فرسانك تموت مغدورة .. دائماً من قفا يا أمّة .. تقّابة .. وفا وخانة مشاعر مرهفة يا مدن شوارعه تستعيض .. بي أغنياتو عن النضال .. ضد الظروف المجحفة بعضاً على بعض الدروب قاشرابو .. موضة وقندفة لو تستعيد نفس أمنياتو عَلى الطريق مَافىِ الْعَوارضو توقفه يا كمبوهات بتّ الحلال بالطيبة والرحمة المحاننة مترفة يا الفارشين الأرصفة يا الحلمهن حلم الطيور عيشةً شريفة وأرغفة في بلد حِنيْنة ... موالفة يا المن أصابعين الوطن حتى القيامة ...ولا الزمن .. لا كُبَّة حامي بتنتفه يا كلكن في العاصفة دون عاطفة مَن كان .. بيسمع ... مصطفى .. صــــــــــنّه ووهج صوتو انطفى ومن كان بيسمع .. ما اصطفى .. حيْ .. بي قضيتو .. وبس .. كفى .[/align] |
مَن كان ..
بيسمع ... مصطفى .. صــــــــــنّه ووهج صوتو انطفى ومن كان بيسمع .. ما اصطفى .. حيْ .. بي قضيتو .. وبس .. كفى . لك التحية المسافة |
الواثق تاج السر
شكرا للمرور الجميل |
[align=center]الاعزاء زملاء و زوار
كل عام و انتم بخير. سوف نواصل هذا البوست توثيقا للاعمال الخالدة للراحل المقيم الفنان الاستاذ/ مصطفى سيد احمد و نتمنى مشاركاتكم جميعا في الرصد و التحليل و اضافة الاشعار و الاغنيات و الخواطر.[/align] |
[media]http://sudaniyat.net/Agani/Humeed.wmv[/media]
[align=center](مبدعنا - حميد)[/align] المسافة العزيز ليتني أجد الوقت لمعاونتك في التوثيق ولكني ساحاول من حين لآخر محبتي |
[align=center]
الاخ الاكرم/ خالد الحاج كل سنة و انت طيب و مشكور علئ انزال قصيدة و اغنية "بين الموجة والخزان" الخالدة. و نعشم في الكثير منك دون استعجال كلما تسمح ظروفك و عارفنك شيال تقيلة جرابك مليان و كلس و سداد. بين الموجة والخزان سنّى على النضال إيدى سوّكى بى الهتاف .. فمّى شوارعك لى .. دويها .. على إذا ما آخر العلاج الكى ... مراويدك حُمر يا أمْى هردت لهاتى بى الغنوات وقتْ يبرد حشاك .. يا أمّى من التعب البلا صالح تفيقى .. تروقى .. تنجمّى تسوّى مكانسك المطرة تضوى البيت وتنجمّى تمرقى صبوحة لى الجيران قدح فوق إيد ... (وفْيد) ألمى يلاقوك شفّع الكتـّاب نضاف وظراف بلا النسمى يغنولك غناوى السـاب وفى بيوضة مافى سراب جبال كجمى وفيافى الكاب تميد بى الخضرة ...منقسمى فيافى الصّى وبيوضة البراسيم فيها مفروضة خدارا يرارى شوف عينى على الأبواب .. طواريها وحواريها بقت روضة بقت تشرب من الحامداب تشوفى رهاب ... بُعُد نجمى بشوفو قريب قُرُب نضمى بشوف العالم التحتانى هيلاهوب وقف ناهض وهدّ عمايد الفوقانى .. جوّة الجُب رمى العارض وفى الساقوا الدمار أفراد عريق الحب نبض قابض متل قبض الحروف فى إسمى وغناوينا القبيل .. رقراق علينا تصب برد .. قارض وأجر نمّى أدوبى لهاتى بى الغنوات عُقُب يبرد حشاك .. يا أمّى وطنى ولا ملى بطنى سكاتى ولا الكلام النّى بليلتى ولا ضبايح طى قليلتى ولا كُتُرْ سمّى سلام يا أمّى سلام لا هكمى لا دكْمى[/align] |
[align=justify]
[align=center]هل يكون الموت نوعاً من تآلف يحى فضل الله [/align] [align=center]سافرى فىّ شموساً ووتر لأغنيك التماسك أبتغى منك الوصول أمنحى القمح الخصوبة أمنحينى نفسى دون خوف دون همس وأمنحى المدن الدليل فيا طفلة ظلت تفتش عن ضفيرتها، بين دمع ورحيل هل يكون الموت نوعاً من تآلف فى غيابات الخليل؟ [/align] فى هذا النهار ، نهار 21/6/96 أستمع إلى مصطفى وهو يدخل منطقة خوفى الميتافيزيقى ويغنى هذا السؤال: "هل يكون الموت نوعاً من تآلف..فى غيابات الخليل ؟" ترى هل أملك المقدرة على أن أحيل كل ذلك إلى عمق التواصل الذى يجعل من الموت نوعاً من تآلف ... ذلك التآلف المجازى بين الموت وبين غيابات الخليل ؟..... كنا نستمع ــ خطاب حسن أحمد ، بثينة محمد نصر التى خصتنا بهذا الإستماع إلى صوت خليلها الذى غاب ،، بشير لا يملك إلاّ أن يهرب من الغرفة خائفاً من دموعه .. كل ذلك كان بالإسكندرية ، حى الإبراهيمية حيث تسكن الأخت الحميمة بثينة محمد نصر زوجة مصطفى سيد أحمد ــ وولديه سامر وسيد أحمد ... بعدها غنى مصطفى قصيدة العميرى ذلك الذى تآلف مع الموت من قبل .... "مكتوبة فى الممشى العريض شيلة خطوتك لى البنية " لا أستطيع أن أصف ذلك الفرح الذى تداخل مع الحزن فى وجه خطاب حسن أحمد حين إكتمل غناء مصطفى لقصيدة العميرى كاملة لأننا كنا نبحث عن تكملتها حيث إستمعنا إليها ناقصة فى عدد من الأشرطة وأخيراً وجدنا تلك القصيدة كاملة هنا فى الإسكندرية بين ثنايا خطاب مسجّل من مصطفى إلى بثينة ... أعفونا من زخم المشاعر حين كنا نستمع إلى الغائب الحاضر وهو يتحدث أعفونى من أن أصف تلك المشاعر ... حقيقةً ليست لدىّ هذه القدرة .[/align] |
[align=center]
واحد جميل سيدأحمد الحردلو تانى قام واحد جميل فى بلدنا ماتْ وكان بغنى للمساكين والمسولتين والحفاتْ وكان بغنى للمنافى والعصافير والرعاتْ وكان بغنى لى بلد فى الحلم جاي أغنياتْ وكان بطنبر وكان بدوبى للحياةْ تانى قام واحد ملك روّح وفاتْ وكان ملك فى الريد وإنسان فى الصفاتْ وكان مهاجر فى دموع كل البكاتْ وكان وتر مشدود ومسكون دندناتْ وكان - عليه سلام - تقول مازول حياةْ يا مصطفى فاكر الجماعة الكانوا ساكنّك دوام من منفى لى منفى ومن عود .لى سفرْ فاكر العصافير المسافرات دون جواز فاكر اللى داجّين فى المطرْ عبدالرحيم .. وهلم جرْ فاكر القطر فاكر النخيل .. فاكر الحراز الليلة كانوا جميع هناك قسماً يمين .. كان الجميع باكين عليك كان المطار فارش عليك كان الجميع مشتاق إليك ياسلام عليك لمّان تكون زولاً عزيزْ عنْ ناس عزازْ يعنى كان لازم تفوتْ والحزن مشرور فى البيوتْ والدنيا مازال فيها حوتْ وفيها لسع .. عنكبوتْ ! يعنى كان لازم تفوتْ وتخلّى أوتارك سكوتْ ولسة عندنا ريد جديدْ ولسة عندنا ليك قصيدْ يعنى كان لازم تفوتْ وتخلى هذا الحب يموتْ ياسلام عليك لمّان تكون زولاً عزيزْ عنْ ناس عزازْ يا سلام عليكْ[/align] |
[align=justify]
المشاء الأعظم بروح أيوبية أسامة الخواض هكذا كان " مصطفى سيدأحمد" المشـّاء الأعظم .. مشى بين الناس بالغناء فى الأندية والمعاهد والجامعات ودور التحالف ... ومشى وسط حقول الكلام يلتقط فى فرح ما طاب من بنفسجها وسوسنها وفلها . ومشى فى قلب هموم الناس العاديين يلتقط بؤسها وأشواقها للحرية وللعشق .. وكان فى المشائين من فئة المتفائلين ..... يبشر " بالبنت الحديقة " والإنسجام وأن نكون " أهل البلد بالجد " ... كان أمة وحده وسط فوضى الواقع المهترىء . وحين أصبح الوطن طارداً لمصطفى العذب ، حمل صوته وأمراضه وحقيبة معاناته ، وهرول فى إتجــاه صوت الوطن العمودى . ما مر بأرض إلاّ وبكت شوقاً لصوته الممزوج بنكهة الألم والعذوبة ..." كانــت طرابلس والقاهــرة والدوحــة " تهتف فى جلال : " مصطفى سيدأحمد مرّ من هنا " . كان يكتم عذابات مرضه العضال ، ويصر على الغناء .. كان حين ينهــض مــن غيبوبة غسيـل الكلى الممض ــ كمـا يروى مــلازموه ــ يحتضــن عوده ويغنى مسابقاً الموت ... كان يتشح دائماً وفى أقصى حالات الوجع .. بروح أيوب . وفى موته كان ــ أيضاً ــ مشاءً عظيماً ... إستقل صندوقه المعقم ، ومشى وحوله المشــاؤون العـظام إلى بيـتـه الأثير لديه " معهد الموسيقى والمسرح " ... وحتى حين سكن جسده " ود سلفاب " مسقط رأسه ، لم يركن إلى الراحة الأبدية ، ولكنه بدأ مشيه الحثيث الطويل فى مسارب الخلود والأسطورة كأعظم المشائين فى ذاكرة الشعب السودانى .[/align] |
[align=center]
إلى إنبثاق نفسى على داخلى أزهرى محمد على لمتين متيمم شطر النيل متوقـّى اليابسة وواردْ متوكـّى الغنية عصا موسى بتـْهـش فى غيم الإلفة الشارد مهدودة القُدرة وفترانة حردان الضل البارد بتـْوجـّل لى يوسف فى البير يطلع من بطن البير المارد فات الكان بدّينا إحساس بالإلفة وكان راوينا فات الباكى جرحنا وناسى جروحو ولافـّى ورانا مدينة مدينة فات الصاحى ونحنّ نغط فى النومة السابعة طالق حســّو ولا حسـّينا حتـْحـتْ فينا غناهو الطاعم وفات قنعان من خيراً فينا سلامات يازول يا رائع سلامات عوّافى سلامات يا خلاصة الخير الفى الناس وترياق الزمن المتعافى سلامات يازول يارائع سلامات عوّافى محاصر فيك بسأل عن سكـّة تطلّع منك أو سكـّة تودّى عليك بسأل عن مخرج منك وليك زى نهر بينبع وما لاقى مصب بتمدد عشقك فى أقصى ضواحى الروح لى أقصى نواحى القلبْ يتكثـّف بسعة إطلاق الرّب وأنا كنت بفلـّى القلب بسيرتك سميتك حلاّب الغيم من ضرع الجدبْ وظنيتك مارست الفعل السرّى وحفـّظت فحولة النيل أيام الخصبْ ولمحتك وإنت بتتمشـّى وترقـّص فى حمامـكْ على حُمــّة إيقاع الحرب وتكلكل جلد الكلمة الحافـّة لحبيبة بتفتح مجـرى الغنا فى الدم وتفلّس باب القلب فيا بنوت الشارع الطاعم قومنْ كبْ قومن لى الما قصـّر فى غناكن ضُمـّة ولا إتلوّم بى وراكنْ تبْ ولو تبقى السكّة الجايّة ضهبْ وسلامات يازول يارائع البارح عصفورتك ركـّتْ فى البال رقـصتْ وأدتْ عصفور الريد شبـّال وطارت من قولة كرْ ما الزول النهر العصفورة بحرّض فى كلاب الحرْ لابسنى وداخل فى اللحم الحى راصد كل البسأل عن حالى حرّش ضُلـّى علىّ ونتـّف زغب الخاطرة التخطر على بالى ومنع العصفورة تحومْ إستجوب كل الناس التجى فى النوم ما تقومْ يازول يارائع .. ومهموم يا مضـيـّع ضى عينيّى وراك واقف حاحاى لى النوم يا مستـّف رئة الدنيا شهيق ومشحتف روح الخرطوم كيف حال يا أبوى كيف حال يا خال وتعالْ إتفضّل على باحة بيتنا .. الطـّيب ماعون الأطفال ضمـّد جراحاتك تعال من ضلاماتك تعالْ أدّينا هينين من صبُرْ السكّة أبعد من مشيك والجرح أعمق من حدود الإحتمال السابلة والأطفال هناك قدّامك المشوار طويل والريح وراك كل البيوت إتشرّفتْ لى طلعتكْ والونسة ما كملتْ معاك القرقراب والقهقهة مين سمـّى ترحالك غياب؟ والغيبة بتزيدك بها لو يرتق الحزن المصاب كان بعدك الموت إنتهى يا أقصى حالات الحضور المشتهى يا منـْتهى تعال قـرّّحنـا بى دهشة غناك الحى وحـّىْ من جرحك الدامى وفترْ حيلك وحـّى من ضُلـّك الرامى وحملْ شيلك تموت متل الشدر واقف تموت واقف على حيلك فيا حليلكْ يا حليلك بنستنـّاك على صهوة جياد الريح بنستنـّاكْ فى الزمن اللّديح القيحْ بنستنـّاك على باب الحلم فى غناكْ بنستنـّاك رحيلك شلهتْ الدنيا ورتـّب العالم البى هناك بنستنـّاك وأنا تانى وراك شنْ لاحــقْ ؟ دهستنى فى بعـْدك حدو الخوف الدّاخلة علىْ بالسـّاحق أدّينى القدرة التمنحنى بحجمـْبكْ سعة الشوف لو أقدر أطل من شاهق لو أقدر ألوّح لى عيونك تلمحـْنى وأنا ضعفى أمامك فاضحنى سامحْنى ما قدرت أطولكْ سامحنى شفتك من وجع طالع من برزخ ملتقى النيلين كنت هناك وحيـْدك وكل الناس إتنين إتنين براك واقف فى حد السيف براك .الما وقفْ بينْ بينْ تغازل حلمك الفارع فتح بابين على الملكوتْ تسلـّمْ على حضرة جلال الموتْ وتفتح فى الأرض نفـّاج إذا إمتلأ الفراغ بالصوتْ فيا باطن الأديم أفتح براحات الحنين مشرعْ وأندهْ لى مدن شاختْ أنده لأطلال القرى الرّاحت بيوت فى بيوت تمرق من شبر مسرح مدنْ فاضلة وعالم بى إتساع الحلم بقامة يشتهى التابوت فما لفظ البحر يونس ولا إنسدّت شهية الحوتْ ويا زول .. يا رائع تمشى بى الحسرة ... وتموت؟ سلامات يازول ... يارائع[/align] |
العزيز المسافة...
شكراً علي هذه الرائعة.. عارف أنا كنت بفتش علي النص المكتوب من مدة؟ شكراً جزيلاً. |
[align=center]مراحب يا جلال...
مشرع الحلـم الفسيـح أزهري محمد علي يا مشرع الحلم الفسيح أنا بينى مابينك جزر تترامى والموج اللّديح القدرة والزاد الشحيح كملتو ما كِمل الصبر نتلاقى فى الزمن المريح ميعادنا فى وش الفجر يا مشرع الحلم الفسيح يا بعض منى وفينى ساكن أنا أصلى منك ومشتهيك وبيناتنا ليل الغربة داكِنْ هبّت هبوبك أفتح شبابيك المساكن وسـِّع دروبك ولـِّع مصابيح الأماكن يا مشرع الحلم الفسيح يومنا النـّهِـبْ أسلِبنا خوفنا كبـِّرنا قدرك مرتين وطـِّول قدر كتفك كتوفنا يا غضبة الرعد البيسكن فى غناوينا وحروفنا ضوِّى الدساكر والضفاف عبِّى الحناجر بالهتاف سدِّد مسامات الرِّعاف نوِّر مغاراتنا وكهوفنا يا مشرع الحلم الفسيح أنا وإنت والمطر الفصيح حنطوِّع الزمن القبيح ناخد بعض شكل السما حدِّثنى دايماً كلما تنشف على البر الضفادع يهجر الضو المواضع وتسقط من الكف الأصابع حدثنى دايماً كلما تحرد مراسيك السفن تسكن مرافيك الزعامات الدُمى حدثنى لو تاهت خطانا على الدروب المبهمة أو ربما تهدم آلات الشوارع وترجمْ العُزّى الصواقِع حدثنى لو صادف الكى المواجع وضلك على الساحل رمى حدثنى لو مطرك هما علمنا دايماً كلما نبذر على أرضك شهيد يطلع شمس يبهر بأنوارو السما [/align] |
[align=center]
السفر الأبيد صلاح حاج سعيد ماكنت قايل نفسى يوم أرثيك يا أصدق خليل أنا كنت بتخيّل أكون قبلك أسافر غنوة فى الوتر الجميل زى ما عبرت معاك صروف زمن المسافة وجينا للحزن النبيل أنا كنت داير الدنيا تمهلنا ونغنى الفرحة لى الزمن الخرافى المستحيل ورحلت ما كان ده الأوان رحت وحرقت حشا الغنا خليتنا لى الزمن الهوان والإرتهان لى خيول زمان الشنشنة كل المطارات والموانى وشفع البلد الفتارى لسة بارين القطارى يسألوا الناس عن خبر زولاً مسطّر إسمو فى قلوب العذارى وفى عيون كل المساكين الحيارى زول بيطلع من نفس طورية ضامة الطين تكابد طول نهارا زول بيسكن فى عيون أطفال تأمّل ديمة يديها البشارة ياخى والله الفرقة حارة وفقدك أكبر من محيط الدنيا وأكوانها .ومدارا طليتنا زى حلماً جميل فجأة فى غفلة أنسرق أسطورة تحكى أمانى جيل فى حب غناك كان ليهو حق أديتو فى الدنيا الأمل وريتو كيف فى الحق يقيف من غير وجل أو إنبهار علمتو بى حس النغم إنو الكلام لازم يكون واضح كما شمس النهار صدقك ملاهو حماس يقين بالخير وبالحق والنضار والإفتخار إنو الحبيبة هى الأرض والتضحيات عشان عيونا هو الفرض والدنيا ورّاثا الصغار وعرفنا يازول قسوة الضنا والتعب والإرتحال فى غفلة الزمن الصعب وقولة الوداع بالضبط والسفر الأبيد من غير رجوع أو غير متاع وبكت عليك كل الشوارع فى المدينة ناحت عليك كل الفواصل فى الغنيوات الرصينة وإنكتم نبض الغنا جلل سواد حزنك سنا وإتوشح المنا بالضياع وكان بدرى يازول الوداع لا سكة لى درب الرجوع بعدك أغانيك إلتياع مسكونة بالأسى والخشوع لكن بريقك ما خبا أبداً بريقك ماهو ضاع ساطع كما نور الشعاع منو قال هو فات زولاً وهب كل الحياة للأغنيات منو قال هو فات ما أظنو زيّك يقولوا فات يامن وهب كل الحياة للأغنيات يا من ترك فى قلوبنا أنبل ذكريات يا من ترك أحلامو فى كل الجهات وخلّد معانى الروعة بى كل الصفات ما أظنو زيّك يقولوا فات يامن وهب كل الحياة للأغنيات ورحلت ما كان الأوان رحت وحرقت حشا الغنا خليتنا لى زمن الهوان والإرتهان لى خيول حروف الشنشنة[/align] |
[align=center]
ناحت على بابك يمامة عبد العال السـيــــّـد بسمع صدى صوتك .. مزامير فى عشيـّات الشتا والريح سوافى وأطرق على بابك أواخر الليل وألاقيك إنت مافى وأنشد على بابك حزين " عزّ المزار " وكل السنين صارت منافى وأهتف وأناديك فى سديم الليل يضيع حـسـّى و هتافى قمراً وقف مستـنـّى تال الليل نهارات العصافير والقوافى رجعْ الصدى . وحسْ الرياح مجنونة في الساحات تعربد وإنت مافى غابت نهاراتك .. ولكن لسـّة صوتك فى العروق يا صاحبى ساكن لسة صوتك يسرى فى كل الأماكن " يا قمرة .. أقلبى السنسنة .. الحمرا" وشوفى ليه ما جا لسـّة على أفق المدى ترجاك " صبية " جراحا نازفة لسـّة واقفة تسأل عليك مجلس صحابك فى الليالى تسأل عناقيد الدوالى تسأل عليك عصفور مرق ينفض نعاس عينيهو من سهر الليالى يا صاحبى لسـّع جراح الفرقة صاحية وتر الغنا المشدود ينوح يسأل عليك فى كل ناحية كانت ليالى " الدّيم " فوانيس والعمر مغسول .. صبابة وكنا ما بشغلنا غير وتر الغنا وحرف الكتابة يا صاحبى .. ليتها الأيام .. تعود أنا فى منافى العمر ضيّعت الوعود يا صاحبى .. هطلت على قبرك سحابات الخزامى وناحت " على بابك " .. يمامة وشرقت شموس ترسم . على باب النهارات إبتسامة[/align] |
2 مرفق
|
[align=center]
طيبــــــــه محمد الحسن سالم حميد كل ما تباعد بينا عوارض كل ما هواك يا طيبة مكنِّى تلد الغربة .. الكُرب الواحِد بيكى أسمى الشوق وأكنـِّى لمـّا أفوتك من دون خاطر أو دون خاطر منى تفوتى بلقى حبايب فى كل حِتـّة وكل بيوت الفُقرا بيوتى لا غيرت وراك الجِتـّة لا بدلت ملامح صوتى لا غافلنى وهادن فنى غامل المدن الما عِرفتنى تبن الشوق الصبرو مصوبر للأرياف الكم وفّتنى وللأطفال الناشفة ضلوعا ونازفة بغنى اطمن روعا وأهتـّى دموعا ببسمة بكرة اللاّها تمنى ولا مصنوعة أغنى لشعبى ومين يمنعنى أغنى لقلبى إذا لوّعنى مخيـّر دربى الما رجعنى إذا طلعنى نخلة القرب و لا الغربة الكدرومية تنزل غنوتى بى قمرية أو وقـّعنى فى بطن الجـُّبْ بطلع يوسف بالأغنية أغنى الناس الما بتسمعنى المِنِّى بعيدة ومبعدة عنى النادا نشيدا وكنت المعنى الإيدى فى إيدا وإيدا بتبنى فى دنيا جديدة اليوم راح تدنى وأريت غنواتى فى ناس شغالة تكون سُندالة وعود طورية ضراع رجالة كتاب أطفالا وجملة بالا الما مكرية سدّة مالا وبقـّة فالا فى ليلة الدخلة على أسمى قضية حبيبة قلبى يا سودانية يا أسمى معانى فى زول بيعانى ياود ضكران ويابتْ دغرية وأنا إنْ سامعانى فضـّلت أغانى غُـبش فقرية وروح غانيانى حويتك منك يادافعانى براحة إيديا كما الاشواق ويا جابدانى برفق عليا وما بتحيـّر بين الفوق وبين الناس التحتانية إلاّ مغـيـّر ولاّ عقُوق ولاّ كفيف الإنسانية ومنـِّك وين يا كاشفة عينيا بنور الإلفة ضِيا الحنية وحِلم العالم ناس تتسالم والبنى آدم صافى النية والأطفال الناشفة ضلوعا يطمِّن روعا وتبدى تغنى غناوى البكرة الكم مسموعة حسيس طنبارة مع نـُقارة صفِقتاً حارة ودارة تغنى فيا حلتنا عليكى تـُرابك وإنتى شبابك زينة الجَنـِّى أحلى عروس البلد اللّتنا ولاّ الغُبُش الرّابّة تهنى ولاّ هدير المدن التصحا وتمحى ظلام الحاصل عنـّى[/align] |
[align=center]
من الواسوق محمد الحسن سالم حميد من الواسوق أبت تطلع من الأبرول أبت تطلع من الأقلام أبت تطلع من المدفع طلع خازوق خوازيق البلد زادت يفيض النيل نحيض نحن يظل حال البلد واقف تقع محنة ولا النيل القديم ياهو ولا يانا نعاين فى الجروف تِنهد ولا يانا رُقاب تمر الجدود تِنقَص ولا يانا متين إيد الغُبُش تتمد ولا قِدّام ولا قِدّام تتِشْ عين الضلام بى الضو تفرهِد شتلة لا هدّام ولا فيضاً يفوت الحَد عُقُب يا نيل تكون ياكا ونكون أهل البلد بى الجد ونكون أهل البلد بى الجد[/align] |
الجابرية
محمد الحسن سالم حميد فجأة يدوى مكّبر صوت قال الريس ماربى فوقنا كنا ضحوية وكنا نسند فى المحروت إن شغلتنا بلا ماروقنا فكّينالو حبل واسوقنا وإنماسكنا يطمّن روقنا قمنا جميع الحلة مرقنا..البيشوفنا يقول واشوقنا كان ضحوية وكان عين شمش الله قوية وكان الريس فى عربية..واقف طولو تحت شمشية هللنالو وهلجنالو..ولوحنالن بالطورية فرّ عبايتو وهز عصايتو وهزّو بنادقن الضابطية صفقنالن صفقة قوية زغردنالن وهدّنعندنا خمسة دقائق قدمنالو كتاب الله..درقة وسيف..تبروقة هدية قفة تمودة و فاس دهبية وكنا قبيل بيّتنا النية وبين بنتين علينا اليافطة اليافطة ام زيق الدمورية وانعبينا هتافاً واحد الجابرية تحي الثورة..دايرين بوسطة ومدرسة وسطى) (والشفخانة وسوق منضبطة روح باسم قام خاطبنا بنهج الثورة الصارم وحازم امّن لازم من شفخانة والتعمير بالعون الذاتى الا البوستة دى ينظر فيها..اما السوق ....السوق منضبطة وبالتاكيد للتجار الاسعار واضحة للمستهلك باينة وواضحة..وإن جاملتوهن تبقى الغلطة إنكفينا رفعنا ايدينا وهزيناهن بالتاييد (لاتفريط فى قوت الشعب..الجابرية ضراع الثورة..بالانتاج حنبنى بلدنا) وكانو فى جيهه ونحن فى جيهه هم اتهبهبو بالكابات..وماهمانا الصيف وعرقنا فات الريس وانفرقنا كلنا ننضم وما صدقنا بالجابرية تجيها البوسطة الشفخانةومدرسة وسطى قلنا ياريت لو زارنا فطور واحزمنا ضبحنا التور كان أ قلا ضمنا النور كنا بننضم بايدينا دة احسن ريس مّر علينا من الله خلقنا وشفنا خلقنا دة اول ريس ذاتو يجينا وكونه يجينا يقنب بينا يشوف البينا كفاية علينا الجابرية يجوكى الحكماء الجابرية تواصلى البرة الجابرية ولادك تقرا نمشى الليلة نصاقر الرادى نمشى الليلة نحضر النشرة كنا نرجّع فى كلماتو ***************** إلا فى ستة من الجابرية قالو تعبكم خارم بارم يذهب حاكم خلف الحاكم والجابرية تظل فى حالا..حلة حياتها تسر الظالم صدفة تموت ونحيا اطفالا لا جلكوز لا تقرا رسالة لا راح يطلع منها عالم مابنصفكن الاّ ضراعكن عبّو ضراعكن يارجالة وخلو بصركم دغرى وسالم حكم العسكر ما بنشكر كلة درادر كلو مظالم ماهو قدركم تحيو همالة مقصودين والقاصد فاهم وقاطعناهن حاربناهن تمينا البينا شتايم حالتن احسن ناس فى الحلة ايدا نزيهه..عقولا نبيهه وقلنا يفرزو قلنا فواهم يطلعو فالصو وقطاع رحمة عينة شماتة وخارم بارم ونحن القصًًر واثقين فيها وقطعناها معاهم جملة وقاطعناهم وصارو فى جيهه ونحن فى جيهه مرً اليوم الشهر الحول والجابرية بلد فى حالا قواسى شيوخا مآسى اطفالا عذابات ناسا حلة تعافر ومقطوع راسا من القراصة لى قراصا حلة تعافر ومقطوع راسا عشرين كيلو من الجابرية صبية تساسق بى كراسا الجابرية عذابك فينا لاكى قرية ولاكى مدينة وفد فى وفد يقوم ويجينا عايزة دراسة واجراءات عون امريكى قرض المانى وحاحاءات وحد ما نشوف مسعولين مسعولين او خواجات نجرىنلم قدحاتنا عليها ترطن ترجع زى ما جات الشفخانة وعايزة دراسة ومدرسة وسطى واجراءات لما الطوحة طالت بينا اتذكرنا العون الذاتى اتحزمنا وقلنا برانا نبنى نقوم للشفخانة طوبة فى طوبة وقومناها ويوما التمت جات السلطة عربى وعجمى ومرة رطانة الشفخانة دة ماهو بكانا هاك يا تلتلة هاك يا ورطة وغصبا عنك ياالجابرية غصبا عنك يا احوالا وحمياتا وموت اطفالا وعمرة عينكم يا رجالة قوة انشكت بينا النقطة وفى الجابرية تحوم الشرطة هووا كلاب الحلة وصنوا ومن يوم داك ما شفنا الستة وفد الحلة السافر جانا قال اتاكد شاف الخرطة ونحن بدل نبنى الشفخانة انسرعنا بنينا النقطة الشفخانة دة ماهو بكانا وكانت غلطة انقلبت ورطة اتفاهمتو مع المسعول؟؟؟؟ انفاهمنا مع المسعول وقال حيقوم للشفخانة او يدفع لنا حق الطين مع انو النقطة وقت بنيانا قومتوها بدون زنزانة فى تقديرنا كلام معقول كونو يقوم للشفخانة حاجة تضحك محرقة هانة انتو تقيفو مع المسعول واللا كنتو تقيفو معانا؟؟ وقلنا وخفنا نصد الجاى خفنا نفشل باقى الخطة فضلت جاى هى فضلت خطة واتفرقنا على الجابرية واتعلقنا تجينا البوسطة ومدرسة وسطى والشفخانة قصاد النقطة تجينا تجينا تجيناوما اتيقنا ناس انولدو وواحدين ماتو لما الريس ودوشتو فاتو فاتو العسكر وجو الاحزاب ونفس الحلم انجدد تانى نفس الوجع الراح تحتانى حتلناهو جمعنا رفاتو نفس اليافطة فى نفس الحتة الجابرية تحيى الشعب دايرين بوسطة ومدرسة وسطى والشفخانة بديل النقطة فينا اتكلم شيخ الحلة صنقع دنقر سلم وصلى وكانو كلاب الحلة يهووا وقال كلمتنا تكون فد واحدى شان ننقوى ما ننذلا شان مشهادنا وعدل الحلة نحن نفوز حاج البلة وزاد هوهيو كلوب الحلة وبعضنا عارض رد وفاوض شيخ الحلة القام حمسنا بلة الحمش الزول ما دلة اول فاهم وقبلو ولدنا وراح يحكمنا بى شرع الله هو هو هووا كلاب الحلة لما استغرب شيخ الحلة وانفرقنا على الجابرية انفرقنا ويوم الليلة انجمعنا عموم الحلة شيخ الحلة قرا القرآن صنوا كلاب الحلة وهووا وبلة اتقدم سم وصلى صنوا شوية وهو هو هووا وقام اتكلم وعند اتكلم كان ينقسم النسوان الجاى تتهامز الصبيان الجاى تتغامز وكان يتبسم وكانو كلاب الحلة يهووا شكر وشتم هو هو هووا حلل وحرم هو هو هووا هود سابنا وفات ودانا الآخرة وجابنا قاطعناهو وصوتوا انوطأ اصلاً واطى وتانى انوطأ دايرين بوسطة ومدرسة وسطى والشفخانة بديل النقطة التموين وزيادة الحصة كهربا موية وسوق منضبطة بلة اتبرع قال يبنيهن هو هو هوواكلابنا واستغربنا قبل بالمرة لامن نهتف ترسى كلابنا لامن ينضم بلة يهووا بلة انحمس وقال بسقينا وبى اذن الله يضوى الحلة هتف الشيخ وهتفنا وراهو لاتبديل لشرع الله هو هو هو لا ولاء لغير الله طاء طاء طاء عاش الفارس امل الحلة بلة الطاهر على حسب الله كبر وقام اتدلى ولسة كلاب الحلة بهووا وزاد هوهيون كبشا ضاع من مرحاتو وفاقع باع بله الطاهر على بلاع **************** كان اول مرة نشوفو يومنا الشفنا اللاندكروزر اللونا مخطط والبنوت الراسا مربط..التنبوبر لورى مكوش اقمشة سكر حتى رفوفو وعتًل تؤجر وامحى المنكر بى معروفو بلة الطاهر على بلاع اكرمناهو اكرمنا ضيوفو يشبه مرت الشيخ فى وشيو لولا الدقن الدشدش صوفو بلة خبارك مابتشبهناوعامل زولنا؟ تانى نقول الزول برانا نغير قولنا الا كبار الحلة بقولو.بلة دة هولنا بلة دة اصلاً من ها الحلة الا اتربى وقرأ فى الخارج ورافق جدو الفتح التركى وسيرتو انقطعت فى المهدية ومرة سمعنا استوطن برة وقام اتزوج من مصرية جابت على..على جاب الطاهر..حتى الطاهر خلف بلة جدو اشيطن اخير مالانا وبلة انسركن وجا وبرانا اقرب واحد لحاج بلة ..اقرب واحد شيخ الحلة بلة الطاهر على حسب الله اول مرة يصلى معانا قدمناهو وقام امانا صوتو مرخرخ لمن يقرأ يقرأ ويقطع زى البطرأ لامن يركع جسمو متختخ عند السجدة سجودو ممخمخ شيخ الحلة يقول عن امرو زول غرقان فى الدين من عمرو ستة سنين قابض فى جمرو ما فكاهو طريق الله صوتو ودر من كترة ذكرو وجسمو التختخو شدة صبرو قلنا حقيقة الزول بى عذرو وفتنا قناعة ومانا قناعة إلا الستة الصارو جماعة قالو دة زول ترباتو مناعة مابيشبهنا ورفعو وضاعة زول زول دنيا ودنيا صياعة قصة دقنو ودينو بضاعة ونحن اصواتنا يا اما مضاعة يا اما جهالة وناس متباعة وفى الحالتين آمالنا مضاعة وخرم بارم كونها بوسطة ومدرسة وسطى والشفخانة وموية ونور كونا يجينا دة ما منظور وزيادة الحصة الزول زول سوق زول من جدو يلف ويدور وياالجابرية دة مطلب عادل كونو تطيبى تكاتبى وتقرى ضوك يشلع ..دشك يرشع ونحن دفعنا ضرائب بدرى ولسة بندفع لسع ..لسع بس يا جماعة إنقضينا حياتنا تباعة وصنيت رادى وقول فى الفاضى خوفنا نقوم ما نلقى اراضى ونحنا اساسنا وراسنا زراعة والجابرية ان دايرة شفاعة ما بشفعلها الا ضراعا عبو ضراعكم يارجالة وخلو بصركم دغرى وسالم عبو ضراعكم يارجالة شيخ الحلة اضّل وضلّ واسالو برة وحاجة السرة عن التيبان وحكاية الصرة اللّم البلة وشيخ الحلة مع شرع الله!!!؟؟؟؟ والناس ديل العارضين برة جرّبناهن كمين مرة تاني نجرب شان ننضرّ ويا الجابرية معاكي سلامة .. كان الفوقك ما فات مرة كان كلماتن ناشف ريقا .. وكانت مرة إلا حقيقة .. غلبنا نطيقا .. وين في الصرمة وقل القدرة سكتناهن بس ما صنّوا .. وقاطعناهن تاني المرة وبلة طريق الناس وخيارا فوزناهو وجانا زيارة كرمنالو التور وعرضنا .. وخليناهن برة الدارة دايرين بوسطة ومدرسة وسطى موية وكهربا والشفخانة .. زيادة الحصة وسوق منضبطة وصدوا كلاب الحلة يهووا .. ينضم بلة يهووا معاهو نهتف نحنا يزيد هوهيوا مافي شهر جاتنا الخرسانة .. جان السيخ .. الطوب .. الرملة جا الأسمنتى شكارة شكارة عديناهن ألف شكارة كرمنالن خيراً جانا وكل كلاب الحلة الهوّن .. طفشنالن بالجبخانة وفي صنانة تدودي الزانة انغالطنا كتير في بعضنا .. أولى المدرسة ؟ واللا البوسطة أولى المدرسة والشفخانة .. الشفخانة محل النقطة ونان النقطة .. نحنا أهالي .. وودنا صافي بينا معزة جرائم مافي وما بنحتاج لي شرطة ونقطة تحصل علة .. في شيخ الحلة وناس السلطة نحنا الإيدنا بنت لي النقطة .. والجيرنا زبالة اطيانا ناس السلطة إن دارو النقطة .. شي بُكان أرض الشفخانة وما طالبانا خلاف زنزانة مدرسة بوسطة ستين طلبة وعشرين اوسطى .. شغالين ما ملو سخانة مدرسة بوسطة .. وقلنا غُنانا يا الجابرية .. الله أدانا حاج البلة المبروك جانا جاب المدرسة .. جاب البوسطة .. وبكرة يرجع للشفخانة نصحى نصابح موية الدُّش .. نمسى نلاقي الضو عمانا مدرسة بوسطة .. مدرسة بوسطة وتاوق .. تاوق .. تاوق ..تاوق .. تخ وفجأة تبين في السطح الخرطة .. وكب تنتصب الميضنة أخ أخ من حظك يا الجابرية سابع جامع بالجابرية وصدوا كلاب الحلة يهووا .. أخ يا الناس الحالُن قطّ هو .. هو .. هو .. هووووا في البلدان الحظها فاجع بق يا الصاح الماك متراجع حرِّق دبش الدنيا الغلطة بق وانفرق في الجابرية .. بق في ارحامنا في شافع نافع ترفعوا امو في حيطة الجامع يكتب يسقط دجل السلطة .. يسقط بلة وشيخنا التابع وكشفناك وكشفنا الخطة .. تحيا كلابك يا الجابرية .. يحيا ضراع الزيتُن طالع غُلب يصارع مر الواقع يحيا ترابك والطورية .. الجابرية تحيي الشارع دايرين كهرباء دايرين موية .. دايرين سلطة وسوف منضبطة دايرين هسة زيادة الحصة .. الشفخانة بديل النقطة دايرين بوسطة ومدرسة وسطى http://sudaniyat.net/upload/uploading/hemid.jpg |
|
الجميل المسافه
روائع التحايا لك كل الود ايها الرائع وانت تبدا هذا المشروع ونحن مغبلين على ذكرى رحيل اروع زول بدات دون ان اعرف بوستك هذا بشى من الخربشات له فى بوست اخر ساعدنى الشفيف ديامى فى انزال شهيق بصوته والان بوستك رائع جدا فالنواصل الاحتفاء بذكرى هذا الجميل لك كل الود |
mahdy alamin و
عز المزار : مرحبا بكم و بوجودكم الجميل هنا. كل عام و انتم بخير و ارجو ان تواصلوا و تضيفوا في هذا البوست. الود و التقدير. |
[align=center]
حبيبنا المغني النبيل لمحــتك تغربل غنانا وتنعِــــم وتدخل حروفك بيوتنا وتسِـلم تفاصل، تجادل، تناقش، تفَهِم تفرح، تضحك ، تبكي وتألـــم لمحتك توسِم .. وتمهر غنانا . تلون هوانا تحَلي وتطعِم.. تجلي وتجمل مداخل سمعنا تغني وتصحح بوعي المعلم لمحتك توالــف خطاك الرحيل مِكندك عيونك غبار السفر مِحقِب جـروفنا ومحــزْم بنيل يزامن رحيلك رحيل القمر تفتش مـواني الأمـاني القـبيل حرازن مخاصم مجافي المطر وتحرق شراع المراكب وراك وبينك وبين المواني البحر لحونك تمازج ملامح رضـاك تمازُج ملامح هموم البشر تبنت ضلوعك شــجون المعاك شجونك تبنت نحيب الوتر لمحتك تعالج مواجع الغُننا .. تســابق خطـاك الرحـيل الطويل تداقش صنوف العذاب والضني بصبر المــغني العـــفيف النـبيل تتربل جداول حروف المُني وتزرع بذور الأغــــاني النخـيل نجوم الاغاني البشعن سنا يضون مـراتع "بثينة وجميل " بشًرف حضورك هناك وهنا تنًور مـــداخل الغُنا المســـتحيل -2- لمحتك تنَقر جدار السكون .. وتفتح مخـــابي المواجــع نواح تكحل مراود غناك العيون وهمسك يســـامر رحيل الـرياح تلون مدادك مداد الشجون تلــون بلــون الغــروب الــبراح ترتب غنانا ومجَيه يكون تغــني وغــناك الجـميل ارتيـاح يداوي الدواخل غناك الحنون يغرِق دواخلك نزيــف الجــراح لمحتك تضيف الإطار الجديد بشـكل اطارك جـذور الإضــافه تباري إرتحال النوارس بعيد تنقي القِئيم والمعاني الثقافــــه تغالب هموم ارتحالك وحـيد هموم السفر والتعب والمسـافه تعاف الكــلام المكبل بقـــيد تعاف المعاني السقيمه الخرافه لمحتك برغم همومك سـعيد تأســس غنانا السليم المعــافي لمحتك ، وكان ارتحالك وشـــيك تطرز حواف الحروف بالنغم تجيك الحروف العطاش ترتجيك غناك الــرزين يســـتفز الألـم تصادم ســوافي الفيافي وتجــيك مخافك علـيهن يقوي العشــم تخلــي الحــروف التوابع عــليك موانع لحـونك تصــد الوهم برغم الأسي المستقر في عينيك ولا مرة عمرك عرفت الندم لمحتك تقارب نهاية المطاف مشارف مفازة الطريق المخيف موسد حنايا الضلوع الرهاف هموم الغلابه البسكوا الرغـيف مودع سنين الرحيل العجاف وزادك مقاطــع غناك العفــــيف -3- وراجع تقالد نداوة الضفاف بصدق المغني الرقيق الرهــيف يقالدوسامة صباك العفاف ربيعنا وشتانا وغـيوم الخــريف لمحـتك تقاوم قســاوة الظـــروف تطارد شوارد الحروف الغمام تفرش بطون الصحاري الجروف يحرض غناك القوافي النيام تعـــلم مــوالف الرتابة العـــزوف تغني الكـــلام المفيد التمــام تنور حــروفك ضـــلام الكهـــوف تفتح نســايم غناك المســــام تدغــدغ لحونك مـلاين الحــروف توقف صفوف عاشقينك قيام تأمِــن وتضـرع عشــانك كفــوف تأمِل مقامـك كريم المــقام برحـمة إلآهـنا الرحـيم العطــوف مكرم معزز في دار السلام مكرم معزز في دار السلام مكرم معزز في دار السلام ابراهيم محمد أحمد مصطفي ( المك) منتدي السودان الثقافي جده 2002[/align] |
[align=center]
مــريم الأخــــرى محمد عبدالله شمو هاهيَّ الأرض تغطت بالتعب والبحارُ أتخذت شكل الفراغ وأنا مقياس رسمٍ للتواصل والرحيل وأنا الآنَ الترقبُ وانتظار المستحيل انجبتني مريم الاخرى قطاراً وحقيبة ارضعتني مريمُ الأخرى قوافي ثم أهدتني المنافي هكذا قد خبّروني ثم قالوا لي ترجل ثم أنتِ أنتِ يا كلُ المحاورِ والدوائر يا حكاياتُ الصبا تحفظين السر والمجد الذي ما بين نهديك اختبأ ليس يعنيكِ الذي قد ضاع من عمري هبأ وأنا لستُ أدري ما الذي يدفعني دفعاً اليكْ ما الذي يجعلني أبدو حزيناً حين أرتاد التسكع في مراي وجنتيكّ لا عليكْ تشهدُ الآن السفوح المطمئنه نحن قاتلنا سنيناً وأقتتلنا نحنُ سجّلنا التآلف وإنفعالات الأجنه واحتوانا البحرُ والمد اليقاوم والشراع ياهذه البنتُ التي تمتدُ في ديناي سهلاً وربوعاً وبقاع ما الذي قد صبّ في عينيكِ شيئاً من تراجيديا الصراع والمدى يمتدُّ وجداً عابراً هذي المدينه خبّريني ... هل أنا ابدو حزينا هل أنا القاتل والمقتول حيناً والرهينه؟ هل أنا البحرُ الذي لا يأمن الآن السفينه؟ خبئيني بين جدران المسام قبليني مرة في كل عام فأنا احتاجُ أن القاكِ في كل عام وأنا أحتاجُ أن القاكِ في ذرات جسمي في الشرايين المليئةِ بانقلاباتِ المزاج في إنعكاسِ الضوءِ في النافذةِ الاولى وبلّور الزجاج هكذا قد خبّروني ثم قالو ترجلْ وعلى اطروحة الحلم المسافر التقيك على حمى الرحيل المستمر الآن في كل المواطن التقيك في مساحات التوهج ... في جبيني التقيك في انشطار الوقت في كل الذرى وفي حكايات الطفولةِ إذ يعودُ بنا الزمانُ القهقري آه لو تاتينَ يا سيدتي من كل فجٍ واتجاه من عميقِ الموجِ من صُلبِ المياه تستطعين التنقّلَ بين ارجائي وظلّي تستطعين التوهجَ عند لحظات التجلي ولعينيكِ إمتلاكُ وثائقي حتما وقلبي ولعينيك التنصلُ عن مواثيقي ودربي هكذا قد خبروني ثم قالوا لي ترجل وأنا ابحثُ عن صيغة هذا البعدِ هـذا اللانهـائـي عن قرارِ الشعر عن لونِ التغرب بين جدران المقاهي آه لو تاتينَ .. آه تجدينَ الألف الممتدَّ سهلاً بإنتظارك وأنا كالحذر المنساب خوفا بين صالات الجمارك كالرحيل كالترقب وإنتظارِ المستحيل هكذا قد خبّروني ثم قالوا لي ترجـل البحـر .. الشاهـد المشـهود أبدأُ الآن إنتشارى عبرَ أحزان المراحلِ وانتمائاتى العديده وأنا طفل’’ توارى فى عيونكِ أنا سر’’ تدارى فى شجونك جئتُ من خلفِ البداياتِ التى قد أرهقتنى جئتُ من خلفِ النهايات التى قد اطّرتنى جئتُ حرفاً ضاع فى نهرِ القصيده ذلك الخيطُ الذى ينسَابُ فى الألويةِ الحمراءَ والمافيا الجديده ذلك العطرُ الذى لوّنَ جدران العلاقه منطقُ التجريدِ فى فن تهاوى أعلن َاليوم احتراقه فلماذا عشتِ فى ذاكَ التردى ولماذا كنتِ ضدى ؟ وأنا أهواكِ مداً لا يبالى بالرصيف أهواكِ صيفاً وشتاءً ... وخريف أهواكِ وجداً إثر ميلاد قصيده ها أنا اكتُب عن افيون عشقى واصفاً بعضَ انشطارى وانصهارى حين رتقى ها أنا آتيكِ من كلِ المحاور أستطيع الآن تحييد الشغيلة أستطيعُ الآن تحييد النقابه ها أنا آتيكِ ركضاً محدثاً فيكِ انقلاباً ها أنا آتيكِ فجراً فى قطاراتِ الصحافه طاوياً جسرَ المسافه لائذاً بين الازقةِ وانحناءاتِ الحوارى معلناً حظَر التجّولِ وقوانين الطوارى أنتمى الآن اليك تنتمين الآن يا سيدتى قسراً إلىَّ وأنا أرفضُ تقنينَ الروابطْ ارفضُ الحلفُ المقام الآنَ بين الجسًرِ والظلِ المرابط والنهاراتُ مشاويرُ تمنٍ والنهاراتُ مواخيرُ تدنٍ النهاراتُ ابتداءات’’ معاده معرض’’ أبكى حتى اطراف الوساده والبحرُ قطعاً يعرفُ السر الدفين ينثنى نحوى ونحوك موكباً لا يستكين البحرُ كان مطارك المغلقَ فى كلِ انتشار كان باباً فى ملفاتِ الحوارِ البحرُ لا ينفكُّ يذكرُ كلَ أشكلِ انتحارى والنهاراتُ إحترامُ الفعلِ والأطر المقامه النهاراتُ التطرف والتحالف والدوامه والنهاراتُ انتباه وخراطيمُ مياه تكنسُ الآنَ القمامه [/align] |
حاول التعبير عن المعاني التي تظهر أو تختفي في النصوص الشعرية بمعادل صوتي
تعلمت من سواد الناس كيف أكون برقاً بانتمائي لشعبي العظيم حاوره هاشم كرار توطئة هو ثروة قومية مثله مثل حقول (الذهب الأبيض) في الجزيرة الخضراء... مثل حزام الصمغ العربي في كردفان (الغرة أم خيراً برة)... مثله مثل حقول الذهب الأسود في بانتيو والمجلد ومدرسة الغناء والتطريب يلتف حولها- الآن- جيل من شعراء الأغنية في السودان، ويلتف حولها الملايين... الملايين من متذوقي الأغنية المتقدمة على امتداد أرض المليون ميل صوته فرد... وصوته جماعة... وصوته أمة، فيه في صوته كل كبرياء الجرح وجرح جيل بأكمله، أشواقه، همومه، عذاباته تطلعاته، نداءاته، دقات قلبه، ودقات قلب الكون. ما سبق جزء من مقدمة الحوار الذي أجراه الأستاذ هاشم كرار ونشر بصحيفة الوطن القطرية قبيل رحيل الفنان مصطفى سيد أحمد كآخر حديث صحافي... نعيد مقتطفات من ذلك الحوار الهام جداً والذي أجاب خلاله على السؤال الفلسفي الهام الذي يواجه كل مطرب لمن يغني مصطفى سيد أحمد؟ وتساؤلات أخرى ولأهمية الحوار نعيد نشر جزء منه: أنت هكذا، يا أستاذ مصطفى معطوب الكليتين لسنوات وسنوات... لكن رغم ذلك مازلت تغني... بل مازلت تبدع.... تضيف مجداً- في كل يوم جديد- للأغنية السودانية، أريد الآن أن أسالك عن هذه التجربة الاستثنائية تجربة الغناء في خضم الألم؟ صمت لفترة خلتها قد طالت أخيراً جاءني صوته الرحيب من وراء شاربه الأبيض الكثيف المميز: الألم شعور ذاتي خاص، والتعامل معه ومعايشته يومياً يورث المرء قدراً من الجرأة، وقدراً كبيراً من الشفافية والألم، من خلال معايشتي اللصيقة له يلون الطاقة الإبداعية... يشحذ همتها من خلال عملية الإسقاط هذه ، ومن خلال الجرأة المكتسبة، والشفافية تتفجر الطاقة الإبداعية بشكل أو بآخر. أيضا ومن خلال معايشتي للألم، يمكنني أن أقول أن الألم قد يجعلك تنكفئ على ذاتك أو تنفلت منها وفي حالة الإنكفاء على الذات تتوارى كوامن الإبداع وتندثر وتموت... وفي الحالة الثانية... حالة الانفلات تكتسب قدرة أكبر في الإحساس بألم الأخرين ويستميل هذا الإحساس إلى مشاركة أعمق وأرحب، وبشكل موضوعي. المسألة في ظني أشبه بالتربية في الصوم إحساسك بالجوع في الصوم يجعلك تحس بجوع الآخرين تلتفت إليهم... تتعاطف معهم تنحاز إليهم وتتبنى- في الغابة- موقفاً معارضاً للجوع حيث وجد وأنى كان. إذن... من هنا يمكن أن نقول أن انحيازك للنصوص وليد تجربتك مع الألم؟ إلى حدٍ ما. وإلى حد أبعد؟ لقد كانت معرفتي بالشعر وتذوقه وإدراك الصادق منه وراء ذلك ثم كانت تجربتي مع فن الدراما وقبل ذلك كانت تجربتي مع الرسم والشعر والدراما والتي كانت وراء وضوح رؤيتي في اختيار النصوص التي تتفق مع موقفي من الدنيا والواقع وجملة الأشياء. أعود وأسألك لماذا إلتمعت فيك موهبة الغناء واندثرت أو كادت موهبة كتابة الشعر وموهبة الرسم؟ بمعنى لماذا أصبح الغناء سيد الموقف الإبداعي فيك؟ الطاقة الإبداعية واحدة وأن تعددت أشكالها هذه حقيقة غير أن هذه الطاقة تعبر عن نفسها في المجال الذي تمتلك أنت فيه، أدواته، ومفاتيحه، لا تندهش إذا قلت لك إن الطاقة ذاتها التي كنت أكتب بها الشعر هي الطاقة نفسها التي كنت أرسم بها وهي ذاتها التي أنشيء بها الآن أعمالي الغنائية الموسيقية، بعد أن امتلكت أكثر أدوات ومفاتيح الغناء من خلال دراستي الجادة في معهد الموسيقى والمسرح، والذي تخصصت فيه في علم الصوت تكنيك الأداء الصوتي... الصوت البشري قديمة وحديثه... إلى جانب المواد الأخرى من الدراسات الموسيقية. أنت تخصصت كما قلت- في علم الصوت... وأنت بالطبع- من المؤمنين بالمقولة التاريخية التي تقول (أعرف نفسك) الآن انطلاقاً من كل هذا دعني أضع صوتك في طبلة أذنك كيف تسمعه... ما هي ملامحه... في أية خانة من الخانات الصوتية يمكن أن تضعه لنا؟ ابتسم الأستاذ مصطفى سيد أحمد صمت قليلاً ثم قال: إني أمرؤ أتنفس بالغناء وباستمرار أحاول أن أعبر عن المعاني التي تغيب وتظهر في النصوص الشعرية بمعادل موسيقى وصوتي! أي بُعد في صوتي أو ارتفاع فيه أو انخفاض في درجاته السفلى هو تعبير أصيل عن تلك المعاني التي تبين وتختفي! ليس هناك صوت زائد أو ناقص عن الضرورة التعبيرية يبدو أن السؤال مازال قائماً أين تضع صوتك في أية خانة من الخانات الصوتية.؟ صوتي من فصيلة (باص بريتون) وهي الدرجة الأولى من الأصوات الغليظة عند الرجال. من من المغنين السودانيين يشاركك الانتماء لهذه الفصيلة؟ صديقي الفنان محمد ميرغني وأيضا جلال الصحافة قلت الآن دعني أسألك لمن يغني مصطفى سيد أحمد؟ الفنان أي فنان حقيقي- عبر التاريخ كان، وسيظل له موقفه الصارم من العالم الذي يعيش فيه كان الفنان وسيظل ناقداً مبيناً لقيم الخير والحق والجمال... كاشفاً لكل أقنعة القبح ومظاهره... محرضاً على الثورة والتغيير... راسماً معالم الحلم والظلم والظلام وأنا مثلي مثل أي فنان حقيقي آخر كان لي موقف صارم قبولاً ورفضاً ونقداً وتعرية... لذلك فإنني أغني لجملة الناس بما يعبر عن هذا الموقف أنني أتعطل أولاً... أتنفس بما أغني نصاً وموسيقى ثم أعيد تقديمه مرة أخرى لمنبت غناي: جملة الناس الذين ما انفصل غناي عنهم وعن همومهم، وقضاياهم في يوم من الأيام أنني أؤمن إيماناً لا يشوبه أي نوع من التزعزع بضرورية الالتزام بأرضي وأمتي ومن هنا يجئ اختياري للنصوص الشعرية التي تمجد هذه الأرض وهذه الأمة بأية صورة من الصور ومن هنا يجئ الالتفاف الكثيف من أبناء أمتي حول إسهاماتي! حقيقة أنني لا أجد في نفسي مساحة لذلك النوع من الغناء الذي يعطي الناس (التعسيلة) و(الغمدة) لا أجد غناء يعطي الآخرين وسائد الخدر اللذيذ والطرب فواقعي من واقع أمتي وأمتي واقعها أليم ومفجع ويبقى بالضرورة أن نلمس هذا الواقع، ندق على أبوابه لشحذ الهمم والتحريض على التماسك لقد سقطت- بالطبع- فكرة الفن للفن، وبقيت وستبقي إلى الآن مقولة الفن للإنسان... والحياة. أنت الآن فنان جيل بأكمله في السودان... هذا اعتراف من الكثيرين... كيف تأتى لك ذلك؟ منذ وقت مبكر أدركت دور الفنان عبر التاريخ، مثلي مثل غيري خرجت من صلب شعبي غير أنني رأيت في الأغنية شيئاً مبتذلاً إذا لم تحمل هذه الأغنية هموم هذا الشعب... عذاباته، أمانيه وتطلعاته... ومنذ البداية، أيضا وضعت نفسي تلميذاً في مدرسة هذا الشعب: أتعلم فيه... أشاركه همومه اليومية قضاياه... انفعالاته... تشوقه للمستقبل... رفضت أن ابتعد أو أتعالى في برج عاجي وهمي عن سواد الناس، فتعلمت منهم كيف أغني الغناء الذي يعبر عنهم، وكيف أعيش إحساس المشاركة العامة، وكيف أكون برقاً بانتمائي لشعبي العظيم. لقد رفضت أن استدعي الماضي لأعبر به عن قضايانا الآنية أو المستقبلية من زاوية أنني الأقدر على التعبير عن واقعي وآفاق مستقبلي من السابقين... وكان ذلك بالطبع تجاوزاً لكل أدبيات الركود والردة حدثت الأغنية السودانية في فترات ما تغنيت به كان خروجاً عن (المتواضع) و(المألوف) وكان خروجاً عن النص السائد غير أنه كان يعبر بإيمان عميق... عن الواقع. لقد طرحت مشروعي من خلال جلسات استماع في بداية الثمانينات... تعلمت من خلال الحوار الذي كان يدور في هذه الجلسات الكثير، الكثير مما يعتمل في نفوس الناس من هموم ومشاكل وقضايا ملحة فيخرج غنائي من بهو روحي معبراً عن المشاكل والقضايا حين امتنعت الأجهزة الرسمية (بلجان نصوصها وألحانها) الخائبة التي ساهمت في ركود الأغنية السودانية كثيراً حتى صارت شيئاً مكرراً ومسخاً مشوهاً يحاولون تجديده وتزيينه باستدعاء (أغنية الحقيبة) التي لا تعبر عن زمانها وهمومها، في الوقت الذي كان قد تغيرت بالتالي المضامين الشعرية.... وتغيرت النصوص إلى نصوص جديدة لشعراء شباب يكبرون ويكبرون بنصوصهم الجديد في كل يوم جديد. ويصمت فناننا مصطفى سيد أحمد لفترة ثم من مكان ما في أعماقه يجيئني صوته أخيراً ليقول المسألة مسألة تشكيل جيل جديد متذوق للأغنية السودانية لم تكن سهلة، ولم تكن قفزة فوق المراحل وإنما كانت توخي أمانة شاهد العصر الذي قرأ الواقع قراءة متأنية عراه برؤية واضحة، وبشر بكل احتمالات المستقبل. الآن كيف ترى مستقبل هذه التجربة.؟ أتوقع أن يصير هذا توجهاً عاماً وكاملاً عند أبناء الجيل القادم.... سواء كانوا شعراء أو مغنين فالأغنية لم تعد ترفاً لم تعد أرجوحة تخدر... الأغنية صارت هماً قناة لنشر الوعي الذي تعجز عنه كل برامج محو الأمية. كيف يمكن لنا أن نعبر بأغنيتنا السودانية حدودنا الوطنية... إلى العالم من حولنا؟ أغنيتنا- دون أي نوع من التحيز- يمكن أن تشكل إسهاماً نشارك به الآخرين فنصوصنا الشعرية الغنائية متقدمة إلى حدٍ بعيد، ومقامنا الموسيقى- رغم خصوصيته- ليس غريباً عما هو موجود في العالم، غير أن ما يميزه هو أنه يعبر عن وجداننا نحن عبر التاريخ فقط، يبقى علينا أن نسبغ هذه الأغنية باللون العالمي الذي يشكل قاسماً مشتركاً بين كل شعوب الدنيا. |
[align=center]
سحــابـات الهـموم عمر الطيب الدوش سحابات الهموم .. ياليل بكن بين السكات والقول وباقات النجوم الجّن يعزن فى المطر فاتن عزاك رجعن وشوق رؤياك دوام مشدود على أكتاف خيول هجعن وصوت ذكراك مكان يجرى يلاقى السيل وسر مدفون بصدر النيل و لولا الذكرى مافى أسف و لا كان التجنى وقف وصوت ذكراك رزاز صفق على خطوات بنات سجعن وصوت ذكراك حنين لى غيبة فى المجهول و لولا الذكرى مافى وصول و لولا الذكرى مافى إصول و لولا الذكرى مافى شجن [/align] |
[align=center]عـدّي فــات
صلاح حاج سعيد عــدّى فـات زمـن العيون الإلفــة والحـضـن الملاذ ورهـافــة الحس البـلوّن ضـحكة النـاس العــزاز بـعـد الحـنـان الكـان زمـان إســتـوطـن المـطــر الحراز روّح زمــانى وفى رجــاك قـاسـيـت مـرارة الإنـتـظـار فى ضـل شـبـابـيـك السـفـر صـادقـت لـيلات الأمـاسى الـتـايهة فى بحـر الأمانى بـتـنـتـظـــر لـو يـوم طـيـوف لحظـك تمر تعبر خيالاتك تـفــوت قـلـق المـواعـيـد الضّـجـر سـهـر العـيـون الإحـتراز تـعـزز الـنــوم الخـــزاز وإتمــدد الشــقا فى العـــمر مـلّـيـت تـبـاريـح الجـراحات البـقـت بـعــدك أسـى وزمــنــاً قـســــــا وحـــالاً أســيـف ومـشــيـت أفـتـش عـن خـطـاويـك الـقـبـيـل مـضّــارى من زمـناً وراك مـلانى خــوف أشــتــقــت أرتـاح فى عـيـون فـيـهـن مـلامحــك ذاتــا مــن غـير أىّ زيـف وإشــتـقـت لى ضـحكة صـبـاحك والدعـاش عـطّـر رزاز مـطـر الخـريف أنا وإنـت والدنـيـا الزمـان والناس وفـا وخـوّة صـفــا ودفء المشاعر الشاتية صيف أنا وإنت والدنيا الزمان زمن الغناوى الطالعة من قلباً رضى وحســّاً ندى وزوقاً رهيف أنا وإنت والـدنيــا الأمــان ما العمر شتّان بين أوان زمناً حييتو وعمر ما بتقدر بتعرف بكرة يصبح حالو كيف [/align] |
[align=center]
كتبـت ليــــــــك صلاح حاج سعيد كتبت ليك لا بينى بينك ريدة لا قصة غرام إخترت ليك أجمل حروف وأصدق فواصل نادرة فى لغة الكلام لا قصدى ألهو معاك بى كلمات غنا لا شعرى ليك مرجيحة من شعر الغمام كتبت ليك والله يا قمر الزمان شان جيتى بى زمن المحنة وشفت فى عينيكى حس أهلى القُدام كتبت ليك وأنا جايى من زمن الشقا الممدود على وش الثوانى مظللا تتمدد الساعات سنين تتفتح الأحزان غريبة ومذهلة وأشتاق أفتش نسمة فى الزمن العذاب وأيامى من كتر الأسى وكتر العزوف والإغتراب صارت حروف مترهلة لحظات أسيفة ومهملة كتبت ليك ووقفت ليك لامن لقيتك جايه من قلب الطريق ولمحت فيك راحة المشاوير البعيدة ونفحة النسمة الحنينة الجاية من قلب الطريق حسيت عجايب الدنيا إتلمـّت بقت جايـّانى من عصراً سحيق عينيكى حس أطفال بنادوا القمرة لى الغايب يعود وجبينك الضوّاى حجا الحبـّوبة فى الزمن السعيد وأنا فى قساوة الموحش الزمن المكهرب بالحريق أنا حيلتى أيه قوليلى يا قمر الزمان غير أتـّكى وأحلم معاك وأحضن أماسى الصحو والأمل البريق[/align] |
[align=center]
عـز المـزار عبد العال السيد من بعد ما عز المزار والليل سِها وملّت نجومه الإنتظار والشوق شِرِب حزن المواويل وإنجرح خاطر النهار وبقيت أعاين فى الوجوه وأسأل عليك وسط الزحام قُبـّال أتوه يمكن ألاقى البشبهك ما الليل براح والشوق تعالى بيندهك شايلاه وين النيل معاك عصفورة جنحاتها النجوم وأنا بى وراك بسأل عليك مدن مدن وأعصر سلافة الليل حزن بسأل عليك فى المنفى فى مرفا السفن يمكن طيوفك أُخريات الليل تمر تملا البراحات للحزين طول العمر ما نحنا بينا الأمنيات والتضحية بينا المعزات والعذابات فى الحياة بينا الهوى إخلاص على قلب إنكوى وكلام قديم قلناهو آخر الليل سوا إنو راح نتلاقى لو طال النوى لكن كلامنا الكان وكان خايف يكون شالو الهواء :cool: :o :o :o [/align] |
الجميل المسافه
سلامات يازول يا رائع اتابعك باعجاب شديد التحيه لك على مجهودك المقدر ضليت قاسم ابو ذيد ضليت هرب منى الامل جنيت جافانى الشروق حنيت كنتى معايا فى لمه دليب شاشاى فى ايقاع حشا المردوم فى جيد الزمن سوميت مرقت على محطات السفر غربه وما لقيتك امل شارد مع انك معاى فى زحمه المشوار وحتى يغينى عاد من تانى صحاك من حنين ذاتى نجم الفرحه يا عايد تعالى معاى من زفه نفس مسدار وما جرتق فرح كانت ولا طعم الشقاء الروح خطاى هانت وانت معاى شايلاها القوافى معزه فى عمق الفرح دوبيت وكت ضليت قعدت براى وحسيتك بتطلعى من نفس طوريه ضامه الطين ومن دمعه وجع طول ندا العرق البنادى حنين واناديك وانت فى ذاتى مخاوف سكه اهاتى مداين قريه لابسه القمره شامه ضؤ يحن يغشاها مره شروق يخدر من عرق تربال يرتاح فى ضليل واسوق ينادى تراب يغازل خدره السيال تطل شروق تكون قمر السعد ضويت محبتى خالصه لك المسافه |
| الساعة الآن 03:23 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.