ياشاعرات وشعراء المنتدى الداير يوثق اعمالو يدخل هنا
الاخوات والاخوه الشاعرات والشعراء
فكرة البوست ليست بالجديده وقد تم ورودها في العديد من المنتديات ولكن هذا لا يمنع ان نكررها هنا ايضاً وربما سبقني اليها احد الاخوه من قبل في هذا المنتدى وهذا ايضاً لا يمنع من احياء الفكره مرّه اخرى.. فقط لي رجاء من الاخوه الذين يودون المشاركه ان يلتزموا بالامانه والصدق فيما يقومون بنشره من قصائد فنحن هنا بصدد حفظ حقوقنا وتوثيق اعمالنا وحمايتها من الضياع والسطو من ضعاف النفوس الباحثين عن الشهره حتّى لو كان ذلك بالتسلق على اكتاف الغير. بسم الله افتتح البوست بهذه القصيدهاتاريك لسه فيني --------- اتاريك لسه فيني....وساكن جوّه عيني وانا القايل قدرت انساك وقايل قلبي ملّ هواك لقيت حبك مسهيني ............... مرّت سنين بعد البعاد والشوق دفين تحت الرماد ولمّا الحنين الليله عاد لقيتك انت ناسيني ............. ملكني هواك سنين وازمان فؤادي وراك تعب حرمان بعيده سماك وانا العطشان اريت دمعاتي ترويني .............. اريت الشوق يدق بابك يذكّر قلبك احبابك والقاك ياحبيب جابك حنين لي مدّه كاويني مجدي مسعد حنفي |
بتفتش وشيها مُدُن ..مُدُن
كايس عليها ..و تندها صاحبت الموانى والسفُن لو تلقى بلدا يشبها .. رحلْتَ كما ترحل مُزُن ضيّعت عفوا دربها خيّم وراها الحزن دى الكنت تفرح قربها |
ياشاعرات وشعراء المنتدى الداير يوثق اعمالو يدخل هنا
سلامات يامعتصم
يازول باقي الكلام الجميل دا وين ولا انت اتعلمت البخل اتحفنا بالمزيد الشديد . |
ياشاعرات وشعراء المنتدى الداير يوثق اعمالو يدخل هنا
ياخوانا المنتدى دا
مافيهو ناس بتكتب شعر ولا كل زول قاعد يقلب في اوراقو ويشوف حيكتب شنو في البوست .. افيدونا عشان مانوجع راسنا على الفاضي. |
بكره جاي الدور عليك
-- ----------- زيد قلبي عليك حرقه واجرح احساسي بايديك يالدروبك هم وفرقه بكره جاي الدور عليك .......... اقسى اتمادى في صدودك واجرح احساس البريدك وانسى تصدق في وعودك ياهو طبعك ماجديدك الحنين لو مرّه عاود وذكّرك ترسل بريدك اوعى تتجاوز حدودك صبري كمّل حدّو فيك .......... بكره لمّا خطاك تتعب وتلقى روحك زول وحيد املا كاس الصبر واشرب ضوق مرارته ومنه زيد انت انسان ماطبيعي انت كتله من الجليد والعملته في قلبي اصعب من اسامح واصفى ليك .......... ياما قالوا عليك وعادوا قالوا انك زول اناني بس عيوني الليك رادوا ظنّوا في قربك اماني ويوم حقيقتك ليها بانت وعرفوا في ريدتك هواني قالوا لي قلبي وعنادو انسى سيرة حبو ديك مجدي مسعد حنفي |
اقتباس:
لو ما عارف ومتأكد انك ما خبيث كنت فهمت حاجة تانية:D:D:D |
معاكم انتو ياغاليين
----------- معاكم انتو ياغاليين بشوف الدنيا اشراقات بشوف الكون بديع زاهر ورود ونغم وابداعات ............... معاكم انتو ببقى سعيد ومن عينيّ تطل افراح واسافر في خيالي بلاد ظلام ايامها كلو صباح قلوب سكانها مابتعرف غير بسمة امل وسماح مناهم يشفوا للمجروح وماتعود ليهو تاني جراح ............... حلاوة الدنيا في وجودكم وفي غيابكم بتبقى سراب وراحة نفسي يوم نقعد نداعب سيرة الاحباب قوافي غنايا بلقاكم تلين زي النسيم تنساب وتبقى الريشه فرحانه تسطّر شعري في اعجاب ............... معاكم انتو لو بالايد ربيع العمر احياهو اشيلكم فوق رموش العين وتبقوا لقلبي دنياهو اشيل من عمري واديكم واغرد في لياليكم عساهو فؤادي يبقى سعيد وترجع بسمة افراحو مجدي مسعد حنفي |
العزيز مجدي مسعد .. طابت أوقاتك
معقول حديقة بالجمال دا كلو والواحد يتخطاها إلا يكون عديم إحساس لكن بالجد كدة حروفك تجبر الواحد إنو يقيف عندها والله تخريمة كدة: سر البكا في الفي شعرك دة من شنو ، خليتنا نتجرس معاك زاتو:). التحية/ عثمان الطيب |
ياشاعرات وشعراء المنتدى الداير يوثق اعمالو يدخل هنا
شكراً جزيلاً ياعثمان
على كلماتك الموزونه الدافيه تعرف ياعثمان انا لما فتحت البوست دا مافتحتو عشان شعري انا بس لكن عشان كل الناس تشارك وتكتب وتخلّي حروفها تتنفس لكن للأسف لقيت نفسي قاعد اكتب براي ومافي زول شغال بالبوست لكن غايتو كلامك دا شجعني اواصل عسى ولعل الناس تتشجع وتكتب عشان البوست يستمر ويتواصل ومايقيف بعد مايخلص رصيدي والحراره تنقطع. اما موضوع البكا فمااظن انو مقصود ويمكن دا سببو طبعي وتكويني النفسي ويمكن كمان سنين الغربه الطويله في الامارات اكتر من تلاتين سنه تكون تركت اثر ودا اكيد يعني تخيل اني لي 28 سنه مشيت في خلالهم السودان مرّه واحده لمدّة اسبوعين تفتكر دا ماسبب كافي . ان شاءالله ياعثمان ياخوي الحديقه اشجارها وارفه ومليانه بجميع اشكال الغنا فتابع وان شاءالله ماتندم . |
لما طليتي في ديارنا
----------- لما طليتي في ديارنا وزرتي دارنا هامت السكه بعبيرك وبالفرح فرهد خضارنا ******** زي نغم مبدع وساحر جات خطاويك المثيره خطوه راقصه وخطوه مايسه وخطوه زي خطوة اميره راسمه فوق الثغر بسمه زادت اشواقنا وسعيره خلّت الكلمات تغرد بي جمال ست الضفيره ******** ياما من اعماقنا ليكي قلنا كلماتنا وغنانا ياما نسّقنا المعاني باقه من ريدنا ومنانا واشتهينا نشوف عيونك شايله ريدتنا وهوانا واشتهينا كمان عيونك نلقى فيها بريق هنانا ******** لما طليتي في ديارنا زادت الازهار نضاره الربيع من غير ميعاد طل في حارتنا زاره النسيم في رقّه لامس لي حرير الخد هامس والطيور في نشوى كانت تشدوا في الاشجار حيارى مجدي مسعد حنفي |
مجدى.. وجميع المشاركين...سلام..
فكرة البوست رائعة..فهو محطة للتأمل والتحليق بأجنحة الكلمات.. أعجبتنى كثيراً الأعمال المطروحة فهى كما السهل الممتنع حيث تمتاز بالرقة.. البساطة.. والأناقة فى إختيار المفردات.. واصل.. نتابع معك جميل الكلام.. |
شقيقي الحبيب
في السودان بقت الموضة، شقلبتن الكلام للشئ الجميل يقولوا: شين للظريف يقولو: صعب وهلوماجرآ.. حسي الواحد يقول عليك شنو؟؟؟؟؟؟؟؟؟؟؟؟ غايتو بلخصها كلها، إيجابيها من مقصودة وسلبيها من منقالة بقصد؛ كلامك جميل بالبي بنعرفها قبال الشقبنا وشين بالبنقال حسي والخ.. بقول يابا!! شغلك عجيب وهو أصلن عليك أبدن ما غريب ما إتا ود سيد الشعر، رب الكلام في الغزل، في الهيام في كل معاني الحياة.. زدنا من دلك وسيب دلالك ما تخلي ناس توحآ وأخوك بابكر يقاطعوك ويشردو بنات أفكارك ما هي الحكاية غيرة سااااااااااااااااكت، للبنات العندك بالكوم وإحنا محرومين حتى من طلتهن في المنام.. ليك محبة وعشق |
اقتباس:
|
اقتباس:
أو حتى بنشد كان خليتها تبقى لكربلاء نشيد وين الإنفكاك دا أصلن في دنيا الريد محال.. عجيييييييييييييييييييييييب يا شقيقي الحبيب |
ياشاعرات وشعراء المنتدى الداير يوثق اعمالو يدخل هنا
الاخ العزيز ود البيك
تحياتي وامتناني على رقيق عباراتك ياخي كان من الممكن ان يكون البوست اكثر جمالاً وروعه لو ان الاخوه والاخوات نفضوا عنهم تراب الكسل وتخلّوا عن البخل وشاركوني باعمالهم ومداخلاتهم ولكن مازلت لم افقد الامل في تدفق ابداعاتهم ومشاركاتهم وحتّى يتحقق ذلك ساظل اتحمل مواصلة احياء البوست باعمالي ومشاركاتكم وتشجيعكم . |
ياشاعرات وشعراء المنتدى الداير يوثق اعمالو يدخل هنا
الشقيق الاكبر بابكر
والله يابابكر ليك وحشه وصدقني انا مافي حاجه مزعلاني غير اننا عايشين في بلد واحده الزمن ده كلو ومالاقينا بعض . حسه انا كنت متوقع منك مداخله ولو واحده لكن فاجاتني باكتر من مداخله ( ياهو طبعك ماجديدك )وان شاءالله تواصل معانا دايماً وماتحرمنا من مشاركاتك,تخريمه: يابابكر بوست شيخ التشكس عليك الله ماتهملوا |
ياشاعرات وشعراء المنتدى الداير يوثق اعمالو يدخل هنا
شهد الغرام
0000000 احتمل انك تخاصم وتنفعل وتقولّي في لحظة زعل اسكت مابينا كلام ابعد وماترسل سلام بس احتمل عنّي تغيب وفي دنيتي اصبح غريب مستحيل اقدر اقاوم واحتمل 000000000 عشرتنا ياسيدي عمر والبينا إلفة روح لروح وهوانا لا يوم لا شهر لكن سنين بالحب تبوح لا عشنا آلام النوى لا حبنا يوم انطوى لا باعدت بينا جروح 00000000 مهما حصل بينا زعل او ابتدا بينا الخصام على قلبي وحياتك عسل اصلو الزعل شهد الغرام ماليك سواي ولا لي سواك روحك معاي وروحي فداك وبعادنا ياسيدي حرام مجدي مسعد حنفي |
اقتباس:
يا ريتني كنت شاعرة كنت جيت شاركت معاك ممكن اشارك بخواطر وجدانية:p |
ياشاعرات وشعراء المنتدى الداير يوثق اعمالو يدخل هنا
اهلاً بيك يابدور
الدار دارك والخواطر برضو نوع من انواع الشعر الحر والمقصود من البوست واحه نتنفس فيها بهدؤ وكمان نوثق فيها اعمالنا للحفظ من الضياع والتعدّي في انتظار مشاركاتك . |
ياشاعرات وشعراء المنتدى الداير يوثق اعمالو يدخل هنا
آه يـــــــابلد
0000000 آه يابلد..... آه لو تعرفي الشوق وحسرات الكمد آه لو تعرفي رنين غناي كيف بتخنق ساعة يتولد آه لو تعرفي حنيني ليك واشواقي ليك انا يابلد 000000000000 آه يابلد0000 آه لو تعرفي اللوعه والنار في الضلوع وكيف الفؤاد يزداد لهيب ساعة العيون تغرق دموع وكيف الامل يصبح وهم والليل يلف ضي الشموع وكيف حالي لما يمر نسيم حامل اريج زهر الربوع يرحل يفوت كل الجلد من شوقي ليك انا يابلد 000000000000 آه يابلد حتّى الحبيب ماراضي يبقى عليّ قريب قايلني بنسى بعيد هواه وفي الغربه بختار لي حبيب قايلني من غير ابتسامه ونظره من عينيه بطيب قايلني بنسى وعودي ليهو وهواهو يصبح لي غريب ياريتو لو يعرف شقاي واشواقي لي سيد البلد 00000000000000 آه يابلد لمتين خطاي تسرح تتوه وسط الرمال لمتين اسافر للنجوم والشوق يبدّل حالي حال لمتين حنيني اليك يطول والدمعه يشقيها السؤال ومتين ميعادي معاك يهل ولقانا يصبح ماخيال فاقد حنانك ياهواي وفاقد حنان اهل البلد مجدي مسعد حنفي |
اقتباس:
دسني جوة الروح ولملم القليب المجروح يا فرحتي البتجي وما بتروح بين اديك همومي تروح والوجد بيك اصبح سموح يا بدايا اعتناق الروح للروح انزع من جواي الاتراح وازرعنى غنوة تغنيك للصباح خذنى من اقدار الرياح وادفني خاتمة عهدك الفواح رأيك شنو في المشاركة المتواضعة دي حاسة اني نقطة صغيرة جنب ابداعاتك ( وش خجلان) |
ياشاعرات وشعراء المنتدى الداير يوثق اعمالو يدخل هنا
واصلي يابدور
وخللي الحروف تتنفس وخللي الكلام يرتاح في درّك المنثور |
مجدي
تحايا كبيرة لو ما فتحي نبهني للبوست دة ما كنت حأشوفو على كل حال سأوافيك كل يوم بقصيدة عامية و أخرى فصحى دمتم |
[align=center]معاي الحق[/align]
معاي الحق أكون مفتون و في جوف الزمن ضَهَبان أفتش فيك دريبات المُدُن و عَشَم اللقيا بوصلة و عنوان معاي الحق أكون مجنون من ظُلْمِك ضايق مُرْ طعَم الغُـبُن و في هجرِك ... رِويت من علْقم الحرمان أدَبِك صولجان طلْعتِك .. تاج راس الحُسُن بسْمتِك نيشان مطرزة فوق كتْف الحُزُن ... كلْمَتِك ميزان ... ماخودة من صفحات المُتُن تقيلة زي خطوة مشيتك تَرجِّح كفَّة الولهان عويناتك غمامات هُتُن مُسَطَّرة فوق جبيني عشْقاً يزيدني هوان قدَرمكتوبِك تشوفو العين محل ما دار بِوديني.. أي مكان يرجِّعْني وكِتْ ما دار .. أي زمان المهم تكوني معاي مسكون فيك .. ساكنة حداي حدقة عين عزيزة و غالية .. روحي التانية من جواي و معاي الحق أكون مفتون *** جلال داود الرياض 13 أبريل 2009م |
الاخ العزيز ابو جهينه
شكراً يازول على المشاركه الجميله وقالوا وعد الحر دين وانت وعدت انك تتواصل مع البوست وزي ماقالوا اول الغيث قطره . شكراً ليك يافتحي وان شاءالله نخدمك في افراحك قبل اتراحك:) |
ياشاعرات وشعراء المنتدى الداير يوثق اعمالو يدخل هنا
خلّيني احلم باللقا
000000000 خلّيني احلم باللقا لو اللقا اصبح محال وفي غفله من ليل الشقى اوصل معاك حبل الوصال ******** خلّيني اتخيّل انا وانتي على قمة جبل ماحولنا غير الفضا وفي قلبنا نور الامل خليني اكتب في العيون باقة غزل من كل لون والهاله من حول الجبين زي بدر في ليلو اكتمل ******** خليني احلم والحلم لعلّتي اصبح دوا الشوق سقى قلبي الم والليل كوى عمري جوى اذكر سنين عمر الغرام في صحوتي وعز المنام واصبر على غدر السنين واصبر على هم النوى ******** يادنيا آه قالوا الحبيب مهما عمل ليلو سهر لابد يسافر في المغيب كل ليله يستنى القمر يادنيا آه كم كم شقيت يوم اختفت عنّي وبكيت كل ليله يشجيني الحنين ومنامي فات دربي وهجر مجدي مسعد حنفي |
( هي الوحيدة التي لم تفرح عندما إنطلق محبوبها باللوتري كعصفور إنعتق من ربقة الأسر ... قلبها كان يحدثها بأنه لن يعود ... و لكن دائماً تبقى جذوة من الأمل تطل من كَوّة صغيرة تُدْخل النور و الأمل ..
إستميحك عذراً أيتها المنتظرة ... فقد ترْجمتُ صبرك إلى هذه الأبيات .. علها تضيف شيئاً من نور أو أمل إلى ما تبقى لديك .... ) مكانك هنا متروسة بيك كل الجهات لا شَرْق البعاد بعيد شرَّق خيالك لا غَرْب الجفا تاه غرَّب سؤالك مكانك هنا .. بس إنت و أنا شمال نبْض القلب يمين حَدَق العيون و فوق سقْف الهُدُب مُدَوْزِن همْس الدندنة قُرْبك هنا رغم البعاد مُوَنِّسْني صمت السهاد معذبني .. و كاسيني العَنا رضيانة بيهو و عافية منك .. و راضية عنّك .. رغم الضنا خليك هنا تملا الكون غُنا أبداً ما عنك غِنا راجياك هنا .. تفرش العتْمات سنا ما إنت يا سيد الدُنا مالي دنياى هَنا سُكْناك هنا لا شرق البعاد غاب شرَّق ودادك لا غَرْب الجفا فات غرَّب مِعادك عايشاك بداية و غاية مُنَى متحكر جوة الحشا ترياق شِفا و أحضان دَفا عاوزاك هنا ... لو طال غيابك .. تلقاني.. ياني ال أنا قِبْلة وفا راجياك هنا لا بطرا البعاد لا بقول حسيت جفا مكانك هنا *** جلال داود ( 2008م) |
مهداة الى صديقى الجيلى والخال ..
شيخ سيسيليا و فكى اقليم التفاح بمناسبة القهوة فى الالمانى ويتصاعد زى رقصة تتساما .. و تعلن ولادة ريد .. و تسطع بين تمرتين و تقيد بين جمرتين نساما تتباهى بقعة ضو .. يدخل صدر الصبية شهيق تشخبط فى المسافة خطوط تغزل خيط فى خيوط .. تولع فى البسيطة حريق و يرقص .. فى صعودها كمان .. وبين شفتين يبدو المبسم المحظوظ .. كما القبلة و يركع قلب كما لو أنك الشفاه قِبلة .. ومن النار يجيك نسام يا انتى الجمر أقسام .. ناس فى الايد وناس تحرق حشاها السام ويتوحد شهيق مع الدخان .. وبينى و بينك عناد و خصام وشهقة موت .. زفير ليلاك.. نار فى ملاك . يا مأزوم .. النفس انكتم من لاك زفير من فاك ..وتعالي نخمس الفنجان .. نحن وبس .. قبال يروح حسى .. تروح الروح.. نضيع نحن .. يطلع من فاه الصبية قبس وأقول يا دنيا كونينى ..و اكون محل البرنجي نفس .. |
ياشاعرات وشعراء المنتدى الداير يوثق اعمالو يدخل هنا
سؤال يااهل اللغه
في النص الاخير (خليني احلم باللقا ) في المطلع انا كتبت وفي غفله من ليل الشقى ومعروف اصل الكلمه الشقاء يعني كان مفروض اكتب الشقا بس انا لما رجعت للجوجل لقيت في مثل دايماً بنقولوا لما نكون عايزين نعمل حاجه صعبه والمثل هو: استعنا على الشقى بالله ..ولقيت الكلمه مكتوبه في المثل زي ماانا كتبتها في القصيده فما عارف هل كتابتي ليها الشقى غلط ولاّ ممكن تتكتب برضو كدا ياريت اهل اللغه يفيدونا لتعم الفائده على الجميع . بالمناسبه فتحي هو اللفت انتباهي للموضوع دا فله الشكر. |
طول الليل مانمت بفكر . . فيك والنيل وأنين الساقي
وجدول شوقنا الطالع منك .. ودالق فينا حنينو وساقي .. - - - - - - - طول الليل بيناتك راحل .. لامليت لاقلبك ضـــــــــــــاق .. إتكلمت معاك عن بكرة .. واتونسنا كــــــــتييير ودقاااق .. وكان الليل من جوة عيونك .. دالق حنو علي العشاق .. إتمنيت ماتشرق شمسو ..ويفضل دفئو .. حنو وهمسو .. ويفضل ضي إشراقك باق .. ولامن شمس اليوم التاني ..إنتي أماني ..إتجزرتي وطي الأعماق .. وإستوطنتي مداخل قلبي .. ومهما طال في دربك دربي .. الأشـــــــــــــــــواق ياها الأشـــــــــــــــــــــــواق ... - - - - - طول الليل الفات بالذات ..كنتي معايا وكنا رهــــــــــــااااف .. شلنا غناوي اللهفة مشينا .. وحمنا الدنيا أرياف أرياف .. إتواعدنا تحت تمرايا ..إنتي معايا .. صورتك واااضحة ومابتنشاف إتعانقنا عناقا حااار .. إتواثقنا من الأطراف .. وإتعاهدنا عقاب أيامن .. تبقي عليا وأبقى عليكي .. آلأف آلاف .. - - - - - طول الليل وعيونك تنده .. يا أحضان ضميني عليك .. وفيض الشوق المني مدفق .. طالع مني وداخل ليك .. يملا بيوت الدنيا أماني ويظهر سرو علي عينيك ... - - - - - طول اليل يابت نتناجا .. والعينين فايضه ورقراقه .. ميتي قلوب بي شوق عينيكي .. وميتي عيونك بي أشواقا .. |
الحمد لله البوست ابتدا ياخد الشكل الكان مفروض ياخدو من الأول والبركة في المخضرمين الفتحو عليهو نفاج..والعجايز بيشجعو بعض..أبو جهينة رجع معتصم:p للأسف التوقيت الاتفتح فيهو البوست كان صعب عشان الناس كانت ملهية في الحبيب الأشتر وما فاضية للجمال(ناس كايسة جنازة تمشي وراها):D والوش دا هو السبب.. عموما انا لما علقت علي الألف الاسمها شنو ما متذكر البتبقي ياء أنا حسيت انو هنا ما مكانا.. أها مكانا دي ناقصة الهاء عشان تكون مكانها لكن أخوي ود مخير فرض علينا الكتابة بالطريقة الامريكانية :تكتب زي ما تسمع مثال: جدن بدل جدا.. كدا(نستنا) نستني الجماعة المستعربين .أقصد بتاعين العربي عشان المستعربين ديل ما عرب..عشان نشوف رايم شنو.. |
ياشاعرات وشعراء المنتدى الداير يوثق اعمالو يدخل هنا
وانا زاتي قاعد مستني
ان شاءالله بس مايطولوا علينا عشان السؤال مايضيع في زحمة القصايد . |
[align=center]( هيْتَ لك )[/align]
قالت ( هيْتَ لك ) و هامت به ... حسِبتْهُ قد بادلها الشغف ... و أنه قد توسَّط مثلها جوف المُعْتَرك .. سلب منها اللبَّ حتى لا فكاك .. و تربع بالروح ... و توغَّلَ .. و امتلكْ أقسمتْ في سرها : أنتَ لي .. و أنا لك فتودّدتْ .. بسحر حواء الذي أوْدى و هلكْ ... و بذاك الذي تشابكَ و أشْتبك دعتْهُ إلى بهو جمالها ... مسحوراً تقدمْ ... متوجساً ... حذِراً ... متربصاً ... قاب قوسين من هذا و ذاك... أو بحبائلها ( على وشَكْ ) فغلَّقتْ دونه أبواب لهفتها و قالت : ( هيْتَ لكْ ) الحبُّ لكْ الوجْدُ لكْ البوْح لك أنت .. ثم أنت .. يا مَلكْ حلوُ حديثُك ذاك .. طُعْمٌ و ( شرَك ) محبوسةٌ في قمقم عشقك المجنون ... لمساربي يا أول مَن قد سَلَك ... لا تعتقني ... أنا يمينك إذْ مَلَك .. أيساورك في عشقي الملهوف أدنى شك ؟ هيْت لك ... في مهجعي .. أو من مكْمَنك .. فهلُم ... أفْضُض حلمي العذري .. فهو لك .. كل غُرف القلب يا سعْدي ... رهْن إشارتك .. بل مسكنك ... و قُدَّ قميص فؤاده من دُبُرٍ ... فألْفى عند الباب سلطانة العشق القديم .. فتوسل بالشوق القديم .. فقالت : لا ذنب لك .. إن كان قد قُدَّ من قُبُلٍ .. أو قُدَّ من دُبُرٍ .. فأنت لي .. و أنا لك جلال داود ( الرياض 2008م) |
اقتباس:
صاح تكتب الشقا وأيضا الشقـَى ( بتوضيح الفتحة فوق القاف) .. |
ياشاعرات وشعراء المنتدى الداير يوثق اعمالو يدخل هنا
شكراً يامعتصم على التوضيح
بالنسبه للفتحه فوق الياء انا دايماً بكتب الياء بالنقط تحتها والتانيه من غير نقط ودا شي اتعودت عليهو من ممارسة الخط (اخوك خطاط قديم من القرن الماضي). |
ياشاعرات وشعراء المنتدى الداير يوثق اعمالو يدخل هنا
سلّمت ليك امري
0000000000 سلمت ليك امري لو ترضى ياعمري ترحم شقى حالي تطفي لهيب جمري ****** قلبي الرهيف وافي ابيض بلون النور عاشق وليك صافي مهما الليالي تدور ****** في رقتك وجفاك زي النسيم والريح ايام تقول بهواك وايام تفوتني جريح ****** لو غبت عن عيني يبكي الفؤاد مجروح البسمه تشفيني وترد معاها الروح ****** ماتسيبني للأوهام وتلعب على الحبلين ريدك مع الايام سكن الفؤاد والعين مجدي مسعد حنفي |
بسم الله الرحمن الرحيم
الأحبة فتحى , مجدى , الباش شقى .. يشقى .. شقاء شقاء هنا مصدر وتكتب هكذا ( شقاء ) وتحذف الهمزة فى حديثنا بالعامية وعند ضرورات الشعر ( تخفبفاً) والشقى بكسر القاف صفة لمن وقع عليه الفعل وتلحق بها حركات الإعراب حسب موقعها من الجملة أما ( الشقَى ) بفتح القاف فلا أعلم لها أصلاً فى اللغة لأن هذه الياء لا تعود الى ألف فى الفعل الثلاثى فيتعذر فتح ما قبلها عليه فإن (الشقَى ) بفتح القاف ما هى إلا (الشقاء ) فى فصيح اللغة والله أعلم |
سلام يامجدى ومشتاقين
ياخ الجمال ده كله ومخلننا نحن هناك مع الشكل والمشاكل .. يادوب الصفحة الأولى وراجع .. |
قبل القاك
،،،،،،،،،،، قبل القاك ياحلوة سنين انا تهت في الدنيا وبقيت سواح مراكب الغربة شالني وودني وفوق بحرا كبير هدار وعكس الموجه والتيار وكنت براي ياحلوة أنا الملاح اصارع فوق عواتي الموج لما الموج تثيرو رياح وصلت الشاطئ بي عنوة ولقيتك انتي يا حلوة لقيت عينيك رحبو بي ونسوني العذاب البي وفقوق عينيك بدور ارتاح شوية انجم وافتش لي حروف اسمي كان تتلم وعمري الراح شويه ارتاح |
من مثلي أنا
ــــــــــــــ لا تسالي تستأذني بل ادخلي ما عادت الابواب مؤصدة لديك ولي زمان رتاجها الذهبي فقط انزعي عنك التردد وادخلي وان سآءلوك ...ّاذا قالوا أعرشك هكذا قولي بلي هو ذا انه هو..... انه لي وحدي انا إذاً ادخلي خذي مني الصولجان تربعي احكمي وتحكمي و تملكي كل الجوارح فأنت سيدة الجوانح تسربي .. تشربي وتملكي اغوار نفسي تمددي وأن سآءلوك لما قولي فيما إنه عرشي انا وآهـ .. انا من مثلي انا انا لا هنا .. ولا هنا مثل الفراشات الجميلة اطير لا ارتوي لا ارعوي في نشوتي في فرحتي في بهجتي لا مبتدى لا منتهي اغوص في بحورك الدفيئة اعود باللآلي بالكنوز الله .. من غيري بها يفوز وانا من مثلي انا يحي عثمان "مايو 2009م" |
| الساعة الآن 05:27 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.