نفًاج سودانيات ( لو أعيش زول ليهو قيمة....)
سلامات ، وطابت أيامكم بكل خير وبركة..
تماشياً مع مسمًى دورة 2010 نداء إيمان ، بطرح عليكم الفكرة دي : وإللي بتتمثل في قتح نفًاج إنساني يربطنا بكل الحالات المرضية البتستدعي الوصول ليها .. هي محاولة لإنو الواحد يعمل حاجه منها فايده ، وتكون تيراب لعلاقات إنسانية أسمى ، ومحاولة لإنو الواحد يزيد رصيدو الإنساني .. الفكرة إنو نكون ، بالراحه ،.. وحاضرين.. بالراحه ، و بدون show إجتماعي ، نعمل على إنو نصل الحالات البحتاج إنو نكون حاضرين.. وحاضرين دي ما بالضرورة إنو تساهم مادياً .. لأنو إذا ما كنت حاضر مادياً ، قد قد تساهم بشكل أو بآخر في إنك تخفف من معاناة أخواننا/ أخواتنا.. ---- الجمهور المستهدف من النفًاج : مرضى السرطان ، عجزة ، لقطاء ، أي حالات إنسانية يقتضيها الموقف.. الموارد : دعم من المنتدى ، ونشوف مقترحاتكم إللي عندو إستعداد إنو يلتزم شهرياًُ بمبلغ وقدرو .. أهلين ومرحب بيهو إللي مابيقدر يلتزم شهرياً .. أهلين ومرحب بيهو لكن قبل كده ، محتاجين نرشًح هيئة مالية من عضوية المنتدى ، وبعدين همً وتنسيقم. برضو ما نغفل الموارد البشرية : * تواجد الإخوة الإعلاميين( الصحفيين )مهم جداً ، لأنهم نفًُاجنا مع الجمهور.. الجمهور إللي قد تكون فيهو حالات مرضية ، وقد يكون فيهو ناس خيًرين.. * الأطباء : نعًول عليهم كتير ، في العلاج المجاني ، والحاجات الممكن يقدموها من إستشارات طبية ، * ولاد / بنات الحلال ( فاعلي الخير ) --- دي الفكرة البتدور في ذهني لفترة طويلة ، وبنقاشات داخلية مع زملاء وزميلات.. إرتأينا إنو نطرحا ليكم ، ونعمًما ، بقصد الإستفادة أولاً من مقترحاتكم ، والتوسًع فيها.. وبقصد إنو نرمي تيراب للمشروع ده .. -- ولو أعيش طول عمري نسمه ،، أو مع الأيام سحابه ،، أهطل وأدي الدنيا بسمه ،، أروي وادي وأسقي غابه.. |
العزيز شليل طابت أيامك بالخير .. هي بذره .. ستصبح شجره .. سيأتي أكلها كل من يحتاجنا .. معك ومن معك كلنا سواء .. بإذن الله معكم مادياً ومعنوياً وحضورياً .. وبكل الألوان .. حقاً أنه شيء مبهج .. لك ولهم التحيه والتجله والإنحناء .. سامق أنت .. وإلى الأمام وليكن معين لا ينضب .. لك الود .. |
العزيز شليل
كيف حالك اثني على الفكره وربنا يقدرنا و اياكم و الجميع على فعل الخير فكرة الهيئة الماليه كويسه ,,الهيئه دي بدورها تقوم بفتح حساب في البنك عشان الناس البرا السودان و برا الخرطوم يقدرو يوصلو مساهماتهم و يكون في اجتماع شهري للعضويه لو امكن عشان الناس تعرف عملت شنو و حتعمل شنو في مشروع كفالة ايتام و هم ايتام بالفعل بكونو في اسرتهم نفسها بس بتكفل الفرد فيهم بمبلغ 60 ج شهريا تستلمها ام الطفل ,ويحق للكافل ان يزور الطفل في اي وقت و يتابعو في الدراسه و يهتم بيهو ويتفقدو من حين لاخر د.هيفاء عندها خبره في هذا المجال اكتر لانها مشرفه على جمعيه لرعاية اطفال اتمنى انها تطل و تدينا رايها |
ه ه
اقتباس:
النّاس الحُنان .,., ليكم مليون تحيّه., إإمروني تجدوني تحت إمرتكم .,.., عارفه يا ننوش عندي في الجمعيه السنه الفاتت تلاته دخلو الجامعات ., *** شباب زي الورد .,., التعديل تم بواسطة شليل بعد التشاور مع د/ هيفاء ، فلها الشكر أجزله |
اخي شليل سلام
اتفق معك وايدينا بيد بعض داخلا وخارج السودان بس اريد ان الفت الانتبأه لشئ مهم ان لا يكون هنالك ذكر لاسماء الاشخاص الذين ساعدتهم لان المني يتبعه اذي واذا نظرت في وجه من تعطيه شيئا زهبت بحياءه فارجوا السرية والحفاظ علي ماء الوجه فكثرا هم من يحسبهم الجاهلون اغنياء من التعفف وهم في قمة الحوجه فهلموا للخير فانتم اهله قنب عافيه وجيدة |
العزيز شليل
الدال على الخير كفاعله وكلنا معرضون لعواصف الدهر اتمنى ان يجد هذا الامر التفاعل السريع من الجميع وشريحة الايتام ومرضى الكلى اعتبرهم من اهم الشرائح حوجة للدعم .. |
الاخ الانسان شليل صباحك نور وسرور اشد على يدك تقديراً ودعماً لكل كلمة قلتها ارمو قدام ونحن معاكم بالـ بنقدر عليهو والبسهلو ربنا اقول قولي هذا واستغفر الله لي .......... |
الأعزاء جميعاً.. طابت أيامكم بكل خير وبركه :
*أبو خليفة : سعدت بإنو أول المتداخلين ، يثمًن على الفكرة ، ويسجًل حضورو الإنساني.. شكراً يا زول يا إنسان.. * نبراس ، د/ هيفاء : ممتن لحضوركم وطرحكم القيًم .. الفكرة جيده ، وبتنطرح ضمن خطة العمل ، نحاول نماشيها مع أي حالات بتقتضي إنو الواحد يعمل فيها حاجه ، لأنو طالما إنو مشروع كفالة اليتيم بيكلف 60 جنيه شهرياً ، فبإمكاننا إنو نخت إيدينا على المشروع ده وعلى كم مشروع ، لأنو المساهمة الشهرية زهيدة.. فياريت لو د/ هيفاء إتوسعت في طرحها ، الناس ديل محتاجين شنو ؟ : ملابس ، أدوية ، أغذية ، إلخ.. وهل بالإمكان إنو الواحد يتجاوز البيروقراطية في التعامل ، و يلقى ليهو معبر مباشر يصلنا بيهم بدون تعقيدات ؟. * وجيده : لا إتلفتي .. لا لوحتي بإيديك.. وأنادي إليك.. بتفق معاك ، كلما مشت الحاجات بهدوء ، كلما كان أفضل ، وحنعمل على كده إن شاء الله.. في تجربة قبل كده تمت في سودانيات ، والحمد لله ، مشت بهدوء شديد ، مافي زول كايس الوجاهه الإجتماعية ، بقدر ما كايسين إنو نعمل حاجه مفيده.. أبقي طيبة. * سمراء : كان فرجًا ، فرجًا ، كان ما فرجًا غصبا عنها بنفرجًا.. طالما نحن متفقين على إنو نغرس الفكره دي.. وما بنتخير بين الفوق وبين الناس التحتانيه ، إلا مغيًر وللا عقوق وللا كفيف الإنسانية. * زول الله من الصلاح الرفعت عنهم الأقلام : يا زول يا صاح.. المداخلات الزي دي بترفع moral البوست.. ممتن ليك ، ولأي زول أبدى تجاوبو أبقوا طيبين. |
حتى الآن إتشكلت مجموعة المبادرين من :
1/ أبو خليفة 2/ نبراس 3/ د/ هيفاء 4/ وجيده 5/ سمراء 6/ زول الله 7/ شخصي الضعيف |
محتاجين لتداخل الإخوة الإعلاميين :
عبد الجليل سليمان ، آمنه عمر ، آيات ، أمير الشعراني ، فائقة يس ، سالم أحمد سالم ، فتحي الضو ، وبقية الإخوة والأخوات محتاجين نسمع آراؤم حول : بيقدروا يعملو شنو ؟ علاقاتم الإجتماعية كيف ؟ نافذه ؟ إمكانية إنو يتواصلوا مع الcases ، ويملكونا أحوالم الصحية أول بأول ، إلخ |
محتاجين لتداخل ياسر موسى ، إللي حسب علمي عندو علاقة مع الأطفال مجهولي الأبوين..
برضو محتاجين لتداخل الأخ ( إنتهازي ) بوصفو عندو علاقة مباشره مع أطفال السرطان.. |
تداخل الأخوة والأخوات البيعملوا في لحقل الطبي مهم :
د/ طيبان ، د/ أحمد ، د/ جانيت ، د/ سرورة ، د/ أبو محمد وبقية الإخوة والأخوات .. تداخلم مهم عشان نعرف : ممكن يوفروا شنو ؟ أدوية ؟ إجراء عمليات ؟ علاج مجاني ؟ إلخ.. |
شكراً شليل . .
وهكذا هي عضويّة سودانيات تترجم الشعار بالعمل الجاد المُثمر. سأظل قريباً جدّاً وممكن تضيفني ضمن قائمة المبادرين بعد (شخصك الضعيف). الشكر الجميل لكل المتداخلين/ات. ملحوظة: يكون أفضل لو ركّزنا على كل هدف على حدة مع إمكانية العمل في نفس الوقت على: 1/- مرضى السرطان، و 2/- كفالة اليتيم |
اقتباس:
التوسع في خطة العمل رهين بتداخل المعنيين الذكرتهم في مداخلتي الفاتت.. ، لكن مبدئياً أنا شايف بالإمكان العمل في المحورين ، طالما إنو المساهمة الشهرية في مشروع كفالة اليتيم زهيدة بعد تداخل د/ هيفاء ، والإخوة/ات الأطباء ، والمعنيين في الموضوع ده ، حنتوسع في الطرح وحنشكل هيئة مالية تعنى بمتابعة الحالات ، ونحاول نخلق صلة بين كل الأطراف.. أبقى طيب ، تحياتي لربى ولأسرتك الكريمة |
حتى الآن إتشكلت مجموعة المبادرين من :
1/ أبو خليفة 2/ نبراس 3/ د/ هيفاء 4/ وجيده 5/ سمراء 6/ زول الله 7/ عكود 8/ شخصي الضعيف |
سلأم ياشباب
سجلوني هناك حالة مستعجلة الان طفلة جميلة تكاد تفقد بصرها موجودون في القاهرة اتوقع مساهمتكم العاجلة اتمني ان توضع علي صدر اجندتكم ساوافيكم بالتفاصيل |
شكراً يا شليل على المبادرة
وأقترح تطوير الفكرة، وذلك بأنشاء منظمة تستوعب هذه الاهداف ويمكن أن يطلق عليها اسم منظمة سودانيات للعون الانساني، او اي اسم يتفق عليه الناشطين كل هذا لأجل التسهيل من الناحية الاجرائية . كما أتمني أن لا ينحصر اهتمام المبادرة بمجتمع العاصمة فقط فالولايات أشد عوزاً وأكثر حاجة تحياتي لك ولكل المُبادرين |
اقتباس:
ربنا يشفيها ويرد ليها بصرها ، بعد ما تجيبي التفاصيل ، إن شاء الله حنكون حاضرين لكن مستقبلاً.. أنا شايف إنو يكون التركيز على مرضى السرطان ، لأنو برنامج الدورة مستهدفم ، وده ما بيعني إغفال بقية الحالات ، بس لأنو مرضى السرطان وضعهم الصحي بيكون أخطر من بقية المرضى.. وبعد ما نتوسع في الفكرة ، ونجمًع المساهمين ، ممكن نضع خطة عمل : الأولوية تكون فيها لمرضى السرطان ، ومن محور تاني نساهم في مشروع كفالة الأيتام ، وإذا أتزايدت عدديتنا نشوف بند الحالات الطارئة.. أبقي طيبة. |
شليل الانسان
طرح عظيم لفكرة تراودني كثيرا قبل ايام كنا نتحدث عن سرطان الاطفال ودعم الاطفال معنويا وماديا ومضمون الحفلات الخيرية التي تقام لدعم العلاج الكامل تتوسع الرؤى يا شليل عند بداية التخطيط وانجاز الفكرة تجتمع الكلمة والهدف فقط وسوف نصل الى ما نصبو اليه 9/جانيت |
اقتباس:
مع إحترامي لطرحك إلا إنو شايف فكرة إنشاء منظمة ، بتشتت مجهوداتنا المالية والذهنية ، وقد تستغرق إجراءات إنشاءها فترة طويلة مع بيروقراطية أجهزة الدولة ، في وكت نحن قد نكون محتاجين لعامل الزمن ، ولعامل الإستفادة من أي دعم مادي ، في مواجهة حالات مرضية ما بتستدعي إنو نتأخر تجاهها.. مستقبلاً قد تكون فكرة جيدة ، بعد ما نرسى شوية وتتعاظم عضويتنا ، بنكون إكتسبنا خبرة و ممكن نتوسًع في الفكرة ، ونطور من خطط عملنا. بثمن على رؤيتك حول إنو ما نحصر إهتمامنا على ناس المركز ، لأنو فعلاً ناس الولايات بيكونوا أكتر حوجه للمبادرات الزي دي ، تحياتي. --- أسجًلك ! |
اقتباس:
|
فكرة جميلة يا شليل
اتمنى ان يتم استمرارها و نجاحها لنحاول ان نفعل شيئا مفيدا بدل لعن الظلام اتمنى ان لا يصبح الامر تسجيلا اسفرياً فقط لنضع نقاط محددة و خطة عمل واضحة و نعمل عليها تحياتي |
الأخ شليل بدون اي مقدمات
فكرتك بنج بس سجلني طوالي |
الجميل شليل وكل الحلوين الهنا
انا تحت الخدمة بس يا جماعة انا سستر لسة ما بقينا دكاترة:pوعلى استعدادلاى خدمة تطلب منى ان شاء الله انت فصلوا وانا باذن الله ألبس من سكات ما يخص مرضى السرطان بحول الله سوف ابدأ اخر praktis يوم3-5 2010 فى واحد من اكبر المستشفيات الخاصة بالاورام فى اوروبا واى خبرة اى مساعدة حاضرين حتى ولو اطلب من غيرى او من ذوى الاختصاص فلن أتاخر باذن الله بخصوص دار العجزة قمت بزيارة سريعة مع الاخوات مولانا رشيدة من عكس الريح وفرح وسمية آدم من سودانيات وحسب الاتفاق بينى وبين ياسر موسى سيمدنى بمزيد من المعلومات وانا حسب تخصصى ساقدم ما استطيع واتمنى الاخ ياسر موسى يتذكرنى بخصوص كفالة الايتام انتوا قولوا اتفقتوا على شنو وانا حاضرة |
الاخ شليل سلام فكرة رائعة وعمل وطني ايجابي – بيان بالعمل - و تعاون علي البر والتقوي . سأكون من المساهمين بما تيسر ان شاء الله . لنجاح الفكرة واستدامتها يستحسن التركيز علي محور او محورين وتجويدهما بدلا من تشتيت الجهود . دعواتي بالنجاح للفكرة ولصاحبها الهميم. |
اقتباس:
إزيك يا دكتره.. فكرة الحفلات الخيرية فكرة جيده ، وفي فنانين جيدين بيتعاملوا كويس مع الإطروحات الزي دي ، وجودك مهم كزوله بتعمل في الحقل الطبي ، خليك قريبه . --- صور حلتنا وين! |
اقتباس:
إن شاء الله ما حيكون إسفيري ، بل واقعي وملموس.. خطة العمل حأجيها بعد شوية ، بس داير أجمًع أكبر عددية من المبادرين ،بعد ما تتم الحاجه دي ، وبتقسيمات المبادرين وإنتماءاتم المختلفة ( أطباء/ إعلاميين / إلخ ) ممكن نرسم خطة عمل جيدة.. |
اقتباس:
خليك قريب. |
بسم الله الرحمن الرحيم
الأخ شليل .. هذا والله من البوستات البتفرح النفس وتشرح الخاطر .. تمام الإستعداد للمشاركة المالية .. أوافقك بشدة فى الإنتباه لمشروع كفالة يتيم .. اؤيد تسمية مسؤول , مشرف مالى بالخرطوم وفتح حساب باسم سودانيات لتصلكم اشتراكاتنا التى لن تقل بإذن الله عن كفالة يتيم بانتظام .. فى إنتظار السماع من عبد الجليل وآمنة عمر وسمية ومنال ودكتورة هيفاء وياسر موسى شليل يا حبذا لو لاحقتهم برسائل داخلية للإطلاع على البوست والمداخلة فيه مناشدة لبورداب الخرطوم ارجو التداخل وسماع وجهة نظركم .. دكتور أحمد , أبو أمانى , ناصر , الأغبش , عادل عسوم , دكتور وليد محمد الأمين أم التيمان . ود عثمان , مى هاشم , جعفر بدرى , elle , أروى , دكتور محمد الطيب يوسف وبقية العنقود فى الإنتظار يا شباب .. الأفكار العظيمة تبدأ بخاطرة ........ |
الأعزاء..
سرورة الجميلة.. كتًر خيرك ، وياها المحريه فيك ، خليك قريبه. حسين أخوي : بتفق معاك في انو نركز جهودنا في محور أو محورين ، ومستقبلا نتوسع في الفكرة.. أبقى طيب النور الجميل.. كتًر خيرك.. وإيد وإيد تجدع بعيد.. |
حتى الآن إتشكلت مجموعة المبادرين من :
1/ أبو خليفة 2/ نبراس 3/ د/ هيفاء 4/ وجيده 5/ سمراء 6/ زول الله 7/ عكود 8/ آمال 9/ جانيت 10/ مُبر محمود 11/ حاتم علي 12/ محمد عبد الرحمن 13/ ساره 14/ حسين عبد الجليل 15/ النور يوسف 16/ شخصي الضعيف --- حإنتظر فترة إسبوع ، أجمًع فيها أكبر عدد من المبادرين ، وبعديها نقعد ، ونقسًم مجموعاتنا ،ونبني خطة عملنا.. ولي قدًام.. مزيد من المبادرين/ات.. همًتكم معانا. |
كيف لنا أن نتأخر عن هذا الركب وان كان ما نفعله جهد المقل فقط .. !!
العزيز شليل تجدني معكم أينما يممتم وجوهكم .. !! تحياتي |
شليل سلامات وتحايا واحترام ليك
الاعمال الجليلة تبدأ بفكرة علي فكرة سجلني معاكم looool واين ما توجهتم تجدوننا من خلفكم قريته أمس بس ما اتيحت لي الفرصة بالتداخل انشغلتا شويتين |
ازيك ياشليل فكرة جميله شديد
ربنا يقدركم على فعل الخير معاكم باذن الله |
[align=justify]شكرا ً يا شليل على هذه الأفكار النيرة ... حتما ً سنشعر بالسعادة والراحة النفسية ونحن ننضم إلى هذه الكوكبة من المبادرين والمبادرات.
أرجو وضع إسمي معكم ... ونحن رهن الإشارة ... وشكرا ً لكم جميعا ً . [/align] |
اقتباس:
دا كلام ممتاز جدا وتجدني على استعداد للمشاركة والمساهمة في إنجاز اكثر من حفل خيري وإذا لقينا مساندة من الاخوة المقيمين بدول الخليج يمكن تطبيق الفكرة هناك ايضاً وتفاصيلها كالآتي : بالنسبة لمدينة الرياض نسبة النجاح تصل الى 70% وأيضاً شرق المملكة - الدمام والخبر (دا عن تجربة) أما خارج المملكة فالبحرين تقع في المرتبة الأولى من حيث نجاح الحفلات الخيرية وتليها الامارات (دا برضو عن تجربة وخصوصاً البحرين ) تواجدنا في الرياض يتيح لنا - بعد التنسيق مع الاخوة - تنفيذ الفكرة هنا اولاً تجدونا أيضاً ملتزمين بالمساهمة في كفالة يتيم شهرياً حسب ماتقررون ليييي قدااااام اقول قولي هذا واستغفر الله لي ........... |
اللهم احمينا و اهدنا
رحم الله العميري واسكنه فسيح جناته واثابه واثابنا الله خيرا كثيرا
اتمنا ان اسمع له مدحة رسولنا (ص) اللهم اشفي اختنا إيمان إستراتجية المنتدي حب وتواصل شعار الدوره (دعاء إيمان) بالتاكيد عمل الخير وهو الهدف المنشود سعيد جدا انو الفكرة تاتي من فنان تشكلي (شليل) الرائع (معاكم ان شاء الله) والله ياشليل كل افكار الخير الفي العالم ياجايه من فنان ياجايه من السماء و الزول اعترافو يقينو لذلك ليس لدينا خيار خلاف ان نفكر ونبادر بالخير لك الحب و الدعاء بالتوفيق |
ما اجملكم شليل ...
معكم ولي قدام ... تنويه : اتمني من د.هيفاء سحب الاسماء والكليات من صدر البوست ...حتي لا ينجرح احد انا والله اتحسست فكيف يكون احساسهم هم . خصوصا انو شليل نبه للبعد من الظهور والعمل بخفيه قدر الامكان ... |
لو اعيش زول ليهو قيمة
الاخ شليل وكل الاخوان والاخوات لكم اطيب التحايا
وجزيل الشكر والامتنان ..لهذه المبادرات الطيبه .. وانا معكم ان شاء الله وارجعوا لي بوست لي بعنوان دار السلام دائرة من الالام والامال وقولوا واحد بما انني كنت اعمل في احدي المنظمات التي طردت وجعلتني احمل كثير من الهموم والاوجاع سأنزل لكم مارأيته تباعا .. يلا ايد علي ايد وعلي فكرة يمكن ان تساعد بكلمه توعيه في مجال العمل الطوعي فهي كالبذرة تصبح شجرة ..لكم الشكر ..ويلا نعمل يلا نبني دمتم بخير |
شليل
تسلم كتير ويسلمو عيالك وامهم ده هدف نبيل من تواجدنا هنا وياريت يتم العملي فيه ما يغتس زي المنظمة المسجلة رسميا خطوات عملية ونحنا جاهزين خطوة خطوة بالمناسبة ياسر جا هنا وعرض مشروع اعانة المركز وهو عجلة السنة وشنطة السنة للمسنين والمعاقين وطلع بود كويسة المهم الناس الهناك هم دعامة العمل ونجاح الفكرة ترتكز عليهم |
| الساعة الآن 12:57 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.