مفاهيم ... وهرجلات
منذ زمن بعيد ... تتقافز أمامي صور الهرجلات التي تملأ شارعنا
ولا يعدو هذا البوست عن قفزات برضو في ذات الشارع * لماذا لا يحترم الأساتذة عقول الطلاب ؟. ويستسهلون دائما فكرة التدريس ؟ سأحكي حادثتين الأولى : كنا ندرس بمدارس العروبة لامتحان الشهادة السودانية قال الأستاذ وهو يقرأ علينا بيت : ربّ من انضجت غيظا قلبه ... قد تمنىّ لي موتا لم يطع والصورة البلاغية في هذا البيت كناية تصريحية في - قلبه - لأن القلب لا ينضج بنار الغيظ رفعت يدي وقلت : لا ليس صحيحا يا أستاذ ... القلب ان تعرض لنار ينضج لأنه قطعة لحم ... أما ماهية النار هنا هي الصورة البلاغية ... حيث أن الشاعر شبه الغيظ بنار تنضج ... ولكنه حذف المشبه به ورمز له بالانضاج كأحد اهم لوازمه ... إذن فهناك كناية عن موصوف في الغيظ فهاج ... وطردني من الفصل ... ودخل في سهوم مفتعل ... وخرج عن (المود) وأخذ كتبه وخرج ولكنه عاد في حصة الغد ليشرح - بما تفضلت به عليه - ولم يشر لذلك ... حيث أنه راهن - ثانية على غباء الطلبة الثانية جاء الأستاذ في مروي العليا محدثا عن البيئة الجاهلية ... وأنهم كانوا يبنون بيوتهم من الآجر - الطوب الأخضر - واللبن بكسر الباء وهو طين الله والرسول دا ... ولكنه قرأها بفتح الباء فقال له طالب : يبنوا باللبن عديل كدي ؟ فقال له : أيي يا ولدي اللبن الزمن داك ما كان رااااااقد ما مشكلة حادثة ثالثة : أستاذ الدين يقول أن للإمام علي كرّم الله وجهه ولدين ( الحسن والحسين ) فسأله طالب : تيمان يا أستاذ فصمت الأستاذ برهة ( مسافة السمو الروحي فقط ) ورد : أيوة تيمان لكن سيدنا الحسن أكبر من سيدنا الحسين بي سنة ............. .......... أعود لهرجلة الشعر والشعراء وهرجلات أخرى |
انا وبحكم أني تربيت على قراءة شعر حميد ... أصبحت عملية كتابة الشعر عندي من أقسى وأصعب العمليات ...
حميد الذي قال الحجر الأسود ماهو البروة وماهي مكاوي الكعبة تجيها حين يتكرفس توب التقوى والمشروع الديني الخالص ما محتاج لدراسة جدوى يا من قال يارب من قلبو ... رد الخالق دايما ايوة ............... خلاصة فكر ديني ... أخلاقي ... صوفي ... ومعرفي ... في شعر رقيق ... رصين ... متماسك ... يأخذك من يدك - البتوجعك - إلى حيث يرفل الشعر وقال خشّيت دغيش سعن الدِني المرفوع علي سيبات وفا روّابي كان قُطّاع غُني وشوقن مفورن وانكفى خلاصة تجربة حياتية ضخمة ... وملايين العبارات والمواقف من الدنيا ... وما أكثر ما قيل عنها ... شعرا فصيحا بليغا فخيما سائغا شرابه ............ ........ ولكن أن يأتي آخر ويقول : ما زمان العُلما قالو إن هاذي الدنيا مسرح فتقفز لذهني مباشرة أن - العالم - نيوتن ... ومعه آخرون ... حال وقعت عليه التفاحة اللعينة تلك ... ابتسم ابتسامة ذات مغزي - زي الكان بيبتسما تختخ والمغامرون المعاهو ديك - وردد قولته المشهورة عن الفعل ورداءة الفعل ( إن هاذي الدنيا مسرح ) ومضى لحال سبيله ........ ....... وآخر في موضع آخر ليس ببعيد من صاحبه ... يعيد على مسامع وزير الصحة حال البلد بعد الفيضان والأزمة الصحية المصاحبة فيقول ياوزير الصحة وين الكلوروكين أو كما قال !!! اسع دا بيت شعر دا ؟؟؟؟ واللا يافطة رديئة ؟؟؟؟ مرة على أيام ارتيادنا المستمر لنادي الطنبور وجهت لنا دعوى من إحدى منتديات الخرطوم لقراءة الشعر ضيعّت المكان وعدت بلا شعر ... قابلت بعدها شاعرنا الجميل عبدالقادر إبراهيم معتذرا فقال لي يازول الحمدلله الماجيت ... ديل ناس ما بيعرفو الفرق بين القصيدة ووجهة النظر فكفاني تعليقه هذا الكثير الذي كنت سأقوله لكم لاحقا الخلط المفاهيمي الكبير بين الشعر والنظم أضر وسيضر بنا كثيرا كثيرا حيث ان كثيرون من شاكلة ( هنا وربك يهونا ... قضارف وربك عارف ... نجيبو بالطيارة ونبيعو بالخسارة ... أصبحوا من شعراء الأغنية السودانية ... والمديح كمان ... تصوروا ؟ ) نلتقي في هرجلة تلاتة |
اسامة معاوية
صباح الخير يا وديع والناس في هراجيلهم .. مذاهب .. وطرائق قددا .. !! شهدت من كثيرين هراجيلاً تجيب الطاش لاسيما في المحاكم .. تغيب عن الناس المفاهيم الصحيحة فيعمدون الى ما يصادف هواهم وافق ذاك شن الحقيقة أو خالف طبقها .. !! ربما حزمت بعض ذاك وعدت ثانيةً .. اذ يبدو لي أن هذا المكان يستحق التكرار .. !! مودتي |
أن ينقل لنا الشعر والغناء - شئنا أم أبينا - أن قصص الحب الموروثة ديك كانت تبدأ ولا تنتهي بجمال المحبوبة ... مش فيهو هرجلة ؟
يعني يصر الشعراء اللاحقون أن حبيبتهم أجمل من ليلى العامرية ... ومجنون ليلي حالتو أقل من مجنونك مادام ليلى كانت في المحاسن دونك اسع الزول دا القال ليهو مجنون ليلى دا حبّاها عشان كانت سمحة منو ؟ أها دي بالذات كل كتب التاريخ اجمعت انها ما كانت جميلة ... وقيل عرجاء كمان ليه الحب عندنا مربوط بسماحة الوش ؟ والغريبة كثيرات ممن عرفت وقيلت فيهن قصائد وشهن زاتو شين ... هل يجب أن يكذب الشعر دائما لترضى المحبوبة ؟ وذهب جزء آخر (يستنوقون الجمل ) كما قال صاحب المعلقة بالجمال يوسف جابدا أكانت مسترجلة ؟ أم أن جمال سيدنا يوسف كان نسائي ؟ كثير من شعر الحقيبة ... فاقت المحبوبة فيهو جمال يوسف !!! غايتو |
في حادثة أولاد سيدنا علي كرّم الله وجهه ... كان يحكي عن الحسن والحسين رضى الله عنهما ... لكن ليست دقيقة فكرة انو كان عندو ولدين دي ... دي من هرجلاتي أنا - عفى الله عنّي -
غايتو |
اقتباس:
عندنا جدنا كان يقول : الله قال - دون أن تطرف له عين - إذا زرعت ازرع في أرض قريرة ... اسع الآية دي لاقتك عليك دينك ؟؟؟؟ شوف حميد اشتغل على فكرة القدرية المهلكة بتاعة اهلنا ديك كيف ؟ لكني بقول قول بت حمدين يوم سرقو القش ... حاشين حوضين قالولا قدر يا حاجة أراد قالت يا ولاد ... نعم احنا عباد أي والله اراد لكن دا اتر يبقى الله بشر ؟ ما ما معقول ....... وكأن هذي الفكرة دون غيرها كانت تتعب شاعريته الوثّابة يقول والجاتا جاتا من الأرض ما جاتا من تالا السما ونحن نشيل ونخت في السما ... وخالين (الذين مكنّاهم في الأرض ديل ) محتاجين لهزة مفاهيمية ... وتعرف اسي بقليل من الجهد حا تلقاني أنا زاتي مستسهل الفكرة ومهرجل فيها غايتو |
اقتباس:
حبساً حابس .. ورقاً يابس .. ارجع البصر كرتين .. !! لا تعلم عن قولها ذاك إلا أنه قرءآناً متعبدُ به .. !!! أؤلئك الناس يا صاحب .. قلوبهم كالمحجة البيضاء .. !! سأعود باذن الله |
http://www.sudanyat.org/upload/uploads/041.jpg
احدى هرجلات اسامه معاوية الطيب رتب المكتب ده بلاهي :D:D:D لي عودة حيث امتع نفسي بهرجلاتك ;) |
أسامة معاوية ياصديقي..
دعني أُهرجل معك.. زمان في الابتدائي استاذ التربية الاسلامية بيدرسنا الاية: كأنَهم حُمرٌ مُستنفَرة فرَتْ من قَسْوَرة بيقول فرت من قُسُورة.. قسورا دي حفظناها علي وزن قُصُورا.. تخيل حفظناها كدة وعرفنا انو قُسُورا دي بتعني الاسد.. تخيَل..!!! وماخفي من هرجلات ..اعظم.. ثم.. إمام مسجد من المساجد في صلاة الجمعة.. كنت من ضمن المصلين.. الخطبة كان محورها سورة يس.. كان يصر بصورة فادحة علي قراءة الآية التي تقول: ولقد اضلَ منكم جِبِلاً كثيراً فيقرأها ولقد اضل منكم جَبَلا كثيراً(بفتح الجيم والباء) تخيل..!! والآية تحتمل قراءتين فقط حسب ابن كثير يقال جِبلاً بكسر( الجيم وتشديد اللام ) ويقال جُبُلاً (بضم الجيم والباء وتخفيف اللام ومنهم من يسكن الباء..) وتعني في اغلب التفاسير خلقا اما قراءه الامام لها فتعني الجبل الذي نعرف..!! |
اقتباس:
قلوبهم كالمحجة البيضاء ... وأكثر بياضا منها ... ولكن ألا يسربّون مفاهيما تعلق بأطراف أرديتنا نحن ديل ... وتهرجلنا أكثر ؟ يعني جدنا رااااقد في الخلوة .... يسألوهو : الحسين صليت العشا ؟ يجيب : قبييييييل ..... لو أمو شايف كيف ؟ هرجلة بس ... تتداخل فيها تفكيكات كتيرة خالص من المفاهيم غايتو |
اقتباس:
ازيك ياخي |
اقتباس:
تعرف أنا اكتر حاجة بتغيظني شنو ؟ الشعرا البيجو يستعرضو لينا ثقافة الابتدائي في قصايدم يعني يجيك شاعر يقول ليك الا مشانق الأيام دواليب لافة في محور ... طوالي ترجع الفصل ... تلقى حصة العلوم في سنة تالتة ابتدائي شغالة واللا يقول ليك خلي اليروح ما دام متاع ... طبعا في ذاكرتو ( وما للمرء خير في حياةٍ إذا ما عدّ من سقط المتاع ) - خامسة واللا سادسة ما عارف - والشاعر هنا بيتكلم عن حبيبو واللا الحب زاتو ما عارف... انو مادام بقى متاع - وهو غير سقط المتاع بالتأكيد - خليهو اليروح !!! الله لا عادو !!! يشهد الله زول غيرنا نحن رايح مافي مرة في فنان بيغني ( ما شفتو الفرح في الحفلة كان ) مقطع من أغنية شايقية أخشى اني تغولت على وزنها كان بيغني فيها في منطقة اسمها الجبل ... وطبعا كفنان حاول يخلق حالة خاصة من المقطع فكان (ماشفتو الفرح في الجبلة كان ) والجبلة من يوما داك الفرح ما انقطع منها ... والغريبة نحن زي ديل نصّر جدا انو نسلم عليهم بـ : يا أستاذ !!! وبي مناسبة استاذ دي كمان مرة في احتفال مقام على شرف اتحاد روابط مروي في الجامعات والمعاهد العليا كان مفروض اقول الكلمة فيها ... وطبعا شاعر كمان فقدمني مقدم الحفل بـ والآن مع كلمة الاتحاد ... والطالب ... الأستاذ اسامة معاوية !!! وكانت المرة الأولى في هذه الخليقة الجمع بين المنصبين ديل !!! غايتو ... نشوف |
اسامة وكثير كبرياء:D
دي وجهة نظر;) |
اقتباس:
أسع الكبرياء - قليلها أو كثيرها - لاقتك وين هنا ؟؟؟ |
د.أسامة عساك طيب.
حكاياتك عن الأساتذة دي ذكرتني حكاية حصلت في الستينات الماضية للأستاذ العلامة كرف. أستاذ كرف كان بدرس سنة أولي ثانوي لغة عربية وكان في واحد من الأولاد المشاغبين متلح كرف كل ما يقول آاا وللاي دي غلبني أكتبا عديييل ..المهم كل ما يقول الكلمة دي الولد يقول ليهو أتو وكرف عامل ما ماخد بالو.. المهم كرف تاني ما لاقي الولد دا الا في سنة رابعة عرفو أول ما شافو واتذكر حكايتو معاهو وبقي كل شوية يقرب منو يسألو ولما الولد يجاوب يقول ليهوآاااه والولد ما يقول حاجة..في الآخر كرف جا قريب منو وقال ليهو مالك ياولدي أتوك كمل..بوشتاlooool |
اقتباس:
يوم العيد على الهواء مباشرة غنت عقد الجلاد لاتحلموا بعالم سعيد فخلف كل قيصر بموت قيصر جديد..... بعد انتهاء الاغنية قالت المذيعة هذه من اجمل الاغاني التي تدعو للتفاؤل والفرح وو.وو تعليقك استاذ شمت ظهر الامتعاض على وجه الفنان الانسان شمت ولم يزد لااعتقد ان الاغنية تدعو للتفاؤل ...... واخرى مجموعة من المغتربين ودكتور مغترب برضو استلم المجلس وكتب روشتات للضغط والسكري وامراض القلب وفايتمينات ومضادات حيوية وادوية للرطوبة وكتب لي انا شخصيا حبوب للارق المهم كل مغترب استلم الروشتة المجانية بس شوية صاحبك طلع طبيب اسنان |
اقتباس:
شكرا على تفضلك يا حبيب ومرورك يبهج ... طرف الأساتذة والطلاب لا تنقطع ... وفيها من المفارقات الكثير مش زي القالو ليها سافة يا أستاذ ... قال ليهم احسن من البتسجر ؟؟؟ خليك قريب |
اقتباس:
ياخي مرة المذيعة - اظنك مذيعتك دي زااااتا - تحدثت عن طيورنا المهاجرة وبدأت تذكر في الأسماء المهاجرة وكان من بينها طبعا (الشاعر) الطيب صالح ... أها وكأن موتا لم يحدث حينها ... ما زال توبا يلصف في الشاشة (البللورية ) |
الأستاذ الكريم أسامة
منذ سنوات طويلة ، صلّى بنا أحدهم صلاة المغرب، وقرأ "إنا إنزلنا في ليلة القدر"، وتخيّل مدى هلعي عندما قرأ كلمة "القدر" التي ترد ثلاث مرات بالغين وليس بالقاف! بعد الصلاة، تحدثتُ إليه، فأجابني باستعلاء شديد، إن قراءته صحيحة، فتحدثتُ إلى المصلين مستفسرا، فأمّنوا على كلامه! المهم، استفتيتُ قلبي، وأعدتُ الصلاة. تقديري |
اقتباس:
الحبيب معتصم أنا ذاتي اتخلعت لما لقيتك كاتب اسم السورة غلط بدون الهاء في أنزلناه.. |
الحبيب فتحي والجميع
لكم العتبى حتى ترضون. زلة قلم أتت نتيجة لغضبي الذي ما زال مستعرا إثر تذكري للحادثة الكريهة. صحيح الآية الكريمة بالطبع "إنا أنزلناه في ليلة القدر". عرفاني المقيم |
استاذ اسامه لك الود وابقي
كنت احب التاريخ ومازلت اعشقه فقط سألت استاذي عن مؤرخون التاريخ في بلدي وفي كل بقاع الارض فكان نعوم شقير واخرون فاغضبني ذلك فسألته لما لانؤرخ تاريخنا ام المنتصر هو يدون ماضي الامم وحاضرهم فانتهرني وقال لي هذه الاشياء لاتخصك اجلسي كثيرون من يستهيون بعقولنا في شتي ضروب الحياة (ونسوا في كل ذي علما عليم) |
سلامات يا أسامة
كان عندنا أستاذ رياضيات أسمه حمدان .. زول مهذب لحدود عالية .. عندنا طالب أسمه سامى أمين الجمل .. زول عبقرى رياضيات .. لكن الآكشن بتاعو كاوبوى كدة وحركات مجنونة .. يوم حمدان حل مسألة فى السبورة .. بحركة إستعراضية سامى قام قال ليه (خطأ .. فى قاعدة بتقول كذا وكذا تمنع طريقة الحل دى) .. أستاذ حمدان قال ليه (ما سمعت بقاعدة زى دى يا سامى) .. سامى قعد بحركة بهلوانية .. وأشر ليه بطرف القلم وقال ليه (check yourself) حمدان غضب وترك الفصل مكفهراً بدون ما يقول كلمة .. ما عارف الجماعة فى الشعبة ناقشوه ولّ فتش براه .. جانا راجع بهدوء وقال (يا جماعة كلام أخوكم سامى صح .. لكن يا سامى حاول تكون مؤدب شوية) |
اقتباس:
تعرف يا معتصم واحدة من هرجلاتي الخاصة ... أيام الدفاع الشعبي قبل الجامعة مشيت اصلي الظهر ... ولقيت معاي واحد بيتوضا ... مشينا نصلي سوا ... أصرّيت انو يبقى الامام ... لكن وقفت في المكان المفروض هو كإمام يكون واقف فيهو ... وبدينا صلاتنا ... بعد الركعتين الأوائل جا واحد داير يصلي وقف وراي ودفرني ... يقدمني يعني ... وأنا طبعا ما الإمام ... الإمام اظنو أخد المسألة شخصية وقال الا الزول دا يدفرو غير كدا ما طالع من محلو دا ... والزول يشيل ويدفر فيي ... والإمام حالف ما يتقدم ... طوااااالي اتقدمت وتميت الركعتين الباقيات ... وإمامك تمّ معاي زي العجب والغريبة استفتيت قلبي وما عدتها !!! |
اقتباس:
ياخي نحن لحدي يوم الليلة دا - اظنو - قاعدين نقرا (سقوط الخرطوم ) طبعا في يد جيش المهدي ... !!! ودا باب براهو محتاج إعادة قراءة ... وإعادة كتابة ... وإعادة إيمان بينا شكرا جدا ليك معليش حاولت أصلح الآية الواردة في كتابتك |
اقتباس:
كيفك ياخي ؟ النموذج الجبتو نموذج مثالي لي مفهوم راقي ومافيهو أي هرجلة ... الهرجلة المرة دي من الطالب ... لكن دا أستاذ أكثر من مثالي ونموذجي لكن ارجو ألا يكون حال الفصل بعد خروج الأستاذ كان من شاكلة ( لكن أديتو في حنانو أمنّا زاتو ) مشتاقين والله |
اقتباس:
الترباس غيروا محلو! أدفر التانية... |
اقتباس:
طبعا الحالة دي ما عندها علاقة بالهرجلة البحكي عنها دي لكن من أغرب الحالات المرّت بي بس لاحظت انكسارة طفيفة في عيون الامام السابق حال سلمت والتفت إليه ... وهو يردد خلفي السلام عليكم ورحمة الله ... السلام عليكم ورحمة الله |
اقتباس:
حبوبتك دي يا طارق اجتهدت شديد،، وهرجلت وقالت (أرجع البصر كرتين)،، لكن حبوبتي (حرومه) "وده طبعاً إسم الدلع ل (الحرم)، كانت تصلي وماها حافظي ولا آية في القرآن، ومرة سألتها قلت ليها إنتي كيفن تصلي بلا قراية قرآن، وكان ردها: (والله يا ولدي شيخنا قال بس الزول يقول: الصلاة صلاتك والواطة واطاتك وأطير واندق علي انجلاتك.. الله أكبر).. أها دي موقعها وين من الهرجلة؟؟؟؟؟؟؟؟ |
اقتباس:
مرة في حصة من الحصص مرت علينا الآية الكريمة التي تقول: (إن أول بيت وضع للناس للذي ببكة مباركاً وهدى للعالمين.... إلخ الآية الكريمة)، وبدون أي مقدمات طلب مننا إخراج أقلامنا وتصحيح كلمة (ببكة) إلى (بمكة)،، تخيل نحن نصحح ما كتب بالمصحف؟؟ فجأة واحد من الشباب المتحمسين قام قال ليهو كيف يا آستاذ نعدل في كتاب الله؟؟ فما كان من أستاذنا الجليل إلا أن هاج وماج وقال ليهو: يا ولد أن أدرس في القرآن بي عمرك تجي تتفاصح معاي؟؟ يلا شيل كتبك واطلع برة حصتي دي،، وأضاف عليها: وأي واحد فيكم ما عاجبو الكلام ده يطلع مع أخوكم ده!!!!!؟؟؟ |
اقتباس:
عرفتو أستاذ دا عفا الله عنه ... مرة ورطت نفسو في حصة ما انو عامل بحث في المسألة المعينة دي ووعد الطلاب انو يجيبو ليهم ... لأنو بحث وجد الإشادة من الوزير الفلاني ووووو ... واتعكلت فيهو واحد من الطلاب كلو يومو يسألو : يا أستاذ عشان الفايدة تعم وما عارف شنو ... والله نسيتو بكرة بجيبو ... قام مشا ليهو في البيت (بالشرق ) وقال ليهو يا استاذ انا لقيت نفسي قريب من البيت قت اشيل البحث معاي ما تقوم تنساهو تاني قال ليهو : والله ياولدي لقيت الأرضة اكلتو كلو ما خلت فيهو غير (باسمك اللهم ) |
اقتباس:
تعرف حكايتك دي يالتربال ذكرتني كلام واحد أخونا سوري..والراجل دا معروف انو ما بكضب وبرضو حلف انو الحكاية البحكيها دي حقيقة وهو شاهد عليها.. قال عندهم في منطقتهم واحدة عجوز اسمها سلامة يوم هو واقف شاف ليكم سلامة دي جات جنب النهر ومشت فوق الموية لغاية ما قطعت للبر التاني والحتة المشت فيها حتة عميقة جدا.. المهم قال استناها لامن جات راجعة بي نفس الطريقة وقعد يراقبا عشان يشوف كان المرا دي عندها جن ولا سر تاني..استني لامن جا وقت الصلاة ومشي ادسي قريب يراقب.لقاها ركعت في الواطة ورفعت وشها للسماء وايديها في حالة الدعاء وسمعا بتقول: سلامة تعرف ربها وربها بعرف سلامة..قالتا تلاتة مرات وقالت الحمدلله رب العالمين وقامت. |
اقتباس:
ياخي امامكم دا راجل (تقدمي) خالص انا رجعت بالبوست دا لمآرب أخرى غير بتاعة عصاك |
اقتباس:
ده استاذ فعلاً القصّة دي كيّفتني لدرجة مسّخت عليّ قهوتي |
الحبيب اسامة
مررت بال(هرجلات) والمفاهيم أستصحب بسمة رسمتها ذكريات جميلات ... ألا رحم الله ذاك الذي شرع يحيل باء بكة ميما :) اذ كم له في الذاكرة من نوادر! ... بالطبع يبقى التسليم المطلق ب(ايجاب ووضاءة) جلّ مصادر الايحاء والتلقي قاتلا للابداع في نفوس المتلقّين! وطالما كان المعلم هو المتصدر لتلك المصادر... ينبغي للأمم والشعوب أن تجهد في اخراجه للناس بثوب أقرب الى الكمال! في اليابان... يقال بأن معدّل -أو نسبة- الدخول الى كليات التربية والتعليم فيها أعلى من نظيراتها من الكليات الأخرى! ويخصص له -أي للمعلم-راتبا أعلى من نظرائه المتخرين من الكليات الأخرى!! ... أختم لك بهذه: خلال حلقة اذاعية استُضيف خلالها راحلنا البروف عبدالله الطيب كان الحديث يدور حول أشعار الأغاني... قال البروف مخاطبا المذيعة: -أم ذاك الذي يقول ...(بدينا معاكي قصة ريد طريفة خلاص لأنها من طرف واحد)! وانفعل البروف وصاح قائلا: بالله عليك أين وجه الطرافة في ذلك ؟! ألأنها من طرف واحد؟! ماهذا الهراء! فما كان من المذيعة الاّ أن قالت: عذرا مستمعيّ الأكارم ...فاصل ونواصل :D تسلم اسامة |
أن تدخل كلية الآداب لا يعني ذلك مطلقا أنك أصبحت أديبا وشاعرا وناقدا ... ناقدا دي يمكن لكن كمان بعد تقرا ليك شوية مش من شالوك !!!
أن تعمل خفيرا في مستشفى الخرطوم لا يعني مطلقا أن تكتسب (مهارة ) كتابة الروشتات ... وتتحدث عن النتائج المترتبة عن إضراب الأطباء !!! أن تعمل أمين مخزن بصحيفة لا يعني مطلقا الحديث بإسهاب حول إسهامك في إثراء الحركة الصحفية في منطقة القرن الإفريقي !!! أن تعمل (من أوائل المشتركين في المنتدى الفلاني ) ... وهذه أصبحت وظيفة على أيامنا هذي ... لا يعني مطلقا أن تلقي بظلالك (المعرفية) على الجميع ... بدون إبداء أسباب (موضوعية) !!! يمكن للروائي أن يعمل بالصحافة ... لكن لا يمكن للصحفي أن يعمل (بالرواية) ... هذا لا يعني أن (القيد) الصحفي فقط من يمنعه ... ولكن الموهبة !!!طبعا أنا لم أقل أن الرواية تعتمد فقط على الموهبة ولكنها تحتاجها كأساس - فيما اعتقد - يمكن للشاعر أن يعمل بها أيضا – أي الصحافة – وطبعا في السودان يمكن لأي شخص أن يعمل بها ... ولكن لا يمكن (لأي شخص هذا) أن يعمل بالشعر ... هذي الفقرة الأخيرة لا تنطبق على السودان (الحديث) لأن هناك صحفيون (بقيد صحفي وبلا قيد مهني) واصبحوا من شعراء الأغنية السودانية برغم عطالتهم الواضحة في الصحافة والشعر !!! الملاحق التعريفية المرفقة مع النصوص – تقرأ الانصاص – لا تنفع (مرّاقات) إلا إذا كان من يكتبها يعتقد بالآخرين الغباء !!! وهكذا |
اقتباس:
|
:p
|
فتحنا محل صغير لبيع الابتسامات و(الالسنة) بي جاي جنب البوست دا
سيدي الرشيد وسيدي الأسعد وباسعار رمزية والله جمعتكم مباركة إن شاء الله |
اقتباس:
عجبتني جدا نسبة الطرافة للطرف الواحد ... لقيتا قاعدة بي طرف عديييل كدا |
| الساعة الآن 01:22 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.