يا منصور .... ده نميري البنعرفه
يا منصور .... ده نميري البنعرفه تحدث الدكتور منصور خالد كثيرا عن نميري في الفترة الاخيرة , واندهش بعض الناس لان الاعلامي الكبير حسن عبد الوهاب قد ذكر انه شاهد النميري في القطار وهو يعتدي بالضرب علي احد وزرائه . وطلب منه نميري ان لا يبوح بالحادث . ولكن الاخ حسن عبد الوهاب قبل فترة تحدث عن الموضوع ، وامسك عن ذكر اسم الوزير . ولم يكن ذالك هو الوزير الوحيد الذي ضرب . جعفر كان يعاني من حقد دفين علي المجتمع السوداني . وكان سوداويا ولا يخلو من السايكوباتية . لقد قال قبل موته بفترة قصيرة وفي صالون السفير السوداني علي يمين المدخل للمنزل في برلين ، بعد ان ساعدوه برفع رجله علي مقعد . ,, الرجل الاسي انت رفعتها دي ، امانا ما شلتت رجال ,,. وقيل هذا الكلام علي رؤوس الاشهاد . ولقد كتبت انا وقلت. ان النميري وهو علي بعدخطوات من القبر كان من المفروض ان يقول . هذه الارجل قد سعت لمصلحة الشعب , ولقد حملتني لعيادة المريض ومساعدة الايتام وتفقد الارامل .وكان ينتشي وهو يقول بانه اعدم الاستاذ محمود محمد طه . ,, ولو جا تاني حاعدمو ,, الاخ حسن عبد الوهاب عمل في الاعلام والتلفزيون ولكنه لم يطبل او يداهن نميري . وهو ابن عم زميل الدراسة في براغ السفير عبد الباقي حسن وزوج شقيقته . اشتهر حسن بالصدق والامانة . وكان من الزومة في الشمالية . وكان متديننا منذ طفولته . ولقد درس القرآن والتجويد علي يد العم احمد ابراهيم والد المناضلة فاطمة في جامع مرفعين الفقرا في العباسية امدرمان . العم محمد التوم التجاني كان من الرعيل الاول من المعلمين . اشتهر بالطرافة وحب الكلام . وله كثير من المواقف التي تداولها الناس . ولم بكن يقدر التعليم المصري في السودان .ولم يكن يلبي طلبات جامعة الفرع . واخيرا افترح علي ممثليها ان ينظموا اجتماعا في المساء ، لمناقشة المشاكل بسبب ضيق الوقت في وزارة المعارف . وعندما قالوا له ما كان يعرف سلفا ان التعليم في الفرع يحدث في المساء ، قال ساخرا ,, من ما الله خلقنا تعليم بالليل ده غير في رقص العروس تاني ما سمعنا بيه . واليه تنسب الجملة الراجل بذق . وتعني انه دقس او فقد زمام الامر . فيحكي عن نفسه بانه ركب القطار الي كوستي . وجلس في مواجهته رجل ثرثار وصار يتكلم ويتكلم . وعندما وصلوا محطة قنب خارج الخرطوم . الراجل فتح الشباك وبذق ، وبعد داك مسكتوا ليك كلام مافكيته الا في كوستي ,, هذا الرجل الفاضل اعتدي عليه النميري بالضرب حتي لزم سرير المستشفي . واضطر لترك السودان وهو السوداني الذي يمثل ابن البلد ولا يطيق ترك امدرمان . الاستاذ محمد التوم التجاني رد علي من ساله عن اجتماعة بنميري . وربما اراد الرجل لن لا يخوض في الموضوع فقال بعفويته التي اشتهر بها . اداني فاضية واديته مقدودة . ولسوء الحظ كان هنالك من نقل الكلام لنميري . ونميري كان سميعا ومتقلبا . كان كسبورة يمكن ان يكتب عليها الآخرون ما يريدون . والاخطر انه كان حقودا وحسودا منذ صباه . ولم يكن عنده ولاء لاصدقاءه ولم يكن له اصدقاء حقيقيون . كمال ابراهيم بدري كان محاضرا للغة العربية وكان يدرسها في عدة دول ومات وهو يحاضر في اندونيسيا . وكانن صديقا للبروفسر عبد الله الطيب . وعرفت ان البروفسر اراد ان يتبسط مع نميري . وكان الحديث عن الشعر . فقال عبد الله الطيب لنميري انه لو قال الشعر فسيأتي باعذب الشعر . وشرح بعض حملة الاباريق لنميري ان البروفس يقصد ان نميري كاذب . لان اعذب الشعر اكذبه . واستدعي البروفسر . وقال له نميري بعد ان ابدا غضبا . ,, انت ياعبد الله الطيب عاوز تسيئني بالبارد ؟ وبعد الشرح والاستعانة بفنون اللغة العربية والادب والشعر وكلام لم يستوعب النميري اكثره . قال نميري امش لكن يمكن اناديك تاني . هذا الرجل كان يسيطر علي السودان ويديره وكانه كشك مرطبات . الحرمان يأتي باحسن او اسوأ مافي طبع الانسان . والنميري عاش وسط عوائل كانت تعتبرغنية . وهو كان من اسرة فقيرة وكان والده مراسلة . وهذا ليس بمنقصة ، بل شرف يحسب له . الا انه كان حاقدا وحسودا .ربطته صلة القبيلة والجوار وامدرمان مع اسرة عثمان صالح وآل ميرغني . وكان عبد الرحيم عثمان صالح بعتبره كأخ وكان بارا به خاصة في ايام ابعاده من الجيش لاكثر من مرة . وكان النميري يعاني من الفقر وقتها لانه يتحصل علي نصف مرتب فقط . وقام بتأميم شركات عثمان صالح . وهؤلاء اشرف وانبل السودانيين . كانوا اضافة رائعة للمجتمع السوداني والراسمالية الشريفة ورمزا للعشائريه والتكامل السوداني . لقد كتب المهندس مرتضي احمد ابراهيم في كتابه الوزير المتمرد ، انهم كانوا في زيارة الدمازين. ونزل مرتضي مع اسري سودانية غنية قامت باكرامهم بطريقة مبالغ فيها . وكان مرتضي وقتها وزيرا للري . وكان رد النميري ,,ديل طوالي يتاممو ,, فثار مرتضي طيب الله ثراة . وشخط في نميري مستغربا قائلا ,, ناس تكرمنا ناممهم ؟؟ ,, وكانت هنالك مواجهة من قبل بين الاثنين . فبارشادات الامن المصري صار نميري يتفرعن . وفي احد الاجتماعات, غرز النميري عصاه في الطاوله ووقف يتحدث وكانه يخاطب تلاميذا . فانتزع مرتضي العصا . وقال له ,, انت فاكر نفسك منو ؟ وحدثت قطيعة لفترة . ولكن مرتضي قد اتي بالالمان والنمساويين لمساعدة السودان . ومرتضي كان متزوجا من المانية . وانتقل الي جوار ربه في النمسا . وبعد جلسة تصافي وشرب قال النميري لمرتضي بمزاح مبطن ,, انت ضنقلاوي ابن كلب ,, فقال له مرتضي وانت ضنقلاوي ابن ستين كلب ,, وبعد القعدة خرج النميري يسوق سيارته وهو مخمور .وكان معه مرتضي وكما اورد في كتابه ، ادخل النميري السيارة في سرادق عزاء . ولم يهتم اذا كان قد دهس اي انسان في السرادق . بل تراجع بالسيارة وهرب من مكان الحادث . هذا تصرف الرئيس نميري . وكما يطبل البعض للبشير اليوم ، فلقد وجد ولا يزال هنالك من يطبل لنميري . زوجتي التي عاشت فترة نميري ، وابوكم مين ... نميري ، تحسب ان نميري كان مبعوث العناية الالاهية لشعب السودان . بمناسبة السكر والطيش ، كان نميري يقف امام دكان جارة احمد سعد والذي اشتهر في ود نوباوي بالفول . وكان النميري ثملا كعادته في بداية مايو . ترجل احد سائقي التاكسي وكان يحدق في نميري . وبسوقية نميري التي اشتهر بها في امدرمان ، قام بقبقبة السائق . وتدخل احمد سعد وآخرون ,, لا ياجعفر ... مافي لزوم يا جعفر .. اطلق نميري السائق الذي لم يبدي خوفا ، وقال ساخرا ,,هو انت قشيري ؟ ,, عندما توفيت والدة بثينة زوجة نميري اتي العم عوض سالم ومجموعته في المساء للعزاء . وفي كل السودان كانت هنالك مجموعة من الرجال يهبون حياتهم للمساعدة ، خاصة في المأتم والدفن . فسالهم النميري ,, متغابيا ,, ليه ما جيتوا للبرود والكفن . فقال له العم عوض سالم . والله يا جعفر يا ولدي انت فكيتنا من السجن اسي دي . وانحنا جينا طوالي بيوتنا ما دخلناها . وهنالك من قال عن نميري ، مدرج العاطلة . نميري اوقف من الخدمة في عهد عبود . ومكث 22 شهرا خارج الخدمة بسبب ورود اسمه عدة مرات في محاولة انقلاب . وكان قد بقي له شهران ويحال بعدها الي الاستيداع ولا يعود بعدها ابدا للجيش . وذهب اهله الي ود ارو لزيارة البطل اللواء عوض عبد الرحمن صغير وترجوه لاعادة جعفر لان اهله يحتاجون لمرتبه ووضعة العسكري . ولم يكن في الامكان ارجاع جعفر الا باجتماع الفريق عبود واللواء حسن بشير واللواء طلعت فريد . وكان وجود الثلاثة في مكان واحد ممنوعا . لتفويت الفرصة علي الانقلابيين باعتقالهم سويا . وكان هذا قد حدث من قبل . وتصادف وجود الثلاثة في ماتم . ولم يتركهم البطل عوض عبد الرحمن صغير الا بعد ان وافقوا علي ارجاع نميري . ولقد كافأ نميري اللواء بان طرده من الجيش في اول ايامه في الحكم . فالمصريون لم ينسوا ان عبد الرحمن والد عوض . هو من طارد علاء الدين القائد الحقيقي لجردة هكي باشا . وكان علاء الدين قد قتل 12000 انصاريا في معركة المرابيع بالقرب من الجبلين. وعوض الذي كان في السادسة عشر من عمره لحق بعلاء الدين بعد هروبه من المعركة وقتله . وامتطي حصان علاء الدين وبلغ المهدي في بركة المصارين بموت علاء الدين . فقال المهدي ,, انت عبد الرحمن الصغير كتلت علاء الدين الكبير ؟؟ وصار اسمه عبد الرحمن صغير . البطل عوض عبد الرحمن طيب الله ثراه عمل في مديرية الخرطوم بعد طرده من الجيش . واتت شكوي من سكان العمارات بسبب كشك الجرائد ، وتجمع بعض الناس هنالك . وبعد السؤال اكتشف ان الكشك يتبع للعميد سيد العمدة . فثار اللواء واغلظ القول لكبار اهل الحي الذين اتوه شاكين. وقال لهم انها محن الزمان ان عميد جيش يحتاج لان يتعيش من كشك جرائد . سيد العمدة كان من اقرب اصدقاء نميري . وكان مسكن اسرته في العمارات يكاد ان يكون منزل نميري عندما كان يتواجد عند اصدقائه ويتنقل بينهم ويعيش علي كرمهم . وكثيرا ما كان يستعير قمصان سيد العمدة وآخرين ., وقبل يومين من انقلاب مايو الذي خطط له المصريون وتاهبوا لحمايته بجنودهو وسلاح الطيران المصري الذي ادخلناة لحمايته من اسرائيل ، كان النميري قد حضر لامدرمان واتصل بسيد العمدة لكي يحضر له فطورا في مصنع الذخيرة . لكن فطور بيت مش فطور مكاتب . وهذا يعني عصيدة او كسرة بتقلية ولحمة محمرة ...الخ . وبينما سيد المقبول علي الشباك شاهد نميري بسيارة فولكسواجن مستعارة . ولكن عندما شاهد النميري سيارة القائد العام امام المبني ، وكانت تلك زيارة غير متوقعة . . انحرف بسيارته بسرعة واختفي . وبعدها بفترة طلب زين العابدين محمد احمد عبد القادر من سيد العمدة تقديم التحية العسكرية . بعد ان اشار الي علامه قيادة الثورة . فقال له سيد العمدة,, دي تلقاها في المشمش ,,. وطرد سيد من الجيش . فبالرغم من الصداقة فجعفر كان حاقدا علي سكان العمارات . بينما النميري ينفذ ماكانوا يقولون . مايو الهنا مايو الغني والما غنا يركب هنا . كان الشرفاء امثال سيد العمدة رحمة الله عليه يمتلك كشكا لبيع الجرايد . في سنة 1974 احتاجت الاخت ماجدة اسماعيل ابراهيم لعملية زرع صمام قلب . وزوجها ,, عرفة ,, او كمال ابو العلا كان موظفا في مصلحة المساحة . ولم يكن في امكانه ان يوفر تكاليف السفر والعملية في لندن . فذهب بعض اصدقائة الي صديقه الحميم جعفر نميري لمساعدته لانه موظف يعيش علي مرتبه . فقال لهم بكل بجاحة ,, عرفة عنده موارد اخري ,, وهذه الموارد الاخري ما جعلت نميري يتواجد في شجرة محو بيك بطريقة مكثفة عند عرفة . وكان نميري من يقال عليهم ,, كحيته ,, او فوانيس . يتواجدون في كل القعدات والمناسبات ولا يدفعون . وكأن الاخرون ملزمون باطعامهم . ولكن جعفر لم يكن وفيا ولا شكورا . من الظرفاء والشفوت في امدرمان كان عز الدين كبوشية . وكانت هنالك اغاني يرددها الصغار منها العسكر في كوبر وعز الدين سرق الموتر . والاولاد في الظبطية وعز الدين سرق الطاقية . وعز الدين كبوشية طلق مرتو الحبشية . عز الدين خلع قلب امه لانه القي بنفسه امام شاحنة قندران متجه الي وادي سيدنا حيث كانت القاعدة الامريكية . وكان بعض صبية امدرمان يقومون بهذه المغامرة كنوع من الشجاعة . وبعدها عندما يطلب شيئ من والدتة تلبي طلباته بسرعة . وكانوا يلقون انفسهم بطريقة طولية . وتمر الشاحنة فوقهم . عز الدين كان صديقا لنميري منذ فترة الطفولة . وكان وشقيقه يعملون كسروجية ويتخصصون في عمل الخيام ومظلات الدكاكين . كانا يعملان عند العم طه السروجي في بداية شارع القصر . والعم طه هو والد الاخ الحبيب مجدي السروجي . وعندما كان كبوشية يعمل في الشمس في شارع القصر كان صديقه النميري يجلس في القصر علي بعد خطوات . وكان قد نسي كبوشية الذي وفر له كل شيء من خمر وبنقو ، من عرق جبينه . وفي احد الايام وبعد جلسة شرب لم يتوفر العشاء واخذ كبوشية صديقة جعفر الي منزل البيه عبد الله خليل وجار كبوشية . وكان منزل البيه مفتوحا في زمن الخير للجميع . وسمع نميري البيه يقول ,, يا عز الدين سيبك من الهباب البتشربو ده . العاوز تغمزو في الشطة ده ما سمك ده فطير ,, وخاف نميري بان البيه يمكن ان تعرف عليه وهو ظابط صغير وقتها . ولكن عز الدين طمأنه بأن البية رجل كريم ومنزله وقلبه مفتوح للجميع ، ولا يهتم . كمال مولي من جيران نميري وصديقه وله افضال كثيرة علي نميري . وكان من اشداء امدرمان ويركب موتر بي ام سي الذي كان يركبه فئة خاصة من الشباب الاقوياء . شاهد كمال موكب النميري وهو علي موترة وفرح بروية صديقة وبدأ في التلويح بيده ويبدي سعادته بروية جعفر . وانتهي الامر باعتقال كمال مولي والموتر . وبعد اسبوع في ضيافة الامن اللعين . افهموه بأن نميري لا يرغب في رؤيته . فقال لهم ,, ادوني موتري وزولكم ده تاني الله بيني وبينه , في الستينات توج صديقي عبد الفتاح صاحب الضحكة المميزة كمعلم في قهوة شديد متخطيا ود النوبه وود فؤالد وآخرين . وكان من مدني . وتلك سابقة غير معهودة في امدرمان . واتي بعدها فتوة مدني الاكبر عوض حلاوة . وكان محل ترحيب فتوات امدرمان وكان يتواجد كثيرا مع صديقي العجلاتي والملاكم كيكس . وكنا نحاوا اقناعه بالتخلص من الكسكته في الليل . لان من يرتدونها كانو أ عمال الصحة . الا انها كانت تزيده مهابة وعوض تمتع بجسم قوي ومهيب. وعوض لم يخسر في حياته سوي معركة واحدة مع عباس ابو مدينة في المولد وامام الناس في مدني , وعباس كان عربجيا . وكان مسالما . الا انه اراد ان يحد من غطرسة عوض . وخسر النميري معركته مع عوض وشج عوض رأس نميري . ولكن تصالحا وصارا اصدقاء . وفي اثناء عبور النيل الازرق اصيب النميري بشد عضلي ,, انشمطت ليه عصبة ,, فطلب منه عوض ان يضع يده علي كتف عوض . وساعده الي البر . عندما كان النميري حاكما صار الناس يلومون عوض حلاوة لانقاذه لنميري . ومن االممكن ان عوض قد ادلي ببعض التصريحات الغير ملائمة . وما حدث هو ان الامن قام باعتقال عوض حلاوة وتفننوا بالفتك به . ويقال انه السبب في موته . جعفر لم ينس علقة مدني و كان حقودا و سميعا .يمكن لاي انسان ان يؤثر عليه . اتته امرأة وزعمت بأن احد المحامين قد خدعها وساعد آ خرين في انتزاع منزلها . وكل ما قام به المحامي هو انه وثق عقد البيع . وانتهي الامر بالمحامي والشاري في السجن . واعيد المنزل الي البائعة . في سنة 1984 كانت عندنا اتصالات لمشروع عمل تجاري مع شركة كردفان التي كانت في قلب الخرطوم وكان المدير هو الاخ عبد الحليم الذي كان سهلا متواضعا يمثل النقاء السوداني .وكانوا قد قبضوا عربونا من مئة مشتري لشاحنات بدفورد ,, سفنجة ,, ولكن لم تصل سوي 70 شاحنة فقط . وبينما هم يقلبون الامر طلبت شركة ود نميري التي كان يمتلكها ويديرها مصطفي نميري شقيق جعفر ، تسليمها بعض شاحنات بدفورد . فقاموا بالاعتذار لشركة ود نميري . واتاهم صوت نميري في التلفون موبخا ,, انا عاوز اعرف انتو ليه ما عاوزين تتعاونوا مع ود نميريي ؟؟ ولم تفلح اي تبريرات . بل كانت هنالك تهديداد ,, احسن تتعاملوا مع ود نميري . وبعد ساعة اتي مندوب ود نميري قائلا ,, جينا نستلم سفنجاتنا ,, المؤسسة العسكرية التجارية قامت بتخريب الاقتصاد السوداني . وسلمها نميري للزبير رجب . وكانت تتاجر في كل شئ . وقال نميري لمن لاموه ، ان الزبير كان في فترة دراستهم فقيرا مثله . ومن حقه ان يستمتع الآن لان الآخرين قد استمتعوا من قبل . والزبير رجب بني مسكننا وقتها وبداخله مصعد كهربائي . وعندما اتت الطائرة وحاولت ضرب الاذاعة السودانية في الثمانينات ، سأل الناس اين الجيش ؟ فقال الدكتور خليل عثمان في منزل عزاء .. وهو الجيش فاضي من بيع الصلصة . وعلق آخر بأن الجيش بقي يبيع الفرك . ونقل الكلام لنميري كالعادة . وانتزع نميري وسام ابن السودان البار من خليل ووضعه معتقلا في استراحة الزوار الاداريين . وشتمه واعتدي عليه بالضرب . وعندما تعرض الشاب مصباح لنميري في مسجد القوات المسلحة ، وانتقد سياسة نميري وضع في نفس المعتقل. فقال له دكتور خليل ,و مادام جابوك هني معناها نميري في طريقه سياتي ويشتمك ويستفذك فارجو ان لا ترد عليه لانني عندما رديت علي اساءاته . ادخل علي ناس الامن شهوني دقو . وانا رجل مريض فعشان خاطري انا ماترد علية كلو كلو . وعندما لم يرد مصباح علي جعفر قال له كلمك .... ده . وحتي بعد تدخل امير الكويت جابر الصباح رفض نميري اطلاق سراح دكتور خليل . ودكتور خليل كان الاجنبي الوحيد الذي يسكن بالقرب من شيوخ الكويت . وهو رجل البر والاحسان في السودان . وكان يوظف آلاف السودانيين في مصنع النسيج ومصنع الدواء ومصانع اخري . لكن حقد نميري وسوء طويته جعلته يحسد دكتور خليل بسبب جملة واحدة لم تكن بعيدة من الحقيقة . لقد قال نميري لو انا كنت عارف الشعب السوداني ده تافه كده كنت حكمته وانا في الثانوي . لانه الناس ديل قدر ما اهينهم واحتقرهم بيجوني جارين ويتكبكبوا . وكان في لعب القمار يقول عند سحب الكرت,, بس لو لقيت احكم السودان ده يوم واحد .,, ولقد حكم السودان 16 سنة بدأت بالتطهير وطرد الاكفاء من وظائفهم . وشارك معه بعض الشيوعيين . وفتح البللد للنهب الاجنبي . واستعان بالامن المصري ومورس التعذيب بطريقة ممنهجة لاول مرة . وتخلص من اعضاء قيادة الثورة . وصار دكتور بهاء الدين وبدر الدين سليمان من اقرب الناس له . لدرجة ان مامون عوض ابو زيد الذي يتحمل العبئ الاكبر في انجاح الانقلاب . لانه كان قد اخترق مكتب قائد الامن العسكري اللواء محمد عبد القادر عمر الصادق ورد علي استفسار الرئيس ازهري عن تجمع بعض الظباط . ورد مامون طيب الله ثراه . بان الامر لايعدو الا تجمع ظباط لسكر ولعب القمار . وبالرغم من هذا منعه بهاء الدين من الدخول علي نميري . وعاش مامون في الامارات علي كفالة الشيخ خليفة بن زايد النهيان الذي ارتبط بصداقة مع مامون عندما كان مامون وزيرا لداخلية السودان . ومرت بمامون ايام عصيبة في بعض الاحيان . ومنزل الحاج عوض ابو زيد كان منتدي لتلك المجموعة . وكان جعفر يعبر شارع كرري ليتواجد في ذالك المنزل المرحب . والعم عوض ابو زيد من كبار الجزارين ومنزله مفتوح للجميع . وصهره وخال مامون هو الاخ النعيم المشهور بحطب . وهو احد اشداء امدرمان وله شعبية كبيرة كاعد فتوات امدرمان . وكان له رأي سالب منذ البداية في جعفر . وكان رايه في محله . وبعد شريعة نميري المدغمسة والمشوهة . نظمت كشة لمامون وبعض اصدقائة . وقال مامون بشجاعة الزمن القديم ان كل المعروضات تخصة وحده وليس للآخرين اي صلة بها . وبدلا من ان يحمي جعفر ولي نعمته مامون تنظم له كشة . ومامون هو من نادي بادخال نميري بعد ان ترك نميري تنظيم الظباط الاحرار في 1965 بعد ان ورد اسمه في محاولة انقلاب خالد الكد الذي كان وقتها منتميا للاخوان المسلمين ، مثل شقيقه طه الكد . وكان نميري حاقدا جدا علي خالد الكد . ولفد ذكره بالاسم في التلفزيون بعد احداث يوليو. . وكان خالد قد اختفي في بلده السقاي في الشمالية . والنميري كان من المفروض ان يحمي اهله وجيرانه آل عثمان صالح . ولكنه كان هو من فتك بهم وآخرين . يعزي البعض حقد نميري لموت والديه في حادث اليم وفي يوم تخرجه ، وعدم انجابه وشقيقة مصطفي . ولكن هذه الاشياء كان من المفروض ات تجعل منه رجلا متسامحا قريبا الي ربه. يقول البعض ان نميري لم يمد يده الي المال العام . ولكن شركات ود نميري كانت شاهدا عدلا بمبانيها الضخمة في غرب امدرمان . وكان بهاء الديم او مستر تن بيرسنت ، يستلم العمولات . لان النظام كان يدفع للصحفيين الكتاب والمؤلفة قلوبهم . وعلاج ودراسة ابناء المريدين والمتنفذين في النطام ورفاهيتهم واجازاتهم . وكانت تلك اول سياسات تجنيب المال التي تعلمها الكيزان من نميري . ولم تكن اخذ المال من وزارة المالية . وكل الانظمة الدكتاتورية تحتاج لهذا . الاخ شاكر عبد اله مكي اصيب بحادث سير في السويد . وصار مشلولا . وكانت شقيقته ليلي تحضر لزيارته . ولانها كانت موظفة مشهود لها بالكفائة في البريد والبرق فلقد انتقلت الي القصر الجمهوري . وكانت منظمة شركات شيرتون تريد ان تبني هوتيلا في الخرطوم وهم المنافسون للهيلتون . واشتكوا لنميري بان بهاء الدين يحاول ان يلوي زراعهم والحصول علي 10 في المئة قيمة العقد . واتاهم الرد بالتلكس من القصر الجمهوري بطلب تعاونهم . مع دكتور بهاء الدين . والكاتب كان هو بهاء الدين . وغسل اصحاب الشيرتون وكثير من الشركات يدهم من السودان , وعندما اراد الدنماركيون تركيب محطة كهرباء كريمة . طلب منهم نميري تركيب المحطة في دنقللا او الخرطوم . ولان المحطة هدية من سيدة ثرية احبت مروي . وقالوا لنميري بان في امكانه ان ينقل المحطة بعد تركيبها . المشاريع التي كان بهاء الدين يتحصل فيها علي عمولات كانت الشركات تضيف مبالغ طائلة لانفسها . فالدار دارهم والسلطان خالهم . ولم يكن يلتزمون بالمواصفات . وطريق كاس زانجي خير مثال . ولقد قال الخواجة مدير الشركة وهم ثمل بعد انهاء الطريق , ذس اذ الذي رود فروم نو وير تو نو وير . هذا الطريق من لامكان الي لا مكان . ولم يضعوا بطانة لثلث الطريق حسب العقد . والطريق كان بداية لتوطين مصريين في دارفور وعمل مصانع نسيج وستاتي الخيوط من المحلة الكبري في مصر لان دارفور لا تنتج القطن . وكان من المفروض توطين المصريين في جونقلي بعد اكمال ترعة جونقلي . هنالك قصة زميل الدراسة الذي تعرض لتحرش جنسي من نميري في مساكن الجيش وفي الليل . وكان لنميري اسلوب القبقبة والتخويف . ولقد طالبني صهر الرجل بان احذف اسم زميلي ، وان كان رأيي ان زميلي لم يخطئ. وعندما عرف نميري ان طالب الثانوي كان شقيق احد زملائه في الجيش ترجاه ان لا يذكر الامر لشقيقه . وتمنيبت لو انه اخطر شقيقه ولما رشح نميري لقيادة الانقلاب . نمبري كان يستمتع بازلال الناس ودعي احد الوزراء لطعام الغداء . واستمتع بدراسة الوزير وهو يسمع من الراديو خبر اقالته . واحد كبار رجال الدولة سمع خبر اقالته وهو يمتطي سيارة الدولة والعلم يرفرف في مقدمتها . فطلب من السائق انزال العلم وايصاله الي منزله . وبالرغم من كل هذا سياتي من يدافع عن نميري وسيقولون انه كان احسن من الانقاذ ... الخ ولهاذا وصلنا نحن الي هذا الدرك الذي وصلناه . لقد اورد ابو رنات وزميله رجال الامن في زمن نميري ان نميري طلب ان يعطوه تقريرا عن الجنوبي البينو . واعطوه اسوأ تقرير , وكانا متاكدين من ان النميري سيخسف به الارض . ولكن النميري جعله وزيرا . لانه لا يحب الاقوياء والشرفاء . عملية تنصسب البينو وزيرا لمعته . وعندما كان ابو صالح في زيارة السعودية رافقة البينو . وقبض علية وهو يحمل مقدارا تجاريا من المخدرات . صلة نميري ومرافقته للترابي في مدرسة حنتوب جعلته يحس بان الترابي بسمعته الكريهة لن يجرؤ علي التطاول عليه . ولكن الترابي اثبت انه هو من تلاعب بنميري . ومكن الاخوان من السودان وجيش السودان . بالرغم من ان محمود حسيب قد شارك في محاولة انقلاب 1959 المصرية ، وانه من خان اهله النوبة وضمن ولاء الجنود النوبة وسرق الانقلاب لمصلحة انقلاب مايو ، الا ان النميري طرده من الحكومة . وصار مديرا لشركة الاخشاب . وقام شاب بقتله بمسدس في مكتبه . ولكن لم نسمع باعدام الشاب . صديقي الطيب سعد الفكي كان وآخرون من الملتزمين بسكر نميري في نجيلة سلاطين . ولسلاطين باشا سبيل من الرخام وحديقة صغيرة بالقرب من المجلس البلدي . وبعد العشاء من بازار الاحفاد كان النميري يتلقي حق التاكسي للدومة . ولكن بعد مايو لم يتكرم عليهم جعفر بالتحية . صاحبة النيفة الشهيرة عرفت ان نميري قد صار رئيسا للبلد . فقالت الراجل ده اكلني وما دفع لي حق ريسين الخرفات الاكلهم . ده حياكل راس البلد . |
ياشوقي ياخ كلمني أو اكتب لي في الخاص ان شالله تقول لي IDI DO PRDLE.
|
اقتباس:
IDI DO PRIDLE!!!! : Sam IDI NA HUI قرقرقرقر |
اقتباس:
بخاف ما بمشي. |
اقتباس:
تمشى فيك كراكة....بوظت البوست....انت فى يوم بتقتل ليك زول من الناس الاعصابهم بايظة ...وحيقولوا عليك found guilty for culpable homicide..... |
اقتباس:
|
فى الراكوبة سدنة مايو مع الكيزان شكلوا جبهة موحدة للدفاع عن نميرى والهجوم على شوقى.....شاركت فى مواجهتهم تحت اسم Abuleila
http://www.alrakoba.net/news-action-show-id-163260.htm |
ياعم شوقي هنا كورتك "فكت" شوية
اقول قولي هذا واستغفرالله لي.............................. |
ذات يوم عمتك "أم قاسم" صحت من النوم وكعادتها في حكي الحلم والتي تسبقها دوما بقولة؛
خير اللهم أجعله خير.. حلمت أنها شافت "نميري" في حصان ابيض وهو آخر قيافة على ظهر الحصان ووسط الجماهير جاء راجل لمن قرب من الحصان، نميري رفسه برجله.. المهم مع خير اللهم أجعله خير بداء المسلسل،، قالت لآآآآآآآآآآآآآآآآآآآآآآآزم تمشي لنميري وتحكي ليهو الحلمة،، عمك أبراهيم الله يرحمهم إتنينتهم،، قال ليها: أمشي بس ما يرفسك إتي كمان،، ضحكنا وإنتظرنا الحلقات الأخرى.. طلبت من نفيسة الصادق بدري والتي تربطها صداقة حميمة مع أدى زميلاتها في الجامعة من أسرة نميري، أن تطلب زيارة النميري،،، الحلقة التالية في المسلسل وافق نمير أنه تجيه أم قاسم يوم الجمعة حيث كان معتاد أن يفطر مع أهله في ودنوباوي.. اليوم المشهود من الصباح إتحمحمت وإدمدمت وبالكورسير مشت أمدرمان.. إنتظرت مع السيدات وجاء النميري ... أم قاسم: يا الرئيس أنا بت جدك بابكر بدري النميري: عرفتك بالحليل ومد يده لمصافحتها ، لم تستجيب وقالت: ما بسلم عليك إلا أحكي ليك الحلمة وبعد ما توعدني بالبقوله بمد ليك يدي.. نميري: قولي وإن شاء الله خير.. حكت الحلمة.. ونوهت أنها حزنت لذاك المنظر لأن فيه إحتقار... النميري: أبدا والله يا حاجة، ""هم براااهم بيهينوا نفسهم"".. نميري يواصل: والله أنا في المكتب لمن أطلب واحد من الوزراء يتعتر من خشم الباب لمن يصل تربيزتي كمين مرة.. أم قاسم: عات يا السيد الرئيس آها البهين الرجال ربنا بيهنوه.. خرجت بعد ذاك اللقاء وعادت المنزل وتعليق عمك إبراهيم:: آها كدآ إتي مبسوطة... |
المُشْكِلة إنو شَوقي بدري، إعْتمد روحو مؤرِخ بِحكاوي حبوبات وسَمَع هُسسسس، طَيِب ليه أنا صنفت حكاويهو بِـ"حكاوي حبوبات"؟ لأنو بِبساطة شَوْقي بدري ما حاضِر مُعظم البكْتِبو عن الأغيار، إذا كان الواحِد ياخ بجرح في أبو هُرَيْرة ظاطوو، ما عارِف ليه بفْترِض -أي شَوْقي بَدري- إنو فوق الجرح والتعديل. أما المُطبِلون في كُل نص ف ديل حِكايتُم معروفه، ديل ناس أقل ما يُقال فيهم إنهُم كسالى، بثقِفو رقبتُم بقعدات الحكي وبزيدو تُقابة الحكواتي حطب.. الله لا تاجرُم ياخ
لو قريتو كِتاب شَوْقي بدري "حكاوي أم درمان" تلقو العجب.. ما خلى زول إلا فضحو.. ده كان نشال وهو أخو الوزير الفُلاني (ذكر اسمه كامِلاً) وده كان كتال وهو شقيق حوا الطقطاقة.. وده .. وده.. وأصلو ما كتب عن آلِهِ كلمة سوء، كأن أهلو رب العالمين غربل تُرابُمْ وبعد داك نفخ فيهم مِن روحو.. الزول لو كان صريح أكان يِكْتِب عن أهلو.. عن رقبتو.. مُش يبشتِن الخلق وعاوزنا:- (1) نعتمِد رواياتو. (2) ننصِبو مؤرِخ. ياخ لا |
اقتباس:
تعرف ما ينقصنا فى سرد التاريخ هو القصص السماعية .. والحادب يتابعها ويبحث خلفها ليصل الى الحقائق المختبئة .. درسنا فى التاريخ أمجاد المهدية وكنا إذا تعرضنا للهوان نقول تحدياً لمن يتهاون بنا (أنت قايل القصة مهدية) .. وصدقت الرواية الأخيرة على كتاب ضرار صالح ضرار الذى شوه تاريخ السودان .. فأنت يا عزام تهوى الأكاذيب وترفض الحقائق لأنك فى الغالب عنصرى |
اقتباس:
أبدًا ما شخصِية ولا يجوز أن تكون شخصِية.. بس صادف إني قريت ليهو موْضوعين في وقت واحِد والإتنين عندي فيهم رأي، كتبتو، وذكرت الكتبو شَوْقي بدري في "حكاوي أم درمان"، لتوصيل فِكرتي بِشأن فضح الأغيار طالما إنهم مُش مِن آل البدري! ــــــــــــــــــــــــــ اقتباس:
الأكاذيب والحقائِق دي البحدِدا منو؟ إنت؟ شَوقي بدري؟ منو؟ أنا بهوى أوطاني ـــــــــــــــــــــــ اقتباس:
طَيِب (تُقرأ بطريقة عادِل إمام في مسرحية شاهِد مشفش حاجة) |
تعليق في التنك
نميرى ماعنده اى حسنة خرب نظم التعليم والزراعة والصحة والإدارة المدنية وجاب الجيران الأعداء لكي يقتلوا شعبه الأعزل بالطائرات كما حدث للأنصار في أبا وودنوباوي .. ودمر كل ما هو جميل فى السودان وجاب الكيزان وشنق اشرف وانظف السودانيين .. نميري هو عين الحفد جاثم بشخصه وعصابته من الفاقد التربوي من العسكر الفاسدين أخلاقيا ليعوثوا فسادا وتخريبا في أفضل الدول في افريقيا نتحمل وزره إلى اليوم.. الأخ شوقي أرجو منك أن تواصل الكتابة بأسلوبك الشيق وامتلاكك لمخزون ثر من المعلومات عن هذا النميري وحقبته السوداء ..هناك الكثير من العناصر التي يمكن أن تكون روؤس موضوعات جديرة منكم بالاهتمام منذ بداية عهده إلى نهايته بدءا بالتأميم، وتطهير الخدمة المدنية المتميزة مرات متكررة حتى تم إفراغها، ضرب وإبادة الأنصار، سفك دماء المعارضين في 1971 & 1976، ارتهان البلد للأجنبي شرقا أو غربا، سياسة تكميم الأفواه إشعال حرب الجنوب ، بداية زرع الفساد مستر تن بيرسنت، فساد جمعية ودنميري، وفساد المؤسسة العسكرية (الزبير رجب) فضيحة الفلاشا. ارجو أن توثق كل ذلك في كتاب أو مجلد ضخم يكون منبعا للمعرفة للأجيال القادمة عسى أن يكون ذلكم في ميزان حسناتكم..
|
اقتباس:
أداء محمد وردي يا فارسنا وحارسنا يا بيتنا ومدارسنا كنا زمن نفتش ليك وجيتنا الليلة كايسنا يا حارسنا حبابك ما غريب الدار وماك لي حقنا الودار كنا زمن نفتش ليك وجيتنا الليلة كايسنا يا حارسنا جيتنا وفيك ملامحنا بعد يا مايو ما يئسنا بنرجع ليك توصينا بنسمع ليك تحدثنا بيك يا مايو يا سيف الفدا المسلول نشق أعدانا عرض وطول حلفنا نقيف ونتحزم نشد الساعد المفتول عشان نبدي اشتراكية ونرفع راية هم خلوها فوق السارية متكية دقت ساعة كانت نجمة في أعماقنا منسية كنا زمن نفتش ليك وجيتنا الليلة كايسنا يا حارسنا |
السيد عزام فرح , لكي لا يدافع عني اخي الغالي رفت دعني اقول انت غلطان . انا لم يحدث او سيحدث ان اصنف نفسي كمورخ . تقدر تقول لي وين انا كتبتا اني مؤرخ او كاتب او شاعر او صحفي ؟؟
يلومني الكثيرون لانني اتكلم عن المسكوت عنه ولا اعفي اهلي . انت ماقريت حكاوي امدرمان .انا كتبت ان ابراهيم بدري كان يرسلني لجلب الويسكي من موسي ود نفاش في بار لمنيوس . وفي الرابعة عشر تمردت وقلت له ان الخمرة سيئة وانني لن احضرها له . زكرت انني ضربت مدرس من اصل مصري اراد ان يخيف الطلاب وقرر ضربي بدون سبب لانني الاقرب . واعترفت بخطئي والامر كان رد فعل وبنية واحدة . لكن يوسف بدري بالغ في جلدي ممسوكا باربعة من الفراشين . وادنت يوسف بدري في تسبيب الاذي الجسيم بشهادة الطبيب . وادنت سياسة الجلد التي كانت مطبقة . ادنت احمد بدري لانه صار تابعا للنميري ووزيرا للمواصلات . وقلت ما قاله شقيقه الدكتور محمد بدري بانهم في مايو لصوص وكل مرتبه لم يكن يكفي لبناء منزله الفاخر بحوض السباحة . ولتصرف عنصري متعالي منه كنت لا اصافحه عندما يمد يده لي . بالرغم من انه عديل شقيقي . ادنت بابكر بدري لانه وقع في قائمة العار التي قالت ان امة يقودها ابناء الامة مثل علي عبد اللطيف هي امة لا تستحق الاحترام . واول الموقعين هم السيد عبد الرحمن والميرغني والهندي وترتيب بابكر بدري كان 25 من 35 . ادنت وكتبت عن موسي بدري اول طيار سوداني لانه اخرج مسدسه واخرج اولاد الزرقا من حفل عرس . ومنزله كان يفصله من منزلنا 10 امتار ولم نكن ندخل منزله . لان زوجته سعدية المصرية كانت تمنع ابنائها من لاختلاط باولاد الشارع وانحنا كنا اولاد الشارع . ابراهيم حسيب الذي جنح وانتهي به الامر في الاصلاحية وسجن بورسودان . كان ابن عمة توئم الروح بله الذي كانت اقسم باسمه . وهو شقيق الوزير ابراهيم حسيب . وزملاء دراستي ربيع وعباس . القصد التوعية لان اي طفل يمكن ان يجنح اذا لم يجد الاهتمام . هل ابراهيم حسيب بيهمك انت اكتر من اخوه بله تؤئم الروح طيب الله ثراه والذي كان يفتخر بكتاب حكاوي امدرمان . هذا يعرف بالتطفل والغرض . محمد الفي كان صديقي ومدربنا للملاكمة . انتهي به الامر في حالة سكر لقتل صديقه وابن امدرمان الطيب سالم . فجعت امدرمان لموت الاثنين . وكنت احذر من ام الكبائر التي لم اتعاطاها ابدا . حوا جاه الرسول او الطقطاقة كانت بمثابة الخالة وتترد علي منزلنا بانتظام . اتصل بي تلفونيا الابن وجدي الكردي رئيس تحرير حكايات . . وكانت معه الطقطاقة حواء جاه الرسول . وذكرتني بالاهل وامدرمان . وشكرتني للكتابة عن محمد الفي لان الناس قد نسيته . هل محمد الفي يهمك اكثر من شقيقته الطقطاقة ؟؟ هذه اول وآخر مداخلة معك . . |
كتب شوقي ابراهيم بدري :
(في سنة 1956 كنا نجلس تحت اللمبة في شارع الركابية غرب شيخ مرسي. وهذا الشارع ياتي من قلعة صالح جبريل ويعبر شارع الوادي وينتهي بشارع كرري. وكان معي الاخ محمد دوكة, وهو من ظرفاء امدرمان وجاري عبدالله دواي واحمد البشير وشقيقه محمود البشير ومحمد مكي ويس مكي الذي صار طبيب اسنان في الشارقة ) في هذا التاريخ سكنت عائلة ابراهيم بدري والد شوقي بدري في منزل عمنا زين العابدين والذي كان وقتها مديرا لمدرسة وادي سيدنا . هذا المنزل يفصله عن منزلنا شارع ناس محمد دوكه اذ ان منزلنا يقع في شارع الركابيه الرئيسي الممتد من ود نوباوي الي شارع ابو روف وهو الممر لاهل ودنوباوي الذاهبين الي سوق ام درمان لم اعاصر شوقي بدري في فتره وجوده في هذا المنزل لفارق السن وأيضا انتقل من هذا المنزل الي العباسية فيما اظن . الشاهد هنا أنني عاصرت محمد دوكه رحمه الله وعبد الله دواي ومحمد مكي ود. ياسن مكي والشيخ مرسي عليه رحمة الله نحن ابناء الركابية بام درمان نشهد بصحة ما حكاه شوقي بدري . |
اقتباس:
اقتباس:
هسي يا يحيى عثمان عيسي، قُعاد الناس ديل تِحِت لمبة شارع الركابِية دايرالا شِهادة شاهِد! |
السيد/ شَوْقي بدري اقتباس:
اقتباس:
ده كلام ساي.. ما عِنْدك ليهو إثبات.. كلام بتكتبو والسلام [/COLORجاء في صفحة رقم (32) السطر رقم (8): [في ام درمان يقولون فلان قَرَح وتعنى انه قد اتجه الى الاجرام .. اول زملائى الذى قرحوا ونحن فى مدرسة بيت الامانة الاولية كان ابراهيم حسيب ، واتجه لقطع "المفاحض" فى الترماج .] صفحة رقم (33) السطر رقم (1): [يوسف عبد العاطى . وهو من خريجى الاحفاد وكان زميلا وصديقا للاستاذ حسن التاج وكلهم من اسر محترمة الا انهم اتجهوا الى الشرب . وفى بعض الاحيان كان ينضم الينا عبد السلام ابو حوا (...)]. صفحة رقم (52) السطر رقم (4): [ومن بينهم الاستاذ عبد الله عشرى "دابى الليل" كتلة ، حسن عبد الفراج شحرر ، و"ضيعوك" الذى سميت عليه محطه ضيعوك بحى الرباطاب]. صفحة رقم (57) السطر رقم (4): [موسى "رأس حربة" كان من اشهر بائعى البنقو وكان يعمل معه البلطجيه اولاد الحناوى التوائم]. صفحة رقم (59) السطر رقم (2): [(...) وقد دربنا ألفى في نادى المريخ قبل ان ينغمس في شرب الخمر (...) وعندما حوكم وواجه المشنقه مشى بثبات وقد زغردت اخته حواء "الطقطاقة"]. صفحة رقم (61) السطر رقم (7): [وكان والدى عندما يرسلني الى ليمينوس ، كان يكفى ان اقف امام موسى ودنفاش وبدون ان اقول اى كلمة كان يقوم بلف زجاجة الويسكى]. صفحة رقم (76) السطر رقم (9): [اكبر مختلس فى ام درمان كان ود البدوى شقيق الدكتور على البدوى مؤلف مسرحية الدهبايه]. وإنت يا سَيِد/ شَوقي بدري كنت -حينذاك يعني- وحالِيَا نبي مُرسل ولا شنو.. ليه ما كتبت لينا عن بلاويك.. طالما إنت فاتحا على البحري كِده! المصدر: "حكاوي أم درمان" دار الكاتب السوداني/الطبعة الأولى 1999م القاهرة ــــــــــــــــــــــــــــــــــــــ اقتباس:
اقتباس:
أبدًا.. أنا البهمني إنك تكون صادِق طالما بتكتِب عن فضايِح البِيوتات.. وتكتِب لينا عن فضايِح بِيوتاتكم.. وبعدين حكاية تمردك عن جلب الويسكي وضربك للمُدرِس المِصري -إن صدقت- فيها دِعاية لِبُطولاتك -حسب رأيك- أنا عاوِزك تحكي لينا عن فضايحك عن فضايِح بيتكم.. الفضايِح البتكون في درجة [ده كان نشال] [ده كان ببيع البنقو] [ده كان بِتاع نسوان] وكِده ياخ.. بتقدر؟! ما أصلو إما إنت كُنت ملاك أو كمان ما صادِق في حِكاية التوعِية والنُصح والقُدوة والحاجات دي! ــــــــــــــــــــــــــــــــــــــ اقتباس:
ليه كِده بس.. إنت طبعًا مُتَعَوِد على إنو البشرِية تصفِق ليك عَمال على بطال مُش كِده.. لا لا أنا بقرا وبقول رأي، وما بهتم كتير لأي إعتِبار، الواحِد فينا يجرح في أحاديث البُخاري يِقوم يِهابك.. معقول بس ــــــــــــــــــــــــــــــــــــــ اقتباس:
طالما أنا قِدِرت بِإعجوبة أفْلِت مِن مرحلة المُراهقة.. حأوفِق نفسي أعيش بقِية عُمري بِدون ما تِداخل معاي.. حأحاوِل! |
ياعزام علاقتي بشوقي ترجع لي نصف قرن.أعرفه وأعرف المرحومة والدته وأشقاءه ودرست معه في تشيكوسلوفاكيا ولا أستطيع الادعاء اني كنت صديقه بل علي العكس كنت أتحرش به غباءا مني أو اعتقادا انها فروسية.
بالطبع ليس كل ما يكتبه شوقي كان شاهد عيان فيه ولكني ؤأكد بأنه أبعد شخص عن الكذب ولم أره يوما يكذب ولا أعتقد ان هناك من يستطيع اتهامه بالكذب. لولا علمي اليقين بأنك بعيد كل البعد عن كلاب النظام الحاكم لاعتقدت بأنك مكلف منهم بالهجوم عليه علما بأنك لست الوحيد في الفترة الأخيرة هجوما علي شوقي خاصة بعد أن بدأ في تعرية قيادات الكيزان. |
فتحي مسعد حنفي كيف حالك؟ علك طَيِب أنا ما كذبت شَوْقي بدري.. أنا طلبت منو إنو يِكون عادِل ويفضح لينا نفسو وأهل بيتو وعائلتو، بنفس المُسْتَوى الفضح بيهو العوائِل والبِيوتات [ده كان نشال][ده كان كتال][ده كان ببيع البنقو] ومعقول يا فتحي زول يِكْتِب رأيو في كِتاب مطروح في السوق، تقوم إنت ولا غيرك فكركُم طوالي يمشي للكيزان وأذيالُمْ! يعني أقرأ وأصفِق بس.. عِلْمًا بِأنني وإن كُنت لَيس بِكوز، إلا أنني أصبحت بعد تهديد ما يُعرف بِالجبهة الثَورِية -آل ايه- لِتحرير السودان، أصبحت لا أفِت مِن عضل الإنقاذ كسابِق عهدي، فهي -أي الإنقاذ- تصُد عنا نحن في الشِمال النيلي المُتَوسطي، تَوغُل وتَغَوُل هذِهِ الحركات التي تُنادي بِتحرير السودان وهي ترفُل -بِالصلاة على النبي- تحت نير الشعور بِالدونِية |
اقتباس:
وعادت الايام رغم انك ما تستاهل كمين سؤال عنك ولا حس ولا خبر المهم سعيدين بتواجدك. الشهاده لله كان المراد عكس ما ادعيت ان شوقي بدري لم يكن حاضرا وشاهدا في كثير مما كتب هذا أولا ثانيا : ما كتبه شوقي عن أم درمان في بضع من جوانبها في رائى كان من اجمل الكتابات وان تناولت كما قال شوقي المسكوت عنه وهو ليس ما انفردت به ام درمان عن غيرها من المدن . هنالك اخرون كتبوا عن ام درمان في جوانب اخري . البروفسور علي المك . عابدين زكريا . بروفسور حيدر عثمان عيسي وغيرهم . |
شوقي بدري :
ـ من صعاليك ام درمان وطبعا الصعلكه كما نسميها نحن اهل ام درمان خشم بيوت يعني يحمر ليك لكن تأمن جانبو ويحميك ان دعت الحاجه . ممكن يسلفك لو محتاج طبعا ما دافع حاجه من جيبو . عمنا صلاح غندور مره قال لي والله شوقي ده حيرنا . ـ ملاكم بالضربه القاصيه احيانا والفنيه أحيانا واحيانا سارتانا لا يرحم ومدرب ملاكمه ـ من ظرفاء ام درمان ـ في بيت السكر موجود لكن لا يشرب ـ مع ابو شله وود الحناوي لكنه لايتعاطي البنقو ولمن اتذكر الباقي برجع لكم فيهو بلاوي زرقه . عشان ترتاح يا عزام |
اقتباس:
اقتباس:
|
اقتباس:
بس إلحاحك (السفيه*) ده فيهو إنّ .. يا واحد من الكتب عليهم شوقى قريبك أو داير تقشر بيهو زى قشراتك مع الحركة الثورية طريقة (خالف تُعرف) *السفيه هنا ما توجيه إهانة .. لأن الكتبتو يا عزام ممكن يكتبو أى زول بطريقة معدولة ويلاقى القبول من شوقى وغيرو وممكن جدال مثمر .. زى قصة (ياخى لا) و(عائلتو ملايكة) و(يكتب عن فضايح عائلتو) .. دى ما كلام كريم ما يتشرف بيه زول عندو نخوة وبمناسبة نخوة دى أقول فى قاموسنا نحن ناس العهد البائد (كذاب = جبان) .. عمك شوقى دى كان جمبك سنونك السمحات ديل كان عوضك فيها الله وده الزعلو ما أى حاجة تانى |
ألياس كردمان عليه رحمة الله من ظرفاء ام درمان وود كاس النميري برضو عليه رحمة الله فالرحمة تجوز على البر الفاجر المهم الصحوبية بين الاثنين دامت طبعا الشراب والعشاء على عمنا الياس و جاءت مايو وفي اول عهدها كان موكب النميري بيمر من امام بيت الياس كردمان بشارع الوادي وتعود عمنا الياس أن يرفع يديه مهللا ومرحبا وأظن ذلك لم يعجب النميري فارسل الي الياس بأن يكتفي بالوقوف حتي يمر الموكب . الحكاية دي غاظت عمنا الياس شديد وحلف طلاق انو ما يطلع من بيتو الا بعد ما يصل نميري بيتو .
|
الحبيب رافت
خلونا نستمتع مع شوقي ونميري الذي يعرفه ونعرفه حبيبنا شوقي بدري لك التحية والتقدير نأمل المواصله وأنا عارف لازال هنالك الكثير بالمناسبة يا شوقي نحنا 3/2 |
عزيز يحي عثمان لك التحية . البعض يجهل روح امدرمان ن وايقاع امدرمان . في كتاب حكاوي امدرمان كتبت ان ابن خالي وزوج اختي صلاح محمد احمد اتفق مع العم كردمان علي آلاف الخراف . والسعر كان 7 جنيه . وفتح التصدير الذي كان متوقفا . وارتفعت اسعار الخراف . واتي من قال لصلاح انه يجب ان يعوض عمه كردمان . وعندما فتحوا موضوع التعويض غضب العم كردمان واحتد معهم لانه اعطي كلمة ولن يتراجع عنها .
كان بيجوني ناس وبيشتكوا من زول تحرش بابنهم او غازل بنتهم . وكنت بربط للزول بالاسابيع . لكن لو زول ضعيف شتمنا ما بنرد عليه . خالد عبد الكريم من الدومة والده كان عجلاتي في السوق في بداية شارع كرري . كان يمر بزريبة الكاشف مع اخيه . وكنت امنعهم من المرور بحلتنا كالعادة . وعمري كان 11 سنة . حضر مسلحا وقام بطعني . واخذني ميرغني الحاج فردة معني الي الاسبيتالية وطلبوا ارنيك تمانية . حولونا للشمالي رجعت البيت بعد الخياطة . امي قالت لي ود الناس ده بتكون غلطان عليه انت . لا سالوا منو واهله منو ؟ ولا الحصل شنو أ كانت هنالك ادانة كاملة من الوالدة . كان في حوالي 15 مخنجي كبير في امدرمان كنت بعرفهم كلهم . وكنت بعرف السريحين والكشيفين . وبعرف اغلب النشالين . منهم عباس والضل واب دربين وعلي ناست وعوض برسيم . كنت بقعد في الانادي . شقيقي الشنقيطي كان رفيع العود يكبرني بسنتين كان يضربني ولا ارفع نظري , كان يطردني من المجلس في براغ . وطردني من صينية الغداء في حوشنا في نهاية الثماتينات امام حوالي 15 شخص . لم نرفع نظرنا ابدا الي بنات الحله وتكلمنا مع النساءونحن منكسين الرؤوس . لكن دقينا البوليس القليل ادب . عتدما استفردنا بهم . لقد صادقنا كل الناس في حكاوي امدرمان تكلمت عن اصدقاءنا المجذمين كمال في العرضة ورمضان في حي السوق . وعبد العزيز حهاز واربعة حمير وكوكو .الذين يعملون في الالتة . او كاولاد بانديه . احضرت فتوة وركيب قهوة مكي علي ود بري لمنزلنا للفطور لان صديقي الملاكم من العباسية خالد ود ابونا قام بضربه . واكتشفت ان آخر حكم بالسجن عليه كان بواسطة قاضي جنايات امدرمان محمد صالح عبد اللطيف . وهو زوج اختي ويسكن معنا في البيت .وكان يتحدثا بكل بساطة واريحية . عندما اكملت الخامسة عشر تلامضت مع فتوة قديس فيصل روي رحمة الله عليه . وكان يرتاح الي ويختارني كزميل له في الوست , ولكن كان شميت صتاحي فقام باعطائي فلقة جامدة . كنت استحقها . وروي صرع فتوة بانت مكنن بلكمة واحدة وتداخل الاجواد وصاروا اصدقاء . الما بيعرف امدرمان ما بيفهمها . نميري تنكر لروح امدرمان . حمد النيل ضيف الله قائد الجيش السوداني عنده ابن اسمه عثمان طه ز وعثمان كه عربجي . وله ابن اسمه حمد النيل د . اللواء عوض عبد الرحمن صغير فردته ود ارصد وهو سائق تاكسي . نميري لم يتنكر لالياس كردمان الذي كان يطعمه ويسكره لسنين عديدة بل تنكر لكل اصدقائه . |
ذكرت يا شوقي محمد دوكه وجارك الاستاذ عبدالله دواي ... طبعا دواي ده شقيق عبدو الحلاق دكانو في المحطه الوسطي جب عابدين الخياط .. اشهر حلاق في ام درمان صفوة ام درمان كانت تحلق عندو .نميري قبل مايو كان من المترددين على عبدو الحلاق سواء للحلاقه المجانية او تلقي العوازيم والعطايا من الصفوة .
بعد مايو عمنا عبدو يو جمعه شال شنطة الحلاقة وقال نميري صاحبي امشي احلق ليهو في البيت وصل عبدو البيت وشرح للحرس وطلب منهم ابلاغ الرئيس ويعد انتظار وانتظار اخبره الحرس بعدم رغبة نمبري في مقابلته وطلب عدم حضوره مرة اخري . عاد عبدو الحلاق ادراجه غير مصدق ... |
اقتباس:
- إلحاحك (السفيه*) - داير تقشر بيهو - ما كلام كريم ما يتشرف بيه زول عندو نخوة ليه بس كِده يا ود ميلاد ياخ.. يعني علشان تنصِف -حسب رأيك- شَوقي بدري تقوم تكتِب لي كلام زي ده.. والله ما كان العشم؟! ما علينا.. خير يا زول |
يا شَوقي بدري ويا يحيى عُثمان.. واصلو في نشر فضايِح البِيوتات.. بيجي يوم بتضوقو مِن ها الكأس.. ده ناموس.. كما تَدين تُدان.. واصلو |
اقتباس:
سلامات يا عزام والكلام برضو موجه لى يحيى ياخ أنا ما قاعد أنصف فى شوقى بدرى .. أنا قاعد أوبخ فيك أنت يا أبن عمى* شوقى بالمناسبة ما بزعل من أى نقد ولا أنا .. بس أسلوب التكذيب بتاعك وبطريقة إستهانة دى الزعلتو منك حسب تقديرى .. أنت ما منتبه لفارق الأجيال .. القصة دى عندنا كبيرة شديد ومرتبطة بالجبن .. زى ما كان أبوى الله يرحمو بقول (ما تكذب والسكين على رقبتك) زمان كان فى مهنة وضيعة لى ناس بأجروهم لشهادة الزور .. يعنى أتورطت تلجأ للناس ديل لأن لا أبوك ولا أخوك بكذب ليك حتى كان تاخد إعدام .. والناس ديل تدفع ليهم وأنت بتحتقرم فياخ وجه أنتقاداتك كلها بدون ما تجعلا شخصية .. ياخ شوقى بدرى ده مشيت ليهو زيارة عمل ليهو موضع عنوانو (صعوط رأفت ميلاد) وطفش الجكس كلو وحرق صورتى العمرها أسبوع وعشرة يوم :biggrin::biggrin: *أبن عمى دى ملاحظا يا صابى :biggrin: |
الحبيب رأفت
معليش فهمنا تقيل شويه وضح لو تكرمت ماهو الجزء الخاص بيحيى في كلامك اوعي تقول لي توبيخ بزعل منك اي كلام بالظبط الموجه ليحيي برضو نحنا 3/2 تقسيم 41 |
رأفت ميلاد اقتباس:
عليك الله يا ود ميلاد جيب لي إقتباس واحد بس مِن كلامي الكتبتو في العمود ده قُلت فيهو أو أوحيت إنو شَوْقي بدري بكَذِب.. أنا ما قُلت إنو بِكذِب ياخ.. انا طلبت منو في حالة إنو ما ملاك أو أسرتو الصغيرة (أولادو) والكبيرة (العائلة) في حالة إنهُمْ مُش ملايكة، طلبت منو يحكي لينا عن فضايحُمْ، طالما هو بتجدع كِده في نشر فضايِح الأُسر والعوائِل.. أنا ما كذبتو أبدًا لِسبب بسيط خالِص، أنا ما حاضِر الكلام البقول فيهو ولا عِنْدي البخالفو.. أنا بتكلم عن "المَوقِف الأخلاقي" |
اقتباس:
ياعزام يبدوان هناك لبس في الموضوع.. ياخ البوست دا مامفتوح للفضايح وكل كتابات شوقي هي عبارة عن وصف دقيق لمجتمع أمدرمان في خمسينات القرن الماضي والناس البكتب عنو شوقي كانوا هم الشخصيات المحورية الزمن داك وما معقول يكتب عن نشال وبياع بنقو ولا ست عرقي ويقول عليهم أفندية. وبعدين ياخ تفتكرشوقي لما يكتب عن الناس ديل ويقول انو صاحبهم ما دي الفضيحة ذاتا.الزول طلع روحو رباط وبمشي الأنادي وبيوت المخنجية.. ياخ يعمل شنو لو ما عندو زول في أهلو ممكن يفضحووكان للرباية شوقي متربي تربية عالية غصبا عنو وعيبو الوحيد الشكل لكن ما بغلط علي زول.. طول معرفتي بي شوقي أنا ما شفتوعمل شكلة بتخصوهو شخصيا وكل شكلو بسبب السودانيين ودفاعو عنهم.الشكلة الوحيدة الشفت شوقي ضارب فيها بسبب حاجة تخصو هو كانت مع طالب نيجيري اتشاكلو في صف صرف المنحة واستمرت في الداخلية واستغرقت تلاتة أيام وانتهت بدون منتصر.النيجيري دا كان اسمو بالتشيكي شباتني موج أي الراجل الكعب وكان أطول من شوقي ووزنو حوالي 200كيلو خالية من الدهون.. أها داير شوقي يجيب فضايح لي أهلو من وين؟شوقي حفيد بابكر بدري يعني ممكن براك تفتش في سيرتو وتشوف كان عندو فضايح. بعدين شوقي كتب عن ود عمتوعثمان جيمس الكان مسطول وأبوهو قال ليهو أجيب البندقية أديك طلقة وأملاك دخان.عثمان ضحك وقال هو ما عارفني أنا كلي دخان.أها دي سيرة أبو زيد الهلالي؟ خلاصة الكلام ياعزام شوقي ما بكتب فضايح لكن الحكايات البكتبا فيها فضايح. |
فتحي مسعد حنفي اقتباس:
خلاص نعتمِد ليك شَوْقي بدري وأُسرتو مِن الملايكة.. ولا يهمك ياخ |
نميري رئيس عظيم ..الماضي لا يعود عندما تكون رئيس.
قعاد اللمبات في انصاص الليالي للعب الوست اختراع سوداني من العطالي وليالي رمضان......ولف البنقو ..حتي طلوع الفجر.. |
أديسلام
وييييي بي يووو يايويا عمنا شوقي البدري سلام قال النبي الكريم اذكروا محاسن موتاكم لا حول ولا قوة الا بالله دا كلوووووو في نميري عليه رحمة الله والله شئ محزن أنت تشوه صورته وأنت تكتب تفاصيل دقيقه واظن بأنها نجر اخضر ومحض افتراء ومهما جلس الرجرجه والدهماء يثرثرون في الأسواق والحانات فهم لبسوا با أنبياء وليس كلامهم منزل كلنا بشر والبشر خطاؤن ولقد كان السكر في أزمان ليست بعيدة تفاخر ومرجله وكل السودان عاقر أم الكبائر وارتاد البارات والانادي وفي الشدو في البيت وسكرن النسوان |
يكفي انه جعفر محمد نميري رغم كل قلم مسموم وقالوا التور ان وقع كتر البتابت عيييييييييييب
سؤال: ليه عندما كان حي لم تكيلوا له أطنان الصفات والنعوت والقصص والتراكيب الغريبة؟ ايوه فالجبان دوما يهمس ويغمز ويلمز ويحيك أكثر مما قال مالك في الخمر تمنيت لو كان حيا لتمكن من تفنيط الحقائق ودافع عن نفسه للردع كل من تسؤل له الامارة بسؤ اما عم رافت سلام شائفاك بقيت ديكتاتور ومحامي دا منتدي حوار وكلا يدلو بدلوه فقط البتسوي فيه دا ما بشبهك وبعدين عمنا شوقي مايحتاج لدفاع ماهو هين يكفي انه ملاكم وسيف قلمو سنين وبقدر يدافع عن نفسه عمنا فتحي سلام اا خت الكوره واطا شائفاك أنت والمقدس مشكلين فلووووووتروووون علي السيد عزام ياخي هو شخص يتمتع بحقوق عضويه بسودانيات وكل زول يقول يحاور يجادل يفند ويشجب له مطلق الحريه ولا يحجر علي رائ الاخر اما اذا كنتم أصحاب ومعرفة رجاءأ ليس علي حساب الحوار وسياسه التبرير ما جميله يالطيف منتدي دا مافيه سدنه &&&&&&&&&&&&&&* |
السيدة او الآنسة وجيدة لك التحية . انا عمك شوقي بدري بدون الالف واللام . المثل بقول الصقر كان وقع كترة البتابت عيب . والتور كان وقع كترت سكاكينه . هل موت الانسان وهو شخصية عامة يمنع الكلام عنه . انا لا اعرف اي محاسن لنميري . انتم من تعرفون محاسنه اكتبوا عنها .
العم محمد احمد عباس كان اكبر تاجر اقمشة . كان كريما مساعدا . وكما اورد الابن يحي كان احد منازله يأوي مدرسة السلام لست فلة التي ضمت المسيحيين والمسلمين . كان عائلا لعوائل عدة . قام نميري بمصادرة شركاته ودكاكينه . وهو جاره وجار آل عثمان صالح الذين صادر اموالهم وسلمها لسدنه مايو . بعد سنين استدعي الشيخ العالم الفاتح قريب الله العم عباس لان احد عمال العم عباس اراد ان يغفر له العم عباس جريمته . ورفض العم عباس يالرغم من انه يحترم جاره الشيخ الفاتح قريب الله . العامل كشف لرجال نميري مكان المخازن التي كانت فيها البضاعة . واجزلوا له العطاء وصار من الاثرياء . زكر الابن يحي عثمان عيس ارسال الامن لالياس كردمان الذي كان منزله مفتوحا لجعفر ليشرب وياكل ويدفع له صديقه الياس وجاره . وهدد الياس كردمان كما عرفت كل امدرمان . ومنع من التلويح لموكب النميري الذي كان يمر امام باب آل كردمان. وكان المنزل ما يغشاه جعفر يوميا ايام حاجته . لماذا لم يتوقف ابدا للتحية كتب الابن يحي كذالك قصة جارنا الحلاق عبده الذي كان يعمل في في صالون عنبر اكبر محفل اجتماعي في امدرمان وفي المحطة الوسطي .. كانت يحلق لنميري بدون اجر في ايام فلسه وايقافه من الجيش . وكان عبده يجود علي نميري بالمال . وكان الحضور يدعونه لسهراتهم لانه مفلس . عبده كان جاري ويفصلنا حائط وشقيقه عبد الله دواي من اعز اصدقائي . عندما صار نميري رئيسا . اخذ عبده شنطه الحلاقة واراد ان يحلق لصديقه جعفر . لقد طرد من منزل نميري وافهموه ابن نميري لا يريد ان يقابله . لماذا لم يتذكر نميري ابدا اصدقائه القديمين ومن احسن اليه في فترة فقره وشقائه ؟؟ نحن لا نعيب علي جعفر شرب الخمر. ولكن نعيب عليه اللؤم ونكران الجميل والحسد والحقد علي الآخرين . ولقد هاجمنا نظامه في شرق اوربا عندما حضر اليها . وهدد فريق الامن علي صديق بأخذي في نفس الطائرة الي الخرطزم ، او اخصاري . ولقد هاجمنا النظام امام رجال امن نميري وسدنته في الخرطوم . اقرئي موضوع . اهاذا من تقدسون . |
اقتباس:
عايز أقولليك أناعزام بعتبرو صديق وأنا دافعت عن شوقي لأني بعرفو شخصيا ولم أسيئ لعزام ولم أحجر علي رأيه. |
| الساعة الآن 05:54 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.