التقومك من أهلك مريوق تغشيك أم شانق
وتبيتك مرزوق
أم شانق سعد، وأم شانق حاج إبراهيم ومرزوق من قرى شرق الجزيرة ريفي رفاعة، ومرزوق دي مولود فيها الفنان أحمد الجابري. ناس البطانة فوق؛ شايلين حس أم شانق ومرزوق وبوصفوهم بالبخل. مرّة قمت من قرية السعدية بلوري قاصد رفاعة وتمبول |
اها
|
قبل التحرك من السعدية خلوني أوصف الصورة قبل أركب اللوري.
الوكت كان أول يوم في ضراع الأسد ستة صباحا، شيخ عوض الكريم خير الله قال لي: لو ما المطرة دي جاية كنا مسكناك معانا لحدي ما تاكل كرامة حاج الدابي، إلتفت وكورك للبنات السايقات حمير الري لبيارة أم طرطارة ورجعن وحماهن الورود، لأنو المطرة أكيد جاية |
اللوري وصل قرية الكاهلي زيدان، ودخلها من فريق أولاد عون، ركبوا فيهو أربعة رجال لابسين جلاليب بيضا وطواقي خضر، لفت نظري انو الجلاليب نظيفة كغير عادة متسوقي تمبول! ركبت كمان امرأة شايلة ليها جدادتين فيوميات - بسري قلت أكيد الفيومي دا دخلتو للعرب ديل جمعية بلان سودان- وواحدة بلدية وسخل أبيض أضانو مشرومة، ورجلو اليسار مربوطة مع يدو اليمين، الجداد علقوهو برّة اللوري والسخل توشك بدأ يكركم في رباط جزمتي الاديداس.
مجرد ما اللوري إتحرك واحد من الأربعة النضاف وقفو وقال لأخوانو: عيك نسينا عدة الشغل، قبل ما ينزل من اللوري واحد من أخوانو همس ليهو في أضانو الما مشرومة: مع الطارات جيب معاك حجر، المرة دي واحدة في اللوري، الله يكفينا شرّها. |
المداح جا راجع اللوري ومعاهو طارين في مخلاية، صاحبو قال ليهو: إن شاء الله إتذكرت الحجر؟ ردّ بالنفي، وقال البتجي من الله كلها سمحة. دخلنا أم شانق سعد حوالي تزعة ونص ومشينا نزلنا مكنة بابور عند ميكانيكي طرف الحلة، التنزيل أخد وكت طويل لأنو المكنة تقيلة.
بقينا في اللوري أنا والكمساري، والمداحين الأربعة، والمرأة والسخل ًوتلاتة جدادات بجنب اللوري. الكمساري خلص من المرة حق نفرين بحجة انو السخل والجدادات بساون زول! ضربت معاهو حجة شديدة وبعد قنعت منو قالت ليهو: خليتك ليوم القيامة إن شاء النار تشوشوك زي الشية، قال ليها إتي يا مرة مجنونة؟ نار شنو الربنا بشوي بيها الناس! إتي ما عاقلة، معقولة ربنا يرمي ليهو زول حي في نار؟! هسع أنا بقدر أرمي تيسك دا حي في النار؟! دا كلام ساي ما في عذاب بنار ولا شيء. لا شعوريا إنحزت للكمساري وبسري قلت الكمساري دا علماني!! |
يا زول طلعت بلدياتنا يعني .. مبااااااااااااااالغة.. حبابك يا عربي مرفق : محبتي وتقديري بــــادي |
يا سلللللللللللام ياخ علي الحكي الطاعم ده يا بابكر ياخ
واصل عليك الله ما تقيف بينا هِنِي |
اقتباس:
القصة دى كلها عشان كلام الكمسارى دا الكمسارى تقول قاعد يستمع لمحاضرات احمد الخفانجى :wink: حسع شنو البحِلك من حامدمحمدصالح. |
اقتباس:
|
يا مهند يا أخي، أقول ليك لابس جزمة أديداس، تقول لي بلدياتي؟!
كنت في ذلك الوقت باحث بالبطانة، أهلي قبل إستقرارم بمدني كانوا عرووب ساكت، لكن أنا زول حنكوش مولود بمدني |
اقتباس:
|
شكرًا يا ناصر، وإتّا عارفني بحب الشكر والزول البشكرني بدعو ليهو الله يعرس ليهو.
يا زين، مبسوط منك لأنك بطلع العبر من رواياتي، غير حكمة الكمساري هناك فلسفة رفع الحجر مع المرأة الواحدة لكسر العارض وعبر أخرى سوف ترأها في حفلة المداحين. في حتة يا حسين، ممكن تخلي حامدمحمدصالح يصوت لي وهي ربط معرفة شيخ عوض الكريم بالمطر مع تفسير المداح لنزول المطر كعارض لركوب امرأة واحدة فقط معه باللوري. |
بعد عشرة دقائق من خروجنا من أم شانق نزلت المطرة من النوع البفلق في الرأس داك. بسرعة عمر الكمساري طلع ليهو تلاتة مشمعات صفر؛ أدا المرة واحد، وواحد غطى بيهو شوالات العيش والتالت إتكومت فوقو مع المداحين وخرتاية الطارين، بعد داك عمر جاب السخل وجا إتكوم معانا تحت المشمع، بسري قلت: الكمساري دا علماني وحنيّن
|
يا مستنير،،
أكاد أجزم إنك استفدت من تلفوناتك البتضربها لي ديك أيّما استفادة! شايفك بقيت تعرف ترفع درجات التشويق لأعلي معدّل وتخلي القارئ متنشن ومنتظر يعرف الجاي شنو! التحية لزين عبد الله علي المداخلة (الأمينة)، شكلو متابع كويس! |
أبو بكر عباس
أيها الكاتب الأريب ما هكذا تورد الإبل... كب القصة كلها ياخ شحتفت كيبورداتنا زاتو |
اقتباس:
نحن مألفين تحت كي بوردلتنا |
اقتباس:
اقتباس:
اقتباس:
سلامات يا بابكر لو قلت طوبة كان يكون أدق من إستخدامك لكلمة حجر لأن المتعارف عليه في مثل هذا الموقف (التشاؤم) طوبة وليس حجرا ً حسب ثقافة أهل المنطقة التي تحكي عنها .. وهناك فرق بين الحجر والطوبة كما تعلم. كما قال أخونا الرشيد ذات مرة نحن بنحب الونسة والقصص الزي دي وأنا أتفق معه في ذلك لكن حشرك لكلام الكمساري (العلماني) ومحاولة توصيلك لفكرة معينة لم يكن موفقا ً ولا يدعمه منطق حسب سياق هذا النوع من الحكي البلدي البسيط ... وشكرا ً |
اقتباس:
|
سلام يا شبارقة،
الطوبة كلام ناس مدن وهي تعني الطوبة المصنوعة حمرا أو خضرا الناس الكنت معاهم في بداية التسعينات على تخوم ولاية الجزيرة منطقة السعدية وشرقها كانوا بدو ولم يكن هناك بيوت مبنية بالطوب وهم يعتبرون أهل القرى حضرا وبقولوا في شعرهم: زول القرية كان شاورك ما تشورو رياد للكحل وأكل الرهيفة بدورو بخصوص جملة الكمساري؛ أظن أنني سمعتها من زول بسيط "ذات" ونسة بسيطة |
اقتباس:
كده حتشمِت الناس علينا رشيدويه أنموزجاً ومن يتبعهُ علي هواه كأشرف السِر ده ظاااااااتو ياخ البروف ما يجي ناطي بهنا كمان والعرجونه جيجي لو جات حتمسكها علينا ذلَه ياخ الجمع هنا لي انا وكاتبي المُفضَل طبعاً :tongue: :tongue: :tongue: |
اقتباس:
عشان الحنك طبعا |
اقتباس:
تسعينات شنو يا بابكر .. أنا الخط ده ماشي فيهو من بداية السبعينيات .. من رفاعة مرورا ً بتمبول وطريق الهوا حتى قهوة النص ومنها ندخل 65 أب ناجمة ومنها حلفا الجديدة أو خشم القربة وكسلا بالساسريب (الساسريب هو نهر عطبرة)... منو الما بعرف كلمة طوب في سودانا ده ؟ بيوتنا كانت من القش وبالرغم من ذلك لا تخلو من بعض الطوب الأخضر كالحوار أو التكل .. وبنسميهو طوب أخضر .. ناس ما بيعرفوا معنى كلمة طوبة من باب أولى ما ح يعرفو إنو ركوب إمرأة وحيدة في عربية مواصلات يعتبر نوع من العوارض .. يا عمك ثقافة الكمساري ممكن تنبلع لكن إستخدام الحجر مكان الطوبة فلا :smile:. |
اقتباس:
بكّة .. ياخ العريبي عمرو ما ببقى حنكوش .. حنين البادية غلاااااااب يا بك بلا أديداس بلا بطيخ معاك.. مرفق : مودتي بــادي |
ماذا تعني (مريوق)؟
هل هي من (ترويقة)؟ _____ هل ممكن أخاطبك ب(بابكر)؟ ما قادرة أتأقلم مع (أبو بكر)! _____ يا بابكر، انت حكاي. وبصورة ممتعة كمان لوﻻ الفواصل المتعبة، والبعض الذي يقف عليه أخونا شبارقة:smile: |
اقتباس:
مرحبا ً بالأستاذة وهاد فكـّة الريق (معروفة) وجات منها مريوق (صفة) .. وهي بالمناسبة لا تصل لحد الشبع ولكنها قد تكون من مواد تحسسك بالشبع لمدة طويلة (الدخن مثالا ً) الحكي بالدارجي لا يخلو من متعة ..وبالتأكيد أخونا بابكر قادر على ذلك .. بس عليه أن يوسع صدرو شوية (ولا حاجة للتبرير) فقليل من النقد لا يضر:smile: |
اقتباس:
فعل (فكة الريق) معروف ومألوف طبعا، انما اشتقاق الاسم للصفة (مريوق) غريب علي، يمكن لعدم تداوله في بيئي المحلية (برغم عدم احاطتي بها جيدا) آلفها أكثر في ألسنة اخوتنا العرب. ممكن تشوف لي تصريف معاك لحكاية استاذة دي؟:smile: برضو ما بقدر أتأقلم معاها، واقنع لي معاك اخونا فتح العليم:smile: تسلم شبارقة. |
تعديل صبيباً بعد ملاحظة حضيري
المطر صبّ صبيباً بدّع (علي وزن خبّ خبيباً بدّع بتاعت ود بادي)، السواق شاف ليهو حتة عالية وتكّل فيها، سيد اللوري الراكب جنب السواق نزل وكورك للمرة وساقها ركّبها قدام وجا إندفس معانا تحت المشمعات، بعد المرة نزلت، المداح قال للمداح: ما قلت ليك جبيب معاك طوبة*؟ المداح ردّ للمداح: وأنا موش قلت ليك البتجي من الله كلها خير؟ ووقف على حيلو ورفع يدينو الإتنين لفوق واستقبل المطرة بصدرو.
عمر الكمساري طلّع ليهو من خّرج جنبو تمر بركاوي ووزعوا علينا بالخمشات، وبحركات الكماسرة السريعة ديك مدّ للمرة والسواق القدام خمشتين، بسري قلت: الكمساري دا علماني، حنيّن وكريم، وبسري برضو شكرتو شكر شديد علي فكة الجوعة الدخلها فوقنا برد المطرة. شوية والمطرة هِدت، عمر شال واحد من المشمعات ومعاهو حبال وظبط لينا تاية بجنب اللوري في دقائق (كنت داير أسري وأضيف للكمساري صفة سريع، لكن خلونا من الجمل الإعتراضية دي)، شلنا المشمع التاني جلسنا فوقو وإنضم لينا السواق. سيد اللوري قال للمداحين أمدحوا لينا، نزلوا الطارات لقوها مرخية، قلت ليهم أنا عندي بابور غاز في شنطتي، وأضفت: نحن برضو عندنا عدة شغل. شدينا الطارات وكل زول حمس يدينو في البابور والمداحين قعدوا جنب بعض، وبدوا بمدحة: شيء لله يا حسن، يا حسن، الأداء بتاعم أحسن مية مرة من أداء الجمهوريين لهذه المدحة، والمداح الما جاب الطوبة صوتو لو ما أحسن من صوت إخلاص همد، بكون زيها. قلت ليهم إتوا جمهوريين ولّ ختمية، ردوا لي بمدحة سريعة: شيء لله يا أب جلابية ويا عثمان شيخ الختمية شيلوا الفاتحة وأعقدوا النيّة، التمساح جيبولوا أذية ـــــــــــــــــــ * قصرت معاك يا شبارقة واحدة من متعي في المنتدى دا؛ أغالطك. |
اقتباس:
دا هنا كلام سمح ومرتب وشبارقة لو جا قال فيهو حاجة بيكون إتلوم طب. كنت داير اصلح (صبياً) حقت المطرة لكن لقيتك بذكاء أردفتها بمرادفة ود بادي (خبيباً) فعلمت أنك إما قاصدا أو أنها خطأ مطبعي. تحياتي |
اقتباس:
|
بالتوفيق
|
اقتباس:
|
بعد مدحة التمساح، وقفت على حيلي منتشياً، وقلت للمداح الما جاب الحجر: اسمك منو؟ قال لي: يوسف، قلت ليهو: شوف يا أب شرا، إتّا صوتك دا أسمح من فنانين ام درمان الحاليين ديل كلهم، ومديح الرسول (ص) حاجة سمحة بلحيل، لكن الزمن عندو حكمو، وحوامة الحلال دي للمديح يمكن بطنك دي ما فايتها، دحين أقلب حقيبة، حافظ غنا حقيبة؟ قال لي: شوية، قلت ليهو ما مشكلة هسع بكتب ليك واحدة وبقول ليك اللحن ونجرب، بتقرأ؟ هزّ راسو لتحت.
كتبت ليهو جزء من الشاغلين فؤادي: الشاغلين فؤادي .. وفايقين تائهين يكفي البي زارف .. دمعا ما يقيف تالي القبلي شايف .. لي برقاً لمع والصيد في الخمايل .. ياناس إجتمع قوموا يا أحبّة .. نسترق السمع ما بطيق القعدة .. والمها اجتمع وخلطها مع ما بين تبري ناصع وأخصراني اللون وقفت على حيلي وريتو اللحن كيف، البشوفني يقول اللحن حقي!! عبد الوهاب وردي بس!! يا أخي، يوسف دا لمان وصل حتة والصيد في الخمايل يا ناس إجتمع، قلبي قرب ينقلع، ولو ما خفت العرب ديل يربطوا تصرفي الجا في خاطري دا بمدني، كنت ... |
اقتباس:
كان تعملها ياخ :tongue: :tongue: يا كاتبي المفضل تشكر ياخ علي المتعة دي ياخ واصل ... |
اقتباس:
أضحك الله مساك يادكتور غايتو المتأكد منو إنو صديق سرحان كان حاضر في ذهنك لحظة إختيارك للأغنية دي، وعليك الله لو هزيت راسك لتحت كلمني. ـــــــــــ البركة الخفت:biggrin: |
|
:biggrin::biggrin::biggrin:
يا باش كده في ناس بكونوا شايلين هم تكون الطوبة دي مطلوبة في صالون الإدارة برضو! |
اقتباس:
خليك قريب يا باش |
اقتباس:
والتحية لإبداعات الدكتور ، بالجد متعة الكتابة والحكي . وعبركم التحية للاخ عاصم شبارقة حيث ابدع لغة وفكاهة خفية في هذا البوست . مودتي |
والله يا بكور النجاح الذي اصبته باسلوب الحكي اليومين يحمل مؤشر انك ستكون ريس فاشل جدا جدا، بصورة اوضح لنا جعفر ح تكون محمد مهاتير لو قارنها بيك...
لذلك انصحك انك تنسحب من الترشيح وتمسك درب الحكي... وزي ما بقولوا اهلنا (الحكاي ما سواي) :tongue: |
اقتباس:
|
| الساعة الآن 09:29 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.