قبل التأبين
الاعزاء جميعا فى سودانيات
أعضاء ومتابعين تحية طيبة ..تسبقها تعزياتى الحارة لكم جميعا فى فقدنا الكبير. لظروف خاصة بى ظللت اتابع فقط دون ان اشارك الا نادرا جدا.وفى مرات كتيرة كنت اكتب المداخلة وقبل ان اكملها امسحها..فى مرات كتيرة كنت بقول ليس عندى ما أقوله ..او بالاحرى لا تنفع الكتابة ولن تكون مجدية فكما يقول المثل السودانى { قبال النفاس الريحة نحاس}اعتذر للجماعة المثقفاتية والحنكايش عن استعمال هذه النوعية من الامثال بس والله مرارة الحال والقرف الحاصل يقول المثل زاتو فيهو الشفاعة. بعد ان فارقنا الى دنيا الخلود راعى الركب...بكينا جميعا رجالا ونساء شيبا وشباب ونزفت قلوبنا دما ومازالت...وبدأ بعضنا التماسك او التظاهر بذلك وهو مؤشر جيد ...بدأنا فى الوعود ...وعدنا خالد عليه الرحمة بان سودانيات ستظل منارة فى عالم المنتديات..وقلنا ستظل سودانيات كما اراد لها مؤسسها وعرابها منبر لا منبر له مكان للراى والرأى الاخر ...كان وهو مؤسس هذا الصرح ومهندسه يقبل عضوية كل اطياف البشر وكل الوانه...لم تمنغ انتماءت بعضهم حق العضوية ولم تقف توجهات الكتيرون حجر عثرة فى طريقهم لقول رايهم ..كان ديمقراطيا ينفح بالعدل حتى انوف اعدائه... الان ...وقد رحل الرجل النادر جدا..رحل خالد الحاج وقبل رحوله ادخلنا مدرسة تاريخية ...مدرسة جعل احترام الراى والراى الاخر اهم مقرارتها وهم الوطن ركن بالغ الاهمية فيها... قلنا جميعا وبصوت واحد لن نترك المكان..سنظل متمسكين بالعهد والميثاق لن نفرط فى الامانة...لن نحيد عن الدرب ..قلنا الكثير ولكن لم نفعل شىء غير القول.. نعم لم نفعل ها نحن نفرط فى اول شىء وهو ان { يسع المكان الجميع}.. أنا عن نفسى انادى وساقاتل من اجل تحقيق... لا لأقصاء أى احد مهما كان انتمائه لا للشتائم لا والف لا لتصفية الحسابات الشخصية قال احدهم وهو يعزى سودانيات الموقع{ المحترم} وانا اقول له ستظل سودانيات موقعا محترما مهما كان الثمن كنت يا خالد رحمك الله تهتم دائما بعدد الزوار والقراء وتصنيف الموقع بالنسبة للمواقع الاخرى فانا اليوم اقول لك عن نفسى فانا لا املك امر احد ولكن املك امر نفسى سافعل ما بوسعى لتحقيق امنيتك ولو قدر لى الله عمرا وحضرت ليلة تابينك سيكون تاريخ سودانيات وموقعها فى خريطة المنتديات السودانية والعالمية من اهم اولوياتى لك الرحمة ولى ولهم الصبر وحسن العزاء وانا لله وانا اليه راجعون ولا حول ولا قوة الا بالله |
يا حبيبه مرحب بعودتك
دي فكرة الخال عن سودانيات او حلمو كما كتب اقتباس:
ودي نظرتو لتواجد الآخر حتى و ان كانوا على خلاف اقتباس:
رحل خالد نعم لكن الحلم اهو قدامنا بين ايدينا نحن فاما نكون قدر مسؤلية تحقيقو والا فلنتحضر لرثاء الخال مره تانيه ربنا يرحمك يا خال و يسكنك فسيح جنانه |
سلامات يا سرور
علاقة ما كتبتيه بالتأبين شنو؟ ما وضح لى؟ السؤال الى الان ما عندو اجابة عندى.... دحين فى فى ورقه مكتوب عليها ضوابط الكتابة و مكانها مع اللائحة نبراس و سارة دوركم شنو فى اتجاه ضبط الكتابة و الله المواقع دى ما فتحت عشان تكون فاتحه لكل الكتابات و تانى دوركم يا ادارة عشان نكون واثقين انو فى ... احترام رأى و رأى اخر واخيرا يا سارة وثائق الموقع طبقت حتى على مالك الموقع ( الراحل المقيم) ايقاف كمان ومن هنا اقتفى الأثر |
ساره ... البركة فينا وفيك وأحسن الله العزاء في العزيز خالد ..
تتبعت أماكن تواجدك ولم ألتقيك . أما فيما يخص ما ذكرتي فهو من صميم عمل إدارة المنتدي .. فقد كان الخال ديمقراطياً في كل شئ .. لم يفرض لائحة بمفردة إنما طُرحت للجميع لتدارسها .. ولم ينفرد فيما بعد بتطبيقها إنما جعلها إدارة منتخبة .. حتي أنه تم إيقافه بأحد نصوص هذه اللائحة ولم يعترض .. له المغفرة وجنان الخلد إن شاء الله ... |
الحبيبة سارة لنا ولك خالص العزاء
ماذكرتيه فهمته " تماماً " واكرره معك وانادى به لا لدعوات الاقصاء المساحه تسع الجميع ، والمقارعه بالحجه لا للالفاظ " السوقية " الرخيصة موقع سودانيات صار موقعا يرتاده الصغير قبل الكبير ، يرتاده الاب والام والزوجه يرتاده الاخوان والاخوات ، يجب ان تراعى فيه " العبارة " قبل اطلاقها .. اللوائح والقوانين فى كبح كل هذا يجب ان تنبع من دواخلنا فى المقام الاول .. الراحل المقيم ترك لنا "ديمقراطية " يجب ان نرعاها ولا نرهن كل معاملاتنا وادبياتنا للوائح المنظمة . لك التحية ياسارة .. ولك الخلود ياخالد فى الدواخل |
تعرفي يا سرورة
أنا ذاتي قلت كدي عِلا بس رأيي دايماً ما بتسمع يعني بقيت طرورة ساااااااااااااكت وماني زولاً مؤثر بفعل المحبة أهاااااااا وفي تانيين .. قالوها لي ... يا زول إنتَ ما عندك شَغَلَه غير ( حَجَّاز حَّجَاز) دي ... لغااااااااية ما تلقي ليك عُكاز في راسك الماااااااااااااكن ده نعم أنا بستغرب لبعض الإخوة في نقاشاتهم ... مع المختلفين معاهم سياسياً ... في كتير من المرات بتكون ألفاظ غير كريمة ... حقيييييييييقي غير كريمة بس ما أظنها بتعني مسألة إقصاء الآخر بالشكل الواضح داك هي إختلافات ولابد منها الإختلافات دي لكن أن يصل مستوي النقاش لألفاظ ما كريمة دي ... فده شئ مُؤذي بالجد مُؤذي بالنسبة لي أنا شخصياً كزول قارئ في المقام الأول والأخير وقد يكون برضو مُؤذي لغيري فيااااااااااااااا شباب أترجاااااااااااااااكم جميعاً أترجاكم ... إختلفوا كما تشاؤون ... لكن .... رأفةً بنا يا صحاب رأفةً بنا |
العزيزة سارة تفضلي بقبول اصدق التعازي
وربنا يرحمو ويجعل البركة في اهله . يا سارة ليه بدل ما نسميهو الاقصاء ما يكون اعادة الامور الي نصابها .. ثم ما هو شكل الصراع الدائر في الساحة الان ؟ فهل الطرف الاخر مؤمن بمبدأ الراي والراي الاخر ( الديمقراطية )؟ ومن هو الطرف الاخر في الاساس ؟. والاسباب الخلت السودانيين يلجأوا للمنابر الاسفيرية شنو؟ ولي شنو؟ فهل كان المرحوم يقبل او نحنا هسي قبلانين بأنو المنتدي ده يكون مكان للتعذيب والاغتصاب الاسفيري ؟ كوني بخير وبجيك صاد |
ستهم ازيك وسودانيات بيت الجميع وبث
|
التحية لكم جميعا
فقط استسمحكم فى أن ارد على الاخت الحبيبة منال سلامات واحسن الله عزاكم وجبر الكسر ما قصدته من قولى هو مجرد تذكرة ونحن نستعد للتأبين يجب ان نتذكر امنيات الراحل خالد واختى الحبيبة نبراس فهمت ما اقصد تحديدا وهو ان لم نضع فى اولوياتنا ما تمناه الراحل لهذا الموقع فننا قطع شك نقتله ونرثيه اكتر من مرة.. اما دورنا كادارة اترك المجال للاداريين ليردوا عليك ان كان هناك ما يستوجب رد الادارة... انا مشرفة اقوم بدورى وابلغ عن كل شاردة وواردة..بس اتفقنا واميننا العام ان نقلص السحب والحذف...ايمانا منه ومننا ان فى داخل كل منا مديرا لنفسه وحافظا لزمام اموره يعنى منتهى الاحترام والتقدير فى التعامل...يعنى الادارة قالت كلكم راع وكلكم مسؤول عن رعيته وقع ليك كلامى يا الغالية ؟؟ |
اقتباس:
كتر خيرك لانك هنا كم احتاجك |
اقتباس:
نحمد الله على ما اراد الله رحم الله خالد واسكنه العلا من جناته والهمنا صبرا جميلا خالد عليه الرحمة كان محترما جدا ومحترما { بكسر الراء} لهذا المكان لذلك احترم القانون وطبق الديمقراطية فى نفسه وهو ما لم ولن يحصل فى اسافير الدنيا كلها..بس نحنا عند ديمقراطيين لو لاقيتهم فى البحر يقولوا ليك مليتنا عجاج..تطبق اللائحة يقولوا عليك دكتاتور ومتسلط واحتمال حاجات تانية يعنى بالعربى المشبرح كان اتكلمنا اتقلمنا وكان سكتنا المغص يكتلنا |
اقتباس:
المشاركة الأصلية كتبت بواسطة سارة http://sudanyat.org/vb/images/buttons/viewpost.gif التحية لكم جميعا فقط استسمحكم فى أن ارد على الاخت الحبيبة منال سلامات واحسن الله عزاكم وجبر الكسر اما دورنا كادارة اترك المجال للاداريين ليردوا عليك ان كان هناك ما يستوجب رد الادارة... انا مشرفة اقوم بدورى وابلغ عن كل شاردة وواردة..بس اتفقنا واميننا العام ان نقلص السحب والحذف...ايمانا منه ومننا ان فى داخل كل منا مديرا لنفسه وحافظا لزمام اموره يعنى منتهى الاحترام والتقدير فى التعامل...يعنى الادارة قالت كلكم راع وكلكم مسؤول عن رعيته وقع ليك كلامى يا الغالية ؟؟ سرورة فى الاول خلينى اثبت رفضى التام لجمل العندها خط دى الادارة جسم متكامل ترد انت و ليس غيرك وحددتك كده و جيت جاريه معليش ح تصطرنى اقول ليه سارة مشرفة اؤكل لها تعديل العنوان و التصحيح اها فى بوست عنوانو (بعض الساقطين) و ماهو براهو كتير من العناوين - تستوجب التعديل ...ادخلى و عدلى ودى مهمتك الاشرافيه لا تقبل اى تراخى و بالتالى تكونى على الامانه ميه ميه و عملتى المعقول شفتى يا سارة اكان عدلتى انت و صلحتى وفق صلاحيتك ماكان شنو كتر الكتابات على هذه الشاكله و اؤكد ما كان الكاتب ذاتو تجرأ و بل إستمرأ فى المفردات وكتب معه كثرون على ذات النحو. تانى يا سارة احبذ ان نبعد من العبارات التجميله مثل مديرا لنفسه وحافظا لزمام اموره يعنى منتهى الاحترام والتقدير فى التعامل اها ده كلو ما حاصل وبقى واقع فى المنتدى- نقعد نعاين و نكتب عبارة مفخفخه اقصاء اقصاء شنو لكل من كتبها هنا ده سؤال جاد العضو المعنى مشارك منذ اى تاريخ كتب ...ورد عليهو تجاوز نعم - البخلينا شنو ما نطبق اللائحه ده السؤال يا ناسى الوثائق دى ما كتبت عبث او يكون عندكم تفسير تانى لمعنى الاقصاء و فهمونا ليهو رجاء اخيرا حبيبتى البقع لى شنو يا بتى خلى ساكت حمدو فى بطنو بس بتمناك ان تكون شديدة و لضيضه زى ما عرفتك و الباقى كلو بندى الطيور يودنو البحر تحياتى للاولاد |
سلامات يا سارّة..
جميل هو إطلالك، كيفما اتفق. حمد الله علي السلامة. |
بسم الله الرحمن الرحيم
سارة إزيك وسلامات .. فى البدء أود أن اطمئنك أن إجراءات التأبين تسير وفق ما خطط لها وستكون ليلة العرفان والوفاء .. وأؤكد لك أيضاً أن هذا الموقع سيظل كما أراد له موؤسسه ساحة للرأى والرأى الآخر ومنارة لنشر الوعى وثقافة الحوار .. لن نحيد عن هذا النهج ولن نغلق أبواب النقاش لنسمع صدى صوتنا ورجع طرحنا .. وسنظل ندفع بالكل الى رحاب الكلمة الأرقى واللفظ الجميل وسنقودهم الى حيث ما كان يتمنى الراحل المقيم ... ستصل رسالتنا الى المعنيين بالأمر واضحة ـ لا لبس فيها ـ عبر آلية أخرى نؤكد فيها أن هذا الفضاء يسعهم وجل ما بيننا وبينهم كلمة رصينة وحرف مسؤول ... شكراً لك |
| الساعة الآن 01:39 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.