غياب الكواكب ... اظلام تام
اربعة فَلْقات متتاليات في راس اصلا متقيِّح
الفلقة الواحدة تفتح الراس اربعة تدوخ بلد الاستاذ التجاني الطيب بابكر الاستاذ محمد وردي الاستاذ الشاعر محمد الحسن حميد الاستاذ محمد ابراهيم نقد نحن الان الى الهذيان اقرب ولكنا نتحزم ونتلزم نحن اصحاب الوجعة كلنا نحن كلنا اصحاب الوجعة .... |
منتصف التمانينات وانا بعد يافع ، كنت وقتها - ومازلت - مولعا جدا بالقراءة
والاطلاع نهم جدا اقرا كل ما يقع في يدي جريدة طايرة في الشارع ، ملفوفة فيها طحنية ، اي حاجة ما تهمش الهم المصنع ... المهم وجدت جريدة الميدان وبها مقال للاستاذ التجاني الطيب حول مواقف الشيوعيون من نظام المحاكمات ايام نميري قراءت المقالة كاملة حول دفاع الاستاذ عن نفسه امام محكمة الجلاد ، شدني المقال وشجاعة كاتبه وقوة منطقه وثبات حجته وتسلسل كل حاجة من يومها ارتبطت بالميدان وفي تلك الايام اي زول من حلتنا ماشي الخرطوم اوصيه يجيب لي الميدان مرات تجيني تلاتة نسخ من نفس العدد مرة وصيت امي وكتبت لها الاسم على ورقة حفظتها في المحفضة وطلعتها امام المكتبة وصادفت شابا عاوز يشتري نفس الجريدة اصر عليها ان يدفع تمن الجريدة وعندما قالت له عاوزها لي ولدي قاليها سلمي لي عليهو التحية الان لهذا الشاب ان ما وجد .... منذ الاربعينات تفرغ للحزب وجريدته لاحقا وقدم حياته كلها عرفانا لفكرة مؤمنا بها فكرة انسانية باختصار حرية وديمقراطية وتقدم اجتماعي بافقه الاشتراكي ياله من انسان ياله من رجل ياله من صنديد ... القومة لي ذكراك التي في اعماقنا للابد ستظل فكرة مضيئة فكرة للصباح |
محمد وردي دا كمان حكايتو حكاية
لا اعرف منذ متى بدات اسمع وردي واطرب وانسجم مع الصوت العذب والكلمة المنتقاة واللحن المنساب كما خرير الماء النمير من جدول بابورو اللستر يسوي تحححح جاء وقت حفظت معظم اغنيات وردي كما هو الحال عند معظم السودانيين ، وردي ليس فنان صالونات ومثقفاتية ولكنه فنان الشعب هو فنان عبدالوهاب اخوي المفضل وهو يقود شيوَله الضخم يكسر الجبال في بلدا طيرها اعجمي ... هو فنان صديقي هرول وهو سايق اللوري مليان برسيم يوزع من سعد قشرة حتى شجرة ماحيبي ... هو فنان صديقي عبدالحميد في ورشته في بديع زايد .... هو فنان محمد صالح يبيع الفول في ام الحمام ... هو فنان اكوج راكب عجلة في منقلا ... هو فنان الزبير راعي الغنم في البطانة هو فنان ادم في زالنجي هو فنان اوشيك في شرقي الحبيب هو فناني وفناك وفنان افريقيا الفتية هو فنان الامل والنور والضوء |
يا لهذا الحزن النبيل..
نتابعك بمحبة |
بسم الله الرحمن الرحيم
منعم .. تحياتى العزاء لهذا الوطن وليله الممتد .. تغيب نجومه تباعاً ولا شمس فى أفقه ترتجى .. توالت عليه النكبات وتداعت عليه الإحن .. رحل نقد .. طاهر اليد واللسان .. لم تدنسه المناصب ولم تلوثه المراتب .. خفيف عاش وخفيف رحل .. |
ولكنا نتحزم ونتلزم نحن اصحاب الوجعة كلنا نحن كلنا اصحاب الوجعة .... |
اقتباس:
اقتباس:
شكرا لمروركما الوجعة واحدة وان تعددت اصابتنا في مقتل هذه المرة |
عم عبدالرحيم يموت مرتين
وتيتمت نورة اقتباس:
حزن خاص جدا وعميق جدا ياخ الشعب دا كان خات حميد بعيدا هناك ... صاغ سليم زي النيل وزي جبل البركل صامدا وصلدا وشامخا خاتنوا ليوم الفرحة الكبرى الذي هو بلا شك واحد من اعظم ملهميها والفرحة الكبرى ناقصة يوم تفجرها لان فارسها غايب دا سبب حزن الشعب الغير مسبوق على حميد غايتو كتلنا في زولن تاني زيو ما في وزي ما قال الشفيف الشفاف النور يوسف محمد في مداخلة انه يخشى ان لا يتوفر في السودان من هو بشاعرية حميد والبلد تصبح ضنينة ومن الواسوق ابت تطلع من الابرول ابت تطلع من الاقلام ابت تطلع من المدفع طلع خازوق تف بادنيا تف ..... احببنا عم عبدالرحيم زي ابوك عمك جالك اخوك وجارك البتحبو لحظة اتلافا القطر بكينا بدموع حقيقية عم عبدالرحيم يموت مرتين ... بالله عليكم مش اظلام تام ...... اي حاجة !!! |
مالك يا زمان شبعتنا بكا ووحيح ...
لا نقول الا ما يرضى الله ... سيظلوا فى الأعماق دفئا" بل حنينا" بل وفاء اعذرنى ربى نحن لا نبكى القدر انما نبكى نهايات اللقاء وعزاؤنا ان تستجيب لنا الدعاء وتزفهم فى الخلد زف الأنبياء ربى دعونا فاستجب منا الدعاء ............ جبر الله الكسر أخى الكريم |
منعم البركة فيكم ياخ
يا منعم ان هذه الكواكب لم تغب بل ادت الامانة وبلغت الرسالة واكملت دورانها في نسق ارتقابها او كما يقول الصديق خالد الناس دي عملت الحاجات البتخليها اقمارا مدلدلة في سماءنا لحدي ما ربك يقوم يطبق السماء |
اقتباس:
شكرا للمرور |
اقتباس:
الفقد واحد عارف يا وجدي الفراق حار وفراق المبدع الانموذج الدليل الضوء نار جمرة ... عندما وصلت امي السبعين عاما ماتت امها جدتي ... بكتها امي كما لم تبكي من قبل بكتها بكل الدموع وكل الاسى ... رغم انهما لم تفترقان قط طوال نيف وسبعين عاما فتامل ... نعم انهم اقمار تظل تضىء اعماقنا والدروب للابد واعمالهم ومواقفهم وابداعهم يظل نبراسا للامة جميعا ... ولكن فقدهم حار والزول اصلو ما بقنع من كبيرو ولا بشبع منو ... لكن نسوي شنو بس وجدي شكرا لمرورك يا امير |
ولكنا نتحزم ونتلزم نحن اصحاب الوجعة كلنا نحن كلنا اصحاب الوجعة صبرا جميل والله المستعان احسن الله عزاء الجميع منعم |
اقتباس:
|
محمد ابراهيم نقد
تكمن عظمة هذا الرجل وتفرده في انه جعل مع رفاق له عظام جعل الحزب الشيوعي السوداني رقما صعبا في السياسة السودانية لا يمكن تجاوزه باي حال ... رغم النكسات والتحديات التي صاحبت التطبيق هنا وهناك التي اثرت سلبا على اداء احزاب شيوعية عريقة في المنطقة والعالم ولكن الرجل استطاع بسلاسة ان يقود المركب في ظروف استثنائية مع المد اليمين الذي اجتاح العالم من التمانينات ومع الوضع الخاص في السودان باستلام السلطة من حزب يميني فاشست بنى كل رصيده السياسي على العداء للحزب الشيوعي السوداني بل وما ان استلم السلطة حتى التف الى الحزب واصدقائه قتلا ونفيا وتشريدا ومحاربة في لقمة العيش ولكن رغم الصعاب والمحن استطاعت القيادة ان تتجاوز وتكون دوما قريبة من تطلعات الشارع وفي طليعة التغيير ... وانه تكمن عظمة القيادة وعظمة الاستاذ ....... واحد صاحبي يحب الخواجات جدا لدرجة ان كل ملابسه افرنجية وهو المزارع مرة في النادي جابو خطاب نقد في الجمعية التاسيسية خطاب المعارضة الديمقراطية وقد رجوته ان يسمع الخطاب للنهاية وما ان خلص الخطاب حتى التف اليَّ ( والله نقد دا عقليتو ما عقلية سوداني ) ...... كان الرجل قريبا من الشعب ومن الناس التحتانية وعند غيابه بكاهوا كل الشعب وودعوهوا بمشاعر من الحب والتقدير والفقد لم نراها قريبا لزعيم سياسي ... اتكلم مع صديقي في الحلة حول وصول الجثمان والمقابر فاخذ السماعة صديق لنا مشترك لم يكن له يوما له اهتمامات سياسية وقال لي انا كمان ماشي المقابر حاولت ان اقنعه بعد الذهاب دي كم مواصلات وتركب وتنزل ... يا زول هوي مقابر فاروق دي كمان دايراليها مواصلات والله ان دفنوا في القطينة اكان امشي ، عظيم هذا الشعب ... عظيم هذا الفقد عظيم نقد الذي بذره الشعب -كما قال خضر- في قلب الخرطوم .... |
| الساعة الآن 03:51 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.