طحنية
 

بعد سحبت مداخلتي الأخيرة ببوست زهرة الغرق ومقاطعتي غير المعلنة لبوست حاج ماجد المستعدي فيهو (الزملاء) وبوست شليل الدفاعي بجنس الإستعداء؛ نطيت من الكمبيوتر وجري على أقرب بقالة، وبالصدفة لقيت البقالة التحتنا إسمها سمسمة، طوالي توشك على رفوف الطحنية ونزلت ليك من كل الأنواع علبة وإشتريت كرتونتين بيبسي وجري على الكاشير.
في البيت رصيت علب الطحنية الستة ومعاهم علبتين بيبسي في التربيزة وفتحت التلفزيون على قناة MBC2 وطفيت الانوار وجبت الريموت بتاع الرسيفر الإتش دي والتلفزيون الإل إي دي؛ عشان لمان تجي دعايات مرقة ماجي، أحول القناة لMBC
Max
قلت يا ود، يا أبكر، كدي تعال نتفاهم:
- إتّا قبل أربعين سنة وانت راكب القطر من شندي وماشي مدني، حلمك الكبير كان شنو؟
- رديت، الكضب خيبة، حلمي كان: طحنية وشعيرية وباسطة بالكنافة
- طيب ربنا دا، قصر معاك في أحلامك دي، عشان تجي تحاجج في عبادو المتصلين بيهو والمنفصلين منو والبين بين؟
- سؤالك فهمت نصو! بالنسبة لي، أبداً ما قصّر معاي تب وكل ما أحلم بشئ يديني منو ستة علب.

إنت اليومين (دولا) موسم تزاوج الإبل إنتهي؟!

غايتو النصيحة يا بكّة، التساؤل دا قلبت فيهو الهوبة، دي تالت مرّة أتكيّف لبوست من بوستاتك

"كم منزلٍ فى الأرض يألفه الفتى وحنينه أبداً لأولِ منزلِ"

محجوب حسن صاحبي داك، الجانا قبل سنتين الإمارت مغترب جديد، والعينوهو في منطقة بعيدة وأنا وديت ليهو كرتونة طحنية هدية، بتذكرو يا رشيد؟
أها، محجوب دا، الدنيا مشت معاهو معدن وإتحول لشغل ممتاز والإسبوع الفات نزل إجازة سنوية وجا يعديها معاي، أول شئ قالو لي: تعرف، أخوك زايد 13 كيلو وداير أعمل ريجيم ومن الليلة سلطات ساكت،
في اليوم السابع وأنا ماشي الشغل قال لي من تحت البطانية: يا أخي، الليلة شاعر لي برجفانة
جيت نهاية الدوام لقيتو شدا ليهو كيسين شعيرية وخاتيهن في سرويس ومترتر ليهو علبة طحنيها فوقها وجنبو جك كركدي.
قال لي وانا فاتح الباب: ولا كلمة ما داير أسمعها..

كلامك الهنا والفوق يدل بأنك (عزابي)...
والمعنى أنو الحيجيك ضيف حتهريهو طحنية
http://1.1.1.5/bmi/www.sudanyat.org/...milies/mad.gif

وممكن محجوب يكون من أقرباء الدرجة الأولى للحكومة
وبعدين اهم ميزة عند الكتاب، انهم يتوهوك عن حقيقتهم

ست علب طحنية مع العزوبية دى توديهم وين
الا كان تطرشهم يا مجنونlooool

[QUOTE=بابكر عباس;539948]
- إتّا قبل أربعين سنة وانت راكب القطر من شندي وماشي مدني، حلمك الكبير كان شنو؟
- رديت، الكضب خيبة، حلمي كان: طحنية وشعيرية وباسطة بالكنافة


سلام وتقدير
والله ياعباس انت بالجد راجل ممتع الواحد اكون زهجان لكن اقوم القى فيك ذكريات وترتطيبة . .
ذاكرتك تمام قبل اربعين سنة بتذكر رحلة من شندي لمدنى وانت راكب القطر وكنت براك من غير احد، الله اديك طول العمر ، يعنى ياصاحبى نديك كم سنة كدة الان :D
فعلا ايام كانت احلامنا متواضعة عندما نطلب من الله اويحدثنا اهلنا بإن ليلة القدر يوم 27 وننتظر تلك الليلة ،،،،، ام اليوم تبدلت الاحلام واصبحت الحياة معقدة بوتيرة سيئة افتقد الاهل والاصحاب الابتسامة .
نحلم بالعودة وعندما نرجع في اجازاتنا نصطدم بالواقع والاظرف سؤال الجماعة الما عندهم موضوع من اول يوم وصولك البلد انت راجع متين وبعدما تركب الطيارة وتسافر اول اتصال انت جاي متين .
ولفى يادنيا .
ودي وتقديري

أنت الأجمل يا أستاذ طارق





دكتور بابكر دا نادر ما يبرد ليه بطن زول
عشان كدا قلنا نشاركك الصباح الجميل دا.. انت راجل ملاك يا أخ

دي فرصة نضرب عصفورين بحجر واحد:
نسلم على أم التيمان، تصدقي فقدناك؟ بالله يا أم التيمان بعد "عصفرناك مع بكة" وعشان الفقدة الصغيرونة دي تراعي لينا شوية في بوستاتك الجاية :)
وكمان نضحك مع بكة ونتمنى التساؤل بتاعو يكون بداية راحة للرباعي كيشو وخالد الصايغ وتاني منو؟
واحد قريبنا قال زمان لما كان صغير كان بيستغرب جداً من زول بصرف ماهية وما بيمشي يشتري علبة لبن بودرة ويقعد يسف

سلامات يا دكتور قبل اربعين عام كنت متخرج من الجامعه:D
غايتو بتعجبني طريقة حكيك دي تنتزع الابتسامه براااحه شكرا

يا مها، يا أخي، انتي زولة أديبة وقاصّة، شنو البخليك تخلطي بين الراوي وبكّة الحقيقي زيك وزي القراء العنقالة ديل!
يا أخوانا، كاتب البوست هو الراوي بكّة وليس العضو بكّة
عليك الله، يا بروف، تعال فهم الجماعة ديل