شؤون سودانياتية !!
 

(سودانياتية) هنا تشمل السودان الشقيق مثلما تشمل سودانيات المنتدى حيث التواصل و المحبة و البل بالكيلو و بالحبة !!

القناعة الاتوصلت ليها إنو السودان الشقيق ده لن تقم له قائمة، و كلو بما عملت أيدينا، و البفتكر إنو حل مشاكل العباد و البلاد بذهاب الانقاذ بزعل منو زي ما بقول بكة !!
ذهاب الانقاذ هو الخطوة الأولى في طريق الاصلاح، لكن بدون تغيير حقيقي في سلوكنا و تعاطينا للاشياء سيبقى الحال كما هو عليه، أمة تتقلب في الفشل جيلا بعد جيل !!

أرى - و الرأي دائما ما رأيت :( - إنو مشكلتنا الاساسية اننا ما بنقدر نعمل كجماعة و لعمرى ما شايف مشكلة لشعب أكبر من كده !!
السودانيون كأفراد من أحسن خلق الله صفاتا، لكن ما إجتمع سودانيان إلا و كان الفشل ثالثهما، و كل ما زاد عدد السودانيين في عمل ما كلما زادت نسبة فشل هذا العمل !! :cool:
اقترح إنو إحتفالات البلاد باعياد الاستقلال سنة 2016 تقام تحت شعار ( السودان : ستون عاما من الفشل المستمر !! ) !! :rolleyes:

والله يا اميننا الذي بديار الكفار
اود ان اخبرك اننا اليوم افضل حالا من الغد


وستتذكر حديثي هذا
حين تستذكر ايامنا هذه والخلافات الدائرة بين الاشخاص
وتقارنها مع ما آلت اليه الحياة من قتل عديل كدة بين المختلفين
وانت تقعد تقول واللاي يا حليل ايام زمان لمن كانو ناس ماجد تاج وشليل بتشاكلوا بالكلام



خلينا نستمتع بلحظاتنا هذه
فانها حتما اجمل وافضل من اللحظات القادم واسواء من اللحظات السابقة

(سودانيات) هو المنتدى السوداني الوحيد - فيما أعلم - اللي إدارتو بتنتخب ديمقراطيا بواسطة الأعضاء، و الوحيد العندو لائحة واضحة تطبق و يسهر الخلق جراها ويختصموا، و دي تجربة مفروض الناس تعمل على رعايتها و تسقيها بماء العيون .
في الانتخابات الفاتت صوت لحوالي 90% من أعضاء الادارة الحالية و ال 10% الباقيين ما صوت ليهم بسبب اني ما بعرفهم لا أكتر لا أقل، لكني محبط محبط محبط ( تلاتة مرات ) من أداء الادارة الحالية و طريقة حلها و عدم حلها لكثير من الامور !!
و محبط من رقبتي أكتر من احباطي من إدارة المنتدى الحالية، لأني مفروض أكون عارف انو الناس ديل سودانيين و الاحباط في بلادنا وطن !!

أسعد الذي هو وجدي، سلام يا صاحب يا زول هوي، كلامك ده ياهو كلامي ذاتو !!
الحاجة الوحيدة الثابتة في السودان كدولة و في السودانيين كشعب اننا في كل المجالات راجعين لوراء بسرعة مذهلة.
و لو أمعنت النظر بتلقانا بنعمل بدأب و صبر شديد عشان نواصل في الفشل ده .
بالنسبة لحبايبنا ماجد و الفاتح، فكلنا نعلم إنو الحاصل بينهم ده ما بدعة، دي ياها سواتنا و كان ممكن البل الحاصل بينهم ده يكون بيني و بينك أو بين مبر و النور :rolleyes: أو أي اتنين في المنتدى و بعد ده كلو سودانيات من هذه الناحية أحسن منتدى سوداني .
ال bottom line يا حبيبنا إنو لو ما تداركنا ما يحدث ( كان في السودان كدولة ولا في المنتدى ) فالفشل محمدنا محمدنا !!

تعرف يابروف

عدم حل الادارة لاي اشكالية ده خلاني فعلا افكر بانو نحن السودانيين ربما لسة ماجاهزين لفكرة الديمقراطية دي!
شخصيا ماعندي اي مانع انو يحكمنا النور وكانديك بكل ديكتاتورية وللابد ..

خالد يا غالي، سلام يا رجل و لعلك بخير نحن ما عندنا سكة غير سكة الديمقراطية، لانها الضمان الوحيد البتم بيه مبدأ المحاسبة !
شفت النور و كانديك ديل كان جو حكمونا بغير نظام ديمقراطي ما ببقى في فرق بينهم و بين أي دكتاتور بزعط في ناسو الاف السنين !!
النور و كانديك مهما كانو عميقين و عادلين، الحوالينهم ما بخلوهم و لما مافي زول يراجعهم في الصاح و الغلط و يكونو عارفين انهم في مأمن من أي محاسبة ح يفتكرو انهم هدية السماء و مبعوثي العناية الآهية لاخراجنا من الظلمات للنور في حين إنو هم ح يكونو الظلمات ذات نفسها، و بكرة ايقونات العدل و العماقة ديل يبقو مثال لظلم الانسان لاخيه الانسان ( و بالذات عمك كانديك ده :D ) !!
مافي سكة لعمل الوطن جنة غير الديمقراطية، لكنها طريق وعر و شائك و داير الناس تخت يدها في يد بعض عشان نساعد روحنا و بلدنا، مشكلتنا اننا ما بنعرف نخت يدنا في يد بعض لعمل في صالح روحنا ولا بلدنا !!

يا حسين ياخي، سئيلي الله ما كنت عارفك معانا هنا في الشقيقة أمريكا !!
مرحبا يا أخا الاوطان كلها :D : شفت مثلك ده، وقع لي في جرح عشان اوضح وجهة نظري أكتر :
الجماعة لمن بلمو الدولارات لاهل المتوفى، دي حلاوة السودانيين كأفراد : كل زول بجود بالعندو نساعد المحتاج فينا، لمن الناس قالت نقنن الموضوع و نأطرو و نكبرو بحيث المساعدة تكون بصورة أحسن و أجود و الفائدة تكون أعم فشلتو لعدم القدرة على العمل الجماعي و ما فيه من بل : تخطيط و استراتيجيات و نكران ذات و حاجات ربنا ما قسم لينا فيها، و بالتالي المساعدة ح تكون قاعدة صغيرة كده، كل زول يجود بالعندو و عمرو ما ممكن تبقى مؤسسة أو منظمة تساعد الناس بصورة أكبر و لو وسعت النظر تلقى مشاكلنا كدولة معظمها جنس ده، أفراد نحنن و جماعات نجنن :rolleyes: !!
و عشان كده ح نكون دائما في قايمة الدول الما شاده حيلها، لانو الدول يا عم حسين ببنوها الجماعة ما الافراد !!

مشكلتنا الحقيقية, إننا ما بنعرف عن (الدعم) وثقافته.. مبلغ علمنا عن ذلك
هو أن تنصر (فريقك) في الصاح والغلط, وتجتهد في تجيير كل ما يأتي به
حتى وإن قاد بك المركبة الى الجحيم (وما ذاك عنا ببعيد:()
ما بنعرف أن أهم وأصلح الدعم أن نكتشف مواطن العلل فينا وفي فريقنا, لا لشئ سوى أن يقوى.
ما بنعرف أن أجود الدعم تبيان الخطأ وعلاجه.
لكننا نهوى التزييف والتطبيل و الغناء لمآثر وحسنات متوهمة أو بالكاد ترقى لتكون موجبة
نضخّمها حتى تحتار هي في نفسها, كيف صارت مآثر.
ونقلل من شأن الأخطاء حتى وإن (كسرت رقبة الحقائق), ونجمّلها فينا كما عروس.

والديمقراطية في ظل هكذا مناخ يا بروف, لا تفعل أكثر من التلفّح بعباءة الديكتاتوريات, وهي الآن تفعلها بإمتياز.

نحن شجعان جداً في (الشكل, والمنابزة, والمطالعة للخلا),
وأجبن ما نكون أمام كلمة, كلمة للحق ليس غير.

الله يديك العافية... ويدينا.

وهاد يا ستهم ، كلامك العميق الفوق ده بجيه بكرة إن شاء الله، لحدي الوكت داك داير أقول ليك اني عرفت انك زوجة الجيلي و فردة حاجة آمنة :
نيابة عن الشعب السوداني الشقيق بحيك و أقول ليك انك أديتي ضريبة الوطن كاحسن ما يكون، ربنا ينصرك و يقويك و يديك العافية محل ما تقبلي !! :(

:L:L:L مع عاطر التحايا نقلناه بضبانته لبوست مئه يوم من العزله .. ولانقول مئه يوم قادمات من التوهان والطرطشه ..