SOCIAL MEDIA REFUGEE BAN
نداء إلى السيد ممثل الممالك
نطالب باستصدار قرار اداري لحظر دخول لاجئي قنوات التواصل الاجتماعي يعني ما ممكن يا عمدة تخلي لينا المنتدى (سداح مداح) كدة! كل من هب ودب، يجي داخل علي كيفو! أنت عارف الحاصل برة شنو؟! عارف مدى التلوث الفكري والعقائدي الذي يجتاح قنوات التواصل الاجتماعي؟ طيب ياخ لييييه ياخ تخلي المنتدى مكشوف كدة، وأي زول يتلب من اي مكان، بصراحة انا بقيت ما عارف، هل انا في منتدى سودانيات ولا دار الرياضة؟! يا عمدة نحن أمانة في رقبتك، ما ممكن تخلينا مكشوفين كدة للاجئين ملوثين فكريا وايدولوجيا! أفرض لاجئي فجر قنبلة في المنتدى دا، ونحن رحنا ضحايا هذا التفجير، ساعتها خلي طيبتك دي تنفعك... يا اخوي اهلنا قالوا (خذوا الحكمة من افواه المجانين)، وانت لازم تاخذ الحكمة من خشم ترامب، وعليه اطالب بعمل حظر تام لأي زول ما اتداخل في سودانيات قبل أسبوعين من تاريخ البوست دا... نحن في خطر يا عمدة! نحن مستهدفين من قبل قنوات البغي والاستعمار يا عمدة! |
والشهادة لله، أنا من شوفت تداخل الجيلي قبل اقل من اسبوعين في بوست الترشيح للانتخابات، وانا قلبي بدا ياكلني، وبدأ الشك يقتلني!
وأنا كراجل مستبصر، ربنا رافع عني الحجاب وأرى ما لا ترون، شفت في عودة الجيلي جانب متشائم جدا، وقلت دا راجعتو فيها ريحة ما كويسة! وبل اتوقعت انو تمهيد لعودة ارهابيين اخرين، وتأسيس من اجل استيقاظ الخلايا الارهابية النائمة... المهم وما خاب ظني، اذا بي اشوف أمينة عيسى جاية فاتحة بوست ترحم على الخالد (رحمة الله عليه)... ثم جاء رأفت ميلاد فاتح بوست (عاوز طايوقة)، نظام دخول على استحياء وكدة... أنا ساعتها قلت بس نحن في خطر يا معلم، وبديت اتخيل انو بعد شوية حا تجي سماح وشوية شوية تجي تماضر وشوية شوية تجي وهاد وشوية شوية يجي الرشيد وثم يجي اسامة معاوية... قمت طوالي استغفرت مالك روحي ولقيت (خيالي المريض) بدأ يرسم في فرضيات لا تمت للواقع بصلة... وإذا بي يا معلم لقيت أنو (خيالي المريض) دون مستوى الواقع:( واجي اليوم اتفاجأ بعودة اسامة معاوية توووووووش كدة!!! شوف يا عمدة، يوم القيامة ح يجيبوا ويشحطوك قدامي كدة ويقول لي عمدة دا كان سبب ليك أذى جسيم بسبب تركه للمنتدى مفتوح سداح مداح، فماذا أنت (فاعلون به)؟ ساعتها ح اقول ليهو عاوز حقي على دائر مليم، معليش يا معلم، اصلو يوم القيامة دا موسم الحياة كوووولها، وفرصة ما بتتكرر، على عشان كدة ما ح اودرها في المجاملات واقول (أخ كريم وبتاع)، بل ح انتهز الفرصة واشيل حسانات منك!! وعليه (فقد أعذر من أنذر)، واطالب بعمل حظر لكل لاجئي السوشيال ميديا، وتقوم يا معلم تغير الباسووردات كووووولها، وتشوف لحدي قبل اسبوعين كان نشط وبتداخل وترسل ليهو باسورديهو الجديد... ويكون منذ ذلك التاريخ (الجوة جوة، والبرة برة)... *ورفع يديه* آلا هل بلغت، اللهم فأشهد! |
المهم، انا اسي ح اضطر امشي اعمل لي مساج يفك الاستريس الدخلتنا فيهو دا يا عمدة!
شوفت قدر شنو انت بهدلتني:( |
بقينا نخاف ونقفل بوستاتنا من الساعة ستة..
الواحد حاسي بعدم أمان .. وبعدين أشكالهم غريبة غريبة, ومكتحين وغببببش, وناشفين.. بيتكلمو بي صورة عجيبة.. أنا مرات ماقاعد أفهم كلاهم.. حايقولو علينا عنصريين.. لكن بقينا نخاف علي روحنا دي.. يعني ماممكن في يومين بس يجينا العدد دا كلو.. نوديهم وين هسه؟ الاخ ممثل المالك يشوف لينا حل.. دي ماعيشة ياخ |
لا كمان يا الجيلي، شوف صاحبك خاشي بي حنك شنو:
اقتباس:
محبة واشواق؟! لا بلاي، صدقناك تب! |
ايوا ايوا
وبعدين لو لاحظتا ليهم بيخشو بمداخل بعض وبيتحركو دايما مع بعض.. التعامل معاهم لازم يكون حذر شديد... عملتو ليهم فحص طبي؟ |
اقتباس:
اهو غايتو عملنا البوست كلجنة لاستقصاء الحقائق وراء وجود ثغرات تتيح لمن هب ودب دخول المنتدى! وح ندخل سؤالك دا من ضمن بنود الاسئلة الح نوجها للممثل المالك... بصراحة فعلا حاجة مخيفة جدا، اتخيل مثلا يكون دخل المنتدى وهو جاي من الفيس بوك، وأبهامه ملوث من اثر أعجابه ببوست منشور في الفيس بوك!! لاحول ولا قوة الا بالله، دي حاجة مخيفة جدا!!!! لازم نخلي المنتدى في حالة طواريء واستعداد تام، نظرا لدخول كائن موبؤ وملوث !! |
والله العظيم فعلا شكلنا فتنا الجلكمه بى غادى .. افكر واقول عمك طرمبه البقلعه شنو ..؟ واقول دى ديكتاتوريه الديمقراطيه ..يجى فوكو ياما .. يختفه من خشمى ... وعشان عنده كم واحد متابعينه اكتر منى ..خلاص بقت بتاعته ..
هسه انا عاوز اكتب عن موسم الهجره من الفسى يوك (الياء محذوفه عمدا )....يقوم عبقرينو بتاعنا (الحبيب اسعد ) يخت البوست التحفه ده..والحقيقيه الفسى بوك سكنا عندهم مده ...وكانوا شفتوا جنس دعوات ..من عينه الله يكتلك كان ماقلته الله يرحمه ..والله يعميك كان ماقلت الله يشيفيه ..بلاضافه الى ان كل واحد عاجباهو صورته ينزل عادى ويتلقى على ذلك التهانى ..فجينا راجعين ..فيها حاجه دى مع انه اغلبنا لمن مشى ... مشى مبوز ..وكان مطير هنا شكله ليها ضل ..انا شخصيا ماعجبتنى ابدا مغادره ابو جعفر وعدم اعطاءه حقه فى التعبير عن مايدور فى ذهنه ..وبصراحه ماعائز اتذكر الشاكلتهم هنا منو...المهم الجوكم ديل ياسعد اضبحوا ليهم كرامه واعملوا ليهم حفله والشكل خلوا لى بعدين .. |
[gdwl]مافضل الا يجينا الزنديق المستنير بهرطقاته!
ياخ الزول دا أنا مشتاق له جدا و ورسلت له كذا رسالة تحنيس بالعودة![/gdwl] |
إت عادل برضو كان غايب فاطيهو مالك ؟
نظام مديدة و كده looool |
اقتباس:
البوست دا معمول بي خستكة (على وزن معمول بحب)! وهو مجرد مناكفة ومكاواة سااااي |
اقتباس:
ياخ الشر برة وبعيد:p |
اقتباس:
|
سلام يا أسعد،
فكرتك وحيثياتك قوية، وتسوى الزول يفكر فيها. زولك بتاع "المحبة والأشواق" ده بالذات يحتاج الفحص الطبي القال عليهو الجيلي + شهادة حسن سير وسلوك تكون ممهورة بعدد تلاتة توقيعات معتمدة. بجيك لباقي حديثك.. الشجي :) |
بسم الله الرحمن الرحيم
:D:D:D أهمّ حاجة الفحص الطبى عن امراض الفيس المعدية :D |
| الساعة الآن 02:55 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.