معا نحو معرفة المطرة وين صابة
تحياتي لاهل سودانيات
انا رجعت المنبر علشان ابشر بي نفس "الشطر الميت" اللي كنت قاعد ارضع فيهو من سنة غاغ وبورجغ بيهو طوالي... واليوم مع عملية بوتن اللي عملها في ضم مناطق من اوكرانيا... فالحكاية انبقشت بقشة حبيبك... وعليه اقول: العالم عايش جوطة تقيلة. لانه مقبل على مخاض نظام عالمي جديد والنظام العالمي الجديد موش مجرد تغيير للمدير التنفيذي من امريكا وتنصيب الصين... الشغلة ما شغلة شركة ابل لمن المين بورد اقالوا ستيف جوبز وعينوا سكالي بديل عنه... ولا حتة التغيير ح تكون في شغلة احادي القطبية ولا يحزنون الشغلة اكبر من كدة واللعب اعظم مما تبدو عليه الاشياء عليه الاشياء... اولا النظام العالمي الحالي ما اتعمل قبل قرن، بل هو نظام العالمي الحالي اتبذر بذرته الاولى منذ نحو ٤ قرون في معاهدة وستفاليا واللي فيها كان اول انتصار للشعبوية ضد النخبوية اللي كانت حاكمة العالم، والنخبوية هي نظام متطور من نظام الغاب لمن الانسان انفصل من الطبيعة الحيوانية وبدا يعمل نظامه الخاص للبشرية، فكانت النخبوية هي المسيطرة على المجتمعات البشرية، حيث انو الزول الماسك نظام الجماعة يعمل العاوز يعملوا ويقول العاوز يقولو وبقية الجماعة عليهم السمع والطاعة.... والنخبوية باختصار بسيط هي عبارة عن نظام عالمي تكمن فكرته في الفلسفة الفرعونية "وما أريكم الا ما أرى" فنلقاها عند الفراعنة والملوك في الحضر، وعند العمد والشيوخ ورجال الدين في المناطق النائية... اها يلا اتفاقية وستفاليا دي جات ختتها للنظام العالم ده وعملت نظام عالمي جديد فقامت اشتغلت على تفكيك الامبراطوريات الى بلدان وسمتها الحنك ده بي مصطلح "الدولة الحديثة" وكانت بداية النظام في اوربا ولاحقا تم تطبيقه عالميا من خلال الكولونيزم، فمثلا بريطانيا تستعمر حتة كبيرة في افريقيا وتقطعها لحتت صغيرة باعتبار انها دول حديثة... وكانت خلعة موسى الأمير لمن قابله محمد المهدي كحارس للحدود في مسرحية صقر قريش للماغوط😁 اها يلا النظام العالمي الجديد اللي نحن مقبلين عليه قام ختاها للنظام العالمي الحالي وح يشتغل نظام عالمي جديد يقوم على تقنين الواقع الافتراضي ضد الواقع الحقيقي، وتكون حياة الواقع الافتراضي هي الحياة الواقعية بينما الواقع الحقيقي يتحول الى افتراضي... وفي الواقع الحقيقي ح تلتغي تماما قصص الدول وتستبدل بمفهوم الكيبوتسات، وعادي جدا ممكن تكون طالع من أم ضوا بان فيلاقيك محمد المهدي حارس حدود كيبوتس العيسلات ويقول ليك جيب تصريح دخول😁 طبعا موش العالم كلو ح يكون كيبوتسات، لكن ح تكون في امبراطوريات منها امبراطورية صهيون اللي ح يعملوها السمباتة اسياد الواطة... وديل عندي ليهم ورجغة براهم عن كيف انهم اشتغلوا على تطبيق النظام العالمي الحالي والنظام العالمي الجديد... |
سلاااااااااااااااااااام
يعنى ح ننتقل من الحنك ضد القوة الى القوة ضد أى شئ :D |
مرحبا يا سعادة
ح ننتقل انتقال جد! والنقلة الجد جد اللي ح تقص ضهر الايغو بتاع البشرية هي النقلة اللي ح تحصل في الانتماء... ح نلقى الزول انتماءه وولاءه لبلد في الواقع الافتراضي اكتر من ولاؤه للبلد الواقعية اللي عايش فيها! يعني عادي تلقى انسان شلعوها الخوالدة ينتمي لبلد في "ساندبوكس" بالميتافيرس... والحكاية دي طبعا ح يكون فيها تيرنيغ بوينت في الانسيكوريتي... فبدل الواحد يكون ولاؤه لبلد علشان يحقق ليهو الأمان الذاتي، ح نلقاهو يدين بالولاء للواقع الافتراضي لانها مصدر امان له حتى لو كان يتعارض مع واقعه... زي شغلة الفيمانيست والشذوذ الجنسي، ح تلقى البنتمي ليهو يكون ولاؤه ويتخلى هل اهله وواقعه ويبذل الغالي والنفيس دفاعا عن ما ينتمي له. |
وعملتا لينا شنو فى موضوع الفقاعات؟
|
لا يا معلم الفقاعات دي ح يفرتقوها السادة العظماء القاعدين يبعبصوا في الـ Big Red Button...
بوتين، كيم يونغ، خامينئ وغيرهم من العظماء الذين قالوا "أحيي انا" في وجه من قالوا "اوبعلي". |
اقتباس:
كلو فى النهاية برجعك للصراع الطبقي😂 عمك ديف عندو نقة سمحة جدا فى الباردوكس بتاع الشفاتة ديل، محصلتو إنو السود هم المستفيدين🤣🤣 |
اقتباس:
علشان كدة ح نلقاهو حاضر في اول حوار حصل في الخليقة لمن ابليس قال قولته الشهيرة "أنا خير منه خلقتني من نار وخلقته من طين" لكن فقاعة الصراع الطبقي في مرحلة ما بعد عصر الـ Big Red Button ح ياخد شكل ومنحنى تاني خالص مالص... فبدل ما كان الصراع الطبقي يتمحور حول عمايل الإيغو في الأنا واخواتها من اهلي وقبيلتي ومنطقتي وديانتي وايدوليجيتي... في المرحلة القادمة ح يكون الصراع الطبقي في العالم الافتراضي مقرط في عوالم الميتافيرس والافاتارات وانتماءات وولاءات تانية مختلفة عن ما كان معتاد عليه منذ ان عرف الانسان قول "بغم" لمن قالها الانفصاليين الشلك من اصلهم النوير. ديف يا معلم زول بديع ياخ وجامع بين الحكمة والسخرية، ففعلا اللعب الحاصل ده ح يخلي الانسان يرجع لموطنه الاصلي افريقيا منبع الحياة واصلها... |
كلام كبير اوي..
يا دوبك فهمتا حبة.. حا اكون قريب طالما الحكاية جابتلها صراع طبقي.. لكن ماقادر استوعب انو يد الدمار تصل لناس كافية خيرا شرها وقاعدة في نيرتتي والدمازين ومايرنو وقرى بربر وانت ماشي لحدت غرق المناقل.. يعني يطردونا من هناك للخرطوم مدينة الاشباح عشان نمشي نتبهدل في القاهرة.. لي بس كدة بس |
اقتباس:
الناس بتتكلم عن حرب عالمية ثالثة قادمة، بينما إنو الحرب العالمية الثالثة حاصلة فعليا. حاليا فى حرب ضروس مولعة بين الروس والأمريكان فى منطقة القرم ونواحي أوكرانيا؛ دي حرب الله ورسوله الواحدة دي. حرب استعراض للقوات والمقدرات وتجريب كل مايمكن من أدوات الحرب؛ مع عدم قدرتنا على رؤية الجانب الخفي من جبل الجليد، لكنها حرب مكشرة عن كل أنياب السوء الإنساني، وعنتظات القوي. فى هذا السياق التدميري ليس مستبعد خيار الحرب النووية! حاليا أوروبا راكعة على رجلينها الاتنين؛ ومشتتة مابين التعنت الروسي والغطرسة الأمريكية. دا مؤشر بيوريك قدر شنو أوروبا فعلا ضعيفة وماعندها قرار اقتصادي؛ لأنها فعلا فقيرة على مستوي الموارد )مجموعة بشرية كبيرة من المستهلكين فى مناطق ضيقة، تتناحر فى حروب داخلية غير منتهية( داخل كل واحدة من الدول الأوروبية حركات تمرد ونزعات استقلالية؛ بل حتى داخل الإتحاد الأوروبي برزت أصوات تدعو لحله من دول لها ثقلها )ايطاليا، فرنسا، انجلترا( أما الدول الأخري فهي ضعيفة لدرجة أنها سترضي بعظم الدجاج وقشر البطيخ. نحن المستقبل ياصديقي. خليهم يكملو جوطتهم دي؛ ولحدي الوكت داك نكون رتبنا لثأرنا مع القتلة وفضينا لبلدنا. |
اقتباس:
موش درويش قال "اثر الفراشة لا يرى، اثر الفراشة لا يزول" اهو ده بالضبط اللي ح يحصل علينا من فراشات الرجل الابيض... واحدة من الوهمات اللي بتوهم فيها انا اننا لو عاوزين نشوف اثر عمائل الرجل الابيض علينا افضل مثال يتناسب هنا هو تأمل التغيير اللي طرأ على السينما المصرية، لانها هي اكثر حاجة محسوسة لفترة قبل مائة سنة... اها لو تأملنا احوال السينما المصرية في مرحلة ما قبل الحرب العالمية الثانية وما بعدها، ح نلقى انه في تغيير كبير حصل... السينما في مرحلة ما قبل الحرب العالمية كانت افلام تتمحور حول حياة القصور والترف والطبقات المخملية... لكن في مرحلة ما بعد الحرب العالمية السينما المصرية اتجهت نحو الشارع المصري والمواطن المصري وكان فيلم "السوق السوداء" اللي تم فيه تقديم عماد حمدي كبطل للفيلم، مع انه عماد حمدي مافي شكلو اي قدرات خارقة ولا هو كوميديان... وحصل ساعتها عملية تحول من البطل الاسطورة الى البطل ولد البلد اللي بشبه اي مواطن مصري... المقصد هنا ان اثر الحرب العالمية الثانية وما لازمها من روح عبثية، انعكست على السينما المصرية فحصل التحول من "الخلعة بالماديات" الى العودة لاصل الحياة. طبعا ورجغتي اعلاه مجرد كمثال عن اثر فراشة الرجل الابيض... اما اثر الحرب النووية علينا ح ينقلنا نقلة تانية فمثلا ح تلقى انسان بربر او نيرنيتي -بعد عشرين سنة كدة- بتواصل مع حبيبته عبر التخاطر بواسطة شريحة ايلون ماسك وبقول ليها انه عاوز يغترب في كوكب المريخ وح يرسل ليها اقامة علشان تجي تعيش معاهو هناك... الانسان يا صاحبي زي ما قال فوكو هو عبارة عن احدث اختراع للطبيعة... وبطبيعة الحال اي اختراع لازم بتكون عنده اصدارات مطورة تنزل على حسب طبيعة السوق:D |
اقتباس:
مية المية يا معلم اتفق معاك انو نحن حاليا بنعيش حرب عالمية، لكن بتشبه الحرب العالمية الاولى اللي مهدت لحرب عالمية ثانية، وح نلقى التحالفات مختلفة في الحرب الاولى عن الحرب الثانية... اها اسي الحرب الحالية فيها تحالفات مثلا روسيا والصين والسعودية ضد فريق امريكا... بعد فترة الامور ح تجوط ونشوف عملية احلال واستبدال في التحالفات ونشوف حرب عالمية رابعة. بالنسبة للحاصل لاوربا طبعا صادف مصادفة ساي اني من سنوات خلت كنت بتوقع انه النظام العالمي ح يستغني عن اوربا اللي اخترعته زي ما بتخلى اي مجلس ادارة شركة رائدة عن مؤسس الشركة لانه مكلف على الشركة وبنازع سلطات المجلي وكدة... وبالتالي الحاصل في اوربا عملية تهجير لرؤوس الاموال والتقنيات والعقول الى الشرق الأوسط وكدة.... بالنسبة للعودة لافريقيا ح تكون عودة غريبة كما عودة بطل قصة الطيب صالح "رسالة الى أيلين"... الوعي الانساني في مرحلة ما بعد الحرب النووية ح ياخد منحى تاني ومختلف تماما عن ما كان عليه منذ ان قال آدم عليه السلام "بغم" وجغم من الشجرة المحرمة.... لان الحرب النووية المرة دي ما ح تكون نفس حنك قنبلة هوريشيما اللي انضربت علشان توقف الحرب العالمية الثانية... لكن اسي لو انضرب نووي ف ح يفتح علينا ابواب الجحيم من علوم "الهندسة الوراثية" المقفول... يا صاحبي انا ما خايف من النووي بقدر خوفي من انه يشرعن علوم الهندسة الوراثية وساعتها ح نتحول من طبيعة "الانتقاء الطبيعي" الى صنيعة "الانتقاء الغير طبيعي"... لانو لما تضرب نووي وطبعا ح يتبعه حروب بايولوجية، ساعتها علوم الهندسة الوراثية ح تتشرعن وح يقدسها الانسان لانها ح تكون وسيلته الوحيدة للنجاة... علوم الهندسة الوراثية دي كعبة بي الله واحد يا صاحبي، دي ح تشيل مننا العدة وتسلمنا تسليم اهالي لـ "الألة" او الإله الجديد المسيح الدجال |
اقتباس:
او باب الطيرة التي أكلت جناها بهدف "الخسارة القريبة من اجل المكسب البعيد" ومكسب اسرائيل البعيد يكمن في قيام امبراطورية بني صهيون من الفرات الى النيل وده حلم صعب تحقيقه إلا بطرق ملوية نفس طريقتهم في تجميع لشتاتهم بالحركة القردية اللي عملوها قبل قرن من الزمان عندما رفضوا يهود الشتات العودة الى فلسطين لان من الطبيعي والمنطقي لا يمكن لشخص عاقل ان يترك نعيم اوربا ويهاجر إلى جحيم فلسطين لما فيها من عدم توفر أمن وأمان لليهود. حينها قام السادة السمباتة اسياد الواطة بصناعة بعبع لكي يخوف اليهود ويجعلهم يهاجروا الى فلسطين بمحض ارادتهم، وهذا البعبع هو النازية والفاشية الذين تمت صناعتهم بايدي السادة السمباتة لكي يقوموا بعمليات كراهية وترويع لليهود إلى أن وصلنا مرحلة الهولوكوست والتي دفعت بقية اليهود إلى الهجرة بمحض إرادتها إلى فلسطين. وكان فدية ذلك التضحية بعدد من اليهود وخسارتهم من اجل المكسب البعيد وهو بناء دولة اسرائيل. الان نفس الحنك يقوم السادة السمباتة بالتضحية ببعض من شعب اسرائيل وخسارة 20 او 30٪ من شعب اسرائيل بان يتم ضربهم بقنابل نووية من ايران ولكن المكسب البعيد هنا ح يكون هو قيام امبراطورية بني صهيون الممتدة من الفرات إلى النيل وهذي الإمبراطورية ح يتم استحقاقها لاسرائيل كعربون محبة لانها ضحت بشعبها مقابل إنقاذ الشرق الأوسط من حروب نووية. وعليه في الحرب الحاصلة الان بين اسرائيل وايران، ستُغلب اسرائيل وستضرب بقنابل نووية، ولكن بعد غُلبهم سيغلبون وستقوم امبراطورية بني صهيون |
عمايل السمباتة اسياد الواطة ممكن نكون نحن كسودانيين شفناها شوف العيل في تلامذة السامباتة وهم الكيزان.
حيث اننا شوفنا كيف الكيزان يضحوا بشعبهم في حروب ويضحوا ببلادهم باعتبار انها خسائر قريبة لمكسب بعيد وهو سيادة حزبهم. نفس الحنك عند المعلمين الكبار من السادة السمباتة اسياد الواطة حيث انهم يضحوا بشعبهم اليهودي باعتبار انه خسارة قريبة لمكسب بعيد في قيام إمبراطوريتهم المنشودة. |
في الحرب الحالية امريكا ما ح تتدخل لدعم اسرائيل
وح تخلي اسرائيل تشيل الليلة كاملة في حربها مع ايران وايران ح تضرب اسرائيل بالنووي وأكثر من مليون يهودي سيتم إبادتهم في محرقة تنقلها وكالات الأنباء والموبايلات والسوشيال ميديا وح يدخل العالم في حالة بتاعة (الشعور بالذنب) اتجاه ما قد حصل في اسرائيل وحتسود حالة من الشعور بالامتنان لليهود لأنهم ضحوا بأنفسهم لاجل إنقاذ العالم بنفس الحنك بتاع (الهولوكوست) وساعتها ستتمدد اسرائيل وتستحوذ على سوريا والعراق ولبنان والأردن وسينا وشرق مصر وعيييك |
وبينما العالم كلو مخلوع في العملية القردية التي نفذها ترمب.
مع اننا منذ 2017 قلنا ترمب فوزوه علشان العمايل القردية عموما خلونا نشوف ماوراء العملية القردية ومرتبط ارتباط وثيق بمستقبل بلادنا المظلم. ترمب عمل عملتو دي في فنزويلا من اجل ان يجعلها بديلا لدول الخليج. ح نشوف خلال السنة دي وهو ينصب رئيس جديد ويدعمه ويرفع عن فنزويلا العقوبات الاقتصادية ويتعاقد معاهم عقد حصري في استخراج البترول وتصديره. وهنا كما يعتقد ترامب انه ممكن فنزويلا (أغنى احتياطي للنفط) في العالم اصبحت في يد امريكا، وبالتالي الاستغناء عن دول الخليج كمصدر للنفط. وهنا ترامب ح يرفع يده عن الصراع الحالي في دول الخليج واللي حيتأزم بشكل كبير ويتحول إلى صراع شرق أوسطي ويطول أمد هذا الصراع وتنهار الدول العربية خصوصا وتتحول إلى كيبوتسات ونشوف حرس حدود الخرطوم في كبري الحديد وهم يفتشوا في جوازات انسان ام دمان للتأكد من صلاحية تأشيرتهم للدخول إلى كيبوتس الخرطوم. أفكر جليا ان أعمل قناة في اليوتيوب لتوعية الناس بلايف استايل الكيبوتس |
| الساعة الآن 06:02 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.