في ذلك اليوم المشهود، الأشياء لم تكن هي الأشياء، مهند الخطيب ساهماً في سماوات تتجاوز سماوات الأوليمب التي يدمن الحوامة فيها، غابت كل عاداته المألوفة، حوامة سودانيات، الفلفة في الفيس بوك ومصارعة الماسنجر. راقداً في السرير وينظر لدوائر الدخان المتلاشية من سجائره اللورد. احترمت صمته تماماً ولم أسأله، لعلمي التام بمدى غتاتته في أموره الشخصية، إلا أنه فاجأني بالالتفات الى قائلاً ودمعة صغيرة تسيل من زاوية عينه اليسرى:
- الزولة دي بتشبهني، بس هي في طرف الكمال وأنا في طرف النقص
- زولة منو يا زول
- سكارلت، سكارلت يوهانسون ياخ ضربت بقية ابراج مخي ياخ
- انا شايفا عادية جدا جدا يا مهند.. كدي خت الرحمن في قلبك.. اسه دا المدبرس بيك من قبيل
- مدبرس بي!! الدبرسة الهينة دي.. ياخي الزولة عاملة فيني عملية زي العملية في النملية ياخ
- استهدى بالله ياخي وانسى
- انسى كيف.. تعرف يا اشرف سكارلت دي تحس بيها.. ما عارف اقول نو زاتو
- والله يا مهند انت زول فاقد حنان وبس
- فاقد حنان بتاع عينك.. انا فاقد سكارلت ياخ
- اسه العاجبك فيها شنو؟
- اما عجيبة .. انت عميت ولا عميت ياخ، العما اليلايسك.. عربي تمام انجليزي تمام.. اقول ليك شنو.. قوم من هنا..
وانسحب لادخل الى غرفة أخرى في النخيل.. وصورة سكارليت تملأ كل النخيل
