اقتباس:
المشاركة الأصلية كتبت بواسطة أبو جعفر
السلام عليكم رأفت
تعرف يا مدير المرأة السودانية دي اتعرضت بسبب الثراء الذي تسبب فيه ارتفاع أثمان القطن عالمياً - في الخمسينات - لأكبر مهدد لوجودها .. فقد بدأ توافد كثيف من أثيوبيا وغرب إفريقيا .. وهنا كان على المرأة السودانية - كما السعودية اليوم - أن تكون سوبر استار بالنسبة للرجل السوداني .. فلا تظهر نفسها لغيره .. وتتقبل صعوبته وتخلص له وإن خانها... وإلا فالبديل جاهز.. والإنجليز ما قصروا في فتح البلد.
|
ابو جعفر سلام
و الله ما تقول مستقصدك لكن صدقني النقاش معاك مثمر و ممتع بالرغم من انك بتكيل لي ... و المتعة في الكيل يا عمك
اولاً: ما في حاجة اسمها مرأة سودانية انما في نساء سودانيات ...
يعني مرة امدرمان المقعدة البتطلق اسماء علي التياب بالتأكيد مختلفة خلقة, اخلاق, تفكير, نمط حياة عن مرة الطفيلية الجابوها من البلد البتقول (يا عفاف شغلي لي الدقاقة), الدقاقة دي علي وزن الغسالة و تعني السحانة, امراة الوسط مختلفة عن الدارفورية البتلبس التوب باليمين,
الاختلاف ما في يمنية او يسارية لبس التوب و إنما اختلاف في ركايز الحياة .... و الاختلافات جوهرية و لا تسمح بالذوبان اقلها في القريب العاجل....
ثانياً: في خطأ قاتل واقعين فيه معظم المثقفين ما عارف عن قصد أو جهل و انت هنا وقعت فيه ,انو ارتفاع اسعار القطن جابت لقاط من غرب افريقيا ... و المثقفين بضيفوا للقصة دي شوية توابل انو ناس غرب افريقيا السكنوا الكنابي و لقطوا القطن كانوا ماشين الحج و اها لقوا السودان جميل و قالوا مالوا ما نقعد و قعدوا ... متناسيين ان الغرب أفريقي الماشي الحج قطع شك بيكون زول ثري جداً في بلده بدليل انه ماشي الحج من استطاع اليه سبيلا داك, و ما اظن يبدل وضعه الهناك بالقطن فقع و المسكين اترقع.....
عشان كدا أحب اقول ليك سكان الكنابي ديل غالبيتهم ناس دارفور و كردفان بس ممكن تكون في قبايل عندها امتدادات في غرب افريقيا...... انت عارف المثقفين بيقولوا الكلام دا ليه؟
بيقولوها عشان يخلقوا توازن لأنفسهم عندما يحاصروا ذاتياً بالحياة الغير آدمية التي يعيشها سكان الكنابو (لا كهرباء لا موية لا اي حاجة).... بمنتهي الانانية و عدم الانسانية بنفوا عنهم الجنسية السودانية و بيقولوا عنهم من غرب افريقيا....
ثالثاً: المهدد لمرة الجزيرة أصلاً ما لقاط القطن و لا قلاب الكبكبي ,
المهدد ليها يا أبو جعفر ثراء الفقير المفاجئ و دا كلامه برا ....
بعدين هو ذاته الفقير الثرئ او الفقير الذي يملك مال دا, أصلاً ما بتزوج من نسوان الكنابو لكن ممكن يقيم معاهم علاقة جنسية غير مكلفة إقتصادية
و يجوا أهله يقولوا ليك (و الله فلان محترم عنده ولد في الكنبو و الله قاعد يصرف عليه و في كل عيد بودي ليه كسويته.... شفت الاحترام دا كيف؟)... يعني الثري المخلوع دا ما بتزوج من الكنابو و حتي لو حصل ذلك زوجته ما اظن تتواضع لدرجة الغيرة من خادم و خاصة في وعيها مفهوم الآمة و السرية .... المهدد لمرة الجزيرة ثراء زوجها البكرة بتزوج بت ود اللمام العمرها 14 سنة, أو مرة المرحوم الزين العندها بطنة واحدة و كرعينها سمحات ......
رافت قلت لي النسوان السودانيات مالهن
و ثم ازيك يا خي و مشتاقين و كدا