رأفت كيفنك والعيال وأهم ،،، ليكم شوق وتحايا
أم رحيق مثلاً زولة فنانة تشكيلية ( نحاته وبرضو بترسم وتلون وكده )
من قبل ما ـزوجها توقفت عن ممارسة فنها ،،، وبقت زولة أفندية مدرسة فنون ولا زالت تعلم النشئ الجديد ،،،
قبال زواجنا كان في حديث بيناتنا بإني ما عاوز قدومي عند حضرتها ومشاركتها حياتها يكون خصماً عليها كفنانة ،،، يعني عاوزه تواصل في مسيرتها ،،،
الأزاميل والفرش والألوان وووو ... إلخ ،،، كلو جبتو ليها ،،، والمحصلة في ممسارتها لفنها ،،، صِفر %
أنا كنت ممثل ومخرج (إذاعة / تلفزيون / مسرح ) ،،، الآن منتجي الفني في ذات مجالي ،، يساوي ،،، صفر %
طيب نجي ببساطه نناقش المسألة دي ،،، الحصل شنو ؟؟؟
بالنسبة لي أنا يمكن في ظروف موضوعية خلتني أتوقف عن التمثيل نهائياً ،، وعن الإخراج جزئياً بدرجة كبيرة للغاية ،،،
منها بعدي عن وسط العاصمة وعملي وسكنتي في الأكراف الشمالية للريف الشمالي لمدينة بحري ،،،
ومنها برضو إقتناعي الكامل بإنو مافي تمثيل في السودان لإنعدام الإنتاج الحقيقي وبالتالي ما عاوز أكذِب علي ربنا وعلي الشعب السودان ولا علي نفسي في مجال مماسرة التمثيل ،،،
وبالنسبة للإخراج ،،، كانت في معوقات كتيرة ،،، أخرج شنو وعشان شنو ؟؟؟ يعني أصرف علي عمل ما ،،، عشان أبيعو لمنو لأجل التواصل ،،، لكن أهو الزول بحاول مرة مرة كده يصرف ليه قريشات لأجل إنو يقدم للناس ما يفيد عبر اليوتيوب ،،
بالنسبة للزولة الفنانة الراقية السيدة الفُضلي أم رحيق ،،،،
زي ما ذكرت فوق بإنو إهتمامها بالتدريس أخدها جزئياً من مماسرة فنها إنتاجاً ،،، والشئ التاني علي حسب قولها هي بالطبع ــ التلاتة بنيات ديل نشفَن ريقها وشالن بقية الوكِت الفاضل والكان ممكن تستغلو في تنفيذ أو ممارسة فنها الجميل ،،، والشئ التالت يكمن في الجو العام البقي أمسخ من مسيخ ده يا رأفت ،،،
وبرضو ربما يكون عندي بعض التأثير السلبي علي عدم ممارستها لفنها ،،، بقول ــ رُبما ـــ والله أعلم
آسف علي الإطالة لكني قصدتَ أجيب ليك نموزج من داخل بيتي ،،، وربنا يقدرنا لو هي أم رحيق ولا أنا بإننا نقدر نقدم للناس ما يفيدهم من فن راقي يرقي لمستوي أن يُشاهد
|