[imported_الزوول]

بدأها العميد فرفور (كما لقبه عمكم السر قدور) برائعة صلاح بن البادية (يا فايت ومتناسينا)
الذي غنى للشاعر المحتفى به أيضا (ايامك) التي تغنى بها قبله محمد وردي ثم تنازل لصلاح عنها
اغنية يا فايت ومتناسينا ... كتّر بسماتك لينا
أغنية خفيفة راقصة على ايقاع الريغي
اجمل ما فيها ود المليجي الذي أعجبه الايقاع فأبدع فيه بأصابعه ثم بجسمه ...
أداها (عميد البرنامج) بصورة رتيبة أقرب للملل عكس صاحبها صلاح بن البادية الذي يتميزبصوت لا يزال يحتفظ بكامل ألقه وجماله يخسر حتما من يحاول تقليده (4 من 10)
....
الأغنية الثانية الجميلة (يا الطال غيابك ...سنة وزيادة)
أحمد فرح الفنان الذي ظُلم ظلماً بيّنا عندما أدخله المرحوم اسماعيل حسن في معركته ضد محمد وردي ولم ينجح بالرغم من موهبته وجمال صوته ...
أداها (فنان اسمو عصمت)
ممكن البيعرف عنو حاجة يدينا عنو نبذه لاني لم اسمع عنو من قبل
أدى ألاغنية بصورة لا بأس بها ,ان كنت أعتقد أن الراحل (نادر خضر) كان يؤديها بصورة أجمل كثيراً (5 من 10)
...
الأغنية الثالثة
حصل مشيت تفتش عن كلمة في الدكشنري ... وفجأة انتبهت بانك سرحت ونسيت كلمتك وبقيت تقرأ عن كلمات تانية ما عندها علاقة بى كلمتك الاولى الا انها صادفتك في نفس الصفحة ..
اها... ده تفسيري الوحيد للحصل مع عمكم السر قدور.. وإلا قولو لي ... الدخل حسين الصادق وأغنية اسماعيل حسن يا حليلك يا بلدنا شنو في حلقة عن شاعر تاني اسمو الجيلي عبدالمنعم
مشو يفتشو عن اغنية احمد فرح يا الطال غيابك قامو عترو في أغنية احمد فرح يا حليلك يا بلدنا ... فقامو خموها جابوها لينا
عموما حسين الصادق غناها بصورة جميلة وهو الذي تخصص في الفترة الأخيرة في الاغاني بايقاع الدليب (اغاني الشايقية) (6 من 10)
....
الأغنية الرابعة
يوم ورا يوم ، رائعة صلاح مصطفى أدتها (رانية)
أغنية بديعة ... يا سلام
وكأنني أسمعها لأول مرة ... تلحين عبقري متنوع
وفرقة موسيقية في غاية الحرفية واتقان العزف والزمن المظبوط
اما (رانيا) التي لم أستطيع تحديد هويتها
ففي نبرتها شيء من مصر
خليط من صوت (ماما ايناس) الحالياً بقت د. ايناس مقدمة البرامج في تلفزيون السودان الرسمي
وصوت نبوية الملاك الفنانة المادحة
فلا أعتقد ان لديها ما يؤهلها للاستمرار كمطربة
غايتو عشان اختيارها للأغنية الجميلة ولفت انتباهنا ليها نديها (5 من 10)
....
الأغنية الخامسة والأخيرة
رائعة الراحل الضخم وردي (الحبيب ..قلبو طيب)
وأدتها (الكروانة) كما أطلق عليها عمكم السر قدور
هذه الكروانة تملك اجمل وأقوى الاصوات في هذا البرنامج
فنانة بالفطرة ...
ولكنها شوهت الأغنية ... بالصياح
وخاصة عندما تكرر الكلمة الأخيرة وكأنها تزغرد
العوازل ضللو ... ضلللللللللووووووووووو ... زكرررررروووووو
وحدووووووووووووووووووو
منو القال انو بصمتك الشخصية لازمانا في غنى زي غنى وردي ده؟؟؟
البركة في كمنجة اسماعيل عبدالجبار
(عندك 5 من 10 ) والواحد الخلاك باصيتي ده زاتو عليك امان الله بس عشان عمك عكود والله