اخخخخخخخخ ياخ جاني وجع بطن من تخيل المشهد..
طبعا المفروض كلكم تتجلدو،
انت بالذات، ياخ ماتخليك في خمسيانتك الحريفة وحريقك..
اما ديلك فجلد مع الأعمال الشاقة..
ياخ مهما خرمتا للويست ماممكن تجيب كيشة ( معليش علي الملافظ والمسألة ماشخصية
) يكمل ليك الطربيزة..
علي الليمان في روسيا ونحنا برالمة ومتدربين علي الويست في النوادي وعواميد النور وضو الرتاين، لكن ماتدقها إلا تكمل سنة مشاهدة وشحتفة روح، وبعد دا اسمك بيكون مكتوب بقلم الرصاص..
ياخ الويست دا كان عندو تمجيد عجيب وطقوس، وأنواع للجلدات، والقصات، والشتات، والفرش..
زي مابركة ساكن قال في الجنقو إنو أغنية وصيتني وصيتا بقت موضة لحدي ماانو في طريقة بتاعت ركبة للحمير سموها وصيني وصيتا.. برضو كمان الويست كان في حرفنات بتاعت جلد، وطبعا الكشتينة لازم تكون بلاستيك عشان الكرت يطير أو يتزحلق او يخش في جيب المجلود ذاتو.. التقول دا هاري هاوديني..
في جلدات الكرت بيطير فيها فوووووق ومع طيرتو دي بيكون المجلود بيكحّل ليها قبال ينزل، لأنو يمكن آس مجلود بي دو
الجلدات ثلاثية الأبعاد، دي بيلف فيهو الكرت في الهوا ويصرج ويعمل فرفرفر، زي لفات سيمون بيلز..
الجلد العفنة هي البتجي في اليد، ودي جلدة الحقارة
الزول يرمي الكرت وهو ضامنو أعلي بوهية ، في اللحظة ديك تجلدو في يدو بالكرت.. ودي في العادة بتتعمل لمن تكون فيها ريحة..
المهم ياكونفو إنو الحاجة دي لو حصلت في المصفا، فالمفروض يتكرتن كلو وتتراجع القوائم ومافي زول يدق فيها ويست لحدي ماينتهي الإنفستقيشن.