[بابكر مخير]

بينقال أنه الوقت هو مقدار محدود من الزمن.
أنا بقول أنه الوكت ما هو إلا مقياس هلامي مربوطة بيهو حياتنا من وكت ما الزول يتولد لين يمشي منها والمقياس دآ نقول أنه ذي المسطرة مقسمة لي بوصات أو سنتمترات هو كمان ليهو تقسيمات مختلفة. أمسك من فصول السنة الأربعة كل واحد ليهو فترة من المقياس دآ، مرورا بأيام السنة وساعات اليوم وهلما جرآ..
ممكن تتحكم في المقياس دآ يعني تواعد ليك زول الساعة 12 ظهرا وتمشي ليهو الساعة 12 صباحا وممكن برضك تنساق ليهو يعني تأخدك نومة الضهرية وتصحي تلقى الساعة 6 وشوية ضلام تقوم تفتكر أنه الوكت سرقك وهي الساعة حسي 6 صباحا من اليوم التالي..
وذي ما هو منقول؛

(http://lisaan.net/%D8%A7%D9%84%D9%88...7cd65dfbcb7930)..

القصد من دآة كلهو أنه بمرور الوكت بيبقى ليك مع الكًبر إلا الذكريات "وهي ذاتها خربانة ونايمة ما بتصحى إلا فجات" من حاجات جميلة وذكريات مفرحة في وكتن مضى. تقعد تلوك فيها وتمضغها دون ما تبلعها خوفتن من زوالها أو تتلاشى.
أوكات مضت ما تبقى منها إلا طلال..
المحطة الوسطى في الخرطوم وميدان أبوجنزير.
بيتنا في شارع الأربعين وصورة أعمامي ولاد سيدي الأمير يعقوب من الغدوة الي المساجد حتى الوراح. سيد اللبن من الدغشية على "صهوة حماره" ومن بعدهو وعلى حماره أيضا (المعآ قزازا). "المعا قزاز دي هي عملية تدوير recycle بفائدة مادية، كانت زمان في وكتن جميل لمن كانت زجاجات المشروبات الإياها بعد ما تأدي قرضها تنباع لجامعها وممكن الإنسان يلتقي بيها مرة تانية يا في قزازة مشروب روحي أو غازي.. يعني من إحنا شفع ودآ قبل كم وستين سنة في السودان بندور "من تدوير وبكل براءة"..
بلد كانت حلوة، خرطومها لمن خلاااااااااااااص كان غلندر أو قلندر..
من العاصمة وليها وبيها.
بالله عليكم حسي قالوا؛ هاشم محمد عثمان..
أظرف حاجة أنهو والي الخرطوم بعيد في قريتهم ذي أولاد ملاح زمان، في الأعياد ذي أيام الحروب. الناس لازم تحضر تموينها قبل العيد أنهم ولاد ملاح بيقفلوا وبيمشوا البلد وما بيرجعوا إلا بعد عشر يوم أو إسبوعين..
يعني خرتومنا في الأعياد حتكون من دون والي..
ما مشكلة ما هي البلد كلها بدون والي