قبل مدة وبتكلم مع نعمات مالك بنت خالتي فاطمة بدري "إيية" وكيف الدنيا وعلى قول خالتي عزيزة بقت "حاجة بايخة"..
الكرونة قفلتنا قفلة ما منها فكآك إلا يجينا علاء الدين، يفرك ولا يكرش ولا حتى يخربش عشان نطلع ووننفكآ من الجُب الإحنا فيهو.. جيني ولا شيطان، حميدتي ولا السيسي كان التجاني ولا عبد الفتاح ولا البرهان أو حتى حمدوك..
المهم هي تحكي وأنا أشكي، هي تقول وأنا حوالين البيآ أدور وبليف وأقول..
من ناصايحها الثرة؛
تعرف يا بابكر ومع أنهو أغلب الأهل بيقول ليا بابكير تلطيف ولا محبة ولا مجاملة المهم نعمات دي ودآ ياهو طبعها رسمية في جنس دآ، إسمك سموك ليهو ياهو إنقال حسب التسمية. وهي شديدة عند المحن وثابتة ذي شجرة التبلدي وضعيفة عاطفيا كما فرع البان تهزه النسايم، قوية وكت الملمات والمحن والشدايد قلبها من حجر لمن القلوب تجزع وتولول. حين أعدم حبيب قلبها، شريك حياتها ومصطفاها كما هي كانت مصطفاتهو وأبو وليداتها، صارمة، مصادمة وبتذكر أيام كان معينين حرس من أمن نميري في بيتها، كيف كانت قدامهم تلعن مايو ولييهم قايمة بي أمور حياتهم عندها كضيوف من فطور لي شاي والي أخرهو.. مرة أعتقلت في المديرية وكتا في البوليس في وكتها وطباعنا السودانيين "أقلهو زمان" لو عندك زول إتمسك من قبل النظام، ما بتهتم بما قد يصيبك في شخصك أو وظيفتك.. بتمارس كل السبل المتاحة وغيرها عشان يتفكآ من الحبس. فمشيت المديرية وكان هناك عقيد وتربطنا به علاقة قوية شبه أسرية وقلتا ليهو عن قصدي للمديرية. قال ليا يا بابكر أنا بس مستنيها شوية تهداء وأصلي ناوي أوصلها البيت برآي.. لكنها نازلة شتيمة ولعن في مايو.. دخلتا عليها ولمن شافتني كتر خيرها هداءت وطلبتا منها أن تهداء شوية عشان نرجع البيت جدي أحمد منزعج شديد. وكان أن رجعنا وشكرتها أكتر في أنها خصتني وعزتني أن أتشرف بإستطحابها البيت..
من ناصيحها: عليك بالمرآيا؟؟
"كنت قبل كدآ كتبت بوست عن المرآيا وأنها العاكس الحقيقي لي صورتك" وسألتها كيف يعني؟؟
قالت ليا أنا بعاين في المرآيا وإتكلم معاها عن نفسي وروحي وبترد عليا..
تقول ليا: لييه يعني حسي إتي رادمآ هموم الدنيا فوق رأسك. ما حتغيري فيهي شئ.. قوم يما كدآ، أخدي ليك دش وألبسي وأمرقي، إن شاء لفي في الشارع سآكت ولا شغلي ليك غنآ وفرقي عن روحك...
سمعتا الكلام ويا مؤمن يا مصدق..
المرآيا وقبل ما أسمع منها شئ..
بشوف فيها نفسي وأتصوروا..
قال كيف؟؟
بشوف في نفسِّك أحلامي ......
يا أخي لآ...
[youtube]https://www.youtube.com/watch?v=Bq1PD6UYvWc[/youtube]
|