حزنك مسافر فيك
يا حليلك
نضب نبع الدموع جواك
لا واساك رذاذ الغيمة
لا نسّاك
زمان وجع الرحيل جواك
ياحليلك
وقفت براك
تدق باب البكا المفتوح
علي صي المواسم الجافة
ما بكّاك
غياب نجمات ليالي العتمة
ما هماك مخاصمة المطر
خدّر حراز حزنك
مشيت في الصيف
وكان قدرك مباراة
النجوم والريح
وما بلل عيونك طل
ولا سامر سماك خريف
خلاياك والحريق الجاي
من حر السموم الجافة
يا حليلك
تفتش عن غيوم منسية في جواك
أكان يبرد حشا ك
من حرقة الجرح
السكن في الضحكة
ياحليلك
مساسق ديمة
ما بين الجرح والذكرى
لا هدّت مشاوير النزيف الفيك
خيول وجعك
ولا فترت خطاك
من الزحيح في الليل
أكان توصل
بداية الدمعة
كل ما شال سراب الغيم
تلوح جواك بروق
عشم المطر من تاني
لا فترت خيول صبرك
ولا وصلت خطاك
ميس البكا المفتوح
على أمل المطر من تاني
تحلم بالخريف جواك
مهما طال جفاف
صيف المواسم
الجاية من تالا
الفضل من وجعة الحزن
المسافر فيك
ياحليلك