كوكي يابا، قصة العلاج بالأعشاب ومشتقاتها وأنهو البوست دآ مع الشتاء؟
ذكرني، شتاء السودان والقشف البخلي الخدين أشد قساوة من ورق الصنفرة وحتى بعض مرات ذي جلد القرنتية، ناذي دم والشلاليف ديك أن قلتا تبتسم؟ بس تقول مشرط جراح وإنجرا فيهن والحكمة أنها اللزقة قولتن توقف الدم ما بتمسك هناك لأنهن الشلاليف دايمة الحركة.
كدي سؤال عرضي؟ لييه الزول لمن يبرد ويدور يدفي يدينهو بينفخن بي نفس طالع من خشمة وبرضك بي نفس النس الطالع من الخشم، إن قلتا تبرد الشاي بي اللبن الفي برطمانية المربي، بتنفخهو؟؟
نرجع من العرضي للمباشر!
أها إتذكرتا قشف الخدود والإصابة الغير حميدة للشلوفة وكما زيادة نشاف المرفقين وحرقة موية الوضوء فيهن. دآ كلهو وإتذكرتا صحن الألمونية الفقد شكله الطلع بيهو من المصنع وإطرفق ذي "الكيزان" وأنه بقا يسد محل صحن الفول عند أبو العباس والعشرة العظام حيث يكسر الفول ويضاف اليه موية الجبنة وإضافات كتيرة ويغرق في زيت السمسم ودآ؟
هو بيت القصيد،
الزيوت عامة تستعمل كمطريات وحتى مواد تشحيم وزيت السمسم في ماضينا القريب صاااافي كان ذي مريسة أبو نواس الوصفها:
لا تَجعَلِ الماءَ لَها قاهِرًا وَلا تُسَلِّطها عَلى مائِها
ولونه أخضر أجمل نقاء من زيت الزيتون البكر،
أها طعم وفايدة..... على وزن كفر ووتر..
تأكلهو ويسيل على الشفاة فيطريها
وعند الإنتهاء يمسح حيث القشف فيلينهو..
ويبقأ زيت السمسم وأحد من العلاجات مشتقات حبة السمسم الصغونية..
يا ﺳﻤﺴﻢ ﺍﻟﻘﻀﺎﺭﻑ
ﺍﻟﺰﻭﻝ ﺻﻐﻴﺮ ﻣﺎ ﻋﺎﺭﻑ..
ﻗﻠﻴﺐ ﺍﻟﺮﻳﺪ ﺍﻟﺮﻳﺪ الريد
ﻛﻞ ﻣﺎ ﻫﻮﻳﺘﻚ ﺷـــﺎﺭﻑ..
|