[الطيب موسى الطيب]

السلام عليكم يا احبة ...بديت معكم مشوار الحكاوي بس انا ما واحد من دكان ود البصير بس زول اضناهو بعادكم وعاوز اخفف عن ذلك بإعادة الذكريات.... ومن بين الورطات الدخلت فيها . عدت بعد إجازة الصيف لبداية السنة الاخيرة عن طريق مطار القاهرة . وصادفت في الرحلة معاوية وهو قادم بعد برلمة العام السابق . خرجنا من المطار ووصلنا محطة السكة الحديد ولسؤ حظنا وجدنا القطار تحرك قبل ربع ساعة. فكرت ان نركب الاتوبيس للمنياء ومنها نركب القطار. قطعنا التذاكر وركبنا في مقاعدنا . وبعد انتظار قصير نزلت واحضرت الجرنال وبديت اتصفح فيه. جلس خلفنا مصري لابس بدلة شيييييييييييييييك . ثم بدأ معي الحديث الاخ سوداني . فقلت ايوة يا بيه. فقال لو سمحت ممكن الجرنال. اعطيتو الجرنال فقرأ فيه قليلا . ثم سألني عن وجهة سفري فقلت له اسيوط ..فقال لي فرصة سعيدة انا نفسي اشوف اسيوط وانا عندي فندق في الاسكندرية اسمو الكرنك ويقصده كتييير اوي من السودانيين وانا بحب السودانيين اوي. ثم تحرك الاتوبيس وبديت احسبها يمين شمال الزول دا عاوز مننا شنو؟ .بديت افكر في فكرة اتخلص بيها منه فقلت له نحن نازلين المنيا عندنا اخوة هنا عاوزين نزورهم.. فقال لي مالو امشي معاكم. يا دي الورطة .. وصلنا المنيا فقلت نحن غيرنا رأينا ماشين اسيوط فقال والله ما تدفعوا .وقطع لينا التذاكر وجاب الكنافة والبسبوسة والبارد وكلو على حسابو. واخونا معاوية ولا على باله ..وصلنا اسيوط وذهبنا للكوندة المحطة وأجرت غرفة ودفعت المبلغ ..وطلبت منه ان يدخل الحمام ليتروش ..ولما دخل نزلنا بسرعة واخدنا تاكسي لدار الاتحاد ..وبعد المغرب جينا تاني عشان نلقى صاحبنا فوجدناهو غادر المكان ..فضحكت وقلت لي معاوية الرجل فكر في سرقتنا لكنه خسر المشوار وحق التذاكر..وللحديث بقية عن جوازتنا التي ودوها للامن المصري وذلك اللقاء الذي لا ينسى ...