[قرقاش]

واخيرا ..اديناهو بالبرطوش ... فايروس.. تروغان ملوارى ابن ستين كلب .. شفقنا على كمبيوترنا ..والحكايه ومافيها ..قال ايه ..؟ قال الود قاعد فى الكمبيوتروعامل فيها كابتن ماجد ..وقال ايه .. سابح فى امواج الاثير مع النت ..وفجاءه اخش ليك موقع فى النت ولقيت ليك واحد عامل يافطه كبيره ..علينا جاى تنظيف الكمبيوتر مجانا علينا جاى ..وقلت لى نفسى ياود نضف الكمبيوتر بتاعك ده.. اصلو الكمبيوتر الايام دى بقى تقيل شويه ...بس قلته ياعم يابتاع نظافه الكمبيوتر ..وعينك ماتشوف الا النور..وشاشه الكمبيوتر بتاعى بقت الوان واشكال احمر اصفر اخضر ولون زينب وام التيمان كمان ... وبعد شويه كده ..عمك بتاع النظافه قال لى... خلاص ياعم الحاج .. خلصناه .. قلت ليه ..طيب ورينا الحاصل شنو .. قال ..والله مافى عوجه تب الهارد سك تمام التمام ... والسى فيه كم حاجه كده بايظه صلحناه واحنا ماشين ..المشكله الوحيده فى مواقع كده مش ولابد.. احسن نمسح ليك ..قلته ليه .. جدا امسح ...وتانى هاك ياالوان احمر اخضر كحلى وشرايط جاريه وشرايط واقفه ..وبعد شويه قال لى.. تمام البرنامج مسحنا ياسعاده الباشا ..وعندنا برنامج حاجه كده ماحصلتش ..برنامج انما ايه ..؟ فللى ينضف ليك ايه حاجه برنامج جاهز من كله .. وسعره بدل سبعين دولار عملنا ليك خصم خمسين فى المايه ..وبقى خمسه وتلاتين دولارعايز تدفع كيف ..؟ الكريدت كارد بتاعك رقمه كم ..وتاريخه متين ..؟..قلته ليه .. استنى شويه ياخوى نحن فى بلد والله لسه عندنا التجاره البكماء قايمه على كل المستويات..ابتداء من سيد الدكان و حتى الحكومه لمن ما تلقى كاش تسدد بيه ديونها ..تديك واطه ..تقول لى كرت كارد ..انسى ياعم وبلاش تمسح اى جاجه يلا كنسل ...كنسل ..وقفلته وكنسلت وغيرت المحطه... وقفلته الكمبيوتر ورجعت عشان اشغله تانى.. حسب طلبه .. وتعال شوف الهم الازلى .. اول رساله مع التشغيل جات على مايمكن ان تكون على هذا الشكل ..شوف ياود الناس انته الظاهر عليك راجل طيب وعندك اسره وعندك اولاد ..وفى مواقع فى الكمبيوتر بتاعك ده مخزنه.. حوالى 625 موقع.... المواقع دى انته زرتها ومن الممكن جدا انها تخرب ليك بيتك وتحطم اسرتك وتوديك انته واولادك فى ستين الف داهيه ..فاخير ليك امسح المواقع دى ..وطبعا عيونى بقوا فى نص راسى.. الله الله الله ايه الحكايه يااولاد ...ده تهديد ده ولاشنو ..؟ الله الله ..طيب وبعدين ..؟ كدى نعيد القرايه .. ونعيد القرايه ...ونلقى الكلام ياهو نفس الكلام ...وبينى مبينكم ..مره اقول لى نفسى ...هزلت كمبيوتر يهددنى ..انا الكيك ..وتانى كده ..اقول لنفسى وقعت فى شر اعمالك ياقرقشه ..وحتروح غوانتانمو عديل ... ح تروح فى ستين داهيه ياقرقوشتى....مش كده وبس ..وبطريقه مزعجه جدا كل دقيقه يروح البتاع ده ناطى فى وشى ومذكرنى بالعمليه الفظيعه اللى اساسا انا ماعملتها .. وكان نفسى اعملها ..طيب وبعدين ..؟ مافيش حل غير انو انا امسح المواقع دى ...طيب انا امسح كيف المواقع دى ..مع العلم انى والله مازرتها ولا فاكرها ...وشغلانه المسح دى عايزه ليها كردت كارد والكردت كارد عاوز بنك و مافى... فى كل بلدنا بنك عنده الشغلانه دى ..؟ طيب والعمل..؟ ثم بعدين المواقع دى شنو ..؟
وحاولنا نشغل الجمجمه ونذكر الماضى القريب ..البعيد داك انساه اصلو متنيل بنيله ....اصلو بينى وبينكم مره كنت بفتش على كوندليزا اللذيذه ..وقلته يمكن البنيه دى عشان عدم العرس...مخضره ..اقصد محمره لينا عيونه العسل ديك ...كدى النشوف مشكلتها مع العرس شنو..؟ .. المهم قلبته الموجه ..افتش على عمنا كلنتون وحبيبه قلبه مونيكا بت لوينسكى.. مذكرينها ..؟ وعينك ماتشوف الا كل مدسوس ومخفى من المحمر والمشمر واكتشفت انه كراع البنطلون بقت قدر كم القميص وانا كمان بتتشمر .. وحاجات عجيبه وغريبه كتيره ..طبعا بسبب الدهشه والاندهاش الواحد بياخد ليه وقفه .. اما من نوعيه ذلك المشمر والمحمر .. فان الواحد بيعتر فى حاجات كتيره من تلك النوعيه المدفقه والمجدعه فى شوارع احياء النت ..او الشبكه العنكبوتيه.. ونحنه يعنى يارعاك الله ..الواحد فينا كده قليبه خفيف.. فبنقيف ناخد لينا طله فى خلقه الله .. ولا دى كمان حرام ..؟
تخيل بقى ... الخواجات بهددونا بي بمجرد زياره الاماكن دى ..فمابالك بقى بالموغلين فيها ... لابد انهم قبضوا كم واحد كده من الموغلين وعملوا منهم عبيد ...يعنى ناس هددوهم ولا صوروهم وبالتالى استعبدوهم ..
وتذكرت وزير داخليه تلك الدوله العربيه الذى جعل من احدى الفلل خارج عاصمته مدرسه للشبع والاشباع من ذلك الموضوع.. وذلك حتى لايتم استدراج موظفيه ..وتحديدا موظفى السلك الدبلوماسى الذين يذهبون للعمل خارجج بلادهم... وحتى لايتم تجنيدهم عن ذلك الطريق .. للتجسس على بلادهم فى بلاد بره ...فكان الموظف او المعين الجديد عندما يدخل تلك الفيلا بقولون له افعل ماتريد والقصد طبعا اشباعه او بمعنى اخر تطعيمه ضد ذلك الامر ..طبعا الخطاء فى تصرف الوزير ..انه بدلا من ان يصنع ناس عقلاء وخيرين وعفيفين فانه يصنع ناس اشرار..وبينهم وبين العفه تلك الفيلا ..
وانا الكمبيوتر يقولى ايه..؟ قال ح يخرب بيتى ..طيب فى الاول مش يبنى لينا بيت وبعدين يخربه ..بلا عواره بلا لمه ....ثم انه مواقع من اللى بالى بالك ايه العيب اللفيها بالنسبه لشخص بالغ.. راشد.... عاقل.. عارف نفسه بيعمل فى شنو ..؟ ..(وبدون اى تناقض.. اقول انا مع الحظر على تلك المواقع 100فى ال100وبدون اى تردد )
المهم .. بينى وبين نفسى قلت ياود الجماعه ديل اكيد عملوا ليك فايل . وح يشغلوك جاسوس اصلو انته خليت شغلك و بقيت زول بتاع كتابه ساكت ..وطبعا دة اول انذار.. ياح تتعاون معاهم ياروح امك ,..ويكون اسمك قرقاش بوند دبل زيرو سفن اب.. او.. يا اهو زى ماقالوا ليك ح نطلق منك المره ..(هنا ابتسمت ابتسامه خبيثه ) ونسبى ليك العيال ونوديهم غوانتناموا الجوار كوبا .. وح توصم بوصمه العار الى الابد ..وحتما ستذهب الى الجحيم (مع انه هناك مارلين مونرو واخريات مثلا )..ويمكن كمان ينفوك ..جزر الكنارى ولا ملقا ولا كوراساوا او فيرجن ايلند ... ولا يمكن هونولولو ولا تاهيتى ..عشان تتعذب هناك بالشبع مش بالجوع ودى احدث طريقه للعذاب والتعذيب..اى الاكثارمن الشى وليس الحرمان .. يعنى مثلا بدل عشره اسواط يكونوا عشرين سوط ..وبدل كوز مويه كوزين وبدل نمله واحده فى الزنزانه تكون هناك كميه بتاعت نمل من نوع ..ابو رتيله الاصلى.. مربيه ومدربه على العض فى المانيا الشرقيه والسنون معالجه عند عوض دكام الله يرحمه ( هى النمله عندها سنون ..؟)...والخ الخ ..طيب والحل شنو لاعندنا كردت كارد ولاعندنا شروى نقير ايه الحل ..وبيتك ح يتخرب .
.وبس قمته ليك على الكمبيوتر قومه رجل واحد ..وهاك ياسى وهاك يادى .. كلوا افتح افتح كنسل دليتد...والكمبيوتر يفرفر فرفره المذبوح.. ياخى الحته دى.. سى.. لوفتحتها ما من الصالح .. وانا بس اطرش وعلموهو ليك كلمه افتح ..افتح ..ياخى لوفتحت الحته دى انا ماحكون كويس معاك..ويصرخ الكمبيوتر فجاءه .. واااااااى الحته دى ملفات الحاج ويندوز بيل غيتس شخصيا..وانا بس ماعندى غير افتح ..وبينى وبينكم .. والله الكمبيوتر ده بس.. ام فتفت شكلا وموضوعا ..كل ماتفتح ملف .. تلقى الملف فى جواه ملف... فى جواه ملف ..بالله عليكم ماياها ام فتفت ذاته ..اى ام التلافيف بالعربى ..المهم اى فايل ماعجبنى شكلا او موضوعا رحته ماسحه ليك ..كده بس بالمزاج ..طاقيه ده فى راس ده شغال انا بس كده ده.. المهم كل مره ارجع للبرنامج بتاع الفحص واشوف المواقع مع انه ما عارف اى حاجه واماكن وجوده وامشى افتش ليك عليها وامسح...اى حاجه تلاقينى فى طريقى كراكه بس امسح .. على الطلاق لمن خليت ليك الكمبيوتر ابييييياض .. انضف من الصينى بعد غسيله ..مافيه ولا حتته ووورد..الله اكبر .. انا كمان بتهدد ..؟
ورجعته قلته اشغل الكمبيوتر تانى ..انقر اشتغل ..؟
المهم عشان يشتغل..اتصلته بالتلفون على واحد صاحبى ...كتر خيره ..جه نزل لى وندوز جديد.. معاه انتى فايروس اكسباير قبل ما يبتدى .. نسبه لمقاطعه الامريكان للسودان ..ولهف تلاتين الف جنيه .واهو انا قاعد اكتب ليكم القصه .. وكدى نسعلكم ..اها لو وقعته لى فى حتت زى ديك اعمل شنو ياجماعه ..؟ اديها صنه واتفرج فى خلقه الله.وعجايب مخلوقاته .. واقيف اسبح واقول سبحان الله ... باندهاش او اعجاب او استنكار المهم اقيف .. ولا اصهين واقطعوا ناشف وامش .. ..كدى قول لى عليك الله ...
__________________