[قيقراوي]

المشاركة الأصلية كتبت بواسطة سمراء

والله النصيحه منصتك دى شكلها مهوية رسمى وشعبى !
يازول الحلقة دى شايلة " عمر الشاعر همسيلفو الله يعلم ويشهد !!
اى زول باصو ليه اغنية ..خنقتو الا يجى يجرها ذى عربات الونش ..
الله يعلم قلعة من حلق افراح قلع بعد حاولت تبلعه

انت اظنو المحاثيث والباك قراوند بتاعتته عملت ليك هبشة جوة وكدة ..

ما ياهو الكنتة هنا دا ذاااتو ياخ!

لكن لسة مصرررررررر انو المنصة مختلفة ...
طه سليمان و افراح مغنين جيدين اعتقد .. و ما شفنا ليهم اخطاء واضحة قبل كدا ..
اها دا ما بقول انو الكنتة فارق احساس سااااي!؟




--------

مرة بنات اخت سارة - المدام - لفتوني بسؤال تعسفي من النوع ابو كديس داك :
عمو انت بتحب ( الزول ) دا؟ .. نحن ما بنحب غناو!!
لكم ان تتخيلوا انو منو؟ .. لا لازمن تتخيلوا ..
ما قادر اقول .. انا ما بقدر اصرّح ..
ببقى تجديف عديييل دا

مرة تانية - و دي مختلفة خالص عن المرة الاولى ديك - و مسرحا جوووة العربية .. عربيتي شخصياً - و مال ايه!؟ - مكتوب في استمارتا، خانة اسم المالك " قيقارواي ابن ام قيقا.. وحده لا شريك له " .. اها و بناءاً على الملكية المنفردة دي، انا زول ديكتاتوري جداً - خصوصاً فيما يخص الاستماع - الاستماع داخل البص دا على مسئولية صاحبه ( أي البص ) ..
ما علينا و ما علينا .. و لا على ندى القلعة
كنت ماري بـ [ المرحلة الوردية ] وكتها .. المقرر كلو كان وردي خالص .. الدنيا ذاتا كانت وردية ..
مرة وصلت بنات جيرانا مشوار - و الله ببلاش - من شغلت وردي، البنات ديل اتحيلن بكل الطرق انهن يوقفنو .. المفاوضات كانت شايكة جداً لتعنت الطرفين .. نزلن بسقف مطالبن انو اخفض الصوت ساااي .. طبعاً ما كان ممكن اقبل .. ابو الورود ما بقبل فيو و الله!!
انقري ما ختن ليك شنطن في السماعات الوراء و كتمن بيهن الصوت .. و المشكلة الفارهة بتاعتي دي ما فيها غيرين .. على نهج الكيزان الما قويم رامية قدام وراء مؤمّن
في ي ي ذمتك دا جيل و لّ جل سااااي!!
و الله جيل الجل دا الله يكفينا شرو بس!

بعد دا ممكن اوريكم ( الزول دل ) كان منو بعد بعدنا منها ..

الباشكاتب همسلف!!
فتاملوا .. و تجهموا!!
و ادوا ربكم العجب!!